 |
| អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) លោក នី ចរិយា (ស្ដាំ) ត្រូវបានប៉ូលិសបញ្ជូនទៅតុលាការកំពូល នៅថ្ងៃទី៥ ខែកញ្ញា ឆ្នាំ២០១៦។ RFA/Yang Chandara |
តុលាការ កំពូល សម្រេច ឲ្យលោក នី ចរិយា នៅជាប់ឃុំ បណ្ដោះអាសន្ន ដដែល
RFA / វិទ្យុ អាស៊ី សេរី | ៣១ មិនា ២០១៧
អង្គជំនុំជម្រះ តុលាការ កំពូល នៅព្រឹកថ្ងៃ ទី៣១ ខែមីនា បានសម្រេច តម្កល់ សាលដីកា របស់ សាលាឧទ្ធរណ៍ ឲ្យលោក នី ចរិយា នៅជាប់ ក្នុងមន្ទីរឃុំឃាំង បណ្ដោះអាសន្ន ដដែល។ មេធាវីការពារក្ដីយល់ថា ការសម្រេចនេះ មិន បានផ្ដល់ យុត្តិធម៌ ដល់កូនក្ដី របស់ខ្លួន ទេ។
មេធាវី សំ សុគង់ ដែលការពារក្ដីឲ្យលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប.) ថ្លែងប្រាប់អ្នកកាសែតនៅតុលាការកំពូល ព្រឹកថ្ងៃទី៣១ ខែមីនា ថា ការសម្រេចរបស់អង្គជំនុំជម្រះតុលាការកំពូល និងសាលាឧទ្ធរណ៍ដែលឲ្យលោក នី ចរិយា ជាប់ក្នុងមន្ទីរឃុំឃាំងបន្តទៀត ព្រោះតែជាបទឧក្រិដ្ឋនោះ មិនមែនជាសម្អាងមានលក្ខណៈត្រឹមត្រូវ ហើយអាចទទួលយកបានទេ។
លោកមេធាវី សំ សុគង់៖ «ការសម្រេចរបស់សាលាឧទ្ធរណ៍ ហើយនិងតុលាការកំពូល សម្អាងហេតុនោះ គឺពាក់ព័ន្ធតែនឹងការចោទប្រកាន់កូនក្ដីខ្ញុំហ្នឹងពីបទឧក្រិដ្ឋ គឺបទសមគំនិតក្នុងការសូកប៉ាន់សាក្សី។ ប៉ុន្តែនៅក្នុងច្បាប់ ការចោទប្រកាន់ពីបទឧក្រិដ្ឋ មិនឧក្រិដ្ឋក៏ដោយ ក៏មិនមែនជាមូលហេតុនៃការដាក់នៅក្រៅឃុំដែរ ដោយសារនៅក្នុងច្បាប់ គឺគេគិតអំពីសេរីភាព និងសិទ្ធិរបស់ជនត្រូវចោទ។»
ការច្រានចោលបណ្ដឹងសុំនៅក្រៅឃុំរបស់មន្ត្រី គ.ជ.ប លោក នី ចរិយា គឺសម្រេចដោយប្រធានក្រុមប្រឹក្សាជំនុំជម្រះរបស់តុលាការកំពូល គឺលោក ឃឹម ប៉ុណ្ណ នៅថ្ងៃទី៣១ ខែមីនា ដោយតម្កល់សាលដីកាឃុំខ្លួនរបស់សាលាឧទ្ធរណ៍នៅជាបានការដដែល។
កាលពីខែតុលា ឆ្នាំ២០១៦ សភាស៊ើបសួរសាលាឧទ្ធរណ៍បានសម្រេចបដិសេធបណ្ដឹងរបស់មេធាវី សំ សុគង់ ម្ដងហើយ ដែលសុំឲ្យលោក នី ចរិយា ជាកូនក្ដីលោកបាននៅក្រៅឃុំបណ្ដោះអាសន្នដើម្បីព្យាបាលជំងឺប្រចាំកាយ។
