The Anti-Sam Rainsy Law

Monday, June 19, 2017

ក្រសួង ​រ៉ែ​ និង​ថាមពល​ ថា​ ជា​រឿង​ ខាតបង់​ បើ​ ទុក​ខ្សាច់​ ស​ មិន​នាំ​ចេញ​ ទៅ​ក្រៅ​ប្រទេស | Ministry of Mine and Energy says it's a loss if the white sand are not exported

សកម្មភាព​កាយ​ខ្សាច់​ប្រភេទ​ស៊ីលីកា​ដាក់​កប៉ាល់ នៅ​កំពង់ផែ ម៉ុង ឫទ្ធី ឋិត​នៅ​ភូមិ​កែវផុស ឃុំ​ទំនប់រលក ស្រុក​ស្ទឹងហាវ ខេត្ត​ព្រះសីហនុ កាល​ពី​ថ្ងៃ​ទី​១ ខែ​ឧសភា ឆ្នាំ​២០១៧។ Photo courtesy of Mother Nature
សកម្មភាព​កាយ​ខ្សាច់​ប្រភេទ​ស៊ីលីកា​ដាក់​កប៉ាល់ នៅ​កំពង់ផែ ម៉ុង ឫទ្ធី ឋិត​នៅ​ភូមិ​កែវផុស ឃុំ​ទំនប់រលក ស្រុក​ស្ទឹងហាវ ខេត្ត​ព្រះសីហនុ កាល​ពី​ថ្ងៃ​ទី​១ ខែ​ឧសភា ឆ្នាំ​២០១៧។ Photo courtesy of Mother Nature
Photo courtesy of Mother Nature

ក្រសួង ​រ៉ែ​ និង​ថាមពល​ ថា​ ជា​រឿង​ ខាតបង់​ បើ​ ទុក​ខ្សាច់​ ស​ មិន​នាំ​ចេញ​ ទៅ​ក្រៅ​ប្រទេស

RFA / វិទ្យុ អាស៊ី សេរី | ១៩ មិថុនា​ ២០១៧



ក្រសួង ​រ៉ែ និង​ថាមពល ពន្យល់​ ថា, ការ​អនុញ្ញាត ​ឲ្យ​មាន ​ការ​ធ្វើ​ អាជីវកម្ម​ ខ្សាច់​ប្រភេទ​ ស៊ីលីកា ឬ​ខ្សាច់ ​ស គឺ ​ដើម្បី​ កុំ​ឲ្យ​ ខ្សាច់​នោះ​ ត្រូវ​ កប់​ចោល​ ដោយ​ឥត ​ប្រយោជន៍ ​នៅ​ក្រោម​ តំបន់​ សេដ្ឋកិច្ច​ ពិសេស។  សកម្មជន​ បរិស្ថាន ចាត់​ទុក​ ការ​បកស្រាយ​នេះ​ ថា​ ជា​រឿង​ មិន​អាច ​ទទួល​ យក​បាន និង​ទាមទារ ​ឲ្យ​រដ្ឋាភិបាល​ បញ្ឈប់​ ការ​នាំ​ចេញ​ ខ្សាច់ ​មួយ​ប្រភេទ​ នេះ ​ទៅ​ក្រៅ​ ប្រទេស។


អ្នក​នាំ​ពាក្យ​ក្រសួង​រ៉ែ និង​ថាមពល លោក ឌិត ទីណា បញ្ជាក់​ប្រាប់​អាស៊ីសេរី នៅ​ថ្ងៃ​ទី​១៨ មិថុនា ថា ការ​ធ្វើ​អាជីវកម្ម​ខ្សាច់​ប្រភេទ​ស៊ីលីកា ដោយសារ​ទីតាំង​ខ្សាច់​ទាំងនោះ​គឺ​ជា​កន្លែង​ដែល​ត្រូវ​សាងសង់​តំបន់​សេដ្ឋកិច្ច​ពិសេស។ លោក​ថា បើ​សាងសង់​តំបន់​សេដ្ឋកិច្ច​ពិសេស​ដោយ​មិន​ប្រមូល​យក​ខ្សាច់​ទាំងនោះ​ចេញ វា​គឺ​ជា​ការ​ខាតបង់​ទៅ​វិញ​ទេ។

