 |
| ពលរដ្ឋមានជម្លោះដីធ្លីជាមួយក្រុមហ៊ុន អិន.ខេ.វី (NKV) នៅស្រុករមាសហែក ខេត្តស្វាយរៀង នាំគ្នាទៅទប់ស្កាត់គ្រឿងចក្ររបស់ក្រុមហ៊ុនដែលបន្តឈូសឆាយនៅលើដីកំពុងមានជម្លោះ កាលពីព្រឹកថ្ងៃទី២៤ ខែឧសភា ឆ្នាំ២០១៧។ Photo provided |
ពលរដ្ឋ មានជម្លោះ ដីធ្លី នៅរមាសហែក នាំគ្នា ទប់ស្កាត់ គ្រឿងចក្រ ក្រុមហ៊ុន ឈូសឆាយដី
RFA / វិទ្យុ អាស៊ី សេរី | ២៤ ឧសភា ២០១៧
ប្រជាពលរដ្ឋ មានជម្លោះ ដីធ្លី នៅស្រុក រមាសហែក ខេត្ត ស្វាយរៀង នាំគ្នា ទៅទប់ស្កាត់ គ្រឿងចក្រ របស់ ក្រុមហ៊ុន ដែលបន្ត ឈូសឆាយ នៅលើដី កំពុង មានជម្លោះ នៅព្រឹក ថ្ងៃ ទី២៤ ខែឧសភា។ សកម្មភាព របស់ ពលរដ្ឋនេះ ត្រូវ បានកម្លាំង ប្រដាប់អាវុធ ជាច្រើននាក់ ចូលទៅ រារាំង។ រីឯ អភិបាលស្រុក រមាសហែក សន្យាថា អាជ្ញាធរខេត្ត នឹងចុះ ដោះស្រាយ ទំនាស់ ដីធ្លីនេះ នៅក្រោយ ការបោះឆ្នោត ឃុំ-សង្កាត់។
ទំនាស់ដីធ្លី រវាង ប្រជាពលរដ្ឋ នៅឃុំ អំពិល និងនៅឃុំ គគីរ ប្រមាណ ៤៤០ គ្រួសារ ក្នុងស្រុក រមាសហែក ខេត្ត ស្វាយរៀង ជាមួយ ក្រុមហ៊ុន អិនខេ.វី (NKV) ដែលទទួលសិទ្ធិ វិនិយោគ ដាំអំពៅ លើដី របស់រដ្ឋ ទំហំ ប្រមាណ ជិត ៧០០ ហិកតារ បានចាប់ផ្ដើម កក្រើក ខ្លាំងឡើងវិញ រយៈពេល ប៉ុន្មានថ្ងៃ ចុងក្រោយនេះ ខណៈ ពុំមាន ដំណោះស្រាយ ពីអាជ្ញាធរ, ហើយ ខាងក្រុមហ៊ុន នៅតែ ប្រើគ្រឿងចក្រ ចូលឈូសឆាយ ដី ជម្លោះ នោះ។
តំណាងប្រជាពលរដ្ឋ គឺលោកស្រី ខៀវ សារ៉ុន រៀបរាប់ថា ពួកគាត់ប្រមាណ ២០០នាក់ នៅព្រឹកថ្ងៃទី២៤ ខែឧសភា បានលើកគ្នាទៅទប់ស្កាត់គ្រឿងចក្ររបស់ក្រុមហ៊ុននៅលើដីទំនាស់នោះ ប៉ុន្តែពុំមានអំពើហិង្សាកើតឡើងឡើយ ទោះបីជាមានកម្លាំងប្រដាប់អាវុធជាច្រើននាក់ បានឈរជើងការពារក្រុមហ៊ុន ព្រមទាំងប្រមាថ គំរាមកំហែងមកលើពួកគាត់ក្តី។
លោកស្រីបន្តថា ពលរដ្ឋស្នើឲ្យក្រុមហ៊ុនផ្អាកការឈូសឆាយសិន ដើម្បីជជែកដោះស្រាយឲ្យចប់ចុងចប់ដើម ព្រោះថា ពលរដ្ឋមានជំហរចង់បានដីនោះយកមកកាន់កាប់សម្រាប់បង្កបង្កើនផលចិញ្ចឹមជីវិត ព្រោះបច្ចុប្បន្ននេះ ជីវភាពពួកគាត់កាន់តែធ្លាក់ដុនដាប ហើយអ្នកខ្លះបង្ខំចិត្តធ្វើចំណាកស្រុកទៅក្រៅប្រទេស៖ «ទោះបីជាបក្សណាជាប់ឆ្នោតក៏ដោយ ក៏ពួកខ្ញុំនៅតែតវ៉ាដីនេះដែរ ព្រោះបើពួកខ្ញុំអត់ដីនេះ ពួកខ្ញុំងាប់អស់ហើយ មិនដឹងទៅរកស៊ីអីណាបានទេ។ ខ្ញុំធ្លាប់រស់នៅលើដីនេះមួយជីវិតហើយ។»
