 |
| ប្រធានគណបក្សសង្គ្រោះជាតិ លោក សម រង្ស៊ី ថ្លែងទៅកាន់អ្នកកាសែតកាលពីថ្ងៃទី១០ ខែកក្កដា ឆ្នាំ២០១៥ នារាជធានីភ្នំពេញ។ RFA/Brach Chev |
«លោក សម រង្ស៊ី ប្រឆាំង "ផែនការ ក៥" ស្មើនឹង ចង់ ឲ្យមាន របប ខ្មែរក្រហម ឡើងវិញ»
RFA / វិទ្យុ អាស៊ី សេរី | ២៨ មករា ២០១៧
លោក សម រង្ស៊ី ប្រធាន គណបក្ស ប្រឆាំង បន្តចោទប្រកាន់ ប្រទេស វៀតណាម ដែលលោក អះអាង ថា, បានខ្ចីដៃខ្មែរ មួយចំនួន ក្នុងនោះ មានលោក ហ៊ុន សែន ផង ឲ្យសម្លាប់ ពលរដ្ឋខ្មែរ ដែលនៅ សេសសល់ ពីរបប ខ្មែរក្រហម បន្ថែមទៀតដោយប្រើ «ផែនការ ក៥»។ ការសាច ទឹកដាក់គ្នា ជាថ្មី ទៀតនេះ ត្រូវ បានអ្នក ឃ្លាំមើល ការវិវត្តន៍ សង្គម កម្ពុជា យល់ឃើញ ថា, អ្នក នយោបាយ មិនត្រូវ យកចំណេញ ផ្នែកនយោបាយ ដោយក្រឡៃ ប្រវត្តិសាស្ត្រ ពិតនោះទេ។
មន្ត្រី នាំពាក្យ គណបក្ស កាន់អំណាច យល់ឃើញ ថា, ការប្រឆាំង «ផែនការ ក៥» របស់ មេដឹកនាំ គណបក្ស សង្គ្រោះជាតិ នេះ មានន័យ ថា, មិន ខុស ពីលោក សម រង្ស៊ី ពេញចិត្ត ចង់ ឲ្យរបប ខ្មែរក្រហម វិលត្រឡប់ មកកាប់សម្លាប់ ខ្មែរ ជាថ្មី ទៀត នោះទេ។
ប្រតិកម្ម របស់លោក សុខ ឥសាន មន្ត្រី ជាន់ខ្ពស់ គណបក្ស ប្រជាជន កម្ពុជា នៅពេលនេះ នៅក្រោយ ពីប្រធាន គណបក្ស ប្រឆាំង បានបង្ហោះ នៅលើ បណ្ដាញ សង្គម ហ្វេសប៊ុក (Facebook) របស់លោក ប៉ុន្មានថ្ងៃ ជាប់ៗគ្នា ដោយចោទប្រកាន់ ថា, វៀតណាម បានខ្ចីដៃ មេដឹកនាំ បច្ចុប្បន្ន សម្លាប់ខ្មែរ នៅអំឡុង ទសវត្សរ៍ ឆ្នាំ៨០។
លោក សម រង្ស៊ី ដែលត្រូវ បានរដ្ឋាភិបាល បិទផ្លូវ វិលចូល ប្រទេសវិញ ចោទថា, លោក នាយករដ្ឋមន្ត្រី ហ៊ុន សែន អតីត អគ្គលេខាធិការ គណបក្ស ប្រជាជន បដិវត្តន៍ កម្ពុជា, លោក ហេង សំរិន ជាអតីត ប្រមុខរដ្ឋ, និងលោក ប៊ូ ថង អតីត រដ្ឋមន្ត្រី ក្រសួង ការពារជាតិ នៅសម័យនោះ សម្លាប់ខ្មែរ រាប់ម៉ឺននាក់ ក្រោមហេតុផល «ផែនការ ក៥»។ មេដឹកនាំ បក្សប្រឆាំង ដែលហ៊ុមព័ទ្ធ ទៅដោយ បណ្ដឹង នៅតុលាការ សរសេរទៀត ថា, ការប្រព្រឹត្ត បទឧក្រិដ្ឋ របស់ ឥស្សរជន ទាំងនេះ ព្រោះ តែ មានការ គាំទ្រ និងទ្រទ្រង់ យ៉ាងរឹងមាំ ពីបក្សកុម្មុយនិស្ត វៀតណាម ដែលខ្ចីដៃ សម្លាប់ខ្មែរ នៅសេសសល់ ពីរបប ប៉ុល ពត បន្តទៀត។
