 |
| រថយន្តដឹកឈើបម្រុងឆ្លងដែនទៅវៀតណាម ក្រឡាប់នៅឃុំទ្រៀក ក្បែរច្រកព្រំដែនដូនរ័ត្ន ក្នុងស្រុកមេមត់ ខេត្តត្បូងឃ្មុំ កាលពីថ្ងៃទី២៧ វិច្ឆិកា ឆ្នាំ២០១៥។ RFA/Saut Sokprathna |
សង្គមស៊ីវិល ស្នើរដ្ឋាភិបាល ស៊ើបអង្កេត ភាព មិន ប្រក្រតី នៃការ នាំឈើ ទៅវៀតណាម
RFA / វិទ្យុ អាស៊ី សេរី | ១៦ កុម្ភៈ ២០១៧
ស្ដាប់ ឬ ទាញយកសំឡេង
មន្ត្រី សង្គមស៊ីវិល ដែលធ្វើ ការងារ ពាក់ព័ន្ធ ធនធាន ធម្មជាតិ លើកឡើង ថា, រាជរដ្ឋាភិបាល ឬស្ថាប័ន ពាក់ព័ន្ធ ត្រូវ ស៊ើបអង្កេត ជុំវិញ របាយការណ៍ ស្ដីពី ចំនួនឈើ នាំចេញ ទៅប្រទេស វៀតណាម កាលពីឆ្នាំ ២០១៦ មានភាព មិន ប្រក្រតី។ ការស្នើនេះ បន្ទាប់ ពីមាន របាយការណ៍ របស់ គយវៀតណាម បង្ហាញ ថា, ទិន្នន័យ នាំឈើចេញ ទៅប្រទេស វៀតណាម គឺ មានទំហំ ច្រើន ជាងទិន្នន័យ របស់ គយខ្មែរ រាប់សិបដង។ ភាពខុសប្លែក គ្នានេះ សង្គមស៊ីវិល ថា, អាចមាន អំពើ ពុករលួយ ជាប្រព័ន្ធ តែម្តង។
មន្ត្រីសង្គមស៊ីវិលបញ្ជាក់ថា ដើម្បីបង្ហាញពីតម្លាភាពនៃការនាំឈើចេញទៅក្រៅប្រទេស ពិសេសទៅប្រទេសវៀតណាម ស្ថាប័នពាក់ព័ន្ធមួយចំនួនដូចជា គណៈកម្មាធិការជាតិទប់ស្កាត់ និងបង្ក្រាបបទល្មើសព្រៃឈើ ព្រមទាំងអង្គភាពប្រឆាំងអំពើពុករលួយ ត្រូវស៊ើបអង្កេតឲ្យបានច្បាស់លាស់។ បន្ថែមពីនេះ ដើម្បីជៀសវាងបាត់បង់លុយរបស់ជាតិ និងជាវិធានការមួយទប់ស្កាត់មិនឲ្យមានករណីកាប់បំផ្លាញព្រៃឈើបន្ថែមទៀត។
អ្នកសម្របសម្រួលលេខាធិការដ្ឋានបណ្ដាញការពារព្រៃឡង់ លោក សេង សុខហេង បញ្ជាក់ថា បើទោះបីជារាជរដ្ឋាភិបាលបានចេញបម្រាមមិនឲ្យមានការនាំឈើចេញទៅក្រៅប្រទេសក៏ដោយ ប៉ុន្តែហាក់មិនមានប្រសិទ្ធភាពឡើយ។ បន្ថែមពីនេះ ដើម្បីឆ្លើយទៅនឹងព័ត៌មានស្ដីពីទិន្នន័យខុសគ្នារវាងគយខ្មែរ និងគយវៀតណាម លើបញ្ហានាំឈើចេញ លោកថាជាការទទួលខុសត្រូវរបស់រដ្ឋាភិបាលក្នុងការស៊ើបអង្កេត ដើម្បីបង្ហាញការពិត ជៀសវាងធ្វើឲ្យករណីនេះដូចគ្នាទៅនឹងករណីនាំខ្សាច់ចេញទៅក្រៅប្រទេសដែរ៖ «រឿងនេះ គឺត្រូវទទួលខុសត្រូវទាំងអស់គ្នា។ បានន័យថា រដ្ឋាភិបាលតែម្តង ក្រសួងពាក់ព័ន្ធ។»
