[Vietnamization: Tbaung Khmum] លោក ហ៊ុន សែន ថា, បារាំង​ ជា​អ្នក​ នាំ​វៀត​ណាម ចូល​ស្រុក​ | Hun Sen says the French responsible for bringing Vietnamese into country [Mais, monsieur, vous n'avez pas l'air français!]

លោកនាយករដ្ឋមន្រ្តី ហ៊ុន សែន កាលពីកន្លងទៅ

លោក ហ៊ុន សែន ថា, បារាំង​ ជា​អ្នក​ នាំ​វៀត​ណាម ចូល​ស្រុក​ 

VOD / វីអូឌី | ២ វិច្ឆិកា ២០១៦

លោក នាយករដ្ឋមន្ត្រី ហ៊ុន សែន អះអាង ថា, វៀតណាម បានចូល មកនៅ កម្ពុជា យូរមកហើយ ដោយសារតែ បារាំង នាំមក, ហើយ លោក ថា, លោក ជាអ្នក រង នូវការតិះទៀន នៃវត្តមាន របស់ វៀតណាម ក្នុងប្រទេសនេះ។

ក្នុងការបើក សម្ពោធ ការដ្ឋាន សាងសង់ ផ្លូវ នៅក្នុងខេត្ត ត្បូងឃ្មុំ នៅព្រឹកថ្ងៃពុធនេះ, លោក នាយករដ្ឋមន្ត្រី ហ៊ុន សែន មានប្រសាសន៍ ថា, បញ្ហា វៀតណាម នៅកម្ពុជា គឺ មានតាំង ពីសម័យ បារាំង នៅធ្វើ អាណានិគម មកម្លេះ, គឺ ដោយសារ បារាំង ជាអ្នក នាំមក។  លោក បន្ថែមទៀត ថា, វៀតណាម មាននៅ ក្នុងស្រុក ចំពោះ អ្នក មិនទទួលស្គាល់ ប្រវត្តិសាស្ត្រ គឺ តែងតែ បន្ទោសលោក។

លោក មានប្រសាសន៍ ថា៖ «មក ជេរៗ តែខ្ញុំសោះ តែហើយ!  ត្រង់បារាំង កាលពីមុន យកវៀតណាម មកនៅ, រឿង ចាក់កៅស៊ូ អី, កម្មករ កៅស៊ូ ស្អីៗនេះ, កម្មករ កៅស៊ូ ៧០% គឺ ជាវៀតណាម។  ក៏ប៉ុន្តែ ដោយសារតែ មិនទទួលស្គាល់ ប្រវត្តិសាស្ត្រ គឺ ជេរតែ អាអ្នក កើតក្រោយ។  រឿង វា អញ្ចេះ អាហ្នឹង; ប្រយ័ត្នបាប។» 


សាស្ត្រាចារ្យប្រវត្តិវិទ្យា លោក វង្ស សុធារ៉ា មានប្រសាសន៍ថា វៀតណាមពិតជាបានចូលមកក្នុងស្រុកខ្មែរទាំងមុន និងក្នុងសម័យអាណានិគមបារាំងមែន តាមរយៈជាកម្មករចម្ការកៅស៊ូ ជាអ្នកបកប្រែជាដើម តែលោកថារហូតមកដល់ពេលនេះ គឺមានរយៈពេលជាង៦០ឆ្នាំហើយ ដែលប្រធានបទជនជាតិវៀតណាមនេះនៅតែជាបញ្ហាដដែល។ លោក ថា បញ្ហានៃការហូរចូលថ្មីៗនេះ គឺមិនមានអ្នកហ៊ានចេញមុខមកទទួលខុសត្រូវនោះទេ ហើយការហូរចូលនេះទៀតសោត ប្រសិនជាគ្មានការបើកដៃនោះទេគឺមិនអាចកើតមានឡើយ។

