 |
| នាយកលេខាធិការដ្ឋានក្រុមការងារពិសេសសិទ្ធិលំនៅឋាន (HRTF) លោក សៀ ភារម្យ ចូលរួមវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃទី១០ ខែតុលា ឆ្នាំ២០១៦។ RFA |
ព្រះរាជអាជ្ញា ខេត្តកំពង់ស្ពឺ ចេញដីកា ឲ្យឃុំខ្លួន មន្ត្រី សិទ្ធិមនុស្ស លោក សៀ ភារម្យ ពីបទឆបោក
RFA / វិទ្យុ អាស៊ី សេរី | ១៩ វិច្ឆិកា ២០១៦
មន្ត្រី សិទ្ធិមនុស្ស ល្បីឈ្មោះ ម្នាក់ ដែលតែងតែ ឃ្លាំមើល ការរំលោភ សិទ្ធិមនុស្ស និងសិទ្ធិ លំនៅឋាន គឺ លោក សៀ ភារម្យ ត្រូវ បានព្រះរាជអាជ្ញា ខេត្តកំពង់ស្ពឺ លោក កែវ សុធា ចេញដីកា ឲ្យឃុំខ្លួន បណ្ដោះអាសន្ ទាក់ទង បទចោទ ក្លែងបន្លំ ឯកសារ សាធារណៈ, ប្រើប្រាស់ ឯកសារក្លែង, និងបទឆបោក ក្នុងសំណុំរឿង ដី មួយកន្លែង ក្នុងខេត្ត កំពង់ស្ពឺ។
ចំណែក លោក សៀ ភារម្យ នាយក លេខាធិការដ្ឋាន នៃក្រុមការងារ ពិសេស សិទ្ធិលំនៅឋាន ដែលរងការ ចោទប្រកាន់នេះ បដិសេធ ថា, លោក មិនបាន ប្រព្រឹត្ត ដូចការ លើកឡើងទេ, ហើយ លោក នឹងតតាំង តាមផ្លូវច្បាប់ ដោយមិន រត់គេចខ្លួន ឡើយ។ លោក បញ្ជាក់ថា, លោក បានទទួល ដីកានេះ ជាងមួយសប្ដាហ៍ហើយ។
ដីកាចុះថ្ងៃ ទី៤ ខែវិច្ឆិកា របស់ព្រះរាជអាជ្ញាខេត្តកំពង់ស្ពឺ ចោទប្រកាន់ថា លោក សៀ ភារម្យ បានប្រព្រឹត្តបទល្មើសទាំងនេះនៅភូមិក្របីត្រាំ ឃុំជង្រុក ស្រុកគងពិសី ខេត្តកំពង់ស្ពឺ កាលពីឆ្នាំ២០០៩ រហូតមកដល់ឆ្នាំ២០១៦។ អ្នកប្ដឹងលោក សៀ ភារម្យ ឈ្មោះ នួន ផល្លី។
ដើមបណ្ដឹងឈ្មោះ នួន ផល្លី រូបនេះចោទប្រកាន់ថា មនុស្សពីរនាក់ ម្នាក់ឈ្មោះ ខឹម សុខឃឹម ដែលបានទទួលមរណភាពទៅហើយ និងម្នាក់ទៀតគឺលោក សៀ ភារម្យ ថាបានរួមគ្នាប្រើប្រាស់ឯកសារក្លែងទាក់ទងដីមួយកន្លែងនៅខេត្តកំពង់ស្ពឺ។
លោក សៀ ភារម្យ ថ្លែងបញ្ជាក់ថា រឿងដីធ្លីនេះជាការមួលបង្កាច់លើរូបលោកទាំងស្រុង។ លោកថាដីមួយដុំនេះជាដីដែលអ៊ំស្រីរបស់លោកឈ្មោះ ខឹម សុខឃឹម បានធ្វើអំណោយដល់លោក ហើយសុរិយោដីបានផ្ទេរកម្មសិទ្ធិមកលោកជាផ្លូវការហើយដែរតាំងពីឆ្នាំ២០០៤ មកម៉្លេះ ប៉ុន្តែនៅពេលនោះ ឈ្មោះ នួន ផល្លី មិនបានប្ដឹងតវ៉ាទេ។
លោកឲ្យដឹងទៀតថា នៅពេលអ៊ំស្រីរបស់លោក គឺលោកស្រី ខឹម សុខឃឹម ទទួលមរណភាពបាត់ទៅ ទើបឈ្មោះ នួន ផល្លី ប្ដឹងលោកអំពីរឿងនោះតែម្តង។
ទោះយ៉ាងណាក្តី លោក សៀ ភារម្យ ក៏បង្ហាញការព្រួយបារម្ភលើរឿងនេះ ខណៈលោកឃើញសង្គមស៊ីវិលមួយចំនួនត្រូវបានតុលាការចាប់ឃុំខ្លួនជាបន្តបន្ទាប់។ លោកថាពេលលោកបានទទួលដីកានេះ មានមិត្តភ័ក្ដិសង្គមស៊ីវិលខ្លះផ្តល់គំនិតឲ្យលោករត់គេចខ្លួនសិនទៅ ប៉ុន្តែលោកមិនរត់ទេ ព្រោះលោកយល់ថា បើលោករត់គេចខ្លួន មានន័យថាលោកបានធ្វើខុសដូចការចោទប្រកាន់៕
No comments:
Post a Comment