 |
| រថយន្ដដឹកឈើសម្ដេចសង្ឃ ទេព្យ វង្ស (បូ សាវី) |
សម្ដេចសង្ឃ ទេព វង្ស បដិសេធ ដឹកឈើ នៅខេត្ដ សៀមរាប
| កាលពីម្សិលមិញសមត្ថកិច្ចរដ្ឋបាលព្រៃឈើ និងមន្ដ្រីបរិស្ថានបានឃាត់រថយន្ដយីឌុបដឹកឈើពីរគ្រឿង ដោយចោទថា ដឹកឈើលើសច្បាប់កំណត់។
សមត្ថកិច្ចបានដកស្រង់សម្ដីប្រធានសហគមន៍បឹងពារាំងលោក គង់ មង្គល ថា ឈើនោះជារបស់សម្ដេចសង្ឃ ទេព វង្ស ដឹកចេញពីក្រុមហ៊ុនកូម៉ូលីថិក អិលធីឌី យកទៅអភិវឌ្ឍន៍តំបន់ទេសចរណ៍បឹងពារំាង ក្នុងសង្កាត់ជ្រាវ ក្រុងសៀមរាប។
ប្រធានមន្ទីរព័ត៌មានខេត្ដសៀមរាបលោក លីវ សុខុន បានសេចក្ដីប្រកាសព័ត៌មាន នៅថ្ងៃទី៩ខែមិនានេះ ដោយការពារសម្ដេចសង្ឃ ទេព វង្ស ថា ឈើពីររថយន្ដយីឌុបនោះ មិនជាប់ពាក់ព័ន្ធនឹងព្រះអង្គនោះទេ។
សេចក្ដីប្រកាសព័ត៌មានបន្ដថា ឈើទាំងនោះជាឈើរបស់សហគមន៍បឹងពារាំង ដែលដឹកនាំដោយចៅសង្កាត់ជ្រាវ លោក ក្អោប រ៉ន ព្រះចៅអធិការវត្ដព្រិន និងប្រធានសហគមន៍បឹងពារាំងលោក គង់ មង្គល។
សេចក្ដីប្រកាសដដែលអះអាងថា ឈើទាំងនោះដឹកចេញពីក្រុមហ៊ុនរោងម៉ាស៊ីនកែឆ្នៃឈើឈ្មោះ កូម៉ូលីថិក អិលធីឌី ស្ថិតនៅស្រុកគូលែន ខេត្ដព្រះវិហារ មានចំនួន៥៨ម៉ែត្រគូប ខណៈអ្នកដឹកជញ្ជូន ថាមានចំនួន៦៦ម៉ែត្រគូប។
កាលពីថ្ងៃទី០៩ខែមិនានេះ នាយខ័ណ្ឌរដ្ឋបាលព្រៃឈើខេត្ដសៀមរាប លោក ម៉ុង ប៊ុនលីម ឲ្យដឹងថា ការឃាត់រថយន្ដដឹកឈើធន់យក្សនេះ បន្ទាប់ពីមន្ដ្រីបរិស្ថានរកឃើញថា បានដឹកឈើលើសច្បាប់កំណត់ចេញពីរោងម៉ាស៊ីនកែឆ្នៃឈើ របស់ក្រុមហ៊ុនមួយឈ្មោះកូម៉ូលីថិក អិលធីឌី ស្ថិតនៅក្នុងស្រុកគូលែន ខេត្ដព្រះវិហារ ដើម្បី យកទៅធ្វើ កន្លែងទស្សនា នៅតំបន់ ទេសចរ នាខេត្ដ សៀមរាប។
លោកបន្ដថា តាមការអះអាង របស់អ្នកទទួលខុសត្រូវលើការដឹកការជញ្ជូនឈើនេះ លោកថា ឈើនោះជាឈើរបស់សម្ដេចសង្ឃ ទេព្យ វង្ស។ លោកបន្ថែមថា តាមច្បាប់អនុញ្ញាតពីប្រធានមន្ទីរបរិស្ថានខេត្ដព្រះវិហារ លោក ពឹង ទ្រីដា បានអនុញ្ញាតឲ្យដឹកជញ្ជូនមួយរថយន្ដត្រឹម១៥ម៉ែត្រគូប ប៉ុន្ដែអ្នកទទួលខុសត្រូវ បានដឹកលើសពីច្បាប់កំណត់។
ទោះជាយ៉ាងណា ក្រោយពីសមត្ថកិច្ចជំនាញត្រួតពិនិត្យ ស្ថាប័នរដ្ឋបាលព្រៃឈើ បានយក ថយន្ដ ទាំងពីរគ្រឿង នឹងឈើ មួយចំនួន ដែលើសច្បាប់ កំណត់ ទៅក្សាទុក នៅផ្នែក រដ្ឋបាល ព្រៃស្រុក បន្ទាយស្រី កាលពីម្សិលមិញ៕
No comments:
Post a Comment