 |
| លោកហ៊ុន សែន (ឆ្វេង) និងនាយករដ្ឋមន្ត្រីវៀតណាម លោក ង្រ្វៀន សួនផុក(រូបថតពីហ្វេសប៊ុកលោកហ៊ុន សែន) |
នាយករដ្ឋមន្ត្រី កម្ពុជា និងវៀតណាម បង្ហាញ គំនិត ផ្ទុយគ្នា ចំពោះ វត្តមាន អាមេរិក
| នាយករដ្ឋមន្ត្រី កម្ពុជា និងវៀតណាម បានបង្ហាញ ការយល់ឃើញ ផ្ទុយគ្នា ចំពោះ វត្តមាន សហរដ្ឋ អាមេរិក ក្នុងការ ទំនាក់ទំនង ជាមួយ ប្រទេស ក្នុងតំបន់ អាស៊ាន ដោយមេដឹកនាំ កម្ពុជា ថា, អាមេរិក នាំ ឲ្យគ្រោះថ្នាក់។ ចំណែក ខាងវៀតណាម ថា, ជាការល្អ មានការ ចូលរួម ពីប្រទេសច្រើន។
នៅក្នុង កិច្ចពិភាក្សា ក្នុងវេទិកា សេដ្ឋកិច្ច ពិភពលោក ដែលមាន ផ្សព្វផ្សាយ តាមប្រព័ន្ធ អ៊ិនធើណែត នោះ គឺ លោក នាយករដ្ឋមន្ត្រី ហ៊ុន សែន លើកឡើង ថា, ប្រទេស ក្នុងតំបន់ និងមាន ការអភិវឌ្ឍន៍ ដោយសន្តិភាព ប្រសិនជា មិនមាន ការលូកដៃ ចូលប្រទេស ខាងក្រៅនោះ។ ជាមួយគ្នា នោះ លោក នាយករដ្ឋមន្ត្រី ក៏បាន លើកឡើង ពីអតីតកាល និងបច្ចុប្បន្ន ដែលអាមេរិក ចូលក្នុងតំបន់ នាំ ឲ្យមាន សង្គ្រាម នៅកម្ពុជា, ឡាវ, វៀតណាម និងបង្ក ជម្លោះ តានតឹង, ពិសេស គឺ ធ្វើ ឲ្យបណ្តា ប្រទេស សមាជិក អាស៊ាន មានជម្លោះ ជាមួយចិន។
លោក នាយករដ្ឋមន្ត្រី ហ៊ុន សែន ថ្លែងថា លោក មិន ចង់ឃើញ វត្តមាន អាមេរិក នៅក្នុងតំបន់ទេ, ហើយ លោក ក៏បានប្រាប់ ទៅមេដឹកនាំ ហ្វីលីពីន ជាសម្ព័ន្ធមិត្ត របស់ អាមេរិក ឲ្យពិចារណា ឡើងវិញ ក្នុងការផ្តល់ ទីតាំង ទ័ព ឲ្យអាមេរិក ឈរជើង។
ប៉ុន្តែ ក្នុងកិច្ចពិភាក្សានោះ នាយករដ្ឋមន្ត្រី វៀតណាម លោក ង្រ្វៀន សួនផុក មានប្រសាសន៍ ថា, បញ្ហារាំរ៉ៃ ជម្លោះ ជាប្រវត្តិសាស្ត្រ នៅសមុទ្រ ចិន ខាងត្បូង ក៏ដូច ជាការ អភិវឌ្ឍន៍ ផ្សេងៗ លោក ចង់ ឲ្យមាន ការចូលរួម ចរចា គ្រប់ភាគី -- មាន ចិន, អាមេរិក, អង្គការ សហប្រជាជាតិ, ការប្រើប្រាស់ ច្បាប់ អន្តរជាតិ, និង ភាគី ពាក់ព័ន្ធ ផ្សេងៗ ទៀត។
បច្ចុប្បន្នវៀតណាម កំពុងតែ រឹតចំណង មិត្តភាព ជាមួយ សហរដ្ឋអាមេរិក ខណៈ ប្រទេសនេះ កំពុង មានជម្លោះ ដែនសមុទ្រ ជាមួយចិន។
នៅក្នុងទេវិកាសេដ្ឋកិច្ចពិភពលោកនៅប្រទេសស្វីស ចាប់ពីថ្ងៃទី១៧ដល់ថ្ងៃទី២០ មានមេដឹកនាំ និង ឥស្សរជន ពីបណ្តាលប្រទេសនានាចំនួន៣២ជួបគ្នានៅទីនោះ ហើយក្រៅពីការប្រជុំធំពួកគេមានការជួបគ្នាជាទ្វេភាគីទៀត។
No comments:
Post a Comment