សហគមន៍ ខ្មែរ នៅអូស្ត្រាលី ត្រៀមធ្វើ បាតុកម្ម ប្រឆាំង លោក ហ៊ុន ម៉ាណែត
RFA / វិទ្យុ អាស៊ី សេរី | ៥ តុលា ២០១៦
 |
| តំណាងរាស្ត្រខ្មែរ-អូស្ត្រាលី ប្រចាំរដ្ឋវ៉ិកតូរីយ៉ា (Victoria) លោក ហុង លីម / RFA/Chun Chanboth |
ស្ដាប់ ឬ ទាញយកសំឡេង
00:00/00:00
សហគមន៍ខ្មែរនៅទីក្រុងម៉ែលប៊ន
(Melbourne) នៃប្រទេសអូស្ត្រាលី
ត្រៀមធ្វើបាតុកម្មទ្រង់ទ្រាយធំមួយប្រឆាំងនឹងលោក ហ៊ុន ម៉ាណែត នៅថ្ងៃសុក្រ
ទី៧ ខែតុលា នេះ។ អ្នកផ្ដួចផ្ដើមអោយមានការធ្វើបាតុកម្មបញ្ជាក់ថា
ពួកគេមិនសប្បាយចិត្តនឹងលោក ហ៊ុន ម៉ាណែត
ដែលមករៀបចំពិធីជប់លៀងទទួលស្វាគមន៍សមាជិកគណបក្សប្រជាជនកម្ពុជាថ្មី
នៅទីក្រុងនេះ ចំពេលដែលពួកគេកំពុងរៀបចំពិធីបុណ្យខួប ១០០ថ្ងៃ
ឧទ្ទិសដល់បណ្ឌិត កែម ឡី។
សហគមន៍ខ្មែរនៅទីក្រុងម៉ែលប៊ន ត្រៀមធ្វើពិធីបុណ្យខួប ១០០ថ្ងៃ លោកបណ្ឌិត កែម ឡី នៅថ្ងៃអាទិត្យ ទី៩ ខែតុលា រីឯក្រុមគណបក្សប្រជាជនកម្ពុជា នៃទីក្រុងនេះវិញ ក៏ត្រៀមរៀបចំពិធីជប់លៀងទទួលស្វាគមន៍សមាជិកថ្មីនៃគណបក្សនេះ នៅថ្ងៃទី៧ ខែតុលា គឺពីរថ្ងៃមុនគម្រោងបុណ្យខួប ១០០ថ្ងៃ។ ការរៀបចំពីធីប្រកិតគ្នាបែបនេះ បានបង្កអោយមានការអាក់អន់ស្រពន់ចិត្តពីសំណាក់អ្នកដែលរៀបចំបុណ្យខួប ១០០ថ្ងៃ តាមប្រពៃណីខ្មែរ។
លោក ហុង លីម
ដែលជាតំណាងរាស្ត្រមានដើមកំណើតខ្មែរប្រចាំរដ្ឋវ៉ិកតូរីយ៉ា (Victoria)
នេះ ចាត់ទុកថា
នេះគឺជាអំពើអសីលធម៌មួយទៀតរបស់កូនលោកនាយករដ្ឋមន្ត្រី
និងក្រុមអ្នកគាំទ្ររបស់គណបក្សប្រជាជនកម្ពុជា៖ «ព្រោះឥឡូវហ្នឹងគេកំពុងធ្វើពិធីបុណ្យ
១០០ថ្ងៃ (កែម ឡី) ជាពេលដែលក្ដុកក្ដួលក្នុងចិត្ត។ ខ្ញុំដឹងថា
បងប្អូនខ្មែរយើងមួយចំនួនធំមិនទាន់បាត់យំនៅឡើយទេ
ដូច្នេះខាងគណបក្សប្រជាជន មកផ្អើលឈូឆរជប់លៀងច្រៀងរាំអី
ចំពោះគេនៅនេះគឺជាការប្រមាថមើលងាយគេខ្លាំងណាស់ ហើយជាការប្រមាថមើលងាយចំពោះសព
វិញ្ញាណក្ខន្ធវីរបុរសខ្មែរដែលគេគោរព ហើយគេកំពុងកាន់ទុក្ខ
ធ្វើអោយអ្នកស្រុកហ្នឹងខឹងសម្បាខ្លាំង។
បងប្អូនមួយចំនួនធំគាត់ប្រុងប្រៀបធ្វើបាតុកម្មឲ្យដឹងថា
អ្នកឯងអាចធ្វើព្យុះភ្លៀងនៅស្រុកខ្មែរបាន ចំណែកនៅឯណេះ
បងប្អូនខ្មែរយើងមានសេរីភាពក្នុងការបញ្ចេញយោបល់។ មានគេស្នើថា
បើគាត់ចង់ជប់លៀងសប្បាយក្រុមគ្នាគាត់ហ្នុង ហេតុអីមិនចាំគេចប់បុណ្យ
