​Paris Peace Agreements 1991

Saturday, June 3, 2017

សារ ​បែក​ធ្លាយ​ សាយភាយ ​ដល់​មន្ត្រី​ គណបក្ស​ ប្រជាជន​ កម្ពុជា | Leaked messages spread to ruling party official

ឯកសារ​បែក​ធ្លាយ​អំពី​ការ​បង្កើត​ក្រុម​ការងារ​បណ្ដាញ​ព័ត៌មាន Cyber War Room (CWR) ដែល​អាស៊ីសេរី ទទួល​បាន។ Screenshot 
ឯកសារ​បែក​ធ្លាយ​អំពី​ការ​បង្កើត​ក្រុម​ការងារ​បណ្ដាញ​ព័ត៌មាន Cyber War Room (CWR) ដែល​អាស៊ីសេរី ទទួល​បាន។ Screenshot

សារ ​បែក​ធ្លាយ​ សាយភាយ ​ដល់​មន្ត្រី​ គណបក្ស​ ប្រជាជន​ កម្ពុជា

RFA / វិទ្យុ អាស៊ី សេរី |២ មិថុនា​ ២០១៧

t
សារ​បែក​ធ្លាយ​ដែល​ទម្លាយ​ការសម្ងាត់​របស់​មន្ត្រី​គណបក្ស​ប្រឆាំង បាន​កក្រើក​ពេញ​ប្រព័ន្ធ​សង្គម​ហ្វេសប៊ុក (Facebook)។ ប៉ុន្តែ​អាជ្ញា​ធរមាន​សមត្ថកិច្ច ហាក់​គ្មាន​ចំណាត់​ការ​អ្វី​ដើម្បី​ការពារ​សិទ្ធិ​ឯកជន និង​សេចក្ដី​ថ្លៃថ្នូរ​របស់​មនុស្ស​នោះ​ទេ។ ឥឡូវ​នេះ សារ​បែក​ធ្លាយ​នេះ​បាន​រាលដាល​ដល់​មន្ត្រី​ខាង​គណបក្ស​កាន់​អំណាច​វិញ​ម្ដង។
រយៈពេល​ប៉ុន្មាន​ខែ​ចុង​ក្រោយ​នេះ ពោល​គឺ​នៅ​មុន​រដូវកាល​បោះឆ្នោត​ឃុំ-​សង្កាត់ ជិត​ចូល​មក​ដល់ សារ​បែក​ធ្លាយ​ដែល​ទម្លាយ​ពី​ការ​សន្ទនា​គ្នា​ជា​លក្ខណៈ​ឯកជន ត្រូវ​បាន​បញ្ចេញ​តាម​ប្រព័ន្ធ​ផ្សព្វផ្សាយ​សង្គម ជាពិសេស​តាម​គណនី​ហ្វេសប៊ុក ឈ្មោះ “សីហា” ដែល​ល្បី​ខាង​បញ្ចេញ​ព័ត៌មាន ទន្ទ្រាន​សិទ្ធិ​ឯកជន​របស់​មន្ត្រី​គណបក្ស​សង្គ្រោះ​ជាតិ។
ម្ចាស់​គណនី​ឈ្មោះ "សីហា" នេះ សូម្បី​តែ​លោក​នាយករដ្ឋមន្ត្រី ហ៊ុន សែន ក៏​កោត​សរសើរ​មិន​ដាច់​ពី​មាត់​ ថា, ពូកែ​ខាង​លួច​ស្ដាប់​សារ​សន្ទនា​ជា​ឯកជន​បែប​នេះ៖ «អា​ផេក សីហា ហ្នឹង វា​ធ្លាយ! ឥឡូវ​ខ្ញុំ​អត់​ផ្សាយ​អា ផេក សីហា ទេ ព្រោះ​ខ្ញុំ​អត់​ស្គាល់​វា មិន​ដឹង​វា​នៅ​ឯ​ណា។ មុខ​វា​យ៉ាង​ម៉េច​អា សីហា ហ្នឹង? អា​ហ្នឹង​វា​ចាប់​បាន​ទាំង​សំឡេង គ្រាន់​បើ​អា សីហា! អ្ហែង​ប៉ុណ្ណឹង អ្ហែង​គ្រាន់​បើ! អ្ហែង​ចេះ​ចាប់​សំឡេង​អញ​ជាមួយ​នឹង​ឯកឧត្ដម កឹម សុខា បាន។ អា​នោះ​គ្រាន់​បើ​វ៉ី!»