អ្នកភូមិរៀបរាប់ថា ដីនោះពួកគាត់ធ្លាប់ដាំដុះអាស្រ័យផលពីឆ្នាំ១៩៨០ ដល់ឆ្នាំ១៩៨៤ ក្រោយមកអាជ្ញាធរយកដីនោះទៅរក្សាទុកក្រោមហេតុផលថា ជាសម្បត្តិរបស់រដ្ឋ។ ក្រោយមកទៀត អ្នកភូមិបាននាំគ្នាតវ៉ាកាន់កាប់លើដីនោះវិញជាបន្តបន្ទាប់។ លុះដល់ចុងឆ្នាំ២០១០ អាជ្ញាធរបានសម្បទានដីនៅតំបន់នោះទៅឲ្យក្រុមហ៊ុន អិន.ខេ.វី របស់ឥណ្ឌា ក្នុងរូបភាពដាំអំពៅ ប៉ុន្តែក្រោយមកពលរដ្ឋឮដំណឹងថា ម្ចាស់ក្រុមហ៊ុននោះ បានក្ស័យធនបាត់ខ្លួនមួយរយៈ ហើយឃើញមានសកម្មភាពឈូសឆាយដីនោះឡើងវិញ។
អភិបាលស្រុករមាសហែក លោក ពេញ ជា មានប្រសាសន៍ថា លោកបានជូនដំណឹងឲ្យក្រុមហ៊ុនផ្អាកសកម្មភាពហើយ បន្ទាប់ពីមានការតវ៉ាពីប្រជាពលរដ្ឋ។ ទន្ទឹមគ្នានេះ លោកសន្យាថា អាជ្ញាធរថ្នាក់ខេត្តនឹងចុះដោះស្រាយជម្លោះដីធ្លីនៅក្រោយការបោះឆ្នោតឃុំ-សង្កាត់៖ «ខ្ញុំជម្រាបជូនថា ក្រោយការបោះឆ្នោតឃុំ-សង្កាត់នេះ ខាងខេត្តនេះគេទៅដោះស្រាយហើយ។ ខេត្តគេមានគោលការណ៍អីយ៉ាងម៉េចៗ ខ្ញុំបានរាយការណ៍មកខេត្តអស់ហើយ។»
កាលពីថ្ងៃទី២៣ ខែឧសភា ប្រជាពលរដ្ឋមានជម្លោះដីធ្លីទាំងនេះប្រមាណ ៤០០នាក់ ក៏បានលើកគ្នាទៅដល់សាលាឃុំអំពិល ដើម្បីសុំកិច្ចអន្តរាគមន៍ និងជួបពិភាក្សាជាមួយមេឃុំឈ្មោះលោក អឹម សារី ដែរ ប៉ុន្តែមេឃុំរូបនេះ បានយកលេសគេចវេះ និងមិនព្រមចេញមកជួបពួកគាត់ឡើយ។
អគ្គលេខាធិការសម្ព័ន្ធសហគមន៍កសិករកម្ពុជា លោក ថេង សាវឿន យល់ថា អាជ្ញាធរថ្នាក់ក្រោមហាក់ដូចជាគ្មានឆន្ទៈដោះស្រាយឡើយ បើទោះបីមានកិច្ចអន្តរាគមន៍ពីស្ថាប័នថ្នាក់ជាតិរួមមានរដ្ឋសភា ទីស្ដីការគណៈរដ្ឋមន្ត្រី ក្រសួងដែនដី និងក្រសួងកសិកម្មក៏ដោយ ពោលគឺអាជ្ញាធរថ្នាក់ក្រោមបានត្រឹមតែសន្យាម្ដងហើយម្ដងទៀតដែលគួរអោយសោកស្ដាយ៖ «ខ្ញុំគិតថា អាជ្ញាធរគួរតែសិក្សាហើយឈនៅលើភាពជាក់ស្ដែងនៃប្រជាពលរដ្ឋដែលកាន់កាប់ដីធ្លី ហើយនឹងធ្វើការយ៉ាងណាផ្តល់ដីធ្លីជូនប្រជាពលរដ្ឋឲ្យបានសមស្របនឹងទៅតាមការស្នើសុំរបស់ប្រជាពលរដ្ឋ ពីព្រោះថា អ្វីដែលពួកគាត់ស្នើសុំក៏ដូចជាទាមទារកន្លងមកនេះ ដោយសារតែពួកគាត់កាន់កាប់ និងប្រើប្រាស់ដីធ្លីនេះជាយូរឆ្នាំមកហើយ កាន់កាប់តាំងពីមុនច្បាប់ភូមិបាលចេញទៀត។»
ផ្ទៃដីជិត ៧០០ហិកតារ ដែលអ្នកភូមិតវ៉ានោះ ជាប់ពាក់ព័ន្ធជាមួយប្រជាពលរដ្ឋចំនួន ៥ភូមិ គឺភូមិរមាសហែក ភូមិស្រែឫស្សី ភូមិអំពិល ភូមិស្រែពពេល ភូមិកំពង់ត្របែក ស្ថិតក្នុងឃុំគគីរ និងឃុំអំពិល ស្រុករមាសហែក ខេត្តស្វាយរៀង។ អ្នកភូមិកំពុងជ្រួលច្របល់ជាថ្មី ហើយស្នើឲ្យរដ្ឋាភិបាលដកដីសម្បទាននោះមកឲ្យប្រជាពលរដ្ឋដាំដុះចិញ្ចឹមជីវិតវិញ៕
No comments:
Post a Comment