លោក សំ សុគង់ បញ្ជាក់ ថា, លោក បានដាក់ សម្អាងហេតុ គ្រប់គ្រាន់ ទៅតុលាការ កំពូល នេះ៖ «សម្អាងហេតុដែលយើងបានស្នើសុំទៅតុលាការកំពូលនោះ គឺយើងបានលើកឡើងអំពីច្បាប់ទាក់ទងនឹងសេរីភាព ទីពីរ ទាក់ទងទៅនឹងការដាក់ធានាជាប្រាក់ ក៏ដូចជាទាក់ទងនឹងតួនាទីរបស់កូនក្ដីហ្នឹង ដែលជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត ក៏ដូចជាគាត់មានលំនៅឋាន និងក្រុម...។»
ភរិយារបស់លោក នី ចរិយា គឺលោកស្រី យ៉ែម
ចន្ថា ផ្ដល់បទសម្ភាសន៍ដល់អាស៊ីសេរី នៅថ្ងៃទី៣១ ខែមីនា ឆ្នាំ២០១៧
នាតុលាការកំពូល។ RFA/Ou Banung
RFA/Ou Banung
ភរិយារបស់លោក នី ចរិយា គឺលោកស្រី យ៉ែម ចន្ថា បានបន្ទរថា លោកស្រីអស់សង្ឃឹមពេលដែលតុលាការកំពូល សម្រេចឲ្យប្ដីរបស់លោកស្រីនៅបន្តជាប់ឃុំ។ លោកស្រីបន្តថា តុលាការគួរតែអនុញ្ញាតឲ្យប្ដីរបស់លោកស្រីនៅក្រៅឃុំ ព្រោះប្ដីលោកស្រីគ្មានបំណងរត់គេច ហើយបានសហការល្អជាមួយតុលាការ។ ម្យ៉ាងទៀត ប្ដីលោកស្រីកំពុងមានជំងឺត្រូវការការព្យាបាល៖ «ប្ដីខ្ញុំគាត់ឈឺមែន។ គាត់នៅក្រៅក៏ឈឺដែរ តែគាត់មិនមែនឈឺធ្ងន់អ៊ីចឹងទេ ព្រោះនៅក្រៅគាត់មានពេទ្យ ហើយឈឺល្មមៗ យើងរត់ទៅពេទ្យបានហើយ...។»
នៅក្រោយពេលតុលាការកំពូល បដិសេធការសុំនៅក្រៅឃុំរបស់លោក នី ចរិយា លោកមេធាវី សំ សុគង់ មានប្រសាសន៍បន្ថែមថា លោករំពឹងលើសាលាដំបូងរាជធានីភ្នំពេញ ព្រោះលោកបានដាក់ពាក្យកាលពីខែកុម្ភៈ ដោយសុំឲ្យបិទការស៊ើបសួរ និងបញ្ជូនរឿងកូនក្ដីលោកទៅជំនុំជម្រះឲ្យបានឆាប់។ ទន្ទឹមគ្នានោះ លោកក៏សុំឲ្យចៅក្រមស៊ើបសួរសាលាដំបូងសម្រេចលើកលែងចោទប្រកាន់ ឬអនុញ្ញាតឲ្យនៅក្រៅឃុំជាបណ្ដោះអាសន្នដែរ។
លោក នី ចរិយា ជាអគ្គលេខាធិការរង គ.ជ.ប រួមជាមួយមន្ត្រីសិទ្ធិមនុស្សរបស់សមាគមអាដហុក (Adhoc) ចំនួន ៤រូបផ្សេងទៀត ត្រូវបានអង្គភាពប្រឆាំងអំពើពុករលួយឃាត់ខ្លួន កាលពីខែមេសា ឆ្នាំ២០១៦។ អ្នកទាំង ៥ រងការចោទប្រកាន់ថា មានជាប់ពាក់ព័ន្ធនឹងបទសូកប៉ាន់សាក្សី និងសមគំនិតសូកប៉ាន់សាក្សីក្នុងរឿងអាស្រូវស្នេហារវាងប្រធានគណបក្សសង្គ្រោះជាតិ លោក កឹម សុខា និងអ្នកនាង ខុម ចាន់តារាទី ហៅស្រីមុំ៕
No comments:
Post a Comment