លោក​នាយករដ្ឋមន្ត្រី ហ៊ុន សែន ខ្លួន​ឯង ក៏​ចង់​ប្រណាំងប្រជែង​នឹង​ម្ចាស់​គណនី​ហ្វេសប៊ុក​ឈ្មោះ "សីហា" នេះ​ដែរ។ ជា​ញឹកញាប់​លោក​ថែម​ទាំង​គំរាម​បញ្ចេញ​សារ​សន្ទនា​ជា​ឯកជន​ជា​ច្រើន​ផ្សេង​ទៀត​ដែល​លោក​ថត​ទុក​បាន ដើម្បី​បញ្ចេញ​ជា​សាធារណៈ ដែល​ទំនង​ជា​លោក​ចង់​ប្រាប់​ថា មន្ត្រី​គណបក្ស​ប្រឆាំង​ជា​មនុស្ស​របស់​គាត់ ធ្វើ​ការ​ឲ្យ​គណបក្ស​ប្រជាជន​កម្ពុជា ជាដើម ពោល​គឺ​អាច​ក្នុង​គោលបំណង​បំបែកបំបាក់ និង​ទម្លាក់​ប្រជាប្រិយភាព​របស់​គណបក្ស​សង្គ្រោះ​ជាតិ។
លោក ហ៊ុន សែន៖ «ចង់​សាក? អ្នក​ឯង​និយាយ​ជាមួយ​ខ្ញុំ​ពី​ស្អី? នៅ​មាន​ទៀត! អ្នក​ឯង​ចង់​សាក​ទេ? បើ​ចង់​សាក​ខ្ញុំ​ទម្លាយ​ចេញ​ទាំង​អស់ ទាំង​ពី​ក្នុង WhatApps SMS តិច​អ្នក​ឯង​ថា ខ្ញុំ​ជា​មនុស្ស​មិន​បាន​ការ។ អ្វី​ដែល​ជា​ស្តុក អ្នក​ឯង​ចង់​ឲ្យ​ខ្ញុំ​បញ្ចេញ? ខ្ញុំ​នឹង​បញ្ចេញ​ឲ្យ​អ្នក​ឯង​មើល​ទាំង​អស់។ បែក​ធ្លាយ​សំឡេង​ប៉ុន្មាន​ថ្ងៃ​នោះ នោះ​ហើយ​ដែល​ជា​ការ​ដែល ហ៊ុន សែន វ៉ៃ​មួយ​ដៃ​ឆ្វេង តែ​នៅ​ដៃ​ស្តាំ​អត់​ទាន់​វ៉ៃ​ទេ សូម​អ្នក​ឯង​ស្ដាប់​ឲ្យ​បាន»
​ទោះ​ជា​ហ្វេសប៊ុក សីហា បញ្ចេញ​សារ​ដែល​រំលោភ​សិទ្ធិ​ឯកជន និង​សេចក្ដី​ថ្លៃថ្នូរ​របស់​មនុស្ស​ដែល​ច្បាប់​រដ្ឋធម្មនុញ្ញ​ការពារ​យ៉ាង​ណា​ក្ដី ក៏​គេ​មិន​ដែល​ឃើញ​អាជ្ញាធរ​មាន​សមត្ថកិច្ច​ចាត់​ការ​ស៊ើបអង្កេត​ម្ចាស់​ហ្វេសប៊ុក នេះ ដើម្បី​មក​ផ្ដន្ទាទោស​តាម​ច្បាប់​នោះ​ដែរ។ នេះ​អាច​ប្រហែល​មក​ពី​សារ​បែក​ធ្លាយ​ទាំង​នោះ​ធ្វើ​ឲ្យ​ខូច​ប្រយោជន៍​គណបក្ស​សង្គ្រោះ​ជាតិ និង​មិន​ប៉ះពាល់​ដល់​គណបក្ស​កាន់​អំណាច​នោះ​ឯង។
ប៉ុន្តែ​ឥឡូវ​នេះ បញ្ហា​សារ​បែក​ធ្លាយ​នេះ បាន​រាលដាល​ដល់​គណបក្ស​កាន់​អំណាច​វិញ​ម្ដង។ ថ្មីៗ​នេះ អ៊ីមែល​ផ្ទាល់​ខ្លួន​របស់​មន្ត្រី​គណបក្ស​ប្រជាជន និង​ជា​អ្នកនាំពាក្យ​ក្រសួង​យុត្តិធម៌ លោក គឹម សន្តិភាព ត្រូវ​បាន​ជន​អនាមិក​លួច​យក​ទៅ​គ្រប់គ្រង​តាំង​ពី​ថ្ងៃ​ទី​២០ ខែ​ឧសភា មក​ម្ល៉េះ។