លោក មានប្រសាសន៍ ថា៖ «ត្រង់កន្លែងហ្នឹង អាចថា មានមន្ត្រី ពុករលួយ ឬក៏ចំណុចឆកល្វែងមួយចំនួនដែលធ្វើឲ្យជនជាតិ វៀតណាម ហូរចូលមក ស្រុកខ្មែរយើង ថ្មីៗ ទៀតនោះ ដោយខុសច្បាប់។  បើ និយាយទៅ មិនមាន អ្នក ទទួលខុសត្រូវទេ, យើង មិនអាច ដាក់បន្ទុក ទៅអ្នកណាមួយ, បើ ថា មកពីប្រជាជន ក៏កាន់តែ ពិបាក ពីព្រោះ ប្រជាជន មិនមែន ជាអ្នក ចេញលិខិត ឲ្យអ្នកទាំងអស់ហ្នឹង រស់នៅផង។»
លោក យល់ ថា, ដំណាក់កាលនេះ មិនអាច ប្រើការ ចាប់បញ្ជូន ជាតិវៀតណាម ទៅស្រុកវិញ ទាំងស្រុង បានទេ ដើម្បី រក្សាសន្តិសុខ របស់ ប្រទេស។ លោកបានឲ្យជាយោបល់ថា បញ្ហានេះធ្វើយ៉ាងណាទប់ស្កាត់កុំឲ្យមានការហូរចូលបន្ថែម និងត្រូវពង្រឹងការអប់រំនៅកម្ពុជា ទាំងភាសា ទំនៀមទំលាប់ ប្រពៃណី ធ្វើយ៉ាងណាឲ្យអ្នកទាំងនោះស្រលាញ់ជាតិខ្មែរ ការពារខ្មែរវិញជាជាងបង្កឲ្យមានភាពរកាំរកូសរវាងគ្នានិងគ្នា។

លោក បន្ថែម ថា៖ 

«ឲ្យក្នេងដែលជាកូនជនបរទេសដែលនៅជាប់ជិតខាងហ្នឹង បានចូលសិក្សារៀនសូត្រនៅក្នុងសាលារបស់រដ្ឋហ្នឹង ពេលដែលពួកហ្នឹងបានរៀនក្នុងសាលាខ្មែរ សិក្សាវប្បធម៌ ប្រពៃណី ប្រវត្តិសាស្ត្រខ្មែរ រយៈពេល១២ឆ្នាំទៅ ពួកហ្នឹងនឹងក្លាយជាពលរដ្ឋខ្មែរហើយ។ ដូច្នោះហើយ ខ្ញុំគិតថានេះជាបញ្ហាដោះស្រាយដែលល្អជាងគេ ដើម្បីកុំឲ្យមានបញ្ហាទាក់ទងនឹងរឿងនៃការចាប់បញ្ជូន ដែលនាំឲ្យមានប៉ះពាល់ដល់សន្តិសុខរបស់ប្រទេសជាតិ។»

កាលពីខែសីហាកន្លងទៅ ក្រសួងមហាផ្ទៃបានប្រកាសថា មានជនជាតិ វៀតណាម រស់នៅ កម្ពុជា ដែលកាន់កាប់ ឯកសារ រដ្ឋបាល មិនប្រក្រតី និងស្នាក់នៅ យូរ គ្មាន ឯកសារ មានជាង ៩ម៉ឺន នាក់។  ក្រសួង ក៏បាន ឲ្យដឹងដែរ ថា, ចាប់ពីឆ្នាំ២០០២មកដល់ឆ្នាំ២០១៦ ចំនួនជនបរទេសអន្តោប្រវេសន៍នៅកម្ពុជា មានការកើនឡើងជាលំដាប់ និងថាជនអន្តោប្រវេសន៍ដែលរស់នៅច្រើនជាងគេ គឺមាននៅរាជធានីភ្នំពេញ ខេត្តកណ្ដាល កំពង់ឆ្នាំង និងព្រៃវែង៕