លោក សម រង្ស៊ី ព្រមានមន្ត្រីរដ្ឋាភិបាលដែលលោកចោទប្រកាន់ថា បានប្រើប្រាស់ «ផែនការ ក៥» ដើម្បី សម្លាប់ខ្មែរ នឹងត្រូវប្រឈមនៅតុលាការពេលណាមួយចំពោះការប្រព្រឹត្តបទឧក្រិដ្ឋប្រឆាំងមនុស្សជាតិនេះ។
ប្រតិកម្មតបនឹងការចោទប្រកាន់នេះ លោក សុខ ឥសាន មន្ត្រីជាន់ខ្ពស់គណបក្សប្រជាជនកម្ពុជា ចាត់ទុកសម្ដីរបស់លោក សម រង្ស៊ី ប្រឆាំង «ផែនការ ក៥» នៅពេលនេះថា ស្មើចង់ឲ្យមានរបបខ្មែរក្រហមវិលមកកាប់សម្លាប់ខ្មែរទៀត។ លោកបន្តថា តាមពិត «ផែនការ ក៥» នេះ គឺជាការបោសសំអាតកងកម្លាំងនៃរបប ប៉ុល ពត ដែលនៅសេសសល់ចុងក្រោយ ហើយជាការស្ដារប្រទេសឲ្យមានសន្តិភាពឡើងវិញប៉ុណ្ណោះ៖ «អ៊ីចឹង សម រង្ស៊ី គាត់និយាយហ្នឹង គឺគាត់វាយប្រហារមកលើផែនការ ក៥ បានសេចក្ដីថា គាត់ចង់ឲ្យប្រជាពលរដ្ឋកម្ពុជា ដែលបានរួចរស់ពីរបបប្រល័យពូជសាសន៍ហ្នឹង ចង់ឲ្យរបបប្រល័យពូជសាសន៍នឹងមកកាប់សម្លាប់បងប្អូនឡើងវិញ។»
របាយការណ៍ របស់ អង្គការ ឃ្លាំមើល សិទ្ធិមនុស្ស យូមែន រ៉ៃត៍ វ៉ច្ឆ (Human Rights Watch) ធ្លាប់បាន ចុះផ្សាយ កាលពីឆ្នាំ ២០១៥ ថា, មេបញ្ជាការ កងទ័ព វៀតណាម ឈ្មោះ ឡេ ដឹកថូ (Le Duc Tho) ទទួលបន្ទុក នៅកម្ពុជា ជាអ្នក បង្កើត «ផែនការ ក៥» នេះឡើង។ ក្រោយមកទៀត, រដ្ឋាភិបាល នៃរបប សាធារណរដ្ឋ ប្រជាមានិត កម្ពុជា បានអនុវត្ត «ផែនការ ក៥» ដែលចាប់ ពីថ្ងៃ ទី១៩ ខែកក្កដា ឆ្នាំ១៩៨៤, ហើយ បានបញ្ចប់ទៅវិញ នៅឆ្នាំ ១៩៨៨។ ចំពោះ «ផែនការ ក៥» នេះ មានន័យ ថា, កេណ្ឌ កម្លាំង កាប់ព្រៃ ការពារ កម្ពុជា។
ទាក់ទិន «ផែនការ ក៥» នេះ អតីតនាយករដ្ឋមន្ត្រីនៃរបបសាធារណរដ្ឋប្រជាមានិតកម្ពុជា ក្នុងអំឡុងទសវត្សរ៍ឆ្នាំ១៩៨២ លោក ប៉ែន សុវណ្ណ ត្រូវអាជ្ញាធរចាប់ដាក់គុកងងឹតនៅប្រទេស វៀតណាម ជាង ១០ឆ្នាំ ដោយសារតែ លោក ហ៊ានប្រឆាំង «ផែនការ ក៥» នេះ។
មន្ត្រីនាំពាក្យគណបក្សប្រជាជនកម្ពុជា
លោក សុខ ឥសាន ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី
កាលពីថ្ងៃទី៦ ខែកញ្ញា ឆ្នាំ២០១៦។ RFA
Photo: RFA
