The Anti-Sam Rainsy Law

Monday, March 27, 2017

គណៈកម្មាធិការ​ សិទ្ធិ​មនុស្ស ​រដ្ឋាភិបាល ​ថា, ​លោក ហ៊ុន សែន មាន​ស្នាដៃ​ លើក​កម្ពស់​ សិទ្ធិ​មនុស្ស​ ប៉ុន​មហា​មេឃ | Govt Human Rights Committee says Hun Sen has talent uplifting human rights as big as the sky

ប្រធាន​គណៈកម្មាធិការ​សិទ្ធិមនុស្ស​កម្ពុជា​លោក កែវ រ៉េមី (រូប​កណ្ដាល) ថ្លែង​ក្នុង​សន្និសីទ​សារព័ត៌មាន​នៅ​ព្រឹក​ថ្ងៃ​ទី២៧ ខែ​មីនា ឆ្នាំ​២០១៧។ RFA/Cheu Sideth
ប្រធាន​គណៈកម្មាធិការ​សិទ្ធិមនុស្ស​កម្ពុជា​លោក កែវ រ៉េមី (រូប​កណ្ដាល) ថ្លែង​ក្នុង​សន្និសីទ​សារព័ត៌មាន​នៅ​ព្រឹក​ថ្ងៃ​ទី២៧ ខែ​មីនា ឆ្នាំ​២០១៧។ RFA/Cheu Sideth

គណៈកម្មាធិការ​ សិទ្ធិ​មនុស្ស ​រដ្ឋាភិបាល ​ថា, ​លោក ហ៊ុន សែន មាន​ស្នាដៃ​ លើក​កម្ពស់​ សិទ្ធិ​មនុស្ស​ ប៉ុន​មហា​មេឃ

RFA / វិទ្យុ អាស៊ី សេរី | ២៧ មិនា ២០១៧

 

ប្រធាន​ គណៈកម្មាធិការ​ សិទ្ធិ​មនុស្ស​ របស់ ​រដ្ឋាភិបាល ថ្លែង​ថា, លោក​ នាយក​រដ្ឋមន្ត្រី ហ៊ុន សែន មាន​ស្នាដៃ​ ការពារ និង​លើក​កម្ពស់​ សិទ្ធិ​មនុស្ស​ ធំធេង​ ប៉ុន​មហា​មេឃ តែ ​គ្មាន ​នរណា ​មើល​ឃើញ និង​ផ្ដល់​ ពាន​រង្វាន់​ឡើយ បែរ​ ជា​នាំ​គ្នា​ និយាយ​ បន្តុះបង្អាប់​ ទៅ​វិញ។


ការ​ថ្លែង​បែប​នេះ ដើម្បី​ឆ្លើយតប​ទៅ​ក្រុម​សមាជិក​សភា​អាស៊ាន​មួយ​ក្រុម ដែល​រក​ឃើញ​ថា ការ​រំលោភ​បំពាន​សិទ្ធិ​មនុស្ស និង​ការ​រំខាន​យាយី​គណបក្ស​ប្រឆាំង​នៅ​កម្ពុជា កំពុង​រុញ​ច្រាន​ឲ្យ​របប​លទ្ធិប្រជាធិបតេយ្យ​រំកិល​ដល់​មាត់​ទ្វារ​មរណៈ។

មន្ត្រី​រដ្ឋាភិបាល​ផ្នែក​សិទ្ធិ​មនុស្ស ចាត់​ទុក​ក្រុម​សមាជិក​សភា​អាស៊ាន​មួយ​ក្រុម កាល​ពី​ថ្ងៃ​ទី​២០ មីនា ដែល​បាន​ចេញ​របាយការណ៍​ស្ដីពី សំឡេង​ជួង​មរណៈ​នៃ​លទ្ធិប្រជាធិបតេយ្យ​នៅ​កម្ពុជា ថា​ជា​ការ​ចេញ​របាយការណ៍​ខុស​ពី​ការពិត ហើយ​ក្រុម​សមាជិក​សភា​អាស៊ាន​ទាំងនេះ​គ្រាន់​តែ​ជា​ក្រុម​ដ៏​តូច​មួយ ដែល​មិន​តំណាង​ឲ្យ​ក្របខ័ណ្ឌ​សភា​អាស៊ាន​ដែល​គេ​ទទួល​ស្គាល់​ឡើយ។

