 |
| សហគមន៍ភូមិឃ្វែង ឃុំយ៉ាទុង ស្រុកអូរយ៉ាដាវ ខេត្តរតនគិរី ចុះល្បាតព្រៃនៅចំណុចអូរតាង៉ត ជិតប៉ុស្តិ៍តម្រួតការពារព្រំដែនខ្មែរ កាលពីថ្ងៃទី២៩ ខែតុលា ឆ្នាំ២០១៥។ |
សហគមន៍ ជនជាតិដើម ភាគតិច អះអាង ថា, វៀតណាម នៅតែ ឆ្លងដែន កាប់ឈើ ក្នុងដីខ្មែរ
RFA / វិទ្យុ អាស៊ី សេរី | ១៣ តុលា ២០១៦
ស្ដាប់ ឬ ទាញយកសំឡេង
00:00/00:00
ប្រជាពលរដ្ឋ ជនជាតិដើម ភាគតិច រស់នៅ ភូមិតាំងលោម ជាប់ព្រំដែន ប្រទេស វៀតណាម ក្នុងឃុំញ៉ាង ស្រុក អណ្ដូងមាស ខេត្តរតនគិរី អះអាង ថា, ជនជាតិ វៀតណាម នៅតែ បន្ត ឆ្លងដែន មកកាប់ឈើ ក្នុងដីខ្មែរ ក្បែរប៉ុស្តិ៍ តម្រួតការពារ ព្រំដែន តំបន់នោះ។ អ្នកភូមិ ចោទប្រកាន់ ទៅលើ មន្ត្រីព្រំដែន និងអាជ្ញាធរ មូលដ្ឋាន ថា, ឃុបឃិត ក្នុងរឿងនេះ។
សហគមន៍ភូមិតាំងលោម អះអាងថា ជនជាតិវៀតណាម ២១នាក់ ប្រដាប់ដោយម៉ាស៊ីនកាត់ឈើ ឧបករណ៍ទាញឈើ និងប្រើប្រាស់ម៉ូតូជាមធ្យោបាយដឹកជញ្ជូនឈើបានឆ្លងទន្លេជាព្រំដែនចូលមកកាប់ឈើក្នុងដីខ្មែរក្នុងឃុំញ៉ាង ស្រុកអណ្ដូងមាស ខេត្តរតនគិរី។ ការអះអាងនេះធ្វើឡើងក្រោយពេលសមាជិកសហគមន៍បីនាក់បានដើរល្បាតព្រៃ ហើយប្រទះឃើញជនជាតិវៀតណាម ទាំងនោះកំពុងអាររំលំ និងដឹកជញ្ជូនឈើក្នុងព្រៃចំណុចអូរព្រាម ជិតប៉ុស្តិ៍នគរបាលការពារព្រំដែនផាតាម កាលពីថ្ងៃទី១២ ខែតុលា។
សមាជិកក្រុមល្បាតព្រៃម្នាក់ គឺលោក រម៉ាម ហ្យ៊ាង បញ្ជាក់ថា វៀតណាមទាំង ២១នាក់នេះឆ្លងទូកពីត្រើយម្ខាងទន្លេទឹកដីប្រទេសវៀតណាម មកចតទូកនៅចម្ងាយ ៥០០ម៉ែត្រ ពីប៉ុស្តិ៍តម្រួតផាតាម ហើយចូលព្រៃកាប់ឈើ ចំណែកសហគមន៍មានគ្នាតិចមិនអាចរារាំងជនជាតិវៀតណាម ទាំងនោះបានឡើយ។ លោកបន្តថា តម្រួតព្រំដែន និងប្រជាពលរដ្ឋ រួមទាំងមន្ត្រីមូលដ្ឋានមានជាប់ពាក់ព័ន្ធទទួលប្រាក់ជាថ្នូរឲ្យជនជាតិវៀតណាម កាប់ឈើនេះ៖ «ជួបគ្នា ពួកខ្ញុំទៅតែបីនាក់ ថ្ងៃម្សិលបានជួបហ្នឹង។ ត្រូវការឲ្យគេបង្ក្រាបឲ្យពួកខ្ញុំប្រជាពលរដ្ឋគិតតែ ឥឡូវគេញាត់តែហោប៉ៅអាវទៅមួយរួចខ្លួនៗ។»
