 |
| លោក ម៉ៅ មុនីវណ្ណ តំណាងរាស្ត្រមណ្ឌលកំពង់ចាម ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី២២ ខែឧសភា ឆ្នាំ២០១៥។ |
បក្សប្រឆាំង ថា, ការចាកចេញ របស់ សកម្មជន នៅមូលដ្ឋាន មិន ប៉ះពាល់ សំឡេងគាំទ្រ
RFA / វិទ្យុ អាស៊ី សេរី | ២៣ មេសា ២០១៧
មន្ត្រី ជាន់ខ្ពស់ គណបក្ស ប្រឆាំង និងអ្នកវិភាគ ថា, ការចាកចេញ របស់ ក្រុម សកម្មជន និងជំទប់ឃុំ បក្សប្រឆាំង ទៅចូលរួម ជាមួយ គណបក្ស កាន់អំណាច នៅមូលដ្ឋាន នឹងមិន ធ្វើឲ្យ ប៉ះពាល់ ដល់លទ្ធផល ការបោះឆ្នោត ជ្រើសរើស ក្រុមប្រឹក្សា ឃុំ-សង្កាត់ នោះទេ។ ប៉ុន្តែ គណបក្ស កាន់អំណាច និងសង្គមស៊ីវិល ដែលធ្វើការ ផ្នែកបោះឆ្នោត យល់ថា នឹងមាន ផលប៉ះពាល់ ខ្លះដែរ។
ស្របពេលដែលការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃទី៤ មិថុនា កាន់តែខិតជិតមកដល់ ព័ត៌មាននៃការចាកចេញរបស់សកម្មជន ឬជំទប់ឃុំបក្សប្រឆាំង ទៅចូលរួមជាមួយបក្សកាន់អំណាចនៅតាមមូលដ្ឋាន កើតមានជាហូរហែ។ តែមន្ត្រីបក្សប្រឆាំងថា នេះជាការបំផ្លើសព័ត៌មាន។
មន្ត្រី ជាន់ខ្ពស់ គណបក្ស សង្គ្រោះជាតិ លោក ម៉ៅ មុនីវណ្ណ ថា, សកម្មជន ដែលចាកចេញ គឺ ជាសកម្មជន ដដែលៗ, ហើយ នេះ គ្រាន់តែ ជាយុទ្ធសាស្ត្រ នយោបាយ តែប៉ុណ្ណោះ។ លោក ថា គណបក្សសង្គ្រោះជាតិ មិនចាប់អារម្មណ៍នឹងរឿងនេះទេ ហើយការចាកចេញរបស់សកម្មជនបក្សប្រឆាំងទាំងនោះ នឹងមិនធ្វើឲ្យប៉ះពាល់ដល់លទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់នាពេលខាងមុខនោះទេ៖ «មិន ប៉ះពាល់ អីទេ... គណបក្ស សង្គ្រោះជាតិ នៅតែ ឈ្នះឆ្នោត គគ្រឹកគគ្រេង ដដែល។ ខ្ញុំ យល់ឃើញ ថា អាហ្នឹង វា ជាយុទ្ធសាស្ត្រ នយោបាយ ដដែលៗ។»
ជាទូទៅឲ្យតែការបោះឆ្នោតជិតមកដល់ សកម្មជនរបស់គណបក្សប្រឆាំងមួយចំនួន តែងតែចូលរួមជាមួយគណបក្សកាន់អំណាច។ ក្រោយចាកចេញពីគណបក្សប្រឆាំងហើយ សកម្មជន ឬមន្ត្រីជាន់ខ្ពស់ទាំងនោះ អះអាងស្រដៀងគ្នាថា ដោយសារបក្សប្រឆាំងបក្ខពួកនិយម គ្រួសារនិយម ស៊ីសំណូក ឬបក្សប្រឆាំងគ្មានបានអភិវឌ្ឍអ្វី ជាដើម។
អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ការចាកចេញរបស់សកម្មជនបក្សប្រឆាំង នឹងជួយឲ្យបក្សកាន់អំណាចកើនសំឡេងឆ្នោតតាមឃុំ-សង្កាត់៖ «ខ្ញុំយល់ថា អាហ្នឹងវាបង្កើននូវបរិមាណរបស់គណបក្សដែលចូល ក៏ប៉ុន្ដែគណបក្សប្រជាជន ដឹងស្រាប់ហើយ ថាសមាជិកជាង ៥លាននាក់ បើគ្រាន់តែយកសមាជិកចាស់ដែលមានស្រាប់ជាង ៥លាននាក់ មកបោះឆ្នោតហ្នឹង វាដឹងតែឈ្នះ ហៅថាស្វ័យប្រវត្តិហើយ មិនបាច់ខំទេ។»