ប្រធាន​គណៈកម្មាធិការ​សិទ្ធិ​មនុស្ស​កម្ពុជា លោក កែវ រ៉េមី ថ្លែង​នៅ​ក្នុង​សន្និសីទ​កាសែត​នៅ​ថ្ងៃ​ទី​២៧ មីនា ថា រយៈពេល​កន្លង​ទៅ កម្ពុជា មិន​ដែល​ធ្វើ​ឲ្យ​ប៉ះពាល់​ដល់​បណ្ដា​ប្រទេស​ជា​សមាជិក​អាស៊ាន ជុំវិញ​បញ្ហា​សិទ្ធិ​មនុស្ស​ឡើយ បើ​ទោះ​ជា​ដឹង​ថា​ប្រទេស​ជា​សមាជិក​អាស៊ាន​ខ្លះ​មាន​ការ​រឹតត្បិត​សិទ្ធិ​សេរីភាព ការ​វាយ​តំណាងរាស្ត្រ និង​ការ​រំលោភ​សិទ្ធិ​មនុស្ស​ធ្ងន់ធ្ងរ​ជាង​កម្ពុជា ក្ដី។
លោក​បន្ត​ថា ពាក់ព័ន្ធ​បញ្ហា​សិទ្ធិ​មនុស្ស គឺ​អាស្រ័យ​លើ​ទំនៀមទម្លាប់ ប្រពៃណី វប្បធម៌ និង​សេដ្ឋកិច្ច​របស់​ប្រជាជន​នៃ​ប្រទេស​នីមួយៗ និង​មិន​អាស្រ័យ​លើ​ស្តង់ដារ​សិទ្ធិ​មនុស្ស​នៃ​ប្រទេស​ណា​មួយ ដែល​ប្រទេស​មួយ​ទៀត​ត្រូវ​យក​គំរូ​តាម​ឡើយ។

លោក កែវ រ៉េមី ក៏​បាន​អួត​សរសើរ​ពី​ស្នាដៃ​ប៉ុន​មហា​មេឃ​របស់​លោក​នាយក​រដ្ឋមន្ត្រី ហ៊ុន សែន ដែល​បាន​រំដោះ​ប្រជាជន​ពី​របប​កាប់​សម្លាប់​ខ្មែរ​ក្រហម និង​ការ​ធ្វើ​នយោបាយ​ឈ្នះៗ​ដើម្បី​រក្សា​សុខ​សន្តិភាព និង​ស្ថិរភាព​នៅ​ក្នុង​ប្រទេស ដែល​ជា​ការ​ស្រោចស្រង់​ឡើង​វិញ​នូវ​សិទ្ធិ​រស់​រាន​ជា​មូលដ្ឋាន​របស់​ពលរដ្ឋ

ប្រតិកម្ម​ច្រាន​ចោល​របាយការណ៍​របស់​សមាជិក​សភា​អាស៊ាន និង​បង្អួត​មក​វិញ​នូវ​ស្នាដៃ​ការពារ​សិទ្ធិ​មនុស្ស​របស់​លោក ហ៊ុន សែន ដ៏​ធំធេង​នៅ​ពេល​នេះ បន្ទាប់​ពី​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស (APHR) មក​ពី​ប្រទេស​ម៉ាឡេស៊ី ហ្វីលីពីន និង​ថៃ ជាដើម បាន​ចេញ​ផ្សាយ​របាយការណ៍​ជា​សាធារណៈ​នៅ​ថ្ងៃ​ទី​២០ មីនា ដែល​ជា​របាយការណ៍​ចងក្រង និង​វិភាគ​លើ​ការ​វាយ​ប្រហារ​សមាជិក​សភា ការ​ធ្វើ​ទុក្ខបុកម្នេញ​តាម​ផ្លូវ​តុលាការ ការ​រំលោភ​នីតិវិធី​ជុំវិញ​អភ័យ​ឯកសិទ្ធិ​សភា ការ​រំលោភ​បំពាន​លើ​រូប​រាងកាយ និង​ចុង​ក្រោយ​ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ ដែល​អាច​រំលាយ​គណបក្ស​ប្រឆាំង​នៅ​កម្ពុជា ថា​ប្រៀប​ដូចជា​អាវុធ​ដ៏​គ្រោះថ្នាក់​មួយ​ចាក់​សម្លាប់​លទ្ធិប្រជាធិបតេយ្យ​នៅ​កម្ពុជា។

ចាប់​តាំង​ពី​ក្រោយ​ការ​បោះឆ្នោត​ជាតិ​ឆ្នាំ​២០១៣ ដែល​មាន​ការ​វាយ​បង្ក្រាប និង​ការ​បាញ់​សម្លាប់​កម្មករ​តវ៉ា​អហិង្សា​ទាមទារ​ដំឡើង​ប្រាក់​ខែ ការ​បង្ក្រាប​លើ​ក្រុម​តវ៉ា​គណបក្ស​ប្រឆាំង​នៅ​ក្បែរ​ទីលាន​ប្រជាធិបតេយ្យ និង​ការ​វាយ​តំណាងរាស្ត្រ​គណបក្ស​ប្រឆាំង​ទាំង​កណ្ដាល​ថ្ងៃ​ត្រង់​នៅ​ខាង​មុខ​រដ្ឋសភា ជាដើម គឺ​សុទ្ធសឹងតែ​ជា​ព្រឹត្តិការណ៍​ធំៗ​នាំ​ឲ្យ​រដ្ឋាភិបាល​របស់​លោក ហ៊ុន សែន កាន់​តែ​រង​ការ​រិះគន់​យ៉ាង​ខ្លាំង​នៅ​លើ​ឆាក​ជាតិ និង​អន្តរជាតិ។

