 |
| ផែនទីខេត្តរតនគិរី។ RFA |
អ្នកកាសែត និងមន្ត្រី អង្គការ ៧នាក់ អំពាវនាវ រកយុត្តិធម៌ បន្ទាប់ ពីរង អំពើហិង្សា នៅខេត្ត រតនគិរី
RFA |
ក្រុម សមត្ថកិច្ច ប៉ូលិស ស្រុកវើនសៃ
ខេត្ត រតនគិរី
បញ្ចប់ ការស៊ើបអង្កេត បឋម ទៅលើ ពាក្យបណ្ដឹង របស់ ក្រុមអ្នកកាសែត
និងសកម្មជន បរិស្ថាន មានគ្នា ៧នាក់ ដែលសង្ស័យ អ្នកជំនួញ ឈើ ម្នាក់
ថា ជាប់ពាក់ព័ន្ធ គម្រោង ធ្វើឃាត ពួកគេ ពេលព្យាយាម ស៊ើបអង្កេត បទល្មើស ព្រៃឈើ នៅទីរួមស្រុក វើនសៃ។
លទ្ធផល នៃការ ស៊ើបអង្កេត បឋម,
ក្រុមសមត្ថកិច្ច មិនទាន់ វាយតម្លៃ បាន ជាក់លាក់ នៅឡើយ
គ្រា ដែលសមត្ថកិច្ច បន្ត សុំគោលការណ៍ ទៅមន្ត្រី អយ្យការ ដើម្បី ស៊ើបអង្កេត បន្ថែម។
តំណាងក្រុមអ្នកសារព័ត៌មានក្នុងស្រុកមកពីអង្គភាពចំនួន៦
និងអង្គភាពការពារបរិស្ថានមួយរូប
អំពាវនាវសុំឲ្យសមត្ថកិច្ចនៃអាជ្ញាធរខេត្តរតនគិរី
ស៊ើបអង្កេតឲ្យបានហ្មត់ចត់ពាក់ព័ន្ធក្រុមមនុស្សមួយក្រុម
ដែលបានប្រើអំពើហិង្សាវាយប្រហារលើរថយន្តពួកគេ
ខណៈចុះយកព័ត៌មានពាក់ព័ន្ធបទល្មើសព្រៃឈើក្នុងស្រុកវើនសៃ។
ការអំពាវនាវនេះ ធ្វើឡើងនៅថ្ងៃទី៧ ខែកុម្ភៈ
បន្ទាប់ពីរថយន្តអ្នកកាសែតពីរគ្រឿងក្នុងចំណោមរថយន្តបីគ្រឿង
ត្រូវបានមនុស្សពីរក្រុម
មួយក្រុមព្យាយាមបើកគោយន្តបុករថយន្តអ្នកកាសែត
បន្ទាប់មកមនុស្សមួយក្រុមទៀត បានយកឈើបង្កប់ដែកគោលដាក់លើផ្លូវ
ដើម្បីបញ្ឈប់រថយន្ត ហើយមនុស្សប្រមាណ ១០នាក់ប្រដាប់ដោយដំបងឈើ
ដំបងដែក និងញញួរ
ព្រួតគ្នាវាយបំបែកកញ្ចក់រថយន្តអ្នកកាសែតកាលពីថ្ងៃទី១ ខែកុម្ភៈ
ខណៈក្រុមអ្នកកាសែតព្យាយាមរត់គេចពីការវាយប្រហារនេះ។
ប្រធានក្រុមប្រឹក្សាសារព័ត៌មានកម្ពុជា លោក សុខ
សុវណ្ណ ចាត់ទុកសកម្មភាពទាំងពីរលើកនេះ
ថាជាគម្រោងប៉ងធ្វើឃាតក្រុមអ្នកកាសែតពីសំណាក់ឈ្មួញរកស៊ីឈើខុសច្បាប់មួយរូបនៅតំបន់នោះ។
លោកកត់សម្គាល់ថា
អំពើហិង្សានេះកើតមានឡើងបន្ទាប់ពីក្រុមអ្នកកាសែតរកឃើញឈើត្រូវបានគេដឹកជញ្ជូនតាមទូកនៅតំបន់នោះ
ចំណែកក្រុមអ្នកដឹកជញ្ជូនឈើបញ្ជាក់ថា ជាឈើរបស់បុរសឈ្មោះ ម៉េង
មុខរបរប្រមូលទិញឈើខុសច្បាប់ដែលប្រជាពលរដ្ឋលួចកាប់ពីក្នុងព្រៃ៖
«ករណីយើងចាត់ទុកជាការប៉ុនប៉ងធ្វើឃាត ដើម្បីបំបាក់ស្មារតីអ្នកកាសែត។ ខ្ញុំចង់ឲ្យមានយុត្តិធម៌ ចង់ឲ្យមានភាពប្រឈមជាមួយគ្នាចំពោះមុខច្បាប់។»
អ្នកកាសែតទាំងពីរនាក់ គឺជានាយក នាយករង
