 |
| លោក ជុន ច័ន្ទបុត្រ លោក ឡុង រី និង អ្នកស្រី មូរ សុខហួរ រាប់ពីឆ្វេងទៅស្តាំ |
តុលាការ កោះហៅ នាយករង វិទ្យុអាស៊ីសេរី លោក ជុន ច័ន្ទបុត្រ
| ២២ មេសា ២០១៧កាលពីព្រឹកថ្ងៃទី១៩ ខែមេសានេះ លោក ជុន ច័ន្ទបុត្រ ត្រូវបានគេប្រទះឃើញមានវត្តមានជាមួយតំណាងរាស្ត្រគណបក្សសង្គ្រោះជាតិ អ្នកស្រី មូរ សុខហួរ និងលោក ឡុង រី នៅពេលចូលទៅសួរសុខទុក្ខសកម្មជនដទៃទៀតរបស់បក្សប្រឆាំង ដែលកំពុងជាប់ឃុំនៅក្នុងពន្ធនាគារព្រៃស។
នៅក្នុងបញ្ជីចុះឈ្មោះអ្នកចូលសួរសុខទុក្ខអ្នកជាប់ឃុំនោះ លោក ជុន ច័ន្ទបុត្រ ឬ ហួត ឃីនវុទ្ធី ត្រូវបានគេចោទថា បានបន្លំខ្លួនជាជំនួយការតំណាងរាស្ត្របក្សប្រឆាំង ដែលត្រូវបានគេចាត់ទុកថា ជាការភូតកុហកសមត្ថកិច្ច។
ក្នុងដីកាកោះចេញកាលពីថ្ងៃម្សិលមិញនេះ ព្រះរាជអាជ្ញារងសាលាដំបូងរាជធានីភ្នំពេញ លោក សៀង សុខ បានសម្រេចកោះហៅលោក ហួត ឃីនវុទ្ធី ហៅ ជុន ច័ន្ទបុត្រ ឲ្យចូលបំភ្លឺនៅព្រឹកថ្ងៃទី០២ខែឧសភា ជុំវិញការចោទថា បានផ្ដល់ព័ត៌មានភូតកុហកបន្លំខ្លួនចូលពន្ធនាគារ។
ក្រៅពីលោក ជុន ច័ន្ទបុត្រ តំណាងរាស្ត្រ អ្នកស្រី មូរ សុខហួរ និងលោក ឡុង រី ក៏ត្រូវបានតុលាការហៅឲ្យចូលបំភ្លឺផងដែរ នៅសប្ដាហ៍ក្រោយផងដែរ នៅក្នុងដំណើររឿងតែមួយនេះ។
តុលាការបានសម្រេចចេញដីកាកោះហៅបែបនេះ មួយថ្ងៃក្រោយពីអ្នកនាំពាក្យក្រសួងមហាផ្ទៃ លោក ខៀវ សុភ័គ លើកឡើងថា លោក ជុន ច័ន្ទបុត្រ អាចជាប់ពន្ធនាគារ ប្រសិនបើត្រូវបានគេរកឃើញថា មានចេតនាបន្លំសមត្ថកិច្ចចូលសួរសុខទុក្ខអ្នកទោសជាមួយមន្ត្រីបក្សប្រឆាំង៕
No comments:
Post a Comment