ប្រធាន​គ្រប់គ្រង​ផ្នែក​អង្កេត​នៃ​អង្គការ​លីកាដូ (LICADHO) លោក អំ សំអាត ថ្លែង​ថា លោក​មិន​ចាប់​អារម្មណ៍​នឹង​ការ​ចេញ​មុខ​ច្រាន​ចោល​របាយការណ៍​របស់​ក្រុម​សមាជិក​សភា​អាស៊ាន ពី​ប្រធាន​គណៈកម្មាធិការ​សិទ្ធិ​មនុស្ស​កម្ពុជា នៅ​ពេល​នេះ​ឡើយ ព្រោះ​វា​ជា​វប្បធម៌​របស់​រដ្ឋាភិបាល​បច្ចុប្បន្ន ដែល​តែង​រិះគន់​បក​វិញ​ថា​ជា​របាយការណ៍​លម្អៀង និង​មាន​និន្នាការ​នយោបាយ នៅ​ពេល​មាន​អង្គការ​អន្តរជាតិ និង​សហគមន៍​អន្តរជាតិ និយាយ​ដល់​បញ្ហា​សិទ្ធិ​មនុស្ស​នៅ​កម្ពុជា។ ប៉ុន្តែ​អ្វី​ដែល​ជា​ការ​យល់​ឃើញ​របស់​លោក អំ សំអាត គឺ​របាយការណ៍​មួយៗ គឺ​តែង​មាន​ការ​សំអាង​ទៅ​លើ​ការ​រក​ឃើញ និង​សង្កេត​ឃើញ ដែល​រដ្ឋាភិបាល​គួរ​តែ​យក​មក​គិត​ពិចារណា

របាយការណ៍​ពី​សមាជិក​សភា​អាស៊ាន​បញ្ជាក់​ទៀត​ថា ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ ដែល​នាំ​ឲ្យ​ប្រធាន​គណបក្ស​ប្រឆាំង លោក សម រង្ស៊ី លាលែង​ពី​ប្រធាន​បក្ស គឺ​ជា​បរិបទ​បង្ក្រាប​ថ្មី​មក​លើ​អ្នក​ប្រឆាំង ហើយ​ការ​វាយ​ដំ​សមាជិក​សភា សង្គម​ស៊ីវិល​ដែល​រិះគន់​រដ្ឋាភិបាល គឺ​ជា​ការ​ទប់ស្កាត់​មិន​ឲ្យ​មាន​អ្នក​និយាយ​ប្រឆាំង​រដ្ឋាភិបាល។ សកម្មភាព​បែប​នេះ នាំ​ឲ្យ​អន្តរាយ​ដល់​ការ​បោះឆ្នោត​នៅ​ឆ្នាំ​២០១៧ និង​ឆ្នាំ​២០១៨ ខាង​មុខ ហើយ​នាំ​ឲ្យ​កម្ពុជា ក្លាយ​ជា​ប្រទេស​ផ្ដាច់ការ ស្ថិត​ក្រោម​ការ​ដឹកនាំ​ដោយ​គណបក្ស​តែ​មួយ។

អ្នក​តាមដាន​ស្ថានការណ៍​នយោបាយ លោក សូ ចន្ថា យល់​ថា របាយការណ៍​របស់​ក្រុម​សមាជិក​សភា​អាស៊ាន​ដែល​ចេញ​ផ្សាយ ហាក់​ស៊ី​គ្នា​ទៅ​នឹង​ការ​រំលោភ​សិទ្ធិ​មនុស្ស និង​ការ​រំលោភ​សិទ្ធិ​សេរីភាព​នៅ​កម្ពុជា។ លោក​ថ្លែង​ថា ប្រសិន​បើ​ស្ថានភាព​នយោបាយ​ត្រូវ​បាន​គេ​រំលោភ និង​អនុវត្ត​ផ្ទុយ​ពី​គោលការណ៍​ច្បាប់ នឹង​ធ្វើ​ឲ្យ​ប្រជាប្រិយភាព​របស់​កម្ពុជា ត្រូវ​បាត់បង់​នៅ​លើ​ឆាក​អន្តរជាតិ

អ្នក​វិភាគ​នយោបាយ​បញ្ជាក់​ថា ប្រសិន​បើ​ការ​លើក​ឡើង​របស់​អន្តរជាតិ អាច​ជា​ផល​ចំណេញ​សម្រាប់​ប្រជាជន និង​ប្រទេស​ជាតិ រដ្ឋាភិបាល​គួរ​ធ្វើ​ការ​កែប្រែ​ដើម្បី​ឲ្យ​សមស្រប​ទៅ​នឹង​ប្រទេស​កាន់​លទ្ធិប្រជាធិបតេយ្យ និង​គោរព​គោលការណ៍​សិទ្ធិ​មនុស្ស៕

No comments:

Post a Comment