 |
| អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) លោក នី ចរិយា (ស្ដាំ) ត្រូវបានប៉ូលិសបញ្ជូនទៅតុលាការកំពូល នៅថ្ងៃទី៥ ខែកញ្ញា ឆ្នាំ២០១៦។ RFA/Yang Chandara |
អ.ស.ប. សិទ្ធិមនុស្ស ប្រចាំ កម្ពុជា ប្រតិកម្ម ចំពោះ ការសម្រេច ផ្ដន្ទាទោស លើលោក នី ចរិយា
RFA / វិទ្យុ អាស៊ី សេរី | ២៣ កញ្ញា ២០១៦
អង្គការ សហប្រជាជាតិ ទទួលបន្ទុក សិទ្ធិមនុស្ស ប្រចាំកម្ពុជា
ប្រតិកម្ម ចំពោះ ការសម្រេច ផ្ដន្ទាទោស លើលោក នី ចរិយា អគ្គលេខាធិការ រង គ.ជ.ប.
ដោយចោទ ថា,
តុលាការ ពុំ បានបង្ហាញ ភស្តុតាង គ្រប់គ្រាន់ សម្រាប់ ការចោទប្រកាន់ លោក នី
ចរិយា នោះឡើយ។ បញ្ហានេះ អង្គការ សហប្រជាជាតិ យល់ថា
ជានិន្នាការ មួយ គួរ ឲ្យបារម្ភ ពាក់ព័ន្ធ និងការប្រើច្បាប់ ប្រឆាំងសំឡេងឯករាជ្យ។
អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ស្នើឲ្យកម្ពុជាធ្វើកំណែទម្រង់ក្រមព្រហ្មទណ្ឌ។
មន្ត្រីតំណាងឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា
ហៅកាត់ថា យូអេន អូអេច្ចស៊ីអេច្ចអ (UN OHCHR-Cambodia) អ្នកស្រី វ៉ាន់ហ៊ី លី (Wan Hea Lee) បានឆ្លើយតាមប្រព័ន្ធអេឡិចត្រូនិក
ឬអ៊ឺម៉ែលថា ដោយសារតែសេរីភាពសម្ដែងមតិរាប់បញ្ចូលទាំងសិទ្ធិក្នុងការសម្ដែងមតិលើការសម្រេចរបស់តុលាការនោះ
មូលដ្ឋាននៃការផ្ដន្ទាទោសលើ លោក នី ចរិយា
ដោយហេតុតែលោកមិនពេញចិត្តចំពោះការសម្រេចរបស់តុលាការ
ហើយដែលរហូតដល់តុលាការគិតថាជាករណីបរិហារកេរ្តិ៍ បរិហារបង្កាច់កេរ្តិ៍
និងប្រើប្រាស់ឥទ្ធិពលដាក់សម្ពាធលើតុលាការខេត្តសៀមរាប នោះ
គឺវាផ្ទុយទៅនឹងច្បាប់សិទ្ធិមនុស្ស។
អ្នកស្រីបន្តទៀតថា ការកាត់ទោសដោយគ្មានភស្តុតាង
ឬមិនមានហេតុផលផ្លូវច្បាប់ច្បាស់លាស់គឺជាហេតុផលចម្បងដែលធ្វើឲ្យប្រព័ន្ធតុលាការបាត់តម្លៃ។
ករណីនេះ រឹតតែធ្វើឲ្យកេរ្តិ៍ឈ្មោះតុលាការអាក្រក់ថែមទៀត
ហើយក៏បង្ហាញដែរថា
ហេតុអីបានជាត្រូវធ្វើកំណែទម្រង់ប្រព័ន្ធតុលាការជាបន្ទាន់នោះ។
កាលពីថ្ងៃទី២២ កញ្ញា ចៅក្រមជំនុំជម្រះនៃតុលាការក្រុងភ្នំពេញ លោក ឃី
ឆៃ បានសម្រេចផ្ដន្ទាទោសលោក នី ចរិយា អគ្គលេខាធិការរង គ.ជ.ប
