 |
| អភិបាលស្រុកមង្គលបូរី លោក ឡុង ពុន (អាវពណ៌ផ្ទៃមេឃ) ចុះឃាត់សមាជិកព្រឹទ្ធសភាមកពីគណបក្សប្រឆាំង និងក្រុមការងារក្នុងយុទ្ធនាការផ្សព្វផ្សាយឲ្យពលរដ្ឋឲ្យទៅចុះឈ្មោះបោះឆ្នោត នៅភូមិអូរអណ្ដូង ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ថ្ងៃទី១៤ ខែវិច្ឆិកា ឆ្នាំ២០១៦។ Photo Provided |
អាជ្ញាធរ ស្រុក មង្គលបូរី ឃាត់មន្ត្រី បក្សប្រឆាំង មិនឲ្យ ផ្សព្វផ្សាយ ឲ្យពលរដ្ឋ ទៅចុះឈ្មោះ បោះឆ្នោត
RFA / វិទ្យុ អាស៊ី សេរី | ១៤ វិច្ឆិកា ២០១៦
ស្ដាប់ ឬ ទាញយកសំឡេង
00:00/00:00
អាជ្ញាធរ ស្រុក មង្គលបូរី ខេត្ត បន្ទាយមានជ័យ នៅថ្ងៃ ទី១៤ វិច្ឆិកា បានដឹកនាំ សមត្ថកិច្ច ប្រមាណ ១០នាក់ ទៅរារាំង សមាជិក ព្រឹទ្ធសភា មកពីគណបក្ស ប្រឆាំង និងក្រុម ការងារ ខណៈ ធ្វើយុទ្ធនាការ ជំរុញ ពលរដ្ឋ ឲ្យទៅ ចុះឈ្មោះ បោះឆ្នោត ក្នុងស្រុកនេះ ជាច្រើន កន្លែង ចាប់តាំង ពីព្រឹក រហូត ទល់រសៀល។ អភិបាលស្រុក មង្គលបូរី អះអាង ថា, មូលហេតុ ដែលអាជ្ញាធរ រំខាន ដល់សមាជិក ព្រឹទ្ធសភា បក្សប្រឆាំង ដោយសារ ពួកគាត់ មិនបាន សុំច្បាប់ អនុញ្ញាត ពីអាជ្ញាធរ ដែនដី។
សមាជិកព្រឹទ្ធសភាគណបក្ស សម រង្ស៊ី បានប្រតិកម្មភ្លាមៗទៅនឹងអាជ្ញាធរមូលដ្ឋាន ដែលបានរារាំងយុទ្ធនាការជំរុញឲ្យពលរដ្ឋទៅចុះឈ្មោះបោះឆ្នោតនោះ ថាជាទង្វើមួយធ្វើឲ្យរាំងស្ទះដំណើរការប្រជាធិបតេយ្យនៅកម្ពុជា។
សមាជិកព្រឹទ្ធសភាគណបក្ស សម រង្ស៊ី លោក សោ ចាន់ដេត មានប្រសាសន៍នៅថ្ងៃទី១៤ វិច្ឆិកា ថា អាជ្ញាធរស្រុកមង្គលបូរី នាំប៉ូលិសប្រមាណ ១០នាក់ដកហូតឧបករណ៍បំពងសំឡេងដែលលោកកំពុងតែផ្សព្វផ្សាយជំរុញឲ្យពលរដ្ឋទៅចុះឈ្មោះបោះឆ្នោត មានអ្នកភូមិចូលរួមស្ដាប់ប្រមាណ ៥០នាក់ នៅស្នាក់ការគណបក្សសង្គ្រោះជាតិ ភូមិកស្វាយ ឃុំរហាត់ទឹក ស្រុកមង្គលបូរី កាលពីព្រឹកថ្ងៃទី១៤ វិច្ឆិកា។ លោកអះអាងថា ក្រុមការងារគណបក្សប្រឆាំងខេត្តបន្ទាយមានជ័យ ធ្វើយុទ្ធនាការនេះដោយសារខ្វល់ខ្វាយខ្លាចពលរដ្ឋមិនបានទៅចុះឈ្មោះបោះឆ្នោតគ្រប់គ្នា៖ «យើងប្រាប់ថាយើងមានច្បាប់ជូនដំណឹងអីត្រឹមត្រូវ តែគាត់មិនស្ដាប់ នៅតែបញ្ឈប់យើងទៀត ប៉ុន្តែពីដំបូង យើងអត់ឈប់ទេ ប៉ុន្តែដោយឃើញសមត្ថកិច្ចចេះមកអុកឡុកខ្លាំងពេក ក្រោយមកយើងក៏បានបញ្ឈប់ទៅ។»
