 |
| ប្រធានគណបក្សសង្គ្រោះជាតិ លោក សម រង្ស៊ី ថ្លែងក្នុងវេទិកាអាស៊ីសេរី កាលពីយប់ថ្ងៃទី១៥ ខែមិថុនា ឆ្នាំ២០១៦ នារដ្ឋធានីវ៉ាស៊ីនតុន សហរដ្ឋអាមេរិក។ RFA |
លោក សម រង្ស៊ី ប្រតិកម្ម នឹងលោក ឈាង វុន ជុំវិញ ការសម្រេច របស់ សហភាព អន្តរសភា
RFA / វិទ្យុ អាស៊ី សេរី | ១៦ វិច្ឆិកា ២០១៦
លោក សម រង្ស៊ី៖ «ខ្ញុំ ចាប់អារម្មណ៍, ហើយ យើង ទាំងអស់គ្នា គួរ ចាប់អារម្មណ៍ អំពី សេចក្ដីសម្រេច របស់ សហភាព អន្តរសភា, ហើយ គេ បានចេញ សេចក្ដីសម្រេច ចុងក្រោយនេះ ថា, គេ អត់ជឿទេ ការចោទប្រកាន់ មកលើ តំណាងរាស្ត្រ, សកម្មជន គណបក្ស ប្រឆាំង, និងមន្ត្រី សង្គមស៊ីវិល, គឺ គេ មិនជឿ ថា, ជារឿង ផ្ទាល់ខ្លួន រឿងតុលាការ។ ដើម្បី ដោះស្រាយ បញ្ហា នយោបាយ ត្រូវតែ ជួបជជែកគ្នា។ ច្បាប់ នៅកម្ពុជា បកស្រាយស្រេច តែ ចិត្ត គឺ គុកច្រវ៉ាក់, ហើយ គាបសង្កត់ ចំពោះ អ្នក ដែលមិន ឯកភាព ជាមួយ ខ្លួន។»
ទាក់ទងនឹងសេចក្ដីសម្រេចរបស់ IPU តំណាងរាស្ត្រគណបក្សប្រជាជនកម្ពុជា លោក ឈាង វុន កាលពីថ្ងៃទី១៦ ខែវិច្ឆិកា បានប្រាប់អាស៊ីសេរី ថា លោកមានការសោកស្ដាយចំពោះការស្នើសុំរបស់សហភាពអន្តរសភា។
លោក ឈាង វុន បន្តថា រដ្ឋសភាកម្ពុជា សព្វថ្ងៃកំពុងមានដំណើរការធម្មតាជាប្រក្រតី គ្មានវិបតិ្តនយោបាយ ហើយក៏មិនចាំបាច់ចរចាជាមួយគណបក្សប្រឆាំង ដើម្បីដោះស្រាយករណីរឿងអាស្រូវផ្ទាល់របស់ក្រុមមេបក្សប្រឆាំងនោះដែរ។
លោកថា អ្វីដែលសំខាន់នោះ គឺតំណាងរាស្ត្រគណបក្សប្រឆាំងត្រូវចូលធ្វើការក្នុងរដ្ឋសភាដូចធម្មតាវិញ ស្របតាមឆន្ទៈរបស់រាស្ត្រ៖ «សភាកើតហើយ រដ្ឋាភិបាលកើតហើយ តួនាទីបែងចែកឲ្យគេរួចអស់ហើយ ម្នាក់ត្រូវអនុវត្តនិងគោរពរដ្ឋធម្មនុញ្ញ បទបញ្ជាផ្ទៃក្នុងនៃរដ្ឋសភា ច្បាប់ស្ដីពីលក្ខន្តិកៈអ្នកតំណាងរាស្ត្រ ហើយអនុវត្តច្បាប់នៃព្រះរាជាណាចក្រកម្ពុជាទៅ គឺចប់ហើយ មានអ្វីទៀត។ ចង់ឲ្យគណបក្សប្រជាជនកម្ពុជាទៅចរចាពីរឿងពាក់ព័ន្ធនឹងទណ្ឌិត ឬពាក់ព័ន្ធរឿងអាស្រូវបុគ្គលសាធារណៈនោះ គឺវាទៅមិនរួចទេ។»
សេចក្ដីសម្រេចសហភាពអន្តរសភា ដែលមានមូលដ្ឋានក្នុងទីក្រុងហ្សឺណែវ (Geneva) ប្រទេសស្វីស (Swiss) ផ្សាយជាសាធារណៈកាលពីថ្ងៃទី១៥ វិច្ឆិកា ក៏បានស្នើឲ្យរដ្ឋាភិបាលទីក្រុងភ្នំពេញ ធានាការគោរពសិទ្ធិមនុស្ស គោរពច្បាប់ គោរពសិទ្ធិបញ្ចេញមតិ និងសិទ្ធិធ្វើបាតុកម្មដោយសន្តិវិធី ព្រមទាំងទម្លាក់ចោលបទចោទប្រកាន់ប្រឆាំងអ្នកតំណាងរាស្ត្រ និងមន្ត្រីសង្គមស៊ីវិលទាំងអស់៕
No comments:
Post a Comment