លោក សុខ ឥសាន មន្ត្រីជាន់ខ្ពស់បក្សកាន់អំណាចអះអាងថា ការដែលលោក ប៉ែន សុវណ្ណ ជាប់ពន្ធនាគារនៅប្រទេស វៀតណាម នេះ ព្រោះតែលោកប្រឆាំងនឹងវៀតណាម និងប្រឆាំង «ផែនការ ក៥»។ លោកបញ្ជាក់ថា តាមពិតទៅ «ផែនការ ក៥» នេះ ជាយុទ្ធសាស្ត្រមួយដ៏ល្អបំផុតដែលនាំឲ្យកម្ពុជា មានសុខសន្តិភាព និងស្ថិរភាពនយោបាយពេញលេញដល់សព្វថ្ងៃនេះ។
ជុំវិញរឿងនេះ លោក គឹម សុខ អ្នកឃ្លាំមើលសង្គម និងនយោបាយ អះអាងថា ផ្អែកលើរបាយការណ៍ស្រាវជ្រាវ «ផែនការ ក៥» នេះ បានសម្លាប់ខ្មែរបន្ថែមទៀតប្រមាណ ២០ម៉ឺននាក់ក្នុងចំណោមប្រជាជនជិត ១លាននាក់ក្នុងជំនាន់នោះ។ ភាគច្រើននៃអ្នកដែលត្រូវគេបង្ខំឲ្យបម្រើ «ផែនការ ក៥» នេះ ត្រូវបាត់បង់ជីវិតដោយការជាន់មីន ជំងឺគ្រុនចាញ់ និងការអត់អាហារ ហើយអ្នកដែលបាត់បង់ជីវិតទាំងនោះ ត្រូវរកឃើញថា ជាសិស្ស និស្សិត គ្រូបង្រៀន យុវជន និងពលរដ្ឋសាមញ្ញ។
លោក គឹម សុខ អ្នកឃ្លាំមើលសង្គម និងនយោបាយបញ្ជាក់ទៀតថា តាមពិត «ផែនការ ក៥» នេះ គឺជាយុទ្ធសាស្ត្រដែល វៀតណាម ឈ្លានពានកម្ពុជា និងជាការកាប់សម្លាប់ខ្មែរជាថ្មីម្ដងទៀត។ លោកបន្តថា មានពលរដ្ឋរាប់ម៉ឺននាក់ត្រូវស្លាប់ដោយ «ផែនការ ក៥» នេះ ដោយមិនទាន់រាប់បញ្ចូលមន្ត្រីជាន់ខ្ពស់ដែលប្រឆាំងផែនការ "ក៥" នេះនៅឡើយផង៖ «ផែនការ ក៥ គឺផែនការរបស់វៀតណាម មិនមែនទើបតែអនុវត្តនៅក្នុងឆ្នាំ១៩៨៥-១៩៨៦ ឬក៏ផែនការកើតឡើងនៅពេលហ្នឹងទេ កើតឡើងតាំងពីលោក ប៉ែន សុវណ្ណ ជាអ្នកដឹកនាំមកម៉េ្លះ។»
សព្វថ្ងៃប្រទេសកម្ពុជា មានច្បាប់ដាច់ដោយឡែកមួយផ្សេងទៀត គឺច្បាប់ប្រឆាំងជនណាមួយដែលមិនទទួលស្គាល់ថា មានអំពើប្រល័យពូជសាសន៍នៅចន្លោះពីខែមេសា ឆ្នាំ១៩៧៥ ដល់ខែមករា ឆ្នាំ១៩៧៩។ ខ្លឹមសារនៃច្បាប់ដែលរដ្ឋសភាអនុម័តក្រោយការស្នើសុំពីសមាជិកសភាលើសលប់ពីខាងបក្សកាន់អំណាច កាលពីឆ្នាំ២០១៣ គឺកំណត់ថា អ្នកដែលប្រឆាំងថា ពុំមានរបបខ្មែរក្រហម ត្រូវផ្ដន្ទាទោសដាក់ពន្ធនាគារពី ៦ខែ ដល់ ២ឆ្នាំ និងពិន័យជាប្រាក់ពី ១លាន ដល់ ៤លានរៀល។
បើទោះជាបែបណា អ្នកវិភាគយល់ឃើញថា ច្បាប់ដែលអនុម័តរួចហើយ ដែលរដ្ឋាភិបាលតាក់តែងឡើងប្រឆាំងអ្នករិះគន់ថា មិនមានរបបខ្មែរក្រហមនេះ គឺដើម្បីគាបសង្កត់ និងជាការចាប់បង្ខំឲ្យគេទទួលស្គាល់ថា មានរបបប្រល័យពូជសាសន៍ ក្រោមហេតុផលដើម្បីបម្រើឲ្យផលប្រយោជន៍នយោបាយរបស់បក្សប្រជាជនកម្ពុជា តែប៉ុណ្ណោះ៕
No comments:
Post a Comment