 |
| លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ថ្លែងក្នុងពិធីជូនដំណើរកងទ័ពមួកខៀវ នាអាកាសយានដ្ឋានអន្តរជាតិភ្នំពេញ នៅថ្ងៃទី២២ ខែតុលា ឆ្នាំ២០១៤។ RFA/Brach Chev |
មន្ត្រី បក្សប្រឆាំង គ្រោង កោះហៅ លោក ទៀ បាញ់ បំភ្លឺ រឿង ដំឡើងស័ក្តិ អ្នក វាយតំណាងរាស្ត្រ
RFA / វិទ្យុ អាស៊ី សេរី | ២៥ មករា ២០១៧
ស្ដាប់ ឬ ទាញយកសំឡេង
ស្ដាប់ ឬ ទាញយកសំឡេង
00:00/00:00
មន្ត្រី ជាន់ខ្ពស់ គណបក្ស សង្គ្រោះជាតិ ថ្លែង ថា, ខ្លួន នឹងអាច កោះហៅ រដ្ឋមន្ត្រី ក្រសួង ការពារជាតិ លោក ទៀ បាញ់ ទៅឆ្លើយបំភ្លឺ ក្នុងរដ្ឋសភា ពាក់ព័ន្ធ នឹងការ ដំឡើង ឋានន្តរស័ក្ដិ ពីវរសេនីយ៍ឯក ទៅជាឧត្តមសេនីយ៍ត្រី ដល់អង្គរក្ស លោក នាយករដ្ឋមន្ត្រី ហ៊ុន សែន ម្នាក់ទៀត ដែលធ្លាប់ វាយតំណាងរាស្ត្រ របស់ បក្សប្រឆាំង។
ជាមួយគ្នានោះ មន្ត្រីសង្គមស៊ីវិលការពារសិទ្ធិមនុស្ស ក៏លើកឡើងស្រដៀងគ្នាថា ស្របពេលមានការសង្ស័យជុំវិញការដំឡើងឋានន្តរស័ក្ដិដល់បុគ្គលធ្លាប់វាយតំណាងរាស្ត្រនេះ សមាជិកសភាមានសិទ្ធិកោះហៅរដ្ឋមន្ត្រីក្រសួងការពារជាតិ មកឆ្លើយបំភ្លឺ។
ប្រសិនបើពិនិត្យរកឃើញភាពមិនប្រក្រតីជុំវិញការដំឡើងឋានន្តរស័ក្ដិផ្កាយមួយដល់អង្គរក្សលោកនាយករដ្ឋមន្ត្រី ហ៊ុន សែន ដែលធ្លាប់ចូលរួមវាយតំណាងរាស្ត្រគណបក្សសង្គ្រោះជាតិ រហូតរបួសធ្ងន់ ថាជាការធ្វើឲ្យប៉ះពាល់ផលប្រយោជន៍ជាតិ សន្តិសុខជាតិ និងផលប្រយោជន៍ជនរងគ្រោះ គឺក្រុមតំណាងរាស្ត្រគណបក្សប្រឆាំង នឹងកោះហៅរដ្ឋមន្ត្រីការពារជាតិ លោក ទៀ បាញ់ ទៅបកស្រាយបំភ្លឺក្នុងរដ្ឋសភានាពេលខាងមុខ។
សមាជិករដ្ឋសភាមកពីគណបក្សសង្គ្រោះជាតិ លោក ហូរ វ៉ាន់ បានថ្លែងនៅថ្ងៃទី២៦ មករា ថា ពេលវេលាជាក់លាក់កោះហៅរដ្ឋមន្ត្រីក្រសួងការពារជាតិ ចូលឆ្លើយបំភ្លឺនៅរដ្ឋសភា ពាក់ព័ន្ធនឹងការដំឡើងឋានៈដល់អង្គរក្សលោក ហ៊ុន សែន នឹងត្រូវដឹងច្បាស់នៅក្រោយមានការពិភាក្សាជាមួយគណៈកម្មាធិការអចិន្ត្រៃយ៍ ឬជាមួយប្រធានស្ដីទីគណបក្សជាមុនសិន៖ «បើករណីឡើងនោះវាមិនប្រក្រតី ប៉ះពាល់ផលប្រយោជន៍ប្រទេសជាតិ សន្តិសុខជាតិ តំណាងរាស្ត្រយើងមានសិទ្ធិនឹងសួរ និងសុំឲ្យរដ្ឋមន្ត្រីបំភ្លឺលើរឿងនោះបាន។»