និងជាអ្នកយកព័ត៌មានរបស់អង្គភាពក្រុមប្រឹក្សាអ្នកសារព័ត៌មានកម្ពុជា
កាសែតភ្នំពេញប្រ៉ែស កាសែតថ្ងៃនេះ សមាគមអ្នកសារព័ត៌មានប្រជាធិបតេយ្យ
អង្គការអភិរក្សឃ្លាំមើលធនធានធម្មជាតិ កាសែតជួយខ្មែរ
និងមជ្ឈមណ្ឌលព័ត៌មានថ្ងៃនេះ។
ទាក់ទងការចោទប្រកាន់នេះ
អធិការនគរបាលស្រុកវើនសៃ លោក ទឺ នូថង បញ្ជាក់ថា
ការស៊ើបអង្កេតបឋមរយៈពេលមួយសប្ដាហ៍របស់ប៉ូលិសស្រុក
មិនទាន់រកឃើញតម្រុយទាក់ទិនគម្រោងធ្វើឃាតអ្នកកាសែតនោះទេ។ លោកថា
ប៉ូលិសកំពុងបន្តនីតិវិធីសុំគោលការណ៍ពីមន្ត្រីស្ថាប័នអយ្យការស៊ើបអង្កេតបន្តទៀត
មុននឹងធ្វើការវាយតម្លៃជាក់លាក់ពីហេតុការណ៍កើតមានអំពើហិង្សាទៅលើក្រុមអ្នកកាសែតនេះ៖
«ខ្ញុំយកចិត្តទុកដាក់ស្រាវជ្រាវរឿងហ្នឹងយ៉ាងសកម្មបំផុត ហើយប៉ុន្តែអត់មានករណីបញ្ជាក់ណាមួយថា គេប៉ុនប៉ងធ្វើឃាតអ្នកកាសែតនោះទេ។ គាត់មកប្ដឹងយើងថា មានពួកមេប៉ុនប៉ង ប៉ុន្តែអត់មានអ្វីដាក់បន្ទុកទេ។»
កាលពីថ្ងៃទី៣ ខែកុម្ភៈ
ក្រុមអ្នកកាសែតបានធ្វើរបាយការណ៍ដាក់ជូនរដ្ឋមន្ត្រីក្រសួងព័ត៌មាន
ស្ដីពីអំពើហិង្សាលើក្រុមអ្នកសារព័ត៌មាន
ប្រយោជន៍សុំឲ្យសាមីក្រសួងជួយអន្តរាគមន៍ទាក់ទិនការប្រើអំពើហិង្សារំលោភសិទ្ធិអ្នកសារព័ត៌មាននេះ។
អនុរដ្ឋលេខាធិការក្រសួងព័ត៌មាន លោក អ៊ុក គឹមសេង
បញ្ជាក់ថា ក្រសួងបានទទួលរបាយការណ៍នោះហើយ
និងកំពុងចាត់ក្រុមការងារចុះពិនិត្យផ្ទៀងផ្ទាត់របាយការណ៍នេះ។
លោកថា អ្វីដែលសំខាន់
គឺអ្នកសារព័ត៌មានគ្មានគ្រោះថ្នាក់ពាក់ព័ន្ធការប្រើអំពើហិង្សា
ហេតុនេះការស៊ើបអង្កេតរកអ្នកប្រព្រឹត្តិ
គឺជាតួនាទីរបស់ក្រុមសមត្ថកិច្ចពាក់ព័ន្ធ
ដើម្បីកំណត់មុខសញ្ញាប្រព្រឹត្តល្មើសមកទទួលខុសត្រូវចំពោះអំពើហិង្សានេះ៖
«ទោះបីករណីនេះយើងមិនទាន់ដឹងថាយ៉ាងម៉េចក៏ដោយ ក៏ប៉ុន្តែឃើញអ្នកកាសែតទាំងអស់មានសុវត្ថិភាពធម្មតា ចំពោះខាងណាខុស ខាងណាត្រូវ ទុកឲ្យស្ថាប័នមានសមត្ថកិច្ច។ ក្រសួងព័ត៌មាន ពុំមានសមត្ថកិច្ចក្នុងការវិនិច្ឆ័យក្តីក្ដាំនោះទេ ក៏ប៉ុន្តែចង់ដឹងការពិតបន្ថែម តើមូលហេតុនាំឲ្យមានរឿងហ្នឹងឡើង កើតពីត្រឹមណា?»
របាយការណ៍បឋមរបស់ប៉ូលិសស្រុកវើនសៃ ឲ្យដឹងថា
បាតុភាពដែលកើតមានចំពោះអ្នកកាសែត
ទីមួយគឺជាគ្រោះថ្នាក់ចរាចរណ៍ដែលបង្កឡើងដោយរថយន្តដាច់ហ្វ្រាំង
និងទីពីរ គឺបង្កឡើងដោយយុវជនទំនើងមកពីក្រុងបានលុង៕
No comments:
Post a Comment