មន្ត្រី គ.ជ.ប. នឹងជជែក ជាមួយ ក្រសួង មហាផ្ទៃ រឿងនីតិវិធី ផ្ដល់លិខិត ស្នាក់នៅ ដល់ពលរដ្ឋថ្មី
RFA / វិទ្យុ អាស៊ី សេរី | ២ កញ្ញា ២០១៧
ស្ដាប់ ឬ ទាញយកសំឡេង
មន្ត្រី គណៈកម្មាធិការ ជាតិ រៀបចំ ការបោះឆ្នោត (គ.ជ.ប.) នឹងជួបជជែក ជាមួយ មន្ត្រី ក្រសួង មហាផ្ទៃ ជុំវិញ ការប្រកាស កែប្រែ ផ្ដល់លិខិត ស្នាក់នៅ ស្របពេល គណបក្ស សង្គ្រោះជាតិ ព្រួយអំពី ការកែប្រែ នីតិវិធីនេះ ថា ធ្វើឱ្យ ប៉ះពាល់ សិទ្ធិចុះឈ្មោះ បោះឆ្នោត របស់ ពលរដ្ឋ។ នីតិវិធី ថ្មី របស់ ក្រសួង មហាផ្ទៃ កំណត់ ថា, ពលរដ្ឋ ដែលផ្លាស់ ទីលំនៅថ្មី គឺ ត្រូវ ស្នាក់នៅ ឱ្យបាន ចាប់ពី ៣០ថ្ងៃ ឡើងទៅ ទើប អាចស្នើសុំ លិខិត ស្នាក់នៅ ពីអាជ្ញាធរបាន។
មន្ត្រីតំណាងរបស់គណបក្សសង្គ្រោះជាតិ អះអាងថា សេចក្ដីប្រកាសចាស់របស់ក្រសួងមហាផ្ទៃ ដើម្បីចេញលិខិតបញ្ជាក់ទីលំនៅជូនពលរដ្ឋ គឺមិនបានកំណត់ពេលឡើយ ដូច្នោះ ការកែប្រែនីតិវិធីចេញលិខិតបញ្ជាក់ទីលំនៅដោយកំណត់ពេលចាប់ពី ៣០ថ្ងៃឡើងទៅ នឹងធ្វើឱ្យប៉ះពាល់ដល់សិទ្ធិចុះឈ្មោះបោះឆ្នោតរបស់ពលរដ្ឋ។
អនុប្រធាន គ.ជ.ប លោក គួយ ប៊ុនរឿន លើកឡើងថា ប្រសិនបើការអនុវត្តនីតិវិធីថ្មីនេះ ពិតជាធ្វើឱ្យប៉ះពាល់សិទ្ធិចុះឈ្មោះបោះឆ្នោតរបស់ពលរដ្ឋមែន គ.ជ.ប នឹងពិភាក្សាជាមួយមន្ត្រីក្រសួងមហាផ្ទៃ ឡើងវិញ។ ទោះជាយ៉ាងណាលោកបញ្ជាក់ថា មន្ត្រីតំណាងក្រសួងមហាផ្ទៃ ធ្លាប់បញ្ជាក់ប្រាប់មន្ត្រីជំនាញ គ.ជ.