 |
| ផែនទីខេត្តរតនគិរី។ |
សហគមន៍ ខេត្តរតនគិរី អំពាវនាវ ឲ្យអាជ្ញាធរ ទប់ស្កាត់ ការកាប់ព្រៃ និងលក់ដី ត្រៀមបម្រុង
RFA / វិទ្យុ អាស៊ី សេរី | ២៨ កញ្ញា ២០១៦
សហគមន៍ ជនជាតិដើម ភាគតិច នៅខេត្ត រតនគិរី ចោទសមាជិក សហគមន៍ ពីរនាក់ ថា, កាប់រានដី និងកាប់យកឈើ ក្នុងព្រៃ ត្រៀមបម្រុង លក់ជាលក្ខណៈ បុគ្គល ខុសទៅនឹង បទបញ្ជាផ្ទៃក្នុង សហគមន៍។ លើសពីនេះទៀត ប្រធានភូមិ ជាអ្នក នៅពីក្រោយ សកម្មភាព ខុសច្បាប់នេះ។
ប្រជាពលរដ្ឋ ជនជាតិដើម ភាគតិច ភូមិកាណាតធំ ឃុំតាឡាវ ស្រុកអណ្ដូងមាស ខេត្តរតនគិរី អំពាវនាវ សូម ឲ្យអាជ្ញាធរ ខេត្ត បញ្ឈប់ ការលក់ដូរ ដីសហគមន៍ និងការកាប់ឈើ មានតម្លៃ យកជាប្រយោជន៍ បុគ្គល។
ការអំពាវនាវនេះ កើតមានឡើងបន្ទាប់ពីដីត្រៀមបម្រុងសហគមន៍ភូមិកាណាតធំ ចំនួន ២ហិកតារថ្មីទៀត ត្រូវបានសមាជិកសហគមន៍ ២នាក់ គឺ លោក រម៉ាម ញ៉ូយ និងលោក សល់ តៃ កាប់រានព្រៃ ហើយលក់ទៅឲ្យពលរដ្ឋខ្មែរ ចំណែកឈើមានតម្លៃក្នុងព្រៃ ក៏ត្រូវបានសមាជិកសហគមន៍ទាំងពីរកាប់ធ្វើអាជីវកម្មជាលក្ខណៈបុគ្គល ផ្ទុយទៅនឹងបទបញ្ជាផ្ទៃក្នុង និងលក្ខន្តិកៈសហគមន៍កំណត់។
ប្រធានសហគមន៍ភូមិកាណាតធំ លោក សល់ ណឺយ រៀបរាប់ថា គណៈកម្មការសហគមន៍មិនមានលទ្ធភាពទប់ស្កាត់ករណីនេះបានទេ ដោយសារតែអាជ្ញាធរភូមិ គឺជាអ្នកនៅពីក្រោយការលក់ដូរដី និងការកាប់ឈើក្នុងព្រៃសហគមន៍នេះ។ លោកថា ព្រៃឈើនៅសេសសល់នេះ គឺជាព្រៃត្រៀមបម្រុងរបស់សហគមន៍ទុកប្រើប្រាស់ជាលក្ខណៈសមូហភាព និងត្រៀមចុះបញ្ជីដីជាកម្មសិទ្ធិសមូហភាពសហគមន៍នាពេលខាងមុខនេះ៖ «ដីនៅព្រៃសុទ្ធនៅតាមដងអូរ គាត់ដូរជាមួយម៉ូតូ អត់ប្រាប់មេភូមិ អត់ប្រាប់ចាស់ទុំទេ ឈើហ្នឹងកាប់ក្នុងព្រៃកាប់ឈើក្រំ ខាងសហគមន៍មិនឲ្យកាប់ទេ ព្រោះឈើនៅតិចតួច។ អ៊ីចឹងសហគមន៍ទៅចាប់ មេភូមិគាត់ទូរស័ព្ទទៅពួកអារឈើឲ្យសម្លាប់ចោលអ្នកទៅចាប់។»
កាលពីថ្ងៃទី២២ ខែកញ្ញា សហគមន៍ភូមិកាណាតធំ ចាប់រឹបអូសម៉ាស៊ីនកាត់ឈើមួយគ្រឿងពីពលរដ្ឋខ្មែរដែលចូលកាប់ឈើក្នុងព្រៃសហគមន៍ ក៏ប៉ុន្តែប្រធានភូមិបានពោលពាក្យគំរាមសម្លាប់សហគមន៍ដែលហ៊ានចាប់យកម៉ាស៊ីនកាត់ឈើនោះ។
វិទ្យុអាស៊ីសេរី មិនអាចទាក់ទងសុំការបញ្ជាក់ពីសមាជិកសហគមន៍ដែលរងការចោទប្រកាន់បានទេ នៅថ្ងៃទី២៧ ខែកញ្ញា។ រីឯប្រធានភូមិកាណាតធំ គឺលោក រម៉ាម ព្លាន់ មិនទទួលទូរស័ព្ទហៅចូលជាច្រើនលើក។
ទាក់ទិនករណីនេះដែរ មេឃុំតាឡាវ លោក ថា ប៊ុនឡត បញ្ជាក់ថា មិនបានដឹងរឿងទាក់ទិនការកាប់ឈើនោះទេ ក៏ប៉ុន្តែលោកបដិសេធថា មិនមានការលក់ដីត្រៀមបម្រុងដូចការចោទឡើយ។ លោកថា ដីនោះពលរដ្ឋខ្មែរបានជួលពីសមាជិកសហគមន៍ដាំដំឡូងកាលពីឆ្នាំ២០១៥ ក៏ប៉ុន្តែអ្នកជួលបានប្រគល់ដីនោះវិញហើយ៖ «ដីហ្នឹង គឺដីជាប់នឹងក្រុមហ៊ុនក្រុងបុក ក្រោយចុះវាស់០០១ ហើយបងប្អូនខ្មែរកម្មករក្រុមហ៊ុនគាត់សុំដាំដំឡូងមួយឆ្នាំ គាត់បានប្រមូលផលមួយឆ្នាំ ហើយឆ្នាំនេះគាត់អត់ដាំទេ ទុកឲ្យដុះព្រៃ ម្ចាស់អ្នកដាំ គាត់ទៅស្រុកហើយ អត់មានលក់ដូរទេ។»
កាលពីដើមសប្ដាហ៍ ប្រធានសហគមន៍ភូមិកាណាតធំ ស្នើសុំមកការិយាល័យសមាគមការពារសិទ្ធិមនុស្សអាដហុក (ADHOC) ខេត្តរតនគិរី ឲ្យជួយអន្តរាគមន៍ទៅអាជ្ញាធរខេត្តបញ្ឈប់ការលក់ដូរដី និងការកាប់យកឈើក្នុងព្រៃសហគមន៍នេះ។
មន្ត្រីឃ្លាំមើលសិទ្ធិមនុស្សសមាគមអាដហុក ខេត្តរតនគិរី លោក ឆាយ ធី ចាត់ទុកការលក់ដូរដីធ្លីសមូហភាពសហគមន៍ ថាជាទ្រព្យសម្បត្តិរដ្ឋ ថាជាអំពើរំលោភច្បាប់ និងធ្វើឲ្យប៉ះពាល់សិទ្ធិរស់នៅរបស់សហគមន៍។ លោកកត់សម្គាល់ថា កន្លងទៅ ការដោះស្រាយវិវាទផ្ទៃក្នុងសហគមន៍តាមរយៈអាជ្ញាធរប្រពៃណីមិនមានប្រសិទ្ធភាពទេ ពីព្រោះសមាជិកសហគមន៍ខ្លះនៅតែប្រព្រឹត្តផ្ទុយពីបទបញ្ជាផ្ទៃក្នុងដែលមានលក្ខណៈជាបទល្មើសព្រហ្មទណ្ឌ៖ «បងប្អូនជនជាតិដើមភាគតិចយើងនៅទីនេះ គឺគាត់ទម្លាប់ដោះស្រាយទំនាស់តាមរយៈប្រពៃណី។ ការដោះស្រាយតាមរយៈប្រពៃណីទៅលើការកាប់រានព្រៃយកដី ឬយកឈើទៅលក់ឲ្យអ្នកដទៃ មិនមានប្រសិទ្ធភាពទេ។ ប្ដឹងទៅអាជ្ញាធរមូលដ្ឋាន មន្ត្រីព្រៃឈើ ឬតុលាការទើបអាចមានការទប់ស្កាត់បាន។»
ច្បាប់ភូមិបាលចាប់ពីមាត្រា២៣ រហូតមាត្រា២៨ ចែងថា កម្មសិទ្ធិនៃអចលនទ្រព្យសហគមន៍ជនជាតិដើមភាគតិច ត្រូវបានផ្តល់ដោយរដ្ឋជាកម្មសិទ្ធិសមូហភាព។ កម្មសិទ្ធិសមូហភាព សហគមន៍មានសិទ្ធិថែរក្សា និងអាស្រ័យផល ប៉ុន្តែគ្មានសិទ្ធិចាត់ចែងចំណែកណាមួយនៃកម្មសិទ្ធិសមូហភាពដែលជាទ្រព្យសម្បត្តិសាធារណៈរបស់រដ្ឋ ទៅឲ្យបុគ្គលក្រៅសហគមន៍បានឡើយ។ លើសពីនេះទៀត ក៏គ្មានអាជ្ញាធរណាមួយក្រៅពីសហគមន៍អាចទទួលបានសិទ្ធិលើអចលនទ្រព្យសហគមន៍បានឡើយ។
នាយខណ្ឌរដ្ឋបាលព្រៃឈើខេត្តរតនគិរី លោក កែប កត់ បញ្ជាក់ដែរថា ព្រៃត្រៀមបម្រុងដែលសហគមន៍គ្រោងសុំដើម្បីចុះបញ្ជីដីជាកម្មសិទ្ធិសមូហភាព គឺជាដីសាធារណៈរបស់រដ្ឋ។ សហគមន៍ជនជាតិដើមភាគតិចមានសិទ្ធិអាស្រ័យផលនៅតំបន់ព្រៃឈើនោះ ប៉ុន្តែមិនមានសិទ្ធិធ្វើអាជីវកម្មឈើ ឬកាប់រានព្រៃយកដីលក់បានឡើយ។ លោកថា សហគមន៍ត្រូវផ្តល់ព័ត៌មានទាន់ពេលវេលាមកមន្ត្រីព្រៃឈើនៅមូលដ្ឋាន ដើម្បីទប់ស្កាត់បញ្ហានេះ៖ «គាត់ត្រូវដាក់ពាក្យប្ដឹងទៅអាជ្ញាធរឃុំផង ស្រុកផង ទៅអាជ្ញាធរជំនាញផង ដើម្បីចុះជួយគាត់។»
ភូមិកាណាតធំ ចុះបញ្ជីកំណត់អត្តសញ្ញាណជនជាតិដើមភាគតិច និងចុះបញ្ជីសហគមន៍នីតិបុគ្គល ទទួលស្គាល់ដោយក្រសួងមហាផ្ទៃ តាំងពីឆ្នាំ២០១២។ បច្ចុប្បន្ន សហគមន៍នេះកំពុងរៀបចំឯកសារចុះបញ្ជីដីសហគមន៍ជាកម្មសិទ្ធិសមូហភាពនាពេលខាងមុខនេះ ដើម្បីធានាសុវត្ថិភាពដីធ្លី និងព្រៃឈើអ្នកភូមិអភិរក្ស៕
No comments:
Post a Comment