​Paris Peace Agreements 1991

Monday, June 5, 2017

ស្ថានទូត ​អាមេរិក​ បន្ត​ តាមដាន​ ការ​បោះឆ្នោត ខណៈ គ.ជ.ប. មិន​ ទាន់​ប្រកាស​ លទ្ធផល​ បឋម | US embassy continues to monitor elections as NEC tabulates results

ឯកអគ្គរដ្ឋទូត​សហភាព​អឺរ៉ុប លោក ច្សច អេដហ្គា (George EDGAR) [រូប​ពី​ស្ដាំ​ទី​ពីរ] ឯកអគ្គរាជទូត​ជប៉ុន ប្រចាំ​កម្ពុជា លោក ហ៊ិដិហ៊ិសា ហូរីណូអ៊ុជិ (Hidehisa HORINOUCHI) [រូប​ពី​ស្ដាំ​ទី​មួយ] និង​ឯកអគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា លោក វីល្លៀម ហៃដ្ដ៍ (William A. Heidt) [ឆ្វេង] ផ្ដល់​បទសម្ភាសន៍​ដល់​អ្នក​កាសែត​ក្រោយ​ជំនួប​ជាមួយ គ.ជ.ប នៅ​ថ្ងៃ​ទី​៣១ ខែ​ឧសភា ឆ្នាំ​២០១៧។
ឯកអគ្គរដ្ឋទូត​សហភាព​អឺរ៉ុប លោក ច្សច អេដហ្គា (George EDGAR) [រូប​ពី​ស្ដាំ​ទី​ពីរ] ឯកអគ្គរាជទូត​ជប៉ុន ប្រចាំ​កម្ពុជា លោក ហ៊ិដិហ៊ិសា ហូរីណូអ៊ុជិ (Hidehisa HORINOUCHI) [រូប​ពី​ស្ដាំ​ទី​មួយ] និង​ឯកអគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា លោក វីល្លៀម ហៃដ្ដ៍ (William A. Heidt) [ឆ្វេង] ផ្ដល់​បទសម្ភាសន៍​ដល់​អ្នក​កាសែត​ក្រោយ​ជំនួប​ជាមួយ គ.ជ.ប នៅ​ថ្ងៃ​ទី​៣១ ខែ​ឧសភា ឆ្នាំ​២០១៧។

ស្ថានទូត ​អាមេរិក​ បន្ត​ តាមដាន​ ការ​បោះឆ្នោត ខណៈ គ.ជ.ប. មិន​ ទាន់​ប្រកាស​ លទ្ធផល​ បឋម

RFA / វិទ្យុ អាស៊ី សេរី |៥ មិថុនា​ ២០១៧


ស្ថានទូត​សហរដ្ឋ​អាមេរិក​ប្រចាំ​កម្ពុជា អះអាង​ថា នឹង​បន្ត​តាមដាន​ព្រឹត្តិការណ៍​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​នៅ​កម្ពុជា។ ការ​អះអាង​នេះ ខណៈ​ដែល​គណៈកម្មាធិការ​ជាតិ​រៀបចំ​ការ​បោះឆ្នោត ហៅ​កាត់​ថា គ..ប កំពុង​បន្ត​ដំណើរការ​រាប់​សន្លឹកឆ្នោត និង​មិន​ទាន់​ប្រកាស​លទ្ធផល​បឋម​បណ្ដោះអាសន្ន​ការ​បោះឆ្នោត​នៅ​ឡើយ។