ប. ថា តាមច្បាប់ស្ដីពីការចេញលិខិតស្នាក់នៅដំបូងឡើយ គឺត្រូវមានរយៈពេលចាប់ពី ៦ខែឡើងទៅ ប៉ុន្តែដោយសារចង់ជួយសម្រួលដល់ការចុះឈ្មោះបោះឆ្នោតរបស់ពលរដ្ឋ ទើបកំណត់មកត្រឹម ៣០ថ្ងៃវិញ៖ «ជួបជាមួយក្រសួងមហាផ្ទៃ ធ្វើម៉េចដើម្បីជួយសម្រួលដល់ការចុះឈ្មោះបោះឆ្នោតរបស់ពលរដ្ឋ ដើម្បីជួយសម្រួលដល់ពលរដ្ឋដែលមានឈ្មោះបោះឆ្នោតហើយនោះ ដែលបានផ្លាស់ប្ដូរទីលំនៅបានផ្ទេរទិន្នន័យពួកគាត់ទៅឃុំសង្កាត់ថ្មីដែលគាត់រស់នៅនោះ បានបោះឆ្នោតផង។»
ការបញ្ជាក់របស់លោក គួយ ប៊ុនរឿន នេះដើម្បីឆ្លើយតបទៅនឹងសំណូមពររបស់ប្រធាននាយកដ្ឋានកិច្ចការបោះឆ្នោតគណបក្សសង្គ្រោះជាតិ អ្នកស្រី ម៉េង សុភារី នៅក្នុងកិច្ចប្រជុំជាមួយភាគីពាក់ព័ន្ធអំពីការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតឆ្នាំ២០១៧ នៅថ្ងៃទី១ ខែកញ្ញា។
អ្នកស្រី ម៉េង សុភារី ថ្លែងថា កន្លងមក ក្រុមប្រឹក្សាឃុំ-សង្កាត់ខ្លះ គឺអាចចេញលិខិតស្នាក់នៅជូនពលរដ្ឋ ប្រសិនបើពលរដ្ឋនោះ មានត្រឹមតែអត្តសញ្ញាណប័ណ្ណ និងសាក្សីមួយរូបទៅជាមួយ និងមិនបានខ្វល់អំពីការស្នាក់បានមួយថ្ងៃ ឬពីរថ្ងៃនៅពេលបច្ចុប្បន្នទេ។
អ្នកស្រីថា ការកែប្រែនីតិវិធីផ្ដល់លិខិតស្នាក់នៅនេះ នឹងធ្វើឱ្យប៉ះពាល់ពលរដ្ឋខ្លះដែលផ្លាស់ពីកន្លែងមួយទៅកន្លែងមួយ ជាពិសេសពលករដែលបានចំណាកពីស្រុកទៅស្រុកមួយ ដើម្បីបំពេញការងាររបស់ពួកគេ៖ «ការចេញលិខិតបញ្ជាក់លំនៅកន្លងមក ក្រសួងមហាផ្ទៃ ចេញពីរប្រភេទ ទីមួយលិខិតបញ្ជាក់ទីលំនៅសម្រាប់បម្រើឱ្យការចុះឈ្មោះបោះឆ្នោត អ៊ីចឹងអត់កំណត់ពេលទេ អាមួយទៀត ចេញលិខិតបញ្ជាក់លំនៅសម្រាប់ធ្វើអត្តសញ្ញាណប័ណ្ណ អ៊ីចឹងអាហ្នឹងមានកំណត់ពេល ៦ខែអីទៅ។ ការចុះឈ្មោះបោះឆ្នោតបានតែ ៧០ថ្ងៃ ហើយដល់ ៦ខែ វាហួសពេលចុះឈ្មោះបោះឆ្នោតហើយ ម៉េចបាន?»
