 |
| ពលរដ្ឋចុះឈ្មោះបោះឆ្នោតនៅសង្កាត់ព្រែកប្រា ខណ្ឌច្បារអំពៅ កាលពីថ្ងៃទី១ កញ្ញា ឆ្នាំ២០១៦។ RFA/Phann Yasy |
គ.ជ.ប. ដោះស្រាយ បណ្ដឹង បានជាង ១០ ករណី ទាក់ទង ដំណើរការ ចុះឈ្មោះ បោះឆ្នោត
RFA / វិទ្យុ អាស៊ី សេរី | ២៩ កញ្ញា ២០១៦
អ្នកឃ្លាំមើល ការបោះឆ្នោត លើកឡើង ថា. ការចុះឈ្មោះ បោះឆ្នោត ដំណើរការ ទៅល្អ, តែ យ៉ាងនេះក្ដី ក៏មានបណ្ដឹង មួយចំនួន ពីគណបក្ស នយោបាយ ពីដំណើរ មិនប្រក្រតី មួយចំនួន ទាក់ទងនឹ ងកិច្ចការបោះឆ្នោតនេះ។មន្ត្រី ជាន់ខ្ពស់ គណៈកម្មាធិការ ជាតិ រៀបចំ ការបោះឆ្នោត ឲ្យដឹង ថា, គ.ជ.ប. កំពុងតែ ដំណើរការ ដោះស្រាយ បណ្ដឹង ទាំងនោះ ហើយ។
មន្ត្រីនាំពាក្យ គណៈកម្មាធិការ ជាតិ រៀបចំ ការបោះឆ្នោត លោកបណ្ឌិត ហង្ស ពុទ្ធា ឲ្យដឹង នៅថ្ងៃ ទី២៩ កញ្ញា ថា គ.ជ.ប. បានដោះស្រាយបណ្ដឹង បានប្រមាណ ១៤បណ្ដឹង ក្នុងចំណោម ២០បណ្ដឹង។
ការដោះស្រាយបណ្ដឹងនេះ នៅខណៈដែលអ្នកចុះឈ្មោះបោះឆ្នោតនៅទូទាំងប្រទេសក្នុងមួយថ្ងៃគិតជាមធ្យម គ.ជ.ប ចុះឈ្មោះបានជាង ១២ម៉ឺននាក់។
លោកបណ្ឌិត ហង្ស ពុទ្ធា មានប្រសាសន៍ថា បណ្ដឹងពីប្រជាពលរដ្ឋ និងមកពីគណបក្សប្រជាជនកម្ពុជា និងបណ្ដឹងរបស់គណបក្សសង្គ្រោះជាតិ។ លោកបញ្ជាក់ថា បណ្ដឹងរបស់គណបក្សទាំងពីរនេះ គឺប្ដឹងពីការរំខានការចុះឈ្មោះបោះឆ្នោតប្ដឹងក្រុមមេឃុំ ចៅសង្កាត់ ពីការចេញលិខិតបញ្ជាក់ទីលំនៅដល់ទាហាន ឬគ្មានទីលំនៅក្នុងមូលដ្ឋានឲ្យមានសិទ្ធិចុះឈ្មោះបោះឆ្នោត និងប្ដឹងពីករណីអនុញ្ញាតឲ្យចុះឈ្មោះបោះឆ្នោតចំពោះអ្នកគ្មានសញ្ជាតិខ្មែរជាដើម៖ «គ.ជ.ប តែងតែប្រជុំជារៀងរាល់ព្រឹកដើម្បីដោះស្រាយបណ្ដឹងជាបន្តបន្ទាប់ ហើយបណ្ដឹងខ្លះស្រាវជ្រាវទៅមានភាពប្រហាក់ប្រហែលគ្នា។ នៅតំបន់ផ្សេងៗគ្នា។ គ.ជ.ប សម្រេចចេញសេចក្ដីណែនាំប្រកាសជារួមឲ្យគ្រប់ភាគីទាំងអស់ឲ្យយកចិត្តទុកដាក់ និងពិនិត្យឲ្យបានត្រឹមត្រូវទៅតាមនីតិវិធី និងបញ្ជាផ្ទៃក្នុង»។
