 |
| កិច្ចព្រមព្រៀងសន្តិភាពប៉ារីស ចុះហត្ថលេខា ថ្ងៃទី២៣ តុលា ១៩៩១ (ពីឆ្វេងទៅស្ដាំ ៖ លោក សឺន សាន, សម្ដេច នរោត្តម សីហនុ, លោក ហ៊ុន សែន) |
លោក ហ៊ុន សែន ថា ២៣ តុលា ស្លាប់, តែ រំលឹក ថា, លោក ជាស្ថាបនិក ជាមួយ សម្ដេច សីហនុ
RFA / វិទ្យុ អាស៊ី សេរី | ១៥ តុលា ២០១៧
លោក នាយករដ្ឋមន្ត្រី ហ៊ុន សែន ដែលធ្លាប់អះអាង ថា, កិច្ចព្រមព្រៀង សន្តិភាព ទីក្រុង ប៉ារីស បានស្លាប់ បាត់បង់ ទៅហើយនោះ នៅថ្ងៃ ទី១៤ ខែតុលា នេះ បានអះអាង ថា, រូបលោកផ្ទាល់ និងសម្ដេច ព្រះបរមរតនកោដ្ឋ នរោត្តម សីហនុ គឺ ជាស្ថាបនិក នៃកិច្ចចរចា សន្តិភាព ទីក្រុងប៉ារីស ដែលនាំ ឲ្យមាន ការបញ្ចប់សង្គ្រាម បង្ហូរឈាម ដ៏រ៉ាំរ៉ៃ នៅកម្ពុជា។
ការអះអាង របស់លោក ហ៊ុន សែន ធ្វើឡើង នៅក្នុងកិច្ច សំណេះសំណាល ជាមួយ សិស្សនិទ្ទេស អេ (A) ប្រមាណ ជាង ៤០០នាