 |
| នាយរងសេនាធិការចម្រុះនៃកងយោធពលខេមរភូមិន្ទ លោក ហ៊ុន ម៉ាណែត ថ្លែងក្នុងពិធីសែនក្រុងពាលីនៃការប្រកួតកីឡាយោធា កាលពីថ្ងៃទី៥ ខែមករា ឆ្នាំ២០១៧ នាកោះពេជ្រ រាជធានីភ្នំពេញ។ RFA/Brach Chev |
មន្ត្រី បដិសេធ ថា លោក ហ៊ុន ម៉ាណែត មិន ដែលអន្តរាគមន៍ សុំសញ្ជាតិខ្មែរ ឲ្យជនជាតិ ប៉ាគីស្ថាន
RFA / វិទ្យុ អាស៊ី សេរី | ១៤ ឧសភា ២០១៧
ស្ដាប់ ឬ ទាញយកសំឡេង
មន្ត្រី ក្រសួង មហាផ្ទៃ អះអាង នៅថ្ងៃ ទី១៣ ខែឧសភា ថា, កូនប្រុសច្បង លោក នាយករដ្ឋមន្ត្រី ហ៊ុន សែន, លោក ហ៊ុន ម៉ាណែត, មិនបាន អន្តរាគមន៍ ទៅក្រសួង មហាផ្ទៃ ដើម្បី សុំសញ្ជាតិ ខ្មែរ ឲ្យមិត្តភ័ក្ដិ លោក ជាជនជាតិ ប៉ាគីស្ថាន (Pakistan) ឈ្មោះ ចូសេហ្វ ម៉ាត់ស៊ូ (Joseph Matthews) ឡើយ។ ការអះអាងនេះនៅក្រោយ ពីម្ចាស់ ហ្វេសប៊ុក (Facebook) ឈ្មោះ «ធ្លាយហើយ» បានបង្ហោះ លិខិត រដ្ឋមន្ត្រី ក្រសួង មហាផ្ទៃ លោក ស ខេង ផ្ញើទៅកាន់ លោក ហ៊ុន សែន ពីការស្នើសុំ សញ្ជាតិខ្មែរ របស់លោក ចូសេហ្វ ម៉ាត់ស៊ូ។
ការបែកធ្លាយ សារ ពីការសុំ អន្តរាគមន៍ ដើម្បី បានសញ្ជាតិខ្មែរ របស់ ជនជាតិ ប៉ាគីស្ថាន ឈ្មោះ ចូសេហ្វ ម៉ាត់ស៊ូ ពីលោក ហ៊ុន ម៉ាណែត បានកើតឡើង តាំងពីខែ ដើមខែ មីនា។
ក្នុងសារបែកធ្លាយកាលពីដើមខែមីនា នោះ លោក ចូសេហ្វ ម៉ាត់ស៊ូ បានសរសេរទៅកាន់លោក ហ៊ុន ម៉ាណែត កាលពីថ្ងៃទី១៧ ខែវិច្ឆិកា ឆ្នាំ២០១៦ ដើម្បីសុំសញ្ជាតិខ្មែរតាមរយៈការដោះដូរគម្រោងមួយដែលមានឈ្មោះថា Psychological Tactics: Fear Factor ឬជាភាសាខ្មែរ ហៅថា យុទ្ធវិធី បែបចិត្តសាស្ត្រ សម្រាប់ ការបំភិតបំភ័យ ដែលជាផ្នែក មួយ នៃយុទ្ធសាស្ត្រ បោះឆ្នោត។ នៅថ្ងៃ ទី១៦ ខែធ្នូ ឆ្នាំ២០១៦, លោក ចូសេហ្វ ម៉ាស៊ូ បានសរសេរទៅកាន់លោក ហ៊ុន ម៉ាណែត ម្ដងទៀត ដោយបង្ហាញពីសេចក្ដីត្រេកអរដែលបុរសរូបនេះទទួលបានសញ្ជាតិខ្មែរដូចបំណង ហើយប្ដេជ្ញាបម្រើ គ្រួសារ ត្រកូល «ហ៊ុន» តាមជំនាញ និងសមត្ថភាព ដែលគាត់មាន។
ទោះជាយ៉ាងណា ការបែកធ្លាយព័ត៌មាននេះមិនត្រូវបានលោក ហ៊ុន ម៉ាណែត និងលោក ចូសេហ្វ ម៉ាត់ស៊ូ ចេញមុខបំភ្លឺឡើយ។ ប៉ុន្តែរហូតមកដល់ថ្ងៃទី១២ ខែឧសភា ទើបម្ចាស់ហ្វេសប៊ុក ឈ្មោះ «ធ្លាយហើយ» បានទម្លាយ លិខិត ដែលមាន ហត្ថលេខា លោក ឧបនាយករដ្ឋមន្ត្រី , រដ្ឋម ន្ត្រីក្រ សួងមហាផ្ទៃ លោក ស ខេង ផ្ញើទៅកាន់ លោក នាយករដ្ឋមន្ត្រី ហ៊ុន សែន ពីការស្នើសុំសញ្ជាតិខ្មែររបស់លោក ចូសេហ្វ ម៉ាត់ស៊ូ។
ក្នុងលិខិតចុះថ្ងៃទី៧ ខែតុលា ឆ្នាំ២០១៦ ផ្ញើទៅកាន់លោក ហ៊ុន សែន លោក ស ខេង បានបញ្ជាក់ប្រាប់លោក ហ៊ុន សែន ថា លោក ចូសេហ្វ ម៉ាត់ស៊ូ ជនជាតិប៉ាគីស្ថាន សញ្ជាតិ ប៉ាគីស្ថាន។ ជនជាតិប៉ាគីស្ថាន រូបនេះ បានចូលមករស់នៅក្នុងប្រទេសកម្ពុជា នៅឆ្នាំ២០០១ ហើយបានបំពេញគ្រប់លក្ខខណ្ឌទាំងឡាយស្របទៅតាមច្បាប់ស្ដីពីសញ្ជាតិ និងមានលក្ខណៈសម្បត្តិគ្រប់គ្រាន់ អាចអនុញ្ញាតឲ្យសញ្ជាតិខ្មែរបាន។ លោក ស ខេង ស្នើឲ្យលោក ហ៊ុន សែន ពិនិត្យ និងសម្រេចបញ្ហានេះ។
ទោះជាយ៉ាងណា អ្នកនាំពាក្យក្រសួងមហាផ្ទៃ លោក ខៀវ សុភ័គ មិនទាន់អាចបញ្ជាក់បាននៅឡើយទេថា លិខិតនេះជារបស់លោក ស ខេង ផ្ញើទៅកាន់លោក ហ៊ុន សែន ឬយ៉ាងណានោះ? ព្រោះលោកថា មិនទាន់បានឃើញលិខិតនេះនៅឡើយ។
លោក ខៀវ សុភ័គ ក៏បដិសេធថា កន្លងទៅលោក ហ៊ុន ម៉ាណែត មិនដែលអន្តរាគមន៍ទៅក្រសួងដើម្បីទាមទារសញ្ជាតិឲ្យជនបរទេសណាឡើយ។ ផ្ទុយទៅវិញ លោកថា នៅពេលជនណាម្នាក់មានលក្ខណៈសម្បត្តិគ្រប់គ្រាន់ដើម្បីទទួលបានសញ្ជាតិខ្មែរ ក្រសួងនឹងផ្ដល់ជូនតាមនីតិវិធីតាមការស្នើសុំដោយមិនចាំបាច់មានអន្តរាគមន៍ពីនរណាម្នាក់ឡើយ៖ «មិនដែលមានទេ រឿងអន្តរាគមន៍ រឿងចូលសញ្ជាតិ។ យើងមើលទៅឲ្យតែគ្រប់គ្រាន់តាមច្បាប់សញ្ជាតិគេធ្វើជូនហើយ មានពិបាកអីមិនបាច់អ្នកណាអន្តរាគមន៍អី។»
