 |
| អនុគណៈកម្មការបង្ក្រាបបទល្មើសព្រៃឈើនៃអាជ្ញាធរខេត្តរតនគិរី ចុះពិនិត្យទីតាំងក្រុមហ៊ុន នុភាព សុភី នាតំបន់អូរតាយ៉ាក ក្នុងឧទ្យានជាតិវីរៈជ័យ នៅថ្ងៃទី២៦ ខែមករា ឆ្នាំ២០១៦។ RFA/Ratha Visal |
សង្គមស៊ីវិល បារម្ភ ការលក់ឈើ ដែលបង្ក្រាបបាន អាចជាលេស ធ្វើ ឲ្យមាន ការកាប់ឈើ បន្ត
RFA / វិទ្យុ អាស៊ី សេរី | ១ វិច្ឆិកា ២០១៦
ស្ដាប់ ឬ ទាញយកសំឡេង
មន្ត្រីនាំពាក្យកងរាជអាវុធហត្ថលើផ្ទៃប្រទេស ឲ្យដឹងថា រាជរដ្ឋាភិបាលបានព្រមព្រៀងលក់ឈើជាង ៦ម៉ឺនម៉ែត្រគូបឲ្យទៅក្រុមហ៊ុនមួយក្នុងតម្លៃជាង ១៤លានដុល្លារសហរដ្ឋអាមេរិក ដែលធ្វើឡើងកាលពីថ្ងៃទី២៨ តុលា។ មន្ត្រីនាំពាក្យដដែលអះអាងថា កិច្ចពិភាក្សាតម្លៃលក់ឈើដែលគណៈកម្មការបង្ក្រាបបាន គឺធ្វើឡើងដោយមានភាគីជាច្រើនចូលរួម និងប្រកបដោយតម្លាភាព។
ឈើប្រភេទលេខ១ លេខ២ និងលេខ៣ រួមមានបេង ធ្នង់ សុក្រំ ជាដើម ជាង ៦ម៉ឺនម៉ែត្រគូប ត្រូវបានអនុគណៈកម្មការដាក់ដេញថ្លៃសម្រេចលក់ទៅឲ្យក្រុមហ៊ុនមួយឈ្មោះ វី អ៊ីននើជី ឡូជិស្ទីក (V Energy Logistics) ក្នុងតម្លៃជាង ១៤លានដុល្លារសហរដ្ឋអាមេរិក។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍នៅថ្ងៃទី៣១ តុលា ថា ការសម្រេចនេះធ្វើឡើងតាមនីតិវិធីត្រឹមត្រូវ ដោយមានភាគីពាក់ព័ន្ធចូលរួម ហើយមានក្រុមអ្នកសារព័ត៌មាន ពិសេសមានភាគីអង្គភាពប្រឆាំងអំពើពុករលួយចូលរួមតាមដានសកម្មភាពពិភាក្សាតម្លៃនោះទៀតផង។ លោកបន្តថា ដោយសារមានតែមួយក្រុមហ៊ុន ដូច្នេះមិនមែនជាការដាក់ដេញថ្លៃទេ ប៉ុន្តែជាការពិភាក្សាតម្លៃទៅវិញ ហើយថវិកាដែលទទួលបានពីការលក់ឈើ រាជរដ្ឋាភិបាលនឹងយកទៅជួយលើវិស័យអប់រំ៖ «រដ្ឋាភិបាលសម្ដេចតេជោ បានប្រកាស ក៏ដូចជាកិច្ចប្រជុំសន្និបាតនៅក្រសួងបរិស្ថាន គឺដូចគ្នាដែរ គឺប្រកាសការដេញថ្លៃឈើហ្នឹង លក់បាន គឺយកថវិកាហ្នឹងទៅបម្រើក្នុងវិស័យអប់រំ។»