កាលពីថ្ងៃទី១២ ខែតុលា ក្រុមល្បាតព្រៃសហគមន៍ភូមិតាំងលោម បានថតរូបជនជាតិវៀតណាម ខ្លះកំពុងអាររំលំឈើ ខ្លះដឹកជញ្ជូនឈើទុកជាវត្ថុតាងបញ្ជូនមកមន្ត្រីការពារសិទ្ធិមនុស្សអាដហុក ជួយអន្តរាគមន៍ទៅឲ្យអាជ្ញាធរចុះទប់ស្កាត់ករណីនេះ។
អ្នកនាំពាក្យ និងអភិបាលរងខេត្តរតនគិរី លោក ញ៉ែម សំអឿន បញ្ជាក់ថា លោកមិនបានទទួលព័ត៌មានណាមួយទាក់ទិនសេចក្ដីរាយការណ៍នេះទេ។ លោកថា នឹងផ្ទៀងផ្ទាត់សេចក្ដីអះអាងនេះជាមួយតម្រួតព្រំដែន និងអាជ្ញាធរមូលដ្ឋានដើម្បីចាត់វិធានការបង្ក្រាប៖ «ខ្ញុំទើបដឹងលើកទី១ ចាំមើលខ្ញុំទាក់ទងនៅខាងប៉ូលិសព្រំដែន ហើយនិងអាជ្ញាធរ។»
ចំណែកនាយខណ្ឌរដ្ឋបាលព្រៃឈើ លោក កែប កត់ បញ្ជាក់ដែរថា មន្ត្រីជំនាញបានទទួលព័ត៌មានដូចគ្នា និងបានរៀបចំកម្លាំងចុះបង្ក្រាបបទល្មើសព្រៃឈើខុសច្បាប់នេះ។
កាលពីចុងខែកញ្ញា កន្លងទៅ លោកនាយករដ្ឋមន្ត្រី ហ៊ុន សែន ទើបដាក់ចេញវិធានការម៉ឺងម៉ាត់បន្ថែមទៀត ប្រគល់សមត្ថកិច្ចដល់រដ្ឋបាលរាជធានីខេត្ត ក្រុង ស្រុក ខណ្ឌ ឲ្យលុបបំបាត់ការនាំឈើចេញគ្មានច្បាប់ទៅក្រៅប្រទេសតាមច្រករបៀង និងច្រកព្រំដែនទាំងអស់ឲ្យមានប្រសិទ្ធភាព។
អ្នកឃ្លាំមើលបញ្ហាព្រៃឈើសមាគមអាដហុក ខេត្តរតនគិរី លោក ឆាយ ធី ចាត់ទុកបទល្មើសព្រៃឈើឆ្លងដែននៅច្រករបៀងប៉ុស្តិ៍ផាតាម ថាជាការទទួលខុសត្រូវសមត្ថកិច្ចពាក់ព័ន្ធដែលត្រូវអនុវត្តបទបញ្ជា និងការណែនាំរបស់ប្រមុខរាជរដ្ឋាភិបាល។ លោកថា នៅតំបន់ច្រករបៀងព្រំដែនប៉ុស្តិ៍ផាតាម គឺជាកន្លែងចរាចរឈើខុសច្បាប់ឆ្លងដែនកើតមានច្រើនឆ្នាំមកហើយ៖ «ខាងវៀតណាម ចូលមកកាប់អារដឹកជញ្ជូនស្រេចចិត្ត មានការឃុបឃិតទទួលផលប្រយោជន៍ពីវៀតណាម ទាំងអស់ហ្នឹង។»
កាលពីខែកក្កដា សហគមន៍តាំងលោម រាយការណ៍ថា ម៉ូតូប្រមាណ ២០ ទៅ ៣០គ្រឿងក្នុងមួយថ្ងៃៗ ត្រូវបានប្រជាពលរដ្ឋប្រើប្រាស់សម្រាប់ដឹកជញ្ជូនឈើទៅលក់ឲ្យឈ្មួញវៀតណាម តាមច្រករបៀងប៉ុស្តិ៍នគរបាលការពារព្រំដែនផាតាម និងប៉ុស្តិ៍ផាសាវ ក្នុងឃុំញ៉ាង ស្រុកអណ្ដូងមាស៕
No comments:
Post a Comment