ក្នុង​ពេល គ..ប កំពុង​រៀបចំ​បញ្ជី​លទ្ធផល​បឋម​បណ្ដោះអាសន្ន​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់ ស្ថានទូត​សហរដ្ឋ​អាមេរិក រំពឹង​ថា ស្ថាប័ន​ជាតិ​រៀបចំ​ការ​បោះឆ្នោត​មួយ​នេះ នឹង​បន្ត​ការងារ​របស់​ខ្លួន​ដោយ​ការ​ទទួល​ខុស​ត្រូវ ដោយ​មាន​ការ​ចូលរួម និង​តម្លាភាព។
សេចក្តី​ថ្លែងការណ៍​របស់​ស្ថានទូត​សហរដ្ឋ​អាមេរិក​ប្រចាំ​កម្ពុជា ចេញ​ផ្សាយ​នៅ​ថ្ងៃ​ទី​៥ មិថុនា ឲ្យ​ដឹង​ថា ស្ថានទូត​សហរដ្ឋ​អាមេរិក សម្ដែង​ការ​សាទរ​ចំពោះ​ពលរដ្ឋ​ខ្មែរ​ដែល​បាន​ចេញ​ទៅ​ចូលរួម​បោះឆ្នោត និង​កោត​សរសើរ​ចំពោះ​រដ្ឋាភិបាល​កម្ពុជា គណៈកម្មាធិការ​ជាតិ​រៀបចំ​ការ​បោះឆ្នោត មន្ត្រី​បោះឆ្នោត និង​ភាគី​ពាក់ព័ន្ធ​ផ្សេង​ទៀត ដែល​បាន​ចូលរួម​រៀបចំ និង​ធ្វើ​ឲ្យ​ការ​បោះឆ្នោត​កើត​មាន​ឡើង។
នៅ​ក្នុង​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​កាល​ពី​ថ្ងៃ​ទី​៤ មិថុនា ក្រៅ​ពី​មាន​អ្នក​សង្កេតការណ៍​ជាតិ​ប្រមាណ ៧​ម៉ឺន ៥​ពាន់​នាក់​ចូលរួម​ឃ្លាំ​មើល ក៏​មាន​អ្នក​សង្កេតការណ៍​អន្តរជាតិ​ជិត ៤០០​នាក់​មក​ពី ៣៤​ស្ថាប័ន​ចូលរួម​ផង​ដែរ ក្នុង​នោះ​រួម​មាន​មក​ពី​ស្ថានទូត អង្គការ​ក្រៅ​រដ្ឋាភិបាល អន្តរជាតិ វិទ្យាស្ថាន​ប្រជាធិបតេយ្យ​ជាតិ និង​ស្ថាប័ន​ដទៃ​ទៀត។
ដោយឡែក​ស្ថានទូត​សហរដ្ឋ​អាមេរិក​ប្រចាំ​កម្ពុជា បាន​បញ្ជូន​អ្នក​សង្កេតការណ៍​របស់​ខ្លួន​ចំនួន ៤០​នាក់ ដើម្បី​ឃ្លាំ​មើល​ការ​បោះឆ្នោត​នេះ។ ស្ថានទូត​សហរដ្ឋ​អាមេរិក វាយ​តម្លៃ​ថា ជាទូទៅ ការ​បោះឆ្នោត​នៅ​តាម​ការិយាល័យ​នីមួយៗ​ប្រព្រឹត្ត​ទៅ​ដោយ​សណ្ដាប់ធ្នាប់ និង​សន្តិវិធី។
ស្ថានទូត​សហរដ្ឋ​អាមេរិក ចាត់​ទុក​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​នៅ​ពេល​នេះ ថា​ជា​ព្រឹត្តិការណ៍​ដ៏​សំខាន់​សម្រាប់​ដំណើរការ​អភិវឌ្ឍ​លទ្ធិប្រជាធិបតេយ្យ​នៅ​កម្ពុជា។ ស្ថានទូត​សហរដ្ឋ​អាមេរិក ក៏​អំពាវនាវ​ឲ្យ​ពលរដ្ឋ​ខ្មែរ គណបក្ស​នយោបាយ និង​ស្ថាប័ន​នានា ទទួល​យក​លទ្ធផល​នៃ​ការ​បោះឆ្នោត​ដោយ​សន្តិភាព ប្រកប​ដោយ​ស្មារតី​ផ្សះផ្សា និង​សហប្រតិបត្តិការ។