លោក​សង្កត់​ធ្ងន់​ថា ការ​ធ្វើ​អាជីវកម្ម​ខ្សាច់​ស៊ីលីកា​នេះ ធ្វើ​តែ​នៅ​ចំ​កន្លែង​ដែល​ត្រូវ​សាងសង់​តំបន់​សេដ្ឋកិច្ច​ពិសេស​តែ​ប៉ុណ្ណោះ មិន​មែន​ធ្វើ​ជា​រៀង​រហូត ឬ​ក៏​មាន​ចំនួន​រាប់​មិន​អស់​នោះ​ឡើយ៖ «យើង​សង់​តំបន់​សេដ្ឋកិច្ច​ពិសេស​លើ​កន្លែង​ដែល​មាន​ស៊ីលីកា គឺ​ជា​រឿង​ដែល​ខាតបង់​មួយ។ អ៊ីចឹង​ហើយ​បាន​ជា​មាន​ការ​អនុញ្ញាត​ឲ្យ​យក​ចេញ​តែ​ស្រទាប់​ដែល​នៅ​ខាង​ក្រោម​កន្លែង​ដែល​យើង​ហ្នឹង ធ្វើ​តំបន់​សេដ្ឋកិច្ច​ពិសេស។ រឿង​មួយ​ទៀត​ដែល​ត្រូវ​យល់​ដែរ​នោះ គឺ​បរិមាណ (ខ្សាច់​ស៊ីលីកា) ដែល​នៅ​ក្រោម​នោះ​មិន​គ្រប់គ្រាន់​សម្រាប់​យើង​រៀបចំ​ធ្វើ​ជា​រោងចក្រ ឬ​មួយ​ក៏​ធ្វើ​អ្វី​សម្រាប់​ផលិត​នៅ​ក្នុង​ស្រុក​នោះ​ទេ។ ដូច្នេះ​ហើយ​អ្នក​ដែល​យល់​បរិបទ​ទើប​ដឹង​ថា កន្លែង​ហ្នឹង​យើង​នឹង​កប់​ចោល ឬ​ប្រមូល​នាំ​ចេញ»

លោក​បញ្ជាក់​ថា ខ្សាច់​ស៊ីលីកា​ដែល​ត្រូវ​បាន​ប្រមូល​ធ្វើ​អាជីវកម្ម​នោះ​មាន​តែ​ពីរ​ទីតាំង​ប៉ុណ្ណោះ គឺ​នៅ​ខេត្ត​ព្រះសីហនុ និង​ខេត្ត​កោះកុង ទី​ដែល​មាន​តំបន់​សេដ្ឋកិច្ច​ពិសេស ហើយ​ការ​ទាញ​យក​នោះ​ធ្វើ​ឡើង​ចាប់​ពី​ឆ្នាំ​២០១៤ មក​ដល់​សព្វថ្ងៃ។

សម្រាប់​ព័ត៌មាន​លម្អិត​ផ្សេង​ទៀត​ទាក់ទង​នឹង​ការ​នាំ​ចេញ​ខ្សាច់​ប្រភេទ​ស៊ីលីកា​នោះ លោក ឌិត ទីណា ថ្លែង​ថា ក្រសួង​នឹង​ផ្សព្វផ្សាយ​ជា​សាធារណៈ ស្រប​ពេល​នឹង​ការ​ឆ្លើយ​បំភ្លឺ​ចំពោះ​សំណើ​របស់​លោក សុន ឆ័យ នៅ​ពេល​ឆាប់ៗ​ខាង​មុខ។

ទោះ​ជា​យ៉ាង​ណា ស្ថាបនិក​អង្គការ​មាតា​ធម្មជាតិ លោក អាឡិចហាន់ដ្រូ ហ្គន់ហ្សាឡេស ដេវិតសឹន (Alexandro Gonzales Davidson) មិន​ជឿ​លើ​ការ​បកស្រាយ​របស់​អ្នក​នាំ​ពាក្យ​ក្រសួង​រ៉ែ និង​ថាមពល នេះ​ឡើយ។ លោក​បាន​ប្រៀប​ប្រដូច​ការ​បកស្រាយ​នេះ​ទៅ​នឹង​ការ​បកស្រាយ​របស់​ក្រសួង​ជុំវិញ​ករណី​នាំ​ខ្សាច់​ចាក់​បំពេញ ទៅ​ក្រៅ​ប្រទេស​កាល​ពី​ពេល​មុន ដែល​ថា​ការ​បូម​ខ្សាច់​ចាក់​បំពេញ គឺ​ដើម្បី​សម្រួល​ផ្លូវ​ទឹក​ឲ្យ​ពលរដ្ឋ ហើយ​ការ​នាំ​ចេញ​គឺ​ដោយសារ​កម្ពុជា គ្មាន​ទីផ្សារ​លក់​ខ្សាច់​នេះ។