កាលពីថ្ងៃទី១៥ មករា រាជរដ្ឋាភិបាលបានបង្កើតគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើដោយមានលោក សៅ សុខា ដែលជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ជាប្រធានគណៈកម្មការនេះ។
គណៈកម្មការនេះមានភារកិច្ចសំខាន់ៗមួយចំនួនដូចជា ទប់ស្កាត់ និងបង្ក្រាបសកម្មភាពកាប់ឈើ ការនាំចេញឈើខុសច្បាប់ និងបទល្មើសព្រៃឈើនៅភូមិភាគឦសាននៃប្រទេស ស្រាវជ្រាវរកអ្នកពាក់ព័ន្ធក្នុងការកាប់ និងនាំឈើខុសច្បាប់ ចាប់ជនល្មើស និងវត្ថុតាង ដើម្បីបញ្ជូនសំណុំរឿងទៅតុលាការ ព្រមទាំងសហការជាមួយភាគីវៀតណាម និងឡាវ ដើម្បីធ្វើការងារឲ្យមានប្រសិទ្ធភាព។
បេសកកម្មរបស់គណៈកម្មការជាតិមួយនេះរយៈពេលប្រមាណ ៣ខែដំបូង ពួកគេសម្រេចបញ្ជូនរបាយការណ៍របស់ខ្លួនទៅលោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែមេសា បន្ទាប់ពីចាប់បានឈើខុសច្បាប់ជាង ៧ម៉ឺនម៉ែត្រគូប និងប្ដឹងឈ្មួញរកស៊ីចំនួន ៥៧ករណីទៅតុលាការ។ លោក អេង ហ៊ី បញ្ជាក់ថា ឈើប្រមាណ ១ម៉ឺនម៉ែត្រគូប ត្រូវបានរាជរដ្ឋាភិបាលសម្រេចលក់កាលពីខែសីហា ប៉ុន្តែលោកមិនបានដឹងថាមានតម្លៃប៉ុន្មានទេ។
លោកអះអាងថា គណៈកម្មការជាតិទប់ស្កាត់ និងបង្ក្រាបបទល្មើសព្រៃឈើនៅតែបន្តការងាររបស់ខ្លួនឥតឈប់ឈរ ហើយកំពុងស្រាវជ្រាវរកមេខ្លោង ឬឈ្មួញកណ្ដាលដែលទិញឈើពីប្រជាពលរដ្ឋ។ ដោយឡែកឈ្មួញឈើម្នាក់ឈ្មោះ ហេង សំនៀង ហៅយាយព្រឿង ត្រូវបានសមត្ថកិច្ចខេត្តស្ទឹងត្រែង ចាប់ខ្លួនកាលពីថ្ងៃទី១៣ តុលា ហើយបញ្ជូនសំណុំរឿងទៅតុលាការ។ តាំងពីខែមេសា ឆ្នាំ២០១៦ មក គណៈកម្មការនេះចាប់បានបទល្មើសជាហូរហែបន្ថែមទៀត ប៉ុន្តែនៅមិនទាន់ទទួលបានរបាយការណ៍ថាមានចំនួនប៉ុន្មានម៉ែត្រគូបនៅឡើយ។
