The Anti-Sam Rainsy Law

Monday, May 29, 2017

អ្នក​រាយការណ៍​ ពិសេស​ អ.ស.ប​. ថា​ អ្នក​ការពារ​ សិទ្ធិ​មនុស្ស​ ជាច្រើន​ កំពុង ​ប្រឈម​ ហានិភ័យ | UN Special Rapporteur says human rights defenders encountering risks

អ្នក​រាយការណ៍​ពិសេស​អង្គការ​សហប្រជាជាតិ ទទួល​បន្ទុក​ស្ថានភាព​អ្នក​ការពារ​សិទ្ធិ​មនុស្ស លោក មីស៊ែល ហ្វស (Michel Forst) ថ្លែង​ក្នុង​កម្មវិធី​បាឋកថា​សាធារណៈ​មួយ​នៅ​មជ្ឈមណ្ឌល​វប្បធម៌​កម្ពុជា-អាល្លឺម៉ង់ នៅ​ព្រឹក​ថ្ងៃ​ទី​២៩ ខែ​ឧសភា ឆ្នាំ​២០១៧។
អ្នក​រាយការណ៍​ពិសេស​អង្គការ​សហប្រជាជាតិ ទទួល​បន្ទុក​ស្ថានភាព​អ្នក​ការពារ​សិទ្ធិ​មនុស្ស លោក មីស៊ែល ហ្វស (Michel Forst) ថ្លែង​ក្នុង​កម្មវិធី​បាឋកថា​សាធារណៈ​មួយ​នៅ​មជ្ឈមណ្ឌល​វប្បធម៌​កម្ពុជា-អាល្លឺម៉ង់ នៅ​ព្រឹក​ថ្ងៃ​ទី​២៩ ខែ​ឧសភា ឆ្នាំ​២០១៧។

អ្នក​រាយការណ៍​ ពិសេស​ អ.ស.ប​. ថា​ អ្នក​ការពារ​ សិទ្ធិ​មនុស្ស​ ជាច្រើន​ កំពុង ​ប្រឈម​ ហានិភ័យ

RFA / វិទ្យុ អាស៊ី សេរី | ២៩ ឧសភា ២០១៧


អ្នក​រាយការណ៍ ​ពិសេស ​អង្គការ​ សហប្រជាជាតិ (..ប.) ទទួល​បន្ទុក​ ស្ថានភាព​ អ្នក​ការពារ​ សិទ្ធិ​មនុស្ស ធ្វើ​ទស្សនកិច្ច​ ក្រៅ​ផ្លូវការ​ នៅ​កម្ពុជា រយៈពេល ៤​ថ្ងៃ ចាប់​ពី​ថ្ងៃ​ ទី​២៧ ដល់​ថ្ងៃ​ ទី​៣០ ឧសភា។  ទស្សនកិច្ច​ ក្រៅ​ផ្លូវការ​នេះ ធ្វើ​ឡើង ​ស្រប​ពេល​ អ្នក​ការពារ​ សិទ្ធិ​មនុស្ស​ មួយ​ចំនួន កំពុង​ ជាប់​ឃុំឃាំង ​ក្នុង​ពន្ធនាគារ ដោយសារ​ ការ​បំពេញ​ មុខងារ​ របស់​ខ្លួន។


អ្នក​រាយការណ៍​ពិសេស​អង្គការ​សហប្រជាជាតិ ទទួល​បន្ទុក​ស្ថានភាព​អ្នក​ការពារ​សិទ្ធិ​មនុស្ស លោក មីស៊ែល ហ្វស (Michel Forst) ថ្លែង​ទៅ​កាន់​តំណាង​អង្គទូត និង​អង្គការ​សង្គម​ស៊ីវិល​ជាតិ និង​អន្តរជាតិ​ជាច្រើន​នាក់​ថា អ្នក​ការពារ​សិទ្ធិ​មនុស្ស​ជាច្រើន​នៅ​លើ​ពិភពលោក កំពុង​ប្រឈម​នឹង​ហានិភ័យ​ខ្លាំង តាម​រយៈ​ការ​ធ្វើ​ទុក្ខបុកម្នេញ ការ​យាយី និង​ការ​វាយ​ប្រហារ​តាម​គ្រប់​រូបភាព។