គណបក្សដែលបានដាក់បេក្ខភាពគ្រប់ឃុំ-សង្កាត់ទូទាំងប្រទេសនេះ តែងតែអួតអាងថា នឹងឈ្នះឆ្នោត ហើយគ្រប់គ្រងឃុំ-សង្កាត់ទូទាំងប្រទេសច្រើនលើសលប់រៀងៗខ្លួន។ លោក សម រង្ស៊ី អតីតប្រធានគណបក្សសង្គ្រោះជាតិ ថានឹងឈ្នះឆ្នោតឃុំ-សង្កាត់។ ឯលោក កឹម សុខា ប្រធានបក្សប្រឆាំង ប្រាប់អ្នកគាំទ្រក្រៅប្រទេសដូចលោក សម រង្ស៊ី ដែរ។ តែលោកនាយករដ្ឋមន្ត្រី ព្រមាននឹងមានសង្គ្រាម បើគណបក្សរបស់លោកចាញ់ឆ្នោត។
នាយកប្រតិបត្តិអង្គការនិកហ្វិច (NICFEC) លោក សំ គន្ធាមី ថាការរត់ចេញរបស់សកម្មជននេះមានឥទ្ធិពលដល់ការបោះឆ្នោតក្រុមប្រឹក្សាឃុំ-សង្កាត់។ លោកយល់ថា បើបក្សប្រឆាំងគ្មានវិធានការដោះស្រាយបញ្ហានេះទេ បក្សប្រឆាំងអាចបាត់បង់ប្រជាប្រិយភាពខ្លះនៅតាមមូលដ្ឋាន៖ «វាជះឥទ្ធិពលដែរ កាលណាគណបក្សមួយដែលមានសកម្មជន ឬមួយក៏បេក្ខជន គាត់លាឈប់ពីគណបក្សហ្នឹង មានន័យថាគាត់អត់ពេញចិត្តរឿងអីមួយហើយ បានគាត់លាឈប់ហ្នឹងណា... អាហ្នឹងវាជះឥទ្ធិពលដល់គណបក្សសង្គ្រោះជាតិ ហើយ...។»
ទោះជាបែបនេះក្ដី លោក ម៉ៅ មុនីវណ្ណ អះអាងថា លទ្ធផលបោះឆ្នោតឃុំ-សង្កាត់ វាអាស្រ័យលើពលរដ្ឋ។ មន្ត្រីជាន់ខ្ពស់បក្សប្រឆាំងថា កន្លងទៅ សកម្មភាពបែបនេះកើតឡើងច្រើនហើយ ប៉ុន្តែគណបក្សប្រឆាំងនៅតែអាចឈ្នះឆ្នោតនៅមូលដ្ឋានបាន។
អ្នកវិភាគនយោបាយ លោក សូ ចន្ថា មើលឃើញថា ការចាកចេញរបស់សកម្មជនបក្សប្រឆាំង មិនមែនជារឿងចម្លែកទេ។ លោកថា គ្រាន់តែការចាកចេញរបស់សកម្មជនបក្សមិនធ្វើឲ្យប៉ះពាល់ដល់សំឡេងគាំទ្របក្សនោះទេ។ តែផ្ទុយទៅវិញ លោកយល់ថា គណបក្សប្រឆាំងនឹងកើនសំឡេងដោយភ្ជាប់ឧទាហរណ៍ទៅនឹងការបោះឆ្នោតជ្រើសតាំងតំណាងរាស្ត្រអាណត្តិទី៥ ដែលកាលណោះ សំឡេងគាំទ្រគណបក្សប្រឆាំងមានការកើនឡើងគួរឲ្យកត់សម្គាល់៖ «យើងអាចធ្វើការវាយតម្លៃបានថា ទី១ គឺចរន្តរបស់ពលរដ្ឋគាត់ចង់ផ្លាស់ប្ដូរគណបក្សនយោបាយ ដោយសារតែគាត់មានការអាក់អន់ចិត្តជាដើមជាមួយគណបក្សប្រឆាំងនោះ។ ទី២ អាចជាសេណារីយ៉ូ ឬអាចជាការរៀបចំរបស់បក្សកាន់អំណាច ដើម្បីបង្ហាញពីរូបភាពនយោបាយទៅសាធារណមតិថា បក្សប្រឆាំងអស់ការគាំទ្រជាដើម។»
យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ មានរយៈពេល ១៤ថ្ងៃ ចាប់ពីថ្ងៃទី១០ ខែឧសភា រហូតដល់ថ្ងៃទី២ ខែមិថុនា។ ប៉ុន្តែគណបក្សទាំងពីរដែលបានដាក់បេក្ខភាពមេឃុំទូទាំងប្រទេស បានបង្កើនការចុះមូលដ្ឋានចាប់តាំងពីមុនយុទ្ធនាការឃោសនាទៅទៀត៕
No comments:
Post a Comment