 |
| ប្រធានរដ្ឋសភា លោក ហេង សំរិន (ឆ្វេង) និងប្រធានគណបក្សសង្គ្រោះជាតិ លោក សម រង្ស៊ី។ RFA |
បក្សនយោបាយ មានសំឡេង ក្នុងសភា ចាប់ផ្ដើម អួតអាង ពីជ័យជម្នះ ក្នុងការ បោះឆ្នោត
RFA / វិទ្យុ អាស៊ី សេរី | ១៧ ធ្នូ ២០១៦
ប្រមុខ គណបក្ស មានសំឡេងឆ្នោត ទាំងពីរ នៅក្នុងសភា អួតអាង បង្ហាញ វោហារសាស្ត្រ នយោបាយ ថា, គណបក្ស របស់ខ្លួន នឹងយក ជ័យជំនះ ក្នុងការ បោះឆ្នោត ឆ្នាំ២០១៧ និងឆ្នាំ២០១៨ ខាងមុននេះ។ ចំណែក ក្រុមអ្នក ឃ្លាំមើល ស្ថានការណ៍ នយោបាយ វិញ ចង់ឃើញ គណបក្ស ទាំងពីរ ព្យាយាម ដោះស្រាយ បញ្ហាជាតិ ដោះស្រាយ បញ្ហាពលរដ្ឋ ជាជាង ការអួតអាងគ្នា។
រដូវកាលអួតអាងពីជ័យជម្នះរបស់គណបក្សខ្លួន ត្រូវបានប្រមុខគណបក្សនយោបាយមានសំឡេងក្នុងសភា គឺលោក ហេង សំរិន និងលោក សម រង្ស៊ី បង្ហាញក្ដីរំពឹងក្នុងការគ្រប់គ្រងឃុំ-សង្កាត់ និងកៅអីនៅក្នុងសភា បានច្រើនលើសគូប្រកួតរៀងៗខ្លួន។
ថ្លែងប្រាប់សមាជិកបក្សប្រមាណ ២ពាន់នាក់ ប្រធានកិត្តិយសគណបក្សប្រជាជនកម្ពុជា លោក ហេង សំរិន រំពឹងថា ពលរដ្ឋកម្ពុជា នឹងផ្ដល់សច្ចធម៌មកគណបក្សប្រជាជន ដោយការបោះឆ្នោតឲ្យគណបក្សមួយនេះបន្តដឹកនាំប្រទេស ទាំងថ្នាក់ជាតិ និងក្រោមជាតិ។
លោក ហេង សំរិន ថ្លែងបែបនេះក្នុងសន្និបាតគណៈកម្មាធិការកណ្ដាលលើកទី៤០ របស់គណបក្សប្រជាជនកម្ពុជា ថ្ងៃទី១៧ ខែធ្នូ។
មិនខុសគ្នាពីលោក ហេង សំរិន ប្រធានគណបក្សប្រឆាំងកំពុងនិរទេសខ្លួនក្រៅប្រទេស លោក សម រង្ស៊ី បានផ្ដល់បទសម្ភាសន៍មកវិទ្យុអាស៊ីសេរី កាលពីរាត្រីទី១៥ ខែធ្នូ ថា ការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១៧ គណបក្សរបស់លោកនឹងគ្រប់គ្រងឃុំសង្កាត់ជាង ៥០ភាគរយ នៃឃុំសង្កាត់ទូទាំងប្រទេស។ លើសពីនេះទៅទៀត លោក សម រង្ស៊ី ថា, តួនាទីប្រធានព្រឹទ្ធសភានឹងត្រូវគ្រប់គ្រងដោយគណបក្សសង្គ្រោះជាតិ ហើយលទ្ធផលនេះហើយ ដែលធ្វើឲ្យគណបក្សរបស់លោកឆ្ពោះទៅការដឹកនាំប្រទេសក្នុងឆ្នាំ២០១៨។
តែទោះយ៉ាងនេះក្ដី សម្រាប់អ្នកឃ្លាំមើលស្ថានការណ៍នយោបាយយល់ថា វោហារសាស្ត្រនយោបាយបែបនេះ មិនមែនជារឿងប្លែកនោះទេ។
អ្នកសិក្សាការអភិវឌ្ឍសង្គម លោកបណ្ឌិត មាស នី យល់ថា ក្រៅពីការអួតអាងនៃជ័យជម្នះរៀងៗខ្លួន គណបក្សទាំងពីរត្រូវព្យាបាលជំងឺបីមុខឲ្យជាសះស្បើយ គឺជំងឺបក្សពួកនិយម គ្រួសារនិយម ពុករលួយ និងជំងឺរិះគន់មិនបាន។
ការបោះឆ្នោតជ្រើសរើសក្រុមប្រឹក្សាឃុំសង្កាត់នឹងប្រព្រឹត្តនៅដើមខែមិថុនា ឆ្នាំ២០១៧ ខាងមុខ។ នៅពេលនេះ គណបក្សប្រជាជនកម្ពុជា និងគណបក្សសង្គ្រោះជាតិ ចាប់ផ្ដើមប្រមូលឈ្មោះបេក្ខភាពប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំសង្កាត់ ដែលមានទាំងបេក្ខជនពេញសិទ្ធិ និងបេក្ខជនបម្រុងរាប់ម៉ឺននាក់ដើម្បីបញ្ជូនឈ្មោះទៅ គ.ជ.ប.។
ទាក់ទងរឿងនេះដែរ អ្នកវិភាគនយោបាយ លោក សូ ចន្ថា មានប្រសាសន៍ថា គណបក្សដែលអាចទទួលសំឡេងឆ្នោតពីពលរដ្ឋបានច្រើន គឺជាគណបក្សដែលមានគោលនយោបាយដោះស្រាយបញ្ហាប្រឈមរបស់ពលរដ្ឋ ដែលមានផែនការ និងកម្មវិធីជាក់លាក់។ លោកសង្កេតឃើញថា បញ្ហាច្រើនណាស់របស់ពលរដ្ឋមិនទាន់បានដោះស្រាយ ដូចជា កង្វះមធ្យោបាយកសិកម្ម កង្វះទីផ្សារ កង្វះប្រឡាយ ឬមានប្រឡាយគ្មានទឹក។ ជាងនេះទៅទៀត លោកយល់ថា ការដាក់បេក្ខភាពដែលមានសមត្ថភាព ក៏ជាចំណុចទាក់ទាញដែរ។
ក្រុមអ្នកវិភាគយល់ថា នៅពេលស្ថានការណ៍ចាប់ផ្ដើមល្អឡើងវិញ ក្រោយពេលគណបក្សប្រជាជនកម្ពុជា និងគណបក្សសង្គ្រោះជាតិ ងាកមកចរចាគ្នា នឹងធ្វើឲ្យស្ថានការណ៍បោះឆ្នោតខាងមុខកាន់តែល្អប្រសើរ ដែលជាការទុកឱកាសឲ្យគណបក្សទាំងពីរ និងគណបក្សផ្សេងៗទៀត បង្ហាញស្នាដៃឲ្យពលរដ្ឋម្ចាស់ឆ្នោតបានឃើញ៕
I predict Kem Sokha will kick Scam Rainsy to the curb by 2018 election.
ReplyDelete