​ឯកសារ​ដែល​បែក​ធ្លាយ​ចេញ​ពី​អ៊ីមែល​របស់​លោក គឹម សន្តិភាព បង្ហាញ​ពី​ព័ត៌មាន​ជា​ច្រើន​ពាក់ព័ន្ធ​ទៅ​នឹង​ការ​បង្កើត​ក្រុម​ហ្វេសប៊ុក Cyber War Room កាល​ពី​ឆ្នាំ​២០១៣ ដើម្បី​វាយ​ប្រហារ​គណបក្ស​ប្រឆាំង។ ក្រុម​នេះ​ដឹកនាំ​ដោយ​កូន​ប្រុស​ច្បង​របស់​លោក​នាយករដ្ឋមន្ត្រី ហ៊ុន សែន និង​មន្ត្រី​ជាន់​ខ្ពស់​គណបក្ស​ប្រជាជន​កម្ពុជា ជា​ច្រើន​រូប​ទៀត។
​មិន​​តែ​ប៉ុណ្ណោះ ឯកសារ​ស្ដីពី​ការ​ប្រកាស​ទ្រព្យសម្បត្តិ​របស់​លោក គឹម សន្តិភាព ត្រូវ​បាន​លេច​ធ្លាយ​ផង​ដែរ។ ការ​ប្រកាស​ទ្រព្យ​នេះ គឺ​ស្របតាម​ទម្រង់​ប្រកាស​ទ្រព្យសម្បត្តិ និង​បំណុល​របស់​អង្គភាព​ប្រឆាំង​អំពើពុករលួយ។ ទ្រព្យ​រាប់​លាន​ដុល្លារ ត្រូវ​បាន​លាតត្រដាង​ក្នុង​ឯកសារ​ប្រកាស​ទ្រព្យ​នេះ រួម​មាន​លំនៅឋាន​យ៉ាង​តិច ៤​កន្លែង មាស​ដុំ និង​មាស​សន្លឹក​ជិត ១០០​តម្លឹង (៧០​តម្លឹង) ប្រាក់​ចំណូល​ពី​ថ្លៃ​ផ្ទះ​ជួល និង​ភាគហ៊ុន​ក្រុមហ៊ុន​រាប់​សែន​ដុល្លារ។ គ្រាន់តែ​ក្បាល​ខ្សែក្រវាត់​របស់​លោក គឹម សន្តិភាព មួយ មាន​ដាំ​ពេជ្រ​តម្លៃ​ជាង ២​ម៉ឺន​ដុល្លារ (២២.៥០០​ដុល្លារ)។
​ប៉ុន្តែ​លោក គឹម សន្តិភាព បដិសេធ​រាល់​ខ្លឹមសារ​ព័ត៌មាន​ដែល​បែក​ធ្លាយ​ចេញពី​អ៊ីមែល​របស់​គាត់៖ «រាល់​ព័ត៌មាន​ដែល Hacker ដែល​អាច​យក​របស់​ខ្ញុំ ហើយ​គាត់ hack បាន ដូច្នេះ​ជំហរ​របស់​ខ្ញុំ​នៅ​ដដែល ដូចជា​លើក​មុន។ អ៊ីមែល​របស់ខ្ញុំ​គាត់ Hack បាន ដូច្នេះ​ព័ត៌មាន​អ្វីៗ ក៏​គាត់​អាច​កែ​បាន​ដែរ។ នេះ​ជា​ជំហរ​របស់​ខ្ញុំ។ ខ្ញុំ​សូម​បដិសេធ​ព័ត៌មាន​ទាំង​អស់»
​អាស៊ីសេរី​មិន​អាច​ទាក់ទង​សុំ​ការ​បំភ្លឺ​ពី​អង្គភាព​ប្រឆាំង​អំពើ​ពុករលួយ​បាន​ទេ នៅ​ពេល​នេះ ដោយសារ​ទូរស័ព្ទ​លោក ឱម យ៉ិនទៀង តេ​ចូល​ជា​ច្រើន​សា​តែ​មិន​លើក។
​ការ​បែក​ធ្លាយ​សារ​ឯកជន​ដែល​ម្ដង​នេះ​ប៉ះពាល់​ដល់​មន្ត្រី​ច្រើន​រូប​ក្នុង​ជួរ​គណបក្ស​ប្រជាជន​កម្ពុជា បែប​នេះ កំពុង​ក្លាយ​ជា​ខ្នាត​វាស់​មួយ​ដើម្បី​ធ្វើ​តេស្ត​អំពី​ឆន្ទៈ​ពិត​ប្រាកដ​របស់​អាជ្ញាធរ​កម្ពុជា ក្នុង​ការ​ពង្រឹង​ការ​អនុវត្ត​ច្បាប់ ដើម្បី​លើក​ស្ទួយ​សិទ្ធិ​ឯកជន និង​សេចក្ដី​ថ្លៃថ្នូរ​របស់​មនុស្ស៕



No comments:

Post a Comment