ទិន្នន័យនាំឈើចេញទៅប្រទេសវៀតណាម ដែលមានភាពខុសគ្នាខ្លាំងរវាងអគ្គនាយកដ្ឋានគយកម្ពុជា និងគយវៀតណាម នេះ ត្រូវបានចុះផ្សាយដោយព្រឹត្តិបត្រ ឌឹ ខេមបូឌា ដេលី (Cambodia Daily) កាលពីថ្ងៃទី១៤ កុម្ភៈ។ ព្រឹត្តិបត្រនេះបញ្ជាក់ថា កាលពីឆ្នាំ២០១៦ ចំនួនឈើនាំចេញពីកម្ពុជា ចូលទៅប្រទេសវៀតណាម នៅតែកើតមាន បើទោះបីជារាជរដ្ឋាភិបាលបានហាមឃាត់តាំងពីខែមករា យ៉ាងណាក៏ដោយ។
ជាងនេះទៀត អត្ថបទដដែលបង្ហាញថា ទិន្នន័យគយវៀតណាម ស្ដីពីចំនួនឈើនាំចូលពីប្រទេសកម្ពុជា គឺមានជិត ២០ម៉ឺនម៉ែត្រគូប (១៧១.៤៣៨ម៉ែត្រគូប) ខណៈអគ្គនាយកដ្ឋានគយកម្ពុជា បង្ហាញមានចំនួនជាង ៤ពាន់ម៉ែត្រគូប (៤.២៣០ម៉ែត្រគូប) ប៉ុណ្ណោះ។ ចំនួននេះ លោក សេង សុខហេង យល់ថា អាចមានច្រើនជាងរបាយការណ៍គយវៀតណាម ទៀត ពីព្រោះករណីនាំឈើចេញទៅវៀតណាម តាមច្រកព្រំដែនតូចៗ ឬច្រករបៀង គឺតែងតែកើតមានឡើងជារឿយៗ។
ទាក់ទងបញ្ហានេះ អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មាធិការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី មានប្រសាសន៍នៅថ្ងៃទី១៥ កុម្ភៈ ថា បេសកកម្មរបស់គណៈកម្មាធិការជាតិ គឺនៅតែបន្ត។ បេសកកម្មទាំងនោះមានដូចជា ការត្រួតពិនិត្យបទល្មើសក្នុងព្រៃ ការដឹកជញ្ជូនឈើតាមផ្លូវ ទាំងឈើស្របច្បាប់ និងខុសច្បាប់ ត្រួតពិនិត្យតាមព្រំដែន ព្រមទាំងត្រួតពិនិត្យកន្លែងធ្វើអាជីវកម្មឈើទាំងអស់ ជាដើម។
លោកបន្ថែមថា របាយការណ៍តាមបណ្ដាខេត្តស្ដីពីការនាំឈើដោយខុសច្បាប់ចេញទៅប្រទេសវៀតណាម កន្លងមក គឺមិនមានទេ ប៉ុន្តែអាចមានករណីលួចលាក់តាមច្រករបៀងខ្លះ។ ចំណែករបាយការណ៍គយវៀតណាម ដែលបង្ហាញថា មានឈើចូលពីស្រុកខ្មែរយ៉ាងច្រើន ដែលខុសគ្នាទៅនឹងរបាយការណ៍គយកម្ពុជា គឺគណៈកម្មាធិការនេះមិនបានយកមកពិភាក្សាទេ ព្រោះមន្ត្រីធ្វើការតាមជំនាញរៀងខ្លួន៖ «ដូចខ្ញុំជម្រាបជូនអ៊ីចឹង ចំពោះរបាយការណ៍ផ្សេងគឺយើងមិនអាចទទួលស្គាល់បានទេ គឺយើងទទួលបានតែរបាយការណ៍ដែលជាជំនាញ។»