លោកបន្តថា សមាជិករដ្ឋសភាបក្សប្រឆាំងទាំង ៥៥រូប គឺអាចកោះហៅរដ្ឋមន្ត្រីក្រសួងការពារជាតិ មកឆ្លើយបំភ្លឺក្នុងរដ្ឋសភាបាន ព្រោះតាមច្បាប់ គឺតម្រូវឲ្យមានសមាជិករដ្ឋសភាចាប់ពី ៣០រូប។ គម្រោងកោះហៅឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក ទៀ បាញ់ នេះ គឺបន្ទាប់ពីមានរាជក្រឹត្យមួយចុះផ្សាយកាលពីថ្ងៃទី២២ ខែវិច្ឆិកា ឆ្នាំ២០១៦ ដែលព្រះមហាក្សត្រព្រះបរមនាថ នរោត្តម សីហមុនី ត្រាស់បង្គាប់តែងតាំងវរសេនីយ៍ឯកពីររូប ឡើងជាឧត្តមសេនីយ៍ត្រី ហើយឧត្តមសេនីយ៍ត្រីថ្មីទាំងពីររូបនេះ មានម្នាក់គឺជាអង្គរក្សលោក ហ៊ុន សែន ឈ្មោះ ចាយ សារិទ្ធ ដែលធ្លាប់វាយតំណាងរាស្ត្របក្សប្រឆាំងពីររូបឲ្យរបួសធ្ងន់ និងបញ្ជូនទៅព្យាបាលនៅក្រៅប្រទេស គឺលោក គង់ សភា និងលោក ញ៉យ ចំរើន។
(ពីឆ្វេង) លោក សុត វណ្ណនី លោក ចាយ សារិទ្ធ
និងលោក ម៉ៅ ហឿន ជនសង្ស័យវាយតំណាងរាស្ត្របក្សសង្គ្រោះជាតិ
ពេលបញ្ជូនមកកាន់សាលាដំបូងរាជធានីភ្នំពេញ នៅព្រឹកថ្ងៃទី១០ ខែឧសភា
ឆ្នាំ២០១៦។ RFA/Rann Samnang
ការដំឡើងឋានន្តរស័ក្ដិដល់អង្គរក្សរូបនេះ ស្របពេលរដ្ឋាភិបាលកំពុងរងការរិះគន់យ៉ាងខ្លាំងក្រោយពីអង្គរក្សលោក ហ៊ុន សែន ពីររូបទៀត គឺ សុត វណ្ណនី និង ម៉ៅ ហឿន កាលពីថ្ងៃទី១៧ ខែវិច្ឆិកា ឆ្នាំ២០១៦ ទើបទទួលបានការដំឡើងឋានន្តរស័ក្ដិពីវរសេនីយ៍ទោទៅជាវរសេនីយ៍ឯក។
លោក គង់ សភា តំណាងរាស្ត្រគណបក្សសង្គ្រោះជាតិ ដែលរងគ្រោះពីការវាយទាត់ធាក់ពីអង្គរក្សលោក ហ៊ុន សែន ទាំង ៣នាក់ បានចាត់ទុកការដំឡើងឋានៈនោះថា គឺបង្ហាញរឹតតែច្បាស់ថាគណបក្សកាន់អំណាច ជាអ្នករៀបចំ និងស្ថិតនៅខាងក្រោយខ្នងនៃករណីប្រើហិង្សាវាយដំលោក។ តំណាងរាស្ត្របក្សប្រឆាំងរូបនេះបញ្ជាក់ថា មូលហេតុនាំឲ្យមានការដំឡើងឋានន្តរស័ក្ដិ គឺដោយសារអង្គរក្សទាំងបីមានស្នាដៃវាយតំណាងរាស្ត្របក្សប្រឆាំងប៉ុណ្ណោះ៖ «ខ្ញុំយល់ថា ប្រជាពលរដ្ឋនឹងវិនិច្ឆ័យចំពោះរឿងនេះ ដើម្បីដាក់ទោស។»
អង្គរក្សរបស់លោក ហ៊ុន សែន ដែលត្រូវបានតុលាការក្រុងភ្នំពេញសម្រេចផ្ដន្ទាទោសដាក់ពន្ធនាគារម្នាក់ៗចំនួន ៤ឆ្នាំ ពីបទប្រព្រឹត្តហិង្សាលើក្រុមតំណាងរាស្ត្រមានស្ថានទម្ងន់ទោស ត្រូវបានដោះលែងឲ្យមានសេរីភាពឡើងវិញ កាលពីថ្ងៃទី៤ ខែវិច្ឆិកា ឆ្នាំ២០១៦ ដោយសារតុលាការបានសម្រេចអនុវត្តទោសតែ ១ឆ្នាំ ហើយ ៣ឆ្នាំទៀត ត្រូវបានតុលាការសម្រេចព្យួរទោស។