ទោះបីជាយ៉ាងណាក៏ដោយ ប្រធានក្រុមកិច្ចការពិសេសសិទ្ធិមនុស្សកម្ពុជា លោក អ៊ូច ឡេង មើលឃើញថា រូបភាពប្រកាសលក់ឈើដែលរាជរដ្ឋាភិបាលបង្ក្រាបបាន គឺមិនមានតម្លាភាពទេ។ លោកថា ឈើប្រកាសលក់ គឺមិនដឹងថាមានទីតាំងនៅទីណាឡើយ ហើយអាចត្រូវបានឈ្មួញដឹកជញ្ជូនយកទៅលក់ស្ទើរតែអស់ថែមទៀតផង។ លោកបារម្ភថា ការប្រកាសលក់ឈើពេលនេះ អាចជារូបភាពមួយដើម្បីកាប់ឈើថ្មី ឬនាំយកឈើថ្មីសម្រាប់បង្គ្រប់ទិន្នន័យដែលរដ្ឋាភិបាលលក់ឲ្យក្រុមហ៊ុនប៉ុណ្ណោះ។ ជាងនេះទៀត វាគ្រាន់តែជារូបភាពមួយជួយសម្រួលដល់ក្រុមឈ្មួញរកស៊ីឈើដុះស្លែ ដើម្បីមានឱកាសនាំឈើចេញទៅក្រៅប្រទេសដោយស្របច្បាប់៖ «ឃើញថារដ្ឋាភិបាលបានប្ដេជ្ញាចិត្តបិទការទិញឈើទៅប្រទេសវៀតណាម ឬប្រទេសក្រៅ ប៉ុន្តែបន្ទាប់ពីការដេញថ្លៃបានហើយ ក្រុមហ៊ុននឹងមានអាជ្ញាប័ណ្ណដើម្បីនាំឈើចេញ។ ហើយការនាំឈើចេញបែបនេះហើយ គឺជាលេសមួយដើម្បីនាំឈើថ្មី ហើយមិនមានការត្រួតពិនិត្យត្រឹមត្រូវ។»
លោក អ៊ូច ឡេង នៅតែពុំមានជំនឿលើការងាររបស់រដ្ឋាភិបាលក្នុងការទប់ស្កាត់ និងបង្ក្រាបបទល្មើសព្រៃឈើឡើយ។ ជាក់ស្តែងឈ្មួញឈើដុះស្លែក្រៅពី ហេង សំនៀង ហៅយាយព្រឿង គឺមិនមាននរណាម្នាក់ត្រូវបានចាប់ខ្លួនទេ។ លោកអះអាងថា ពួកគេទាំងនោះរួមមាន ឧកញ៉ា លីម ប៊ុណ្ណា ហៅខ្នា ឧកញ៉ា ស៊ឹង សំអុល ហៅអុល ឧកញ៉ាថៃ ជាដើម នៅតែអាចបន្តជំនួញឈើរបស់ខ្លួនបានដដែល។
ច្បាប់ព្រៃឈើឆ្នាំ២០០២ មាត្រា៨៥ ចែងថា អាយុកាលបណ្ដឹងបទល្មើសព្រៃឈើថ្នាក់ទី១ គឺមានរយៈពេល ១៥ឆ្នាំ។ ចំណែកមាត្រា៩៣ វិញកំណត់ថា បទល្មើសព្រៃឈើថ្នាក់ទី១ ត្រូវជាប់ពន្ធនាគារពី ៥ឆ្នាំដល់ ១០ឆ្នាំ និងត្រូវរឹបអូសវត្ថុតាងទាំងអស់ដាក់ជាសម្បត្តិរដ្ឋ។
លោក អ៊ូច ឡេង យល់ថា ដើម្បីឲ្យកិច្ចការពារព្រៃឈើមានប្រសិទ្ធភាព រាជរដ្ឋាភិបាលត្រូវបិទអាជីវកម្មឈើទាំងអស់ ហើយចាប់ខ្លួនឧកញ៉ា និងមន្ត្រីពាក់ព័ន្ធធំៗក្នុងជួររដ្ឋាភិបាល យកមកផ្ដន្ទាទោសតាមច្បាប់ព្រៃឈើ និងរឹបអូសយកទ្រព្យសម្បត្តិរបស់ពួកគេដាក់ជាសម្បត្តិរដ្ឋ។ លោកក៏ស្នើឲ្យសហគមន៍អន្តរជាតិ បញ្ឈប់ការទិញឈើពីប្រទេសវៀតណាម ពីព្រោះជាប្រភពនាំឲ្យមានកាប់ និងជួញដូរឈើនៅក្នុងប្រទេសកម្ពុជា៕
No comments:
Post a Comment