មាត្រា៨ នៃច្បាប់ស្ដីពីសញ្ជាតិឆ្នាំ១៩៩៦ ចែងថា ជនបរទេសដែលអាចសុំចូលសញ្ជាតិខ្មែរបានលុះត្រាមានលិខិតបញ្ជាក់ថា មានគំនិតមារយាទ និងសីលធម៌ល្អដែលចេញដោយមេឃុំ ឬចៅសង្កាត់នៃទីលំនៅរបស់ខ្លួន។ ជននោះត្រូវមានលិខិតថ្កោលទោសបញ្ជាក់ថា ពុំដែលមានទោសពីបទព្រហ្មទណ្ឌណាមួយ ហើយរស់នៅជាប់លាប់ក្នុងព្រះរាជាណាចក្រកម្ពុជា រយៈពេល ៧ឆ្នាំ ចេះនិយាយ សរសេរ យល់ដឹងពីប្រវត្តិ និងទទួលយកបានពីប្រពៃណីទំនៀមទម្លាប់របស់ខ្មែរ មានបញ្ញា និងកាយសម្បទាដែលមិននាំឲ្យមានគ្រោះថ្នាក់ ឬនាំឲ្យមានបន្ទុកដល់ជាតិ។
ទោះជាយ៉ាងណា កន្លងទៅអ្នកច្បាប់ធ្លាប់អះអាងថា ប្រសិនបើជនណាមានបំណងប្រើយុទ្ធសាស្ត្របំភិតបំភ័យស្មារតីប្រជាពលរដ្ឋខ្មែរដើម្បីដោះដូរនឹងការបានសញ្ជាតិខ្មែរនោះ គឺជននោះកំពុងប្រព្រឹត្តបទល្មើសព្រហ្មទណ្ឌធ្ងន់ធ្ងរក្នុងការធ្វើឲ្យចលាចលដល់ស្ថិរភាព និងសន្តិសុខសង្គម ចំណែកឯសម្របសម្រួលវិញក៏អាចមានទោសដូចគ្នាដែរ។
ក្រៅពីទម្លាយលិខិតរបស់លោក ស ខេង ទៅកាន់លោក ហ៊ុន សែន ម្ចាស់ហ្វេសប៊ុក ឈ្មោះ "ធ្លាយហើយ" ក៏បានទម្លាយសារជាអក្សររបស់ឈ្មោះ ចូសេហ្វ ម៉ាត់ស៊ូ ផ្ញើទៅកាន់ឈ្មោះ ហ៊ុន ម៉ាណែត។ សារទាំងនោះនិយាយពីការស្នើអន្តរាគមន៍ពីលោក ហ៊ុន ម៉ាណែត ដើម្បីទទួលបានសញ្ជាតិខ្មែរពីការណាត់ជួបគ្នាដើម្បីនិយាយពីយុទ្ធសាស្ត្រសម្រាប់ការបោះឆ្នោត និងពីយុទ្ធសាស្ត្របំភិតបំភ័យគូប្រកួតជាដើម។
អាស៊ីសេរីបានព្យាយាមទាក់ទងលោក ចូសេហ្វ ម៉ាត់ស៊ូ នៅថ្ងៃទី១៣ ខែឧសភា តាមរយៈលេខទូរស័ព្ទដែលបង្ហាញនៅក្នុងសារបែកធ្លាយដើម្បីឆ្លើយតបចំពោះបញ្ហាទាំងនេះ ដោយទូរស័ព្ទចូលប៉ុន្តែគ្មានអ្នកទទួល៕
No comments:
Post a Comment