និងជាអតីតប្រធានការិយាល័យស៊ើបអង្កេតសមាគមការពារសិទ្ធិមនុស្សអាដហុក (ADHOC) ដាក់ពន្ធនាគារ ៦ខែ និងពិន័យលុយចំនួន
៦លានរៀល។
ឆ្លើយតបទៅនឹងប្រតិកម្មរបស់មន្ត្រីអង្គការសហប្រជាជាតិនេះ
អ្នកនាំពាក្យក្រសួងយុត្តិធម៌ លោក គឹម សន្តិភាព ថ្លែងថា លោក នី ចរិយា
អាចប្ដឹងបន្តចំពោះសេចក្ដីសម្រេចរបស់តុលាការ។
ការសន្និដ្ឋានរបស់មន្ត្រីអង្គការសហប្រជាជាតិហាក់មិនយល់អំពីប្រព័ន្ធច្បាប់នៅកម្ពុជា៖
«គិតថាអង្គការសហប្រជាជាតិគឺជាចំណេះដឹងជ្រៅជ្រះផ្នែកច្បាប់គួរតែយល់ពីប្រព័ន្ធច្បាប់ប្រទេសមួយៗឲ្យបានច្បាស់មុនហ្នឹងធ្វើការផ្ដល់យោបល់ឬមួយធ្វើការសន្និដ្ឋានអ្វីមួយ។
ពាក់ព័ន្ធនិងអំណាចតុលាការអង្គការសហប្រជាជាតិក៏គួរដឹងដែរថា
អំណាចតុលាការកម្ពុជាយ៉ាងម៉េច។ ការសម្រេចសេចក្ដីរបស់ស្ថាប័នឯករាជ្យមួយនេះ
គឺជាការសម្រេចសេចក្ដីដោយឆន្ទានុសិទ្ធិដែលគ្មានស្ថាប័នណាដែលអាចចោទប្រកាន់ថាអញ្ចេះអញ្ចុះបានទេ។»
តុលាការសម្រេចចោទប្រកាន់លោក នី ចរិយា ដោយយោងលើសំណុំរឿងព្រហ្មទណ្ឌ
ក្រោមបទចោទបរិហារកេរ្តិ៍ បរិហារបង្កាច់កេរ្តិ៍ និងពីបទប្រើប្រាស់ឥទ្ធិពលដាក់សម្ពាធលើតុលាការខេត្តសៀមរាប។
ករណីនេះ គឺផ្ដើមចេញពីជម្លោះដីធ្លីរវាងពលរដ្ឋជាង
៣០គ្រួសារនៅឃុំជប់រំដេង ស្រុកស្វាយលើ ខេត្តសៀមរាប ជាមួយក្រុមហ៊ុនវៀតណាម
ឈ្មោះសហគមន៍តាខ្មៅ។
ដើមបណ្ដឹងនៅក្នុងសំណុំរឿងព្រហ្មទណ្ឌនេះ គឺជាព្រះរាជអាជ្ញារង លោក
សុខ កែវបណ្ឌិត និងចៅក្រមជំនុំជម្រះខេត្តសៀមរាប ម្នាក់ទៀត លោក គិ រិទ្ធី។
មន្ត្រីតុលាការទាំងពីររូបនេះ សម្រេចចោទប្រកាន់លោក នី ចរិយា
ពីបទបរិហារកេរ្តិ៍ បន្ទាប់ពីរកឃើញថា លោក នី ចរិយា
ធ្វើសន្និសីទកាសែតកាលពីថ្ងៃទី១២ ខែឧសភា និងថ្ងៃទី២០ ខែមិថុនា
ឆ្នាំ២០១៥ នៅការិយាល័យសមាគមអាដហុកខេត្តសៀមរាប និងនៅភ្នំពេញ ដោយចោទថា
មន្ត្រីតុលាការឃុបឃិតជាមួយអាជ្ញាធរ ប្រព្រឹត្តអំពើពុករលួយ។
ភស្តុតាងតាមបណ្ដាញសារព័ត៌មាន គឺជាមូលដ្ឋានដែលមន្ត្រីតុលាការខេត្តសៀមរាប
ចោទប្រកាន់ថា លោក នី ចរិយា បរិហារកេរ្តិ៍ធ្វើឲ្យប៉ះពាល់ដល់ស្ថាប័នអយ្យការ