លោក​បញ្ជាក់​ថា ការ​វាយ​ប្រហារ​មក​លើ​អ្នក​ការពារ​សិទ្ធិ​មនុស្ស ធ្វើ​ឡើង​តាម​រយៈ​ការ​បង្កើត និង​ប្រើប្រាស់​ច្បាប់​ដែល​មាន​លក្ខណៈ​រឹតត្បិត​សេរីភាព និង​ការ​ទាញ​ភ្ជាប់​អ្នក​ការពារ​សិទ្ធិ​មនុស្ស​ទៅ​នឹង​រឿង​នយោបាយ។ លោក​បន្ត​ថា មាន​អ្នក​ការពារ​សិទ្ធិ​មនុស្ស​ជាច្រើន ត្រូវ​បាន​រដ្ឋាភិបាល​លាប​ពណ៌​ថា​ជា​ក្រុម​ប្រឆាំង ហើយ​មិន​អនុញ្ញាត​ឲ្យ​មាន​ការ​ជួប​ប្រជុំ​ណា​មួយ​នៅ​តាម​ទី​សាធារណៈ​ឡើយ។
លោក មីស៊ែល ហ្វស (Michel Forst) ថ្លែង​បែប​នេះ​ក្នុង​កម្មវិធី​បាឋកថា​សាធារណៈ​មួយ​នៅ​មជ្ឈមណ្ឌល​វប្បធម៌​កម្ពុជា-អាល្លឺម៉ង់ នៅ​ព្រឹក​ថ្ងៃ​ទី​២៩ ឧសភា។

ដោយសារ​តែ​នេះ​មិន​មែន​ជា​ដំណើរ​ទស្សនកិច្ច​ផ្លូវការ លោក មីស៊ែល ហ្វស (Michel Forst) ថ្លែង​ថា លោក​មិន​អាច​វាយ​តម្លៃ ឬ​អត្ថាធិប្បាយ​អ្វី​ឡើយ​ជុំវិញ​បញ្ហា​សិទ្ធិ​មនុស្ស​ដែល​កំពុង​កើត​មាន​នៅ​កម្ពុជា ឡើយ ព្រោះ​លោក​ត្រូវការ​សិក្សា​ឲ្យ​បាន​ស៊ី​ជម្រៅ​ជាង​នេះ។ លោក​បាន​ជួប​ជាមួយ​អង្គការ​សង្គម​ស៊ីវិល​ផ្នែក​សិទ្ធិ​មនុស្ស ក្រុម​គ្រួសារ​អ្នក​ការពារ​សិទ្ធិ​មនុស្ស​មួយ​ចំនួន​ដែល​កំពុង​ជាប់​ឃុំ និង​មន្ត្រី​ទូត ហើយ​លោក​រំពឹង​ថា នឹង​អាច​ជួប​ជាមួយ​មន្ត្រី​រដ្ឋាភិបាល​កម្ពុជា ក្នុង​ដំណើរ​ទស្សនកិច្ច​ផ្លូវការ​ណា​មួយ​នៅ​ពេល​ខាង​មុខ

អ្នក​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន ថ្លែង​ថា គ្មាន​កាតព្វកិច្ច​អ្វី​ដែល​រដ្ឋាភិបាល​ត្រូវ​អញ្ជើញ​លោក មីស៊ែល ហ្វស (Michel Forst) មក​ទស្សនកិច្ច​ផ្លូវការ​នៅ​កម្ពុជា នោះ​ទេ ព្រោះ​អង្គការ​សហប្រជាជាតិ​ផ្នែក​សិទ្ធិ​មនុស្ស​មាន​អ្នក​តំណាង​នៅ​កម្ពុជា រួច​ហើយ។ លោក​បន្ត​ថា វត្តមាន​របស់​លោក មីស៊ែល ហ្វស (Michel Forst) មិន​មាន​ន័យ​អ្វី​ឡើយ​ចំពោះ​ការ​អនុវត្ត​ច្បាប់​ទៅ​លើ​អ្នក​ការពារ​សិទ្ធិ​មនុស្ស​ដែល​កំពុង​ជាប់​ឃុំ ព្រោះ​វា​ជា​ឆន្ទានុសិទ្ធិ​របស់​តុលាការ

នាយិកា​ប្រតិបត្តិ​មជ្ឈមណ្ឌល​សិទ្ធិ​មនុស្ស​កម្ពុជា (CCHR) អ្នកស្រី ចក់ សុភាព យល់​ឃើញ​ផ្ទុយ​ពី​លោក ផៃ ស៊ីផាន។ អ្នកស្រី​បញ្ជាក់​ថា វត្តមាន​របស់​អ្នក​រាយការណ៍​ពិសេស​អង្គការ​សហប្រជាជាតិ ទទួល​បន្ទុក​ស្ថានភាព​អ្នក​ការពារ​សិទ្ធិ​មនុស្ស​នេះ មាន​សារសំខាន់​យ៉ាង​ខ្លាំង ព្រោះ​វា​បង្ហាញ​ពី​ចំណាប់​អារម្មណ៍​របស់​អង្គការ​សហប្រជាជាតិ ចំពោះ​បញ្ហា​សិទ្ធិ​មនុស្ស​នៅ​កម្ពុជា បើ​ទោះ​បី​ជា​នេះ​ជា​ដំណើរ​ទស្សនកិច្ច​ផ្ទាល់​ខ្លួន​ក៏ដោយ។ ម្យ៉ាង​វិញ​ទៀត ដំណើរ​ទស្សនកិច្ច​នេះ គឺ​ចំ​ពេល​ដែល​វិស័យ​សិទ្ធិ​មនុស្ស​នៅ​កម្ពុជា រង​ការ​យាយី​កាន់​តែ​ខ្លាំង ហើយ​មាន​មន្ត្រី​សិទ្ធិ​មនុស្ស​មួយ​ចំនួន​កំពុង​ជាប់​ឃុំ​ក្នុង​ពន្ធនាគារ​ផង​ដែរ