លោក​ថា តាម​ការពិត ខ្សាច់​ចាក់​បំពេញ​ទាំងនោះ​ត្រូវ​បាន​នាំ​ចេញ​ពី​កម្ពុជា ដោយ​គេច​ពន្ធ​យក​ទៅ​លក់​នៅ​ប្រទេស​សិង្ហបុរី និង​ប្រទេស​មួយ​ចំនួន​ទៀត​ដោយ​ខុស​ច្បាប់ ដែល​ធ្វើ​ឲ្យ​កម្ពុជា ខាតបង់​ទឹកប្រាក់​រាប់​រយ​លាន​ដុល្លារ។

សកម្មជន​បរិស្ថាន​ដែល​ត្រូវ​បាន​អាជ្ញាធរ​បណ្ដេញ​ចេញ​ពី​កម្ពុជា រូប​នេះ​អះអាង​ថា លោក​មាន​ភស្តុតាង​រឹងមាំ​ជាច្រើន​ដែល​បង្ហាញ​ថា ខ្សាច់​ស៊ីលីកា​រាប់​សែន​តោន​គិត​ជា​ទឹកប្រាក់​រាប់​សិប​លាន​ដុល្លារ ត្រូវ​បាន​នាំ​ចេញ​ពី​កម្ពុជា មុន​ឆ្នាំ​២០១៤ ហើយ​ការ​នាំ​ចេញ​ទាំងនោះ​ធ្វើ​ឡើង​ដោយ​គេច​ពន្ធ។ លោក​ថា ក្រុម​របស់​លោក​នឹង​លាតត្រដាង​ការពិត​ជុំវិញ​រឿង​នេះ​នៅ​ពេល​ឆាប់ៗ​ខាង​មុខ៖ «លេស​របស់​ក្រសួង​នៅ​ពេល​ដែល​និយាយ​ថា ត្រូវ​តែ​បូម​ខ្សាច់​ចេញ​ដើម្បី​ចំណេញ វា​ជា​រឿង​មួយ​មិន​ល្អ​ស្តាប់ ហើយ​ខ្ញុំ​ក៏​មិន​គាំទ្រ។ ក្រសួង​មិន​គួរ​ផ្តល់​អាជ្ញាប័ណ្ណ​ដើម្បី​ផ្តល់​ការ​ចំណេញ​ទៅ​ឲ្យ​ក្រុមហ៊ុន​ឯកជន​នោះ​ទេ គឺ​គួរ​ផ្តល់​អាជ្ញាប័ណ្ណ​ដើម្បី​ចំណេញ​ដល់​ជាតិ និង​ពលរដ្ឋ​មូលដ្ឋាន។ នៅ​ពេល​ឆាប់ៗ​នេះ យើង​នឹង​ចាប់​ផ្ដើម​លាតត្រដាង​ឯកសារ​មួយ​ចំនួន​ដែល​នឹង​បង្ហាញ​ថា​ខ្សាច់​ស៊ីលីកា នាំ​ចេញ​ទៅ​ក្រៅ​ប្រទេស នាំ​ឲ្យ​ខាត​លុយ ដោយសារ​ភាគច្រើន​គឺ​នាំ​ចេញ​ដោយ​ខុស​ច្បាប់ មិន​បង់​ពន្ធ»

អង្គការ​មាតា​ធម្មជាតិ នៅ​តែ​រក្សា​ជំហរ​ទាមទារ​ឲ្យ​រដ្ឋាភិបាល​កម្ពុជា បញ្ឈប់​ការ​នាំ​ខ្សាច់​ប្រភេទ​ស៊ីលីកា​នេះ​ចេញ​ទៅ​ក្រៅ​ប្រទេស ដូច​ករណី​ផ្អាក​ការ​នាំ​ចេញ​ខ្សាច់​ប្រភេទ​ចាក់​បំពេញ​ដែរ។

ការ​នាំ​ចេញ​ខ្សាច់​ប្រភេទ​ស៊ីលីកា​ដែល​ជា​ខ្សាច់​បម្រើ​ឲ្យ​ឧស្សាហកម្ម​ផលិត​កែវ ដប និង​កញ្ចក់ ទៅ​ក្រៅ​ប្រទេស​នេះ បាន​ក្លាយ​ជា​ប្រធានបទ​ដ៏​ចម្រូងចម្រាស​ថ្មី​មួយ​ទៀត​រវាង​ក្រសួង​រ៉ែ និង​ថាមពល នៃ​រាជ​រដ្ឋាភិបាល​កម្ពុជា ជាមួយ​នឹង​អង្គការ​សង្គម​ស៊ីវិល និង​គណបក្ស​ប្រឆាំង បន្ថែម​ពី​លើ​ករណី​នាំ​ខ្សាច់​ចេញ​ទៅ​សិង្ហបុរី និង​ឥណ្ឌា ដែល​កម្ពុជា ខាតបង់​ទឹកប្រាក់​ជាង ៧០០​លាន​ដុល្លារ​អាមេរិក។