ឆ្លើយតបនឹងបញ្ហានេះ ប្រធាននាយកដ្ឋានកិច្ចការបោះឆ្នោត និងនីតិកម្ម គណបក្សសង្គ្រោះជាតិ អ្នកស្រី ម៉េង សុភារី មានប្រសាសន៍ថា គណបក្សសង្គ្រោះជាតិ បានដាក់ពាក្យបណ្ដឹងជាង ១០បណ្ដឹងទៅ គ.ជ.ប។ តែការដោះស្រាយបណ្ដឹងរបស់គណបក្សប្រឆាំងនេះ ខាងនាយកដ្ឋានរបស់អ្នកស្រីមិនទាន់ដឹងនៅឡើយ។ អ្នកស្រីពន្យល់ថា ក្នុងចំណោមបណ្ដឹងរបស់គណបក្សប្រឆាំងជាង ១០នោះ បណ្ដឹងសំខាន់គឺប្ដឹងមេឃុំមួយចំនួនមាននៅខែត្រកណ្ដាល សៀមរាប ព្រះវិហារ ព្រះសីហនុ និងរាជធានីភ្នំពេញ គឺប្ដឹងមេឃុំ ឬចៅសង្កាត់ ដែលធ្វើលិខិតបញ្ជាក់ទីលំនៅដល់អ្នកដែលគ្មានទីលំនៅ ឬទីសំណាក់ នៅក្នុងមូលដ្ឋានខ្លួន បែរជាចៅ-សង្កាត់ មេឃុំទាំងនោះ ចេញលិខិតបញ្ជូនទីលំនៅជូន ដែលខុសពីច្បាប់បោះឆ្នោត៖ «គាត់មិនមែនជាពលរដ្ឋក្នុងសង្កាត់ហ្នឹងផង គាត់មកចុះឈ្មោះបោះឆ្នោតក្នុងឃុំសង្កាត់ហ្នឹង បោះឆ្នោតក្នុងឃុំសង្កាត់នោះ អ៊ីចឹងគាត់ការបោះឆ្នោតនេះមិនឆ្លុះបញ្ចាំងពីឆន្ទៈពីប្រជាពលរដ្ឋនៅក្នុងឃុំសង្កាត់នេះទេ ដោយគាត់ទៅបោះឆ្នោតហើយ គាត់ទៅវិញ (អ្នកមិនមែននៅមូលដ្ឋានគាត់បោះឆ្នោត)»។
ខ្លឹមសារក្នុងមាត្រា១២ បញ្ជាក់ថា ដើម្បីបោះឆ្នោតបាន ប្រជាពលរដ្ឋត្រូវមានឈ្មោះក្នុងបញ្ជីបោះឆ្នោត និងមានអត្តសញ្ញាណប័ណ្ណសញ្ជាតិខ្មែរ ហើយដើម្បីមានឈ្មោះក្នុងបញ្ជីបោះឆ្នោត ប្រជាពលរដ្ឋត្រូវបំពេញលក្ខខណ្ឌមួយចំនួន ដូចជា មានសញ្ជាតិខ្មែរ មានអាយុ ១៨ឆ្នាំឡើងទៅ គិតដល់ថ្ងៃបោះឆ្នោត មានទីលំនៅឋាន ឬទីសំណាក់ក្នុងឃុំ សង្កាត់ដែលសាមីខ្លួនត្រូវបោះឆ្នោត មិនត្រូវស្ថិតក្នុងស្ថានភាពជាប់ពន្ធនាគារ ឬមិនត្រូវដកសិទ្ធិបោះឆ្នោត និងពុំមែនជាជនវិកលចរិត ឬស្ថិតនៅក្រោមអាណាព្យាបាលទូទៅដោយមានលិខិតបញ្ជាក់ពីក្រសួងស្ថាប័នមានសមត្ថកិច្ចជាដើម។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និចហ្វិក (NICFEC) លោក សំ គន្ធាមី មានប្រសាសន៍ថា ការចុះឈ្មោះបោះឆ្នោតកន្លងមកនេះដំណើរការទៅល្អ ប៉ុន្តែអ្វីដែលជាបញ្ហាដែលខាងអង្គការលោកមើលឃើញ គឺមេឃុំ ចៅសង្កាត់ បានចេញលិខិតបញ្ជាក់ឲ្យអ្នកដែលគ្មានទីលំនៅក្នុងមូលដ្ឋានចុះឈ្មោះបោះឆ្នោតនោះ។ លោកបញ្ជាក់ថា គ.ជ.ប ត្រូវតែណែនាំដល់ចៅសង្កាត់ និងមេឃុំទាំងនោះឲ្យយល់ពីច្បាប់បោះឆ្នោតឲ្យបានច្បាស់លាស់៖ «កន្លែងខ្លះ គ.ជ.ប មិនបានណែនាំដល់មេឃុំដល់ចៅសង្កាត់ទេ ព្រោះថា កន្លែងខ្លះចៅសង្កាត់បានចេញលិខិតបញ្ជាក់ទីលំនៅដល់អ្នកមកពីកន្លែងផ្សេង ដូចជាទាហានអី បើគាត់ប្រចាំការនៅមូលដ្ឋានណា គាត់ត្រូវតែចុះឈ្មោះបោះឆ្នោតនៅកន្លែងនោះ មិនត្រូវទៅចុះឈ្មោះនៅកន្លែងផ្សេងទេ»។
អ្នកនាំពាក្យ គ.ជ.ប លោកបណ្ឌិត ហង្ស ពុទ្ធា អះអាងថា បើសិនបើ គ.ជ.ប ដោះស្រាយបណ្ដឹងហើយរកឃើញថា មេឃុំ ចៅសង្កាត់ ឬមន្ត្រីពាក់ព័ន្ធប្រព្រឹត្តខុសមែននោះ ត្រូវទទួលទោសទៅតាមច្បាប់ដែលមានជាធរមាន។
លោកបន្ថែមថា ការចុះឈ្មោះបោះឆ្នោត គិតមកទល់ល្ងាចថ្ងៃទី២៨ ខែកញ្ញា មានជិតលាន ៣,៨លាននាក់ (៣.៧៨៥.៦១៦) គិតជាភាគរយបាន ៣៩%។ លោកបញ្ជាក់ថា គ.ជ.ប នឹងអាចចុះឈ្មោះបានគ្រប់ចំនួនតាមផែនការកំណត់ ដែលកាលបរិច្ឆេទចុះឈ្មោះគិតពីថ្ងៃទី១ ខែកញ្ញា ដល់ថ្ងៃទី២៩ ខែវិច្ឆិកា ឆ្នាំ២០១៦។
ប្រធាននាយកដ្ឋានកិច្ចការបោះឆ្នោត និងនីតិកម្ម គណបក្សសង្គ្រោះជាតិ អ្នកស្រី ម៉េង សុភារី បញ្ជាក់ថា ដំណើរការចុះឈ្មោះបោះឆ្នោតនេះ ក៏រកឃើញថា មានជនអន្តោប្រវេសន៍ខុសច្បាប់បានទៅចុះបោះឆ្នោតដែរ។ អ្នកស្រីបញ្ជាក់ថា គណបក្សសង្គ្រោះជាតិ ក៏នឹងដាក់ពាក្យបណ្ដឹងពីករណីនេះដែរ នៅក្រោយពេល គ.ជ.ប បិទបញ្ជីឈ្មោះបោះឆ្នោត ក្រោយការដំណើរការចុះបោះឆ្នោតបានបញ្ចប់ ព្រោះថា ច្បាប់តម្រូវឲ្យប្ដឹងពីករណីជនអន្តោប្រវេសន៍នេះនៅក្រោយពេលបិទបញ្ជីឈ្មោះបោះឆ្នោត៕
No comments:
Post a Comment