និងតុលាការ ជុំវិញសំណុំរឿងដីធ្លីនេះ។ នៅក្នុងបន្ទប់សវនាការ លោក នី ចរិយា
បានជម្រាបអង្គជំនុំជម្រះថា សន្និសីទកាសែតទាំងពីរលើកនោះ
គឺលោកពុំបាននិយាយពីតុលាការបានប្រព្រឹត្តអំពើពុករលួយឡើយ។
ប៉ុន្តែលោកបានលើកពីការអនុវត្តខុសនីតិវិធីរបស់មន្ត្រីតុលាការខេត្តសៀមរាប
ទៅវិញទេ។
ថ្វីត្បិតតែមានការផ្ដន្ទាទោសបែបនេះ លោក អំ សំអាត
មន្ត្រីជាន់ខ្ពស់អង្គការលីកាដូ (LICADHO) មានប្រសាសន៍ថា សាលក្រមដែលបានសម្រេចនេះគឺជាជួង
ឬជាសញ្ញាមួយដែលបានគំរាមកំហែងដល់អ្នកការពារសិទ្ធិមនុស្សទាំងឡាយដែលតែងតែរិះគន់ទៅលើប្រព័ន្ធតុលាការនិងរិះគន់ទៅលើភាពអយុត្តិធម៌ទាំងឡាយដើម្បីជួយជនរងគ្រោះ
ឬដើម្បីកែលំអប្រព័ន្ធយុត្តិធម៌។ ប៉ុន្តែពុំមានអ្វីគួរឲ្យខ្លាចនោះទេ
លោកនៅតែបន្តការងារនេះ៖
នេះជាតួនាទីជាភារកិច្ចរបស់យើងបើសិនជាការអនុវត្តន៍មិនត្រឹមត្រូវតាមនីតិវិធីមិនត្រឹមត្រូវតាមច្បាប់យើងត្រូវតែរិះគន់បន្តទៀតដើម្បីធ្វើការស្ថាបនានិងកែតម្រង់ឲ្យប្រព័ន្ធតុលាការឯករាជ្យនិងជាទីទុកចិត្តរបស់ប្រជាពលរដ្ឋយើង។
មិនខ្លាចទោះបីជាមានការចោទប្រកាន់ទាក់ទងបញ្ហានេះក៏ដោយពីព្រោះបើសិនជាយើងមិនធ្វើការរិះគន់ទៅលើអ្វីដែលគេធ្វើខុសគឺយើងចូលរួមបន្តឲ្យប្រព័ន្ធនេះដើរផ្លូវខុសទៀតហើយ។
ជុំវិញរឿងក្ដីលើលោក នី ចរិយា នេះដែរ សមាគមអាដហុកបានរកឃើញថា
ទាំងចៅក្រមលោក គិ រិទ្ធី និងតំណាងអយ្យការខេត្តសៀមរាប លោក សុខ កែវបណ្ឌិត
ចាប់ខ្លួន និងចោទប្រកាន់ពលរដ្ឋបំពានច្បាប់
ព្រោះតែតុលាការពុំបានបើកការស៊ើបអង្កេតឲ្យបានច្បាស់លាស់មុននឹងចាប់ខ្លួនពលរដ្ឋ
២នាក់ដាក់ពន្ធនាគារ។
ចំពោះការផ្ដន្ទាទោសលោក នី ចរិយានេះ គ.ជ.ប អាចនឹងរើសមនុស្សជំនួសលោក
នី ចរិយា លុះណាតែសាលក្រមសាលាដំបូងរាជធានីភ្នំពេញចូលជាស្ថាពរ។
អ្នកនាំពាក្យគជប លោក ហង្ស ពុទ្ធា មានប្រសាសន៍ថា គ.ជ.ប
នៅរក្សាតួនាទីរបស់លោក នី ចរិយា ជាអគ្គលេខាធិការរងដដែល
និងផ្ដល់ប្រាក់បៀវត្សរ៍ជាធម្មតាបើសាលក្រមមិនទាន់ចូលជាស្ថាពរនៅឡើយនោះ។
ចំណែកការអវត្តមានលោក នី ចរិយា នៅប៉ុន្មានខែនេះ លោក ហង្ស ពុទ្ធា
ថាគឺមិនបានប៉ះពាល់ដល់ដំណើរការការងារគ.ជ.ប នោះទេ៕
No comments:
Post a Comment