គណៈកម្មាធិការជាតិមួយនេះត្រូវបានបង្កើតឡើងកាលពីថ្ងៃទី១៥ ខែមករា ឆ្នាំ២០១៦ ដោយមានទិសដៅទប់ស្កាត់ និងបង្ក្រាបបទល្មើសព្រៃឈើគ្រប់ប្រភេទនៅភូមិភាគឦសាន ពិសេសទប់ស្កាត់មិនឲ្យមានករណីរត់ពន្ធឈើចេញទៅប្រទេសវៀតណាម។ លើសពីនេះ ស្វែងរកអ្នកដែលពាក់ព័ន្ធបទល្មើស និងបញ្ជូនសំណុំរឿងទៅតុលាការ។
គណៈកម្មាធិការជាតិទប់ស្កាត់ និងបង្ក្រាបបទល្មើសព្រៃឈើ បង្កើតឡើងប្រមាណបីខែ គឺបង្ក្រាបបានឈើប្រណិតជិត ១០ម៉ឺនម៉ែត្រគូប និងដាក់ដេញថ្លៃលក់បានតម្លៃជិត ២០លានដុល្លារសហរដ្ឋអាមេរិកកាលពីពេលកន្លងទៅ។ លើសពីនេះ ថែមទាំងបានបញ្ជូនសំណុំរឿងទៅតុលាការចំនួនជិត ៦០ករណី។
លោក អេង ហ៊ី មិនទាន់អាចសរុបរបាយការណ៍បង្ក្រាបបទល្មើសចុងក្រោយបានទេ។ ជាមួយគ្នានេះ លោកស្នើឲ្យពលរដ្ឋ ឬឈ្មួញដែលកំពុងជាប់ពាក់ព័ន្ធបទល្មើស ឲ្យបញ្ឈប់សកម្មភាពជាបន្ទាន់ ហើយមេខ្លោងធំៗ អាជ្ញាធរកំពុងស៊ើបអង្កេតដើម្បីឈានទៅចាប់ខ្លួន មិនមែនចាប់បានតែជនតូចតាចដូចការចោទប្រកាន់កន្លងទៅនោះឡើយ។
លោក សេង សុខហេង មើលឃើញថា ការបង្ក្រាបបទល្មើសឈ្មួញធំៗមិនមានប្រសិទ្ធភាពទេ ពីព្រោះឈ្មួញធំៗមួយចំនួនជាមន្ត្រីអាជ្ញាធរ និងមានមួយចំនួនជាប់ពាក់ព័ន្ធជាមួយមន្ត្រីរាជរដ្ឋាភិបាលតែម្តង។
មន្ត្រីអង្កេតជាន់ខ្ពស់សមាគមអាដហុក (ADHOC) លោក ប៉ែន ប៊ុណ្ណារ៍ កត់សម្គាល់ថា បទល្មើសកាប់ និងដឹកជញ្ជូនឈើទៅប្រទេសវៀតណាម នៅតែកើតមាន។ ចំណែករបាយការណ៍ស្ដីពីចំនួនឈើចេញពីប្រទេសកម្ពុជា ទៅវៀតណាម មានភាពខុសគ្នាដូចមេឃ និងដីពេលនេះ គឺបង្ហាញពីចំណុចខ្សោយក្នុងការគ្រប់គ្រង និងបង្ហាញថាមានអំពើពុករលួយជាប្រព័ន្ធ៖ «ភាពខុសគ្នារវាងតួលេខគយខ្មែរ និងគយវៀតណាម បង្ហាញថាវាមានអំពើពុករលួយជាប្រព័ន្ធ។ អ៊ីចឹងទាមទារឲ្យមានការចុះអង្កេត។»
លោក ប៉ែន ប៊ុណ្ណារ៍ ឲ្យដឹងដែរថា កន្លងទៅធ្លាប់មានព័ត៌មានស្ដីពីភាពខុសគ្នារវាងប្រទេសវៀតណាម និងរាជរដ្ឋាភិបាលខ្មែរក្នុងការនាំឈើចេញដែលមានទំហំទឹកប្រាក់រាប់រយលានដុល្លារ។ លោកមានជំនឿថា ប្រជាពលរដ្ឋគឺជាអ្នកដាក់សម្ពាធដល់រាជរដ្ឋាភិបាល ដើម្បីជំរុញឲ្យធ្វើការងារទាំងនេះ ព្រមទាំងចាប់ជនល្មើសដែលជាមន្ត្រីឧកញ៉ាធំៗមួយចំនួនយកមកផ្ដន្ទាទោសតាមច្បាប់៕
No comments:
Post a Comment