 |
| អ្នកគាំទ្រគណបក្សសង្គ្រោះជាតិ ចូលរួមប្រារព្ធខួបលើកទី២៥
នៃកិច្ចព្រមព្រៀងសន្តិភាពទីក្រុងប៉ារីស
ដែលប្រារព្ធនៅទីស្នាក់ការគណបក្សនាសង្កាត់ចាក់អង្រែលើ
រាជធានីភ្នំពេញ កាលពីថ្ងៃទី២៣ ខែតុលា ឆ្នាំ២០១៦។
RFA/Cheu Sideth
|
រដ្ឋាភិបាល អង់គ្លេស អំពាវនាវ ឲ្យរដ្ឋាភិបាល កម្ពុជា ដោះស្រាយ បញ្ហា សិទ្ធិមនុស្ស
RFA / វិទ្យុ អាស៊ី សេរី | ២៤ តុលា ២០១៦
ស្ដាប់ ឬ ទាញយកសំឡេង
តំណាង រដ្ឋាភិបាល អង់គ្លេស ទទូច ឲ្យរដ្ឋាភិបាល កម្ពុជា ដោះស្រាយ បញ្ហា រំលោភ សិទ្ធិមនុស្ស ស្របពេល ពលរដ្ឋខ្មែរ នៅសហរដ្ឋ អាមេរិក និងសហគមន៍ អឺរ៉ុប នាំគ្នា ធ្វើពិធី រម្លឹកខួប លើកទី២៥ នៃសន្ធិសញ្ញា សន្តិភាព ទីក្រុងប៉ារីស ២៣ តុលា ឆ្នាំ១៩៩១។
សមាជិក សភា និងអនុរដ្ឋលេខាធិការ ក្រសួង ការបរទេស អង់គ្លេស ទទួលបន្ទុក កិច្ចការ អាស៊ី និងប៉ាស៊ីហ្វិក លោក អាឡុក ហ្សាម៉ា (Alok Sharma) អំពាវនាវ ឲ្យរដ្ឋាភិបាល កម្ពុជា ធានា ឲ្យបាន នូវការគោរព សិទ្ធិមនុស្ស និងសិទ្ធិ សេរីភាព ជាមូលដ្ឋាន ដទៃទៀត របស់ ពលរដ្ឋ កម្ពុជា ដូចមាន ចែងក្នុង កិច្ចព្រមព្រៀង សន្តិភាព ទីក្រុង ប៉ារីស។
អង់គ្លេសជាប្រទេសមួយក្នុងចំណោមប្រទេស១៩ ដែលបានចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស កាលពីថ្ងៃទី២៣ ខែតុលា ឆ្នាំ១៩៩១។
ពាក់ព័ន្ធនឹងការរម្លឹកខួបលើកទី២៥ នៃកិច្ចព្រមព្រៀងទីក្រុងប៉ារីស នេះដែរ កាលពីថ្ងៃចុងសប្ដាហ៍កន្លងទៅពលរដ្ឋខ្មែរ និងមន្ត្រីអាមេរិក នៅទីក្រុងឡូវែល (Lowell) រដ្ឋម៉ាសាឈូសេត (Massachusetts) និងនៅរដ្ឋវីជីនៀ (Virginia) និងសហគមន៍អឺរ៉ុប បានប្រារព្ធពិធីរម្លឹកខួប២៥ នៃកិច្ចព្រមនេះ ដោយពួកគាត់លើកឡើងថា ពួកគាត់កំពុងរស់នៅប្រទេសជឿនលឿនមានជីវភាពរស់នៅសមរម្យ ថ្លៃថ្នូរ និងមានសិទ្ធិសេរីពេញបរិបូរណ៍។ ពួកគាត់ប្រាថ្នាចង់ឃើញប្រជាពលរដ្ឋខ្មែរនៅប្រទេសកម្ពុជា ទទួលបានសិទ្ធិរស់រានមានជីវិត និងលទ្ធិប្រជាធិបតេយ្យពិតប្រាកដដូចគ្នាដែរ។