ពាក់ព័ន្ធការដំឡើងឋានន្តរស័ក្ដិដល់អង្គរក្សរបស់លោក ហ៊ុន សែន ដែលកំពុងស្ថិតក្នុងការព្យួរទោសបែននេះ ត្រូវបានអ្នកច្បាប់ចាត់ទុកថា ជាការដើរផ្ទុយពីផ្លូវច្បាប់របស់កម្ពុជា។ ប្រធានក្រុមអ្នកច្បាប់ការពារសិទ្ធិកម្ពុជា លោក ហុង គឹមសួន ថ្លែងប្រាប់អាស៊ីសេរីថា ថ្វីត្បិតតែអង្គរក្សទាំងបីស្ថិតនៅក្រៅឃុំដោយសារការព្យួរទោសក្ដី ប៉ុន្តែពួកគេនៅតែមានឈ្មោះជាទណ្ឌិត នឹងមិនត្រូវដំឡើងឋានន្តរស័ក្ដិឡើយ។ អ្នកច្បាប់រូបនេះបន្តថា ផ្ទុយទៅវិញ អ្នកទាំង ៣នាក់ គួរតែបញ្ឈប់ពីតួនាទីជាមន្ត្រីរាជការត្រឡប់ជាពលរដ្ឋសាមញ្ញ ដើម្បីជាការដាក់ទោសទណ្ឌឲ្យស័ក្ដិសមនឹងទង្វើរបស់ពួកគេ ដែលប្រើប្រាស់ហិង្សាវាយលើតំណាងរាស្ត្រ៖ «ឈ្មោះជាទណ្ឌិត ជាគោលការណ៍ច្បាប់ គឺមិនអាចដំឡើង ឬក៏ឲ្យឋានៈដល់អ្នកកំពុងមានឈ្មោះជាទណ្ឌិតបានទេ។»
ជាមួយគ្នានោះ ប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត ថ្លែងថា នៅពេលមានការសង្ស័យជុំវិញការដំឡើងឋានន្តរស័ក្ដិដល់មន្ត្រីរាជការណាមួយ តំណាងរាស្ត្រមានសិទ្ធិកោះហៅរដ្ឋមន្ត្រីនៃក្រសួងស្ថាប័ននោះ មកឆ្លើយបំភ្លឺក្នុងរដ្ឋសភាបាន៖ «តំណាងរាស្ត្រជាតំណាងពលរដ្ឋទូទៅ រហូតមានអភ័យឯកសិទ្ធិ គឺត្រូវគោរព និងការពារសិទ្ធិចំពោះពួកគាត់ ប៉ុន្តែតំណាងរាស្ត្រត្រូវបានគេវាយ ហើយអ្នកវាយត្រូវបានផ្ដល់ឋានៈ វាគឺជះឥទ្ធិពលមិនល្អ ព្រោះអាចធ្វើឲ្យអ្នកតំណាងរាស្ត្រភ័យខ្លាច។»
អាស៊ីសេរី មិនទាន់ទាក់ទងសុំការឆ្លើយបំភ្លឺបន្ថែមពីមន្ត្រីនាំពាក្យក្រសួងការពារជាតិ លោក ឈុំ សុជាតិ បានទេនៅថ្ងៃទី២៦ ខែមករា ឆ្នាំ២០១៧ នេះ។ ប៉ុន្តែកន្លងមក មន្ត្រីនាំពាក្យក្រសួងការពារជាតិ ធ្លាប់បញ្ជាក់ថា ការដំឡើងឋានន្តរស័ក្ដិដល់អង្គរក្សទាំងនោះ គឺបន្ទាប់ពីពួកគេទទួលទោសតាមផ្លូវច្បាប់រួច ហើយត្រូវបានក្រសួងការពារជាតិ ទទួលឲ្យមកបំពេញការងារវិញ។
ទោះបីជាយ៉ាងណាក៏ដោយ តំណាងរាស្ត្របក្សប្រឆាំងយល់ថា ការដំឡើងឋានន្តរស័ក្ដិដល់បុគ្គលដែលបានវាយតំណាងរាស្ត្រសភា គឺជាធ្វើឲ្យកេរ្តិ៍ឈ្មោះជាតិ រងការអាម៉ាស់។ លើសពីនេះ រដ្ឋាភិបាលក៏កំពុងគាំទ្រឲ្យមានវប្បធម៌និទ្ទណ្ឌភាពរីកដុះដាលនៅសង្គមកម្ពុជា ផងដែរ។
សូមស្ដាប់បទសម្ភាសន៍បន្ថែមរវាងលោក តាំង សារ៉ាដា និងលោក គង់ សភា តំណាងរាស្ត្របក្សប្រឆាំងជុំវិញបញ្ហានេះ៖
No comments:
Post a Comment