អ្នក​ការពារ​សិទ្ធិ​មនុស្ស​ដែល​កំពុង​ជាប់​ឃុំ​រួម​មាន លោក នី សុខា លោក យី សុខសាន្ត លោក ណៃ វ៉ង់ដា និង​អ្នកស្រី លឹម មុន្នី និង​អគ្គលេខាធិការ​រង គ..ប លោក នី ចរិយា ដោយ​ពួក​គេ​រង​ការ​ចោទ​ប្រកាន់​ពី​បទ​សូកប៉ាន់​សាក្សី និង​បទ​សម​គំនិត​សូកប៉ាន់​សាក្សី ពាក់ព័ន្ធ​នឹង​រឿង​អាស្រូវ​ស្នេហា​រវាង​លោក កឹម សុខា និង​នាង ខុម ចាន់តារាទី ហៅ​ស្រី​មុំ។ ចំណែក​សកម្មជន​ដីធ្លី​តំបន់​បឹងកក់ អ្នកស្រី ទេព វន្នី វិញ ត្រូវ​បាន​តុលាការ​កាត់​ទោស​ឲ្យ​ជាប់​ពន្ធនាគារ ២​ឆ្នាំ​កន្លះ និង​ពិន័យ​ជា​ប្រាក់ ១៤​លាន​រៀល ពី​បទ​ហិង្សា​ដោយ​ចេតនា​មាន​ស្ថាន​ទម្ងន់​ទោស​លើ​សន្តិសុខ​សណ្ដាប់ធ្នាប់​សាលា​ខណ្ឌ​ដូនពេញ ដែល​ប្រព្រឹត្ត​នៅ​ក្បែរ​ផ្ទះ​លោក​នាយក​រដ្ឋមន្ត្រី ហ៊ុន សែន កាល​ពី​ថ្ងៃ​ទី​១៣ ខែ​មីនា ឆ្នាំ​២០១៣ កន្លង​ទៅ។

ការ​ឃុំ​ខ្លួន​មុន​សវនាការ​លើ​អ្នក​ការពារ​សិទ្ធិ​មនុស្ស​សមាគម​អាដហុក (ADHOC) ៤​រូប និង​លើ​លោក នី ចរិយា ព្រម​ទាំង​ការ​កាត់​ទោស​អ្នកស្រី ទេព វន្នី ដោយ​តុលាការ​កម្ពុជា នេះ ទទួល​រង​ការ​រិះគន់​ពី​មជ្ឈដ្ឋាន​ជាតិ និង​អន្តរជាតិ ថា​ជា​ការ​ប្រព្រឹត្ត​ផ្ទុយ​នឹង​គោលការណ៍​ច្បាប់ និង​សិទ្ធិ​មនុស្ស។

នាយិកា​ប្រតិបត្តិ​មជ្ឈមណ្ឌល​សិទ្ធិ​មនុស្ស​កម្ពុជា អ្នកស្រី ចក់ សុភាព យល់​ឃើញ​ថា អ្នក​ការពារ​សិទ្ធិ​មនុស្ស​គួរ​តែ​ទទួល​បាន​ការ​ការពារ ការ​លើក​ទឹក​ចិត្ត និង​ការ​ឲ្យ​តម្លៃ​ពី​គ្រប់​ភាគី​ពាក់ព័ន្ធ ព្រោះ​កិច្ច​ការងារ​របស់​ពួក​គេ គឺ​ជួយ​ឲ្យ​ប្រសើរ​ឡើង​នូវ​ស្ថានភាព​សិទ្ធិ​មនុស្ស និង​ជំរុញ​ឲ្យ​មាន​យុត្តិធម៌​ក្នុង​សង្គម ដែល​មិន​គួរ​ជា​ការ​វាយ​ប្រហារ ការ​យាយី ការ​ធ្វើ​ទុក្ខបុកម្នេញ ឬ​ការ​បៀតបៀន​ដល់​អាយុ​ជីវិត​នោះ​ឡើយ៕





No comments:

Post a Comment