១០០ថ្ងៃហ្នឹងទៅ ដើម្បីអោយឃើញថា
យើងមានលក្ខណៈថ្លៃថ្នូរ...ហើយយើងមកធ្វើគឃ្លើនក្នុងពេលហ្នឹង
វាហាក់ដូចជាបង្ហាញនូវចរិតលក្ខណៈគួរអោយសោកស្ដាយ
ខ្ញុំមិនចង់ប្រើពាក្យតិរច្ឆានពេលនេះទេ ប៉ុន្តែគួរអោយសោកស្ដាយណាស់។»
ក្រៅពីធ្វើបាតុកម្មបង្ហាញការមិនពេញចិត្តចំពោះវត្តមានរបស់លោក
ហ៊ុន ម៉ាណែត ក្រុមបាតុករក៏ត្រៀមបញ្ជូនសាររបស់ពួកគេទាមទារអោយរដ្ឋាភិបាលក្រុងភ្នំពេញ
រកយុត្តិធម៌អោយលោកបណ្ឌិត កែម ឡី ផងដែរ។
គឺការឈឺចាប់ចំពោះការបាញ់សម្លាប់ ហើយមិនផ្ដល់យុត្តិធម៌ដល់លោក កែម ឡី
នេះហើយ ដែលធ្វើអោយលោក ហុង លីម ហៅរដ្ឋាភិបាលក្រុងភ្នំពេញ ថាជារបបតិរច្ឆាន
រហូតដល់រដ្ឋាភិបាលដាក់ឈ្មោះលោកក្នុងបញ្ជីខ្មៅមិនអោយចូលប្រទេសកំណើតរបស់លោក។
លោក ហុង លីម
មានប្រតិកម្មថា
នេះគឺជាការរំលោភរដ្ឋធម្មនុញ្ញដែលជាច្បាប់កំពូលរបស់កម្ពុជា
និងរំលោភសិទ្ធិរបស់លោកដែលមានសញ្ជាតិកម្ពុជា ពីកំណើត
មិនអោយលោកចូលមាតុភូមិរបស់ខ្លួន។ តែទោះជាយ៉ាងណា លោកមានប្រសាសន៍ថា
លោកក៏នឹងមិនមានគម្រោងវិលចូលកម្ពុជា នៅពេលនេះ
អោយអាជ្ញាធរមានលេសចាប់ខ្លួនលោកឡើយ៖ «ខ្ញុំនឹកស្រុកខ្ញុំដូចខ្មែរយើងនៅឯនាយសមុទ្រ
នឹកគ្រប់ពេល ប៉ុន្តែខ្ញុំមិនទៅបំពេញចិត្តអោយរបបតិរច្ឆានចាប់ខ្ញុំដាក់គុកទេ។
ខ្ញុំយល់ថា វាគ្មានប្រយោជន៍ទៅបង្កើតស្ថានការណ៍ហ្នឹង។»
លោកបន្តថា
លោកនឹងប្រឹងប្រែងបញ្ចុះបញ្ចូលអ្នកនយោបាយធំៗនៅក្នុងជួររដ្ឋាភិបាល
និងសភាអូស្ត្រាលី ក្នុងការដាក់គំនាបដល់រដ្ឋាភិបាលក្រុងភ្នំពេញ
អោយដើរក្នុងផ្លូវប្រជាធិបតេយ្យ ឈប់ជិះជាន់ពលរដ្ឋខ្លួនឯង
ហើយទន្ទឹមនឹងនោះ លោកក៏អំពាវនាវអោយពលរដ្ឋខ្មែរនៅគ្រប់ទិសទី ទាំងក្នុង
និងក្រៅប្រទេស រួមគ្នាគិតគូរពីបញ្ហាប្រទេសជាតិ៖ «ខ្ញុំជឿថា
ស្រុកយើងនឹងគិតដល់ថ្ងៃណាមួយ ដូចលោកបណ្ឌិត កែម ឡី បាននិយាយពេលដែលគាត់មកអ៊ីចឹងថា
វាត្រូវតែមានទីបញ្ចប់មួយ។
រឿងស្រុកខ្មែរយើងវាមិនត្រូវនៅបន្តរបៀបអ៊ីចឹងទេ។
ដូចព្រះជិនវង្សអ៊ីចឹង យើងវេទនាតែមិនស្លាប់ទេ
ប៉ុន្តែមិនស្លាប់ទាល់តែយើងទាំងក្នុង ទាំងក្រៅរួមចំណែកគ្នា។»
គឺជាផ្នែកមួយនៃស្មារតីនេះហើយ
ដែលលោក ហុង លីម រួមនឹងសហគមន៍ខ្មែរនៅទីក្រុងមែលប៊ន
គ្រោងធ្វើបាតុកម្មនៅថ្ងៃសុក្រ ទី៧ ខែតុលា៕
No comments:
Post a Comment