ឆ្លើយតបនឹងបញ្ហានេះ អភិបាលស្រុកមង្គលបូរី លោក ឡុង ពុន មានប្រសាសន៍ថា អាជ្ញាធរហាមឃាត់មន្ត្រីគណបក្សប្រឆាំង មិនឲ្យបន្តយុទ្ធនាការរបស់ខ្លួននោះ គឺដើម្បីរក្សាសន្តិសុខ និងសណ្ដាប់ធ្នាប់ជូនប្រជាពលរដ្ឋនៅក្នុងមូលដ្ឋាន។ លោកអះអាងថា ប្រសិនបើមន្ត្រីគណបក្សមួយនេះចង់ធ្វើយុទ្ធនាការបន្តទៀត គឺត្រូវសុំច្បាប់អនុញ្ញាតពីអាជ្ញាធរជាមុនសិន៖ «ហើយអាជ្ញាធរភូមិ-ឃុំគាត់ចង់បានលិខិតអនុញ្ញាតពីអាជ្ញាធរដែនដី ដែលមានខ្លឹមសារគ្រប់គ្រាន់ គឺធ្វើយ៉ាងណាកុំឲ្យប៉ះពាល់ដល់អាជ្ញាធរដែនដី និងរាជរដ្ឋាភិបាល។»
ទោះបីជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា លើកឡើងថា មន្ត្រីគណបក្សប្រឆាំងធ្វើយុទ្ធនាការជំរុញពលរដ្ឋឲ្យទៅចុះឈ្មោះបោះឆ្នោត គឺពុំខុសច្បាប់ឡើយ។ លោកបន្ថែមថា ក្រុមការងារគណបក្សសង្គ្រោះជាតិ គ្រាន់តែជូនដំណឹងទៅអាជ្ញាធរមូលដ្ឋានឲ្យបានដឹងជាមុនជាការស្រេច៖ «យើងឃើញហាក់ដូចជាដំណើរការមួយដែលចាត់ទុកថាអ្នកផ្សេងជាមនុស្សសត្រូវរបស់ខ្លួន ដែលជាការរើសមួយទៅលើគណបក្សដទៃ។ អ៊ីចឹងអាជ្ញាធរគួរតែអនុវត្តច្បាប់ឲ្យបានស្មើភាពគ្នា ដោយមិនប្រកាន់គណបក្សនយោបាយ។»
នៅរសៀលថ្ងៃទី១៤ វិច្ឆិកា ក្រុមការងារគណបក្សប្រឆាំង បន្តយុទ្ធនាការនេះនៅឃុំបន្ទាយនាង ស្រុកមង្គលបូរី ប៉ុន្តែក៏ត្រូវបានសមត្ថកិច្ចចេញមករារាំងដូចគ្នា។ លោក សោ ចាន់ដេត សង្កត់ធ្ងន់ថា បើទោះជាមានការរារាំងយ៉ាងនេះក្ដី គឺក្រុមការងាររបស់លោក នឹងបន្តយុទ្ធនាការនេះរហូតដល់ចុងបញ្ចប់នៃការចុះឈ្មោះបោះឆ្នោតនៅថ្ងៃទី២៩ វិច្ឆិកា។
នៅខេត្តបន្ទាយមានជ័យ មាន ៦៥ឃុំ-សង្កាត់ និងមានប្រជាពលរដ្ឋដែលគ្រប់អាយុបោះឆ្នោតចាប់ពី ១៨ឆ្នាំឡើងទៅចំនួនជាង ៤៧ម៉ឺននាក់ (៤៧៤.៨០៣នាក់)។ ចំណែកពលរដ្ឋដែលបានចុះឈ្មោះនៅក្នុងខេត្តនេះគិតត្រឹមថ្ងៃទី១៣ ខែវិច្ឆិកា ឆ្នាំ២០១៦ មានចំនួនជាង ២៩ម៉ឺននាក់ គឺស្មើនឹងប្រមាណ ៦១% នៃចំនួនប្រជាពលរដ្ឋសរុប៕
No comments:
Post a Comment