 |
| ពលរដ្ឋពិនិត្យឈ្មោះក្នុងបញ្ជីបោះឆ្នោតថ្មី នាសង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង កាលពីថ្ងៃទី៥ ខែមករា ឆ្នាំ២០១៧។ Photo Provided |
សកម្មជន បក្សប្រឆាំង នៅខេត្ត កំពង់ឆ្នាំង ប្ដឹង លុបឈ្មោះ មនុស្ស ២៥នាក់ ចេញ ពីបញ្ជី បោះឆ្នោត
RFA / វិទ្យុ អាស៊ី សេរី | ១២ មករា ២០១៧
សកម្មជន គណបក្ស សង្គ្រោះជាតិ ខេត្ត កំពង់ឆ្នាំង ប្ដឹង សូម លុបឈ្មោះ មនុស្ស ២៥នាក់ ដែលរស់នៅ ឃុំ ឆ្នុកទ្រូ ស្រុក បរិបូរណ៍ ចេញ ពីបញ្ជីឈ្មោះ អ្នកបោះឆ្នោត ថ្មី ឆ្នាំ២០១៦ ដោយសង្ស័យ ថា, អ្នក ទាំងនោះ ជាជនជាតិ វៀតណាម កាន់ អត្តសញ្ញាណប័ណ្ណ សញ្ជាតិខ្មែរ។ អាជ្ញាធរ ឃុំ ឆ្នុកទ្រូ សម្រេច មិន លុបឈ្មោះ ចេញ ពីបញ្ជីទេ ដោយសំអាង ថា, ពួកគេ មានអត្តសញ្ញាណប័ណ្ណ។
បន្ទាប់ពីក្រុមប្រឹក្សាឃុំឆ្នុកទ្រូ ស្រុកបរិបូរណ៍ សម្រេចបដិសេធមិនលុបឈ្មោះមនុស្ស ១៦នាក់ សកម្មជនគណបក្សសង្គ្រោះជាតិ ឃុំនេះ បន្តប្ដឹងសុំលុបឈ្មោះមនុស្សចំនួន ៩នាក់ផ្សេងទៀតដែលសង្ស័យថាជាជនជាតិវៀតណាម ដែរនៅរសៀលថ្ងៃទី១២ ខែមករា។ ជនសង្ស័យសរុបទាំង ២៥នាក់ ត្រូវបានមន្ត្រីបក្សប្រឆាំងស្គាល់ច្បាស់ថាជាជនជាតិវៀតណាម ដោយមានសាក្សីជាច្រើនជួយបញ្ជាក់ផង។
គ្រូបង្រៀនម្នាក់ និងជាសកម្មជនគណបក្សសង្គ្រោះជាតិ ប្រចាំឃុំឆ្នុកទ្រូ លោក អ៊ុំ សាវ៉ាន ចោទមេឃុំ និងជំទប់ទី១ មកពីគណបក្សប្រជាជនកម្ពុជា ថាបានចេញសេចក្ដីសម្រេចដោយអយុត្តិធម៌ចំពោះករណីជនជាតិវៀតណាម ចុះឈ្មោះបោះឆ្នោតនេះ។ លោកថា មេឃុំឆ្នុកទ្រូ ឈ្មោះ សំរិទ្ធ ផេង រករឿងចោទប្រកាន់រូបលោក ថាមិនគួរប្រឡូកក្នុងរឿងនយោបាយដោយខ្លាចប៉ះពាល់ដល់ការបង្រៀន៖ «ថាពេលនេះគេចុះឈ្មោះរួចអស់ហើយ បើឯងចង់ប្ដឹងមិនព្រមប្ដឹងនៅពេលចុះឈ្មោះបោះឆ្នោត បើថាអ្នកហ្នឹងជាជនជាតិបរទេស។ គាត់និយាយមកដូចអត់ស្គាល់ច្បាប់ស្អីបន្តិច។»
ឆ្លើយតបបញ្ហានេះ មេឃុំឆ្នុកទ្រូ លោក សំរិទ្ធ ផេង ទទួលស្គាល់ថា លោកពិតជាបាននិយាយទៅកាន់លោក អ៊ុំ សាវ៉ាន ដូច្នេះមែន ព្រោះខ្លាចប៉ះពាល់ដល់ម៉ោងបង្រៀនសិស្ស។ ចំពោះការដោះស្រាយរឿងលុបឈ្មោះនេះវិញ លោកបានប្រគល់តួនាទីទៅឲ្យជំទប់ទី១ ព្រោះគ្រានោះលោកមិនសូវស្រួលខ្លួន ដោយមានបញ្ហាជំងឺសម្ពាធឈាមឡើងខ្ពស់ ឬលើសឈាម ហើយលោកចូលរួមក្នុងនាមជាគណៈអធិបតីប៉ុណ្ណោះ។