អ្នកស្រីបន្តថា ការសម្រួលឱ្យពលរដ្ឋចុះឈ្មោះបោះឆ្នោតបានគ្រប់ៗគ្នា គឺមិនមែនជាកិច្ចផ្ដាច់មុខរបស់ គ.ជ.ប ឡើយ ព្រោះត្រូវទាមទារការចូលរួមពីគណបក្សនយោបាយ សង្គមស៊ីវិល អាជ្ញាធរដែនដី និងក្រសួងមហាផ្ទៃ ជាដើម។ មន្ត្រីតំណាងគណបក្សប្រឆាំងរូបនេះ ចាត់ទុកថា វាជាដំណឹងល្អមួយនៅពេលមន្ត្រី គ.ជ.ប បានសន្យាជួបជជែកជាមួយក្រសួងមហាផ្ទៃ នៅថ្ងៃខាងមុខ ដើម្បីពិនិត្យលើសេចក្ដីប្រកាសថ្មីនេះឡើងវិញ។
សេចក្ដីប្រកាសរបស់ក្រសួងមហាផ្ទៃ ស្ដីពីការកែប្រែប្រការចំនួនពីរ ស្ដីពីនីតិវិធី និងបែបបទនៃការចេញលិខិតបញ្ជាក់ទីលំនៅ ដែលបានចុះហត្ថលេខាដោយលោក ស ខេង កាលពីថ្ងៃទី១៤ ខែសីហា ឱ្យដឹងថា កាស្នាក់នៅត្រូវមានរយៈពេលយ៉ាងតិច ៣០ថ្ងៃ ទើបអាចចុះបញ្ជីស្នាក់នៅបណ្ដោះអាសន្ន និងមានលិខិតអនុញ្ញាតឱ្យស្នាក់នៅបណ្ដោះអាសន្ន ចេញដោយប៉ុស្តិ៍នគរបាលរដ្ឋបាលឃុំ-សង្កាត់។
តួលេខពី គ.ជ.ប ឱ្យដឹងថា ប្រជាពលរដ្ឋទើបគ្រប់អាយុ និងអ្នកមិនទាន់បានចុះឈ្មោះបោះឆ្នោតកាលពីឆ្នាំ២០១៦ គឺមានជាង ១,៤លាននាក់ ដែលត្រូវទៅចុះឈ្មោះបោះឆ្នោតថ្មីឆ្នាំ២០១៧ នេះ ដើម្បីអាចមានឈ្មោះ ចូលរួមបោះឆ្នោតជ្រើសរើសតំណាងរាស្ត្រក្នុងឆ្នាំ២០១៨។ នៅថ្ងៃទី១ ខែកញ្ញា នេះ គឺជាថ្ងៃដំបូងនៃដំណើរការចុះឈ្មោះបោះឆ្នោតដែលរយៈពេលសរុប ៧០ថ្ងៃ។ ទោះជាយ៉ាងណា ភាគច្រើននៃអ្នកមិនទាន់ចុះឈ្មោះទាំងនេះ ត្រូវបានគេដឹងថា ជាពលករចំណាកស្រុកទៅប្រទេសថៃ និងប្រទេសកូរ៉េខាងត្បូង ជាដើម។
ជាមួយគ្នានេះ ក្នុងថ្ងៃទីមួយនៃដំណើរការចុះឈ្មោះបោះឆ្នោត អាស៊ីសេរី បានទៅផ្ទាល់នៅការិយាល័យចុះឈ្មោះបោះឆ្នោតនៅក្នុងសង្កាត់ចំនួន៤ ក្នុងរាជធានីភ្នំពេញ ប៉ុន្តែសង្កាត់ខ្លះ ទើបមានអ្នកទៅចុះឈ្មោះបាន ១ និងពីរនាក់ប៉ុណ្ណោះ។ មន្ត្រីនៅក្នុងសង្កាត់មួយបានប្រាប់អាស៊ីសេរីថា សង្កាត់របស់ពួកគេមានអ្នកមិនទាន់ចុះឈ្មោះជាង ២ពាន់នាក់ ហើយភាគច្រើននៃអ្នកទាំងនេះ គឺយុវជនទៅសិក្សានៅក្រៅប្រទេស ពលករ និងអ្នកខ្លះទៀតមិនទាន់ទទួលបានព័ត៌មានច្បាស់លាស់។
ពាក់ព័ន្ធនឹងថ្ងៃបោះឆ្នោតដំបូងនេះ ប្រធានគណបក្សសង្គ្រោះជាតិ លោក កឹម សុខា ក៏បានអំពាវនាវទៅដល់អ្នកមិនទាន់ទៅចុះបោះឆ្នោត ត្រូវទៅចុះបោះឆ្នោតឱ្យបានគ្រប់គ្នា ព្រោះលោកថា បើមិនបានចុះឈ្មោះបោះឆ្នោត គឺមានន័យពលរដ្ឋទាំងនោះនឹងបាត់សិទ្ធិជាម្ចាស់ប្រទេស៕
No comments:
Post a Comment