ទោះ​ជា​យ៉ាង​ណា ស្ថានទូត​សហរដ្ឋ​អាមេរិក ទទូច​ឲ្យ គ..ប ស៊ើប​អង្កេត​ពេញលេញ​នូវ​កង្វល់ និង​ការ​ព្រួយ​បារម្ភ​ទាំងឡាយ​ដែល​បក្ស​ប្រឆាំង និង​សង្គម​ស៊ីវិល​បាន​រក​ឃើញ​នៅ​មុន​ពេល និង​ក្នុង​អំឡុង​ពេល​នៃ​ការ​ឃោសនា​បោះឆ្នោត។
បើ​ទោះ​ជា​នៅ​មុន​ពេល​ការ​បោះឆ្នោត ក្នុង​អំឡុង​ពេល​នៃ​ការ​ឃោសនា​បោះឆ្នោត លោក នាយក​រដ្ឋមន្ត្រី ហ៊ុន សែន និង​មន្ត្រី​យោធា​ជាន់​ខ្ពស់ បាន​ព្រមាន​ពី​ការ​កើត​ឡើង​សង្គ្រាម ឬ​ការ​បង្ក្រាប​ដែល​ជា​ទូទៅ ត្រូវ​បាន​គេ​ចាត់​ទុក​ថា​ជា​សារ​គំរាម​កំហែង​ក្តី តែ​ពលរដ្ឋ​ជិត ៩០​ភាគរយ​ក្នុង​ចំណោម​អ្នក​បាន​ចុះ​ឈ្មោះ​សរុប​ចំនួន​ប្រមាណ ៨​លាន​នាក់ បាន​ទៅ​បោះឆ្នោត។ ការ​ចេញ​ទៅ​បោះឆ្នោត​របស់​ពលរដ្ឋ​នេះ ត្រូវ​បាន​សង្គម​ស៊ីវិល​ចាត់​ទុក​ថា ពលរដ្ឋ​ខ្មែរ​បាន​យល់​ពី​តម្លៃ​នៃ​ការ​បោះឆ្នោត និង​ពី​ការ​ប្រើប្រាស់​សិទ្ធិ​របស់​ពួក​គេ ជ្រើសរើស​អ្នក​ដែល​ខ្លួន​ពេញ​ចិត្ត។
ដោយឡែក​សម្រាប់​ឯកអគ្គរដ្ឋទូត​សហភាព​អឺរ៉ុប ប្រចាំ​កម្ពុជា លោក ច្សច អេដហ្គា (George Edgar) តាម​រយៈ​លិខិត​ឆ្លើយតប​ទៅ​នឹង​សំណួរ​របស់​អាស៊ីសេរី នៅ​ថ្ងៃ​ទី​៥ មិថុនា បញ្ជាក់​ថា តាម​អ្វី​ដែល​លោក និង​ក្រុម​ការងារ​លោក​បាន​ឃើញ​នៅ​ក្នុង​ថ្ងៃ​បោះឆ្នោត និង​ពី​អ្វី​ដែល​លោក​បាន​ឮ​ពី​អ្នក​ផ្សេង​ទៀត បង្ហាញ​ថា​ដំណើរការ​នៃ​ការ​បោះឆ្នោត និង​រាប់​សន្លឹកឆ្នោត បាន​ប្រព្រឹត្ត​ទៅ​ដោយ​រលូន។
ក្នុង​ពេល​ជាមួយ​គ្នា ទីភ្នាក់ងារ​សហប្រតិបត្តិការ​អន្តរជាតិ​ជប៉ុន ហៅ​កាត់​ថា​ចៃកា (JICA) ដែល​បាន​ផ្តល់​ការ​គាំទ្រ​ផ្នែក​បច្ចេកទេស​ដល់ គ..ប វាយ​តម្លៃ​ថា ដំណើរការ​បោះឆ្នោត​ប្រព្រឹត្ត​ដោយ​សន្តិភាព។ ទោះ​ជា​យ៉ាង​ណា អង្គការ​នេះ​នឹង​បន្ត​ឃ្លាំ​មើល​ការ​ប្រកាស​លទ្ធផល​ដោយ គ..ប បន្ថែម​ទៀត៕


No comments:

Post a Comment