កាល​ពី​ពេល​ថ្មីៗ​នេះ ប្រធាន​ក្រុម​សមាជិក​សភា​គណបក្ស​សង្គ្រោះ​ជាតិ និង​ជា​អនុប្រធាន​គណៈកម្មការ​សេដ្ឋកិច្ច ហិរញ្ញវត្ថុ ធនាគារ និង​សវនកម្ម​នៃ​រដ្ឋសភា លោក សុន ឆ័យ តាម​រយៈ​ប្រធាន​រដ្ឋសភា លោក ហេង សំរិន បាន​ផ្ញើ​លិខិត​មួយ​ច្បាប់​ទៅ​រដ្ឋមន្ត្រី​ក្រសួង​រ៉ែ និង​ថាមពល លោក ស៊ុយ សែម ស្នើ​ឲ្យ​រដ្ឋមន្ត្រី​រូប​នេះ​បង្ហាញ​ព័ត៌មាន និង​ឯកសារ​ផ្លូវការ​ទាក់ទង​នឹង​ការ​នាំ​ខ្សាច់​ស៊ីលីកា ឬ​ខ្សាច់​ស ចេញ​ទៅ​ក្រៅ​ប្រទេស។

ឯកសារ​លម្អិត​ដែល​លោក សុន ឆ័យ ស្នើ​ឲ្យ​ក្រសួង​រ៉ែ និង​ថាមពល បង្ហាញ​នោះ​មាន​ដូចជា លិខិត​ចម្លង​វិញ្ញាបនបត្រ​ចុះ​បញ្ជី​ពាណិជ្ជកម្ម​របស់​ក្រុមហ៊ុន​ដែល​ត្រូវ​បាន​ផ្តល់​អាជ្ញាប័ណ្ណ បញ្ជី​ឈ្មោះ​ទីតាំង​ការដ្ឋាន​ដែល​អនុញ្ញាត​ឲ្យ​មាន​ការ​ប្រមូល​យក​ខ្សាច់​ស៊ីលីកា ឯកសារ​ថត​ចម្លង​ពី​អាជ្ញាប័ណ្ណ​របស់​ក្រុមហ៊ុន​ធ្វើ​អាជីវកម្ម និង​របាយការណ៍​វាយ​តម្លៃ​ផល​ប៉ះពាល់​បរិស្ថាន និង​សង្គម។ លោក សុន ឆ័យ ក៏​ស្នើ​ឲ្យ​បង្ហាញ​ពី​តួលេខ​សរុប​នៃ​ការ​នាំ​ចេញ​ខ្សាច់​ស៊ីលីកា គិត​ពី​ខែ​វិច្ឆិកា ឆ្នាំ​២០១៦ ដល់​បច្ចុប្បន្ន វិក្កយបត្រ​នាំ​ចេញ បញ្ជី​ឈ្មោះ​ប្រទេស​ដែល​នាំ​ចូល​ខ្សាច់​ស៊ីលីកា​ពី​កម្ពុជា តម្លៃ​សរុប​នៃ​ការ​នាំ​ចេញ និង​ចំនួន​ថវិកា​សរុប​បាន​ពី​ការ​ប្រមូល​ពន្ធ​សួយសារអាករ។

អ្នក​នាំ​ពាក្យ​ក្រសួង​រ៉ែ និង​ថាមពល លោក ឌិត ទីណា បញ្ជាក់​ថា ក្រសួង​បាន​រៀបចំ និង​ប្រមូល​ឯកសារ​ទាំងនោះ​រួច​រាល់​ហើយ ហើយ​បន្ទាប់​ពី​ឆ្លង​កាត់​បែបបទ​រដ្ឋបាល​រួច ក្រសួង​នឹង​ផ្ញើ​ជូន​រដ្ឋសភា ព្រម​ទាំង​ផ្សព្វផ្សាយ​ជា​សាធារណៈ ដើម្បី​ឲ្យ​ប្រជាពលរដ្ឋ​បាន​ដឹង​ឮ​ផង​ដែរ៕

No comments:

Post a Comment