ចំណែកជំទប់ទី១ ឃុំឆ្នុកទ្រូ លោក សុខ សៀម ថាអ្នកដែលត្រូវបានប្ដឹងសុំលុបឈ្មោះទាំងនេះ ពិតជារស់នៅក្នុងមូលដ្ឋានលោក ប៉ុន្តែបដិសេធមិនបញ្ជាក់ថា អ្នកទាំង ២៥នាក់នោះជាជនជាតិវៀតណាម ឬខ្មែរនោះទេ ដោយជំរុញឲ្យទៅសួរអ្នកប្ដឹង។ ទោះជាយ៉ាងណា លោកថាការសម្រេចមិនលុបឈ្មោះតាមពាក្យបណ្ដឹង ដោយសារបុគ្គលទាំងនោះមានកាន់អត្តសញ្ញាណប័ណ្ណសញ្ជាតិខ្មែរ៖ «ខាងអន្តោប្រវេសន៍មិនជំរឿនបានអ្នកណា នៅអ្នកណា ខ្ញុំក៏វាមិនបានដឹងដែរ។ គ្រាន់តែថាអ៊ីចេះ រឿងការចុះឈ្មោះនេះ គឺសម្គាល់ទៅលើអ្នកណាដែលមានអត្តសញ្ញាណប័ណ្ណសញ្ជាតិខ្មែរ។»
សកម្មជន និងមន្ត្រីក្រុមប្រឹក្សាខេត្តកំពង់ឆ្នាំង មកពីគណបក្សសង្គ្រោះជាតិ នៅប្រកាន់ជំហរប្ដឹងករណីនេះទៅគណៈកម្មាធិការជាតិរៀបចំការបោះឆ្នោត ឬក្រុមប្រឹក្សាធម្មនុញ្ញទៀត បើពាក្យបណ្ដឹងសុំលុបឈ្មោះនេះមិនត្រូវបានដោះស្រាយដោយយុត្តិធម៌នោះទេ។ ពួកគេថា ពាក្យបណ្ដឹងមានសាក្សី ហើយសមត្ថកិច្ចគួរកោះហៅអ្នកទាំងនោះមកសាកសួរពីការចូលសញ្ជាតិ ឬប្រើប្រាស់អត្តសញ្ញាណប័ណ្ណ។
មន្ត្រីផ្នែកអង្កេតជាន់ខ្ពស់របស់អង្គការខុមហ្វ្រែល (COMFREL) លោក កន សាវាង្ស ថ្លែងថា នៅក្នុងនីតិវិធីនៃការចុះឈ្មោះ និងពិនិត្យឈ្មោះបោះឆ្នោតមិនមានចែងថា តម្រូវឲ្យអាជ្ញាធរឃុំកោះហៅបុគ្គលដែលបានចុះឈ្មោះ ហើយគេសង្ស័យថាជាជនបរទេស មកសាកសួរនោះទេ។ ប៉ុន្តែពេលមានពាក្យបណ្ដឹង គួរតែកោះហៅអ្នកទាំងនោះមកបញ្ជាក់ ដើម្បីបញ្ចប់បញ្ហា ឬត្រូវមាននីតិវិធីយ៉ាងណាទៀត៖ «ហើយបើថាគាត់មានអត្តសញ្ញាណប័ណ្ណត្រឹមត្រូវមិនអាចទេ ពីព្រោះនៅក្នុងផ្លូវច្បាប់ គ.ជ.ប ក៏គេមាននិយាយដែរថា ជនបរទេសទាំងឡាយណាក៏ដោយដែលមានប្រើប្រាស់អត្តសញ្ញាណប័ណ្ណសញ្ជាតិខ្មែរដោយខុសច្បាប់ នឹងត្រូវមានទោស ព្រោះកាលណាគាត់ជាសញ្ជាតិខ្មែរពិតមែន គាត់មានឯកសារនៅក្នុងដៃហើយ។ មានទៅបញ្ហាអីហៅគេយកមក ហើយលោកនឹងមកទៅបញ្ជាក់ទៅវាចប់សាច់រឿងហើយ។»
គណៈកម្មាធិការជាតិរៀបចំការបោះឆ្នោត បានបិទផ្សាយបញ្ជីឈ្មោះដំបូងឆ្នាំ២០១៦ សម្រាប់បម្រើឲ្យការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃទី៤ ខែមិថុនា ឆ្នាំ២០១៧ ខាងមុខនៅតាមឃុំ-សង្កាត់ ដើម្បីឲ្យអ្នកចុះឈ្មោះផ្ទៀងផ្ទាត់ឡើងវិញចាប់ពីថ្ងៃទី៣ ដល់ថ្ងៃទី១៤ ខែមករា។ នៅពេលណាពលរដ្ឋពិនិត្យទៅឃើញមានបញ្ហា ហើយចង់ប្ដឹងតវ៉ា ឬប្ដឹងជំទាស់អ្វីមួយ ត្រូវធ្វើទៅក្រុមប្រឹក្សាឃុំ-សង្កាត់ក្នុងរយៈពេល ១០ថ្ងៃ បន្ទាប់ពីថ្ងៃបិទផ្សាយបញ្ជីនេះ គឺចាប់ពីថ្ងៃទី៤ រហូតដល់ថ្ងៃទី១៤ មករា ដែលជាកាលបរិច្ឆេទចុងក្រោយ។ ក្នុងករណីអ្នកប្ដឹងតវ៉ា ឬប្ដឹងជំទាស់មិនពេញចិត្តទៅនឹងសេចក្ដីសម្រេចរបស់ក្រុមប្រឹក្សាឃុំ-សង្កាត់ ពួកគេអាចប្ដឹងទៅ គ.ជ.ប និងក្រុមប្រឹក្សាធម្មនុញ្ញតាមច្បាប់កំណត់៕
No comments:
Post a Comment