មន្ត្រីនាំពាក្យគណបក្សកាន់អំណាច លោក សុខ ឥសាន បដិសេធការលើកឡើងថា កម្ពុជាមិនបានអនុវត្តកិច្ចព្រមព្រៀងទីក្រុងប៉ារីស បានពេញលេញ។ លោកថា កម្ពុជាបច្ចុប្បន្នកំពុងរីករាយនឹងស្ថិរភាព និងសន្តិភាព។
ទោះបីជាយ៉ាងណាក៏ដោយ ពលរដ្ឋខ្មែរដែលចូលរួមក្នុងពិធីខួប ២៥ឆ្នាំ នៃកិច្ចព្រមព្រៀងទីក្រុងប៉ារីស នៅអាមេរិកនេះ មើលមិនឃើញថា រដ្ឋាភិបាលបានគោរពកិច្ចព្រមព្រៀងទីក្រុងប៉ារីស នៅឡើយនោះទេ។ ពួកគេក៏អះអាងថា ពួកគេចូលរួមពិធីនេះ ដោយសារចង់បង្ហាញពីភាពឈឺឆ្អាលចំពោះការដែលរដ្ឋាភិបាលកម្ពុជា មិនបានអនុវត្តឲ្យបានពេញលេញតាមស្មារតីនៃកិច្ចព្រមព្រៀងនេះ និងជាការដាស់សតិដល់ប្រទេសម្ចាស់ហត្ថលេខី «កុំឲ្យដេកលង់លក់»។ ពួកគាត់ដាស់តឿនក្រើនរម្លឹកដល់រដ្ឋាភិបាលខ្មែរកុំឲ្យធ្វើទុក្ខបុកម្នេញដល់អ្នកហ៊ានតវ៉ាប្រឆាំង និងឲ្យរដ្ឋាភិបាលឈប់រំលោភរដ្ឋធម្មនុញ្ញកម្ពុជា ដែលកើតចេញពីកិច្ចព្រមព្រៀងទីក្រុងប៉ារីស និងផ្ញើសារដល់ប្រទេសហត្ថលេខីទាំងអស់ឲ្យធ្វើយ៉ាងណាបន្តជួយជំរុញឲ្យមានការបោះឆ្នោតនៅកម្ពុជា ដោយសេរី ត្រឹមត្រូវ និងយុត្តិធម៌។
ទាក់ទងនឹងការបោះឆ្នោតនេះ លោក ឃិន គីវ រស់នៅនៅរដ្ឋម៉ារីឡែន (Maryland) ដែលគ្មានសិទ្ធិបោះឆ្នោតពីចម្ងាយ បានទទូចសុំឲ្យពលរដ្ឋនៅឯនាយសមុទ្រជួយធ្វើយ៉ាងណារម្លឹកអ្នកនៅស្រុកខ្មែរកុំភ្លេចទៅចុះឈ្មោះបោះឆ្នោតឲ្យបានមុនថ្ងៃទី២៩ វិច្ឆិកា៖ «ខ្ញុំមកចូលរួមនេះ គឺដើម្បីរួមចំណែកអំពាវនាវឲ្យបងប្អូនខ្មែរយើងទាំងអស់ មានបងប្អូននៅស្រុកខ្មែរគ្រប់ៗគ្នា ដោយសារយើងនៅទីនេះមិនអាចមានសិទ្ធិបោះឆ្នោតបានទេ ដូច្នេះយើងត្រូវនាំគ្នាទូរស័ព្ទទៅបងប្អូនយើងទាំងអស់គ្នានៅស្រុកខ្មែរ ទៅបោះឆ្នោតគ្រប់ៗគ្នា។ ឆ្នោតមួយសន្លឹកជាអំណាចរបស់យើង។»
ពលរដ្ឋខ្មែរក៏អំពាវនាវឲ្យប្រទេសហត្ថលេខី រួមទាំងសហរដ្ឋអាមេរិកផង បញ្ជូនអ្នកសង្កេតការណ៍បោះឆ្នោតនៅពេលខាងមុខទៅឃ្លាំមើលការបោះឆ្នោតនៅកម្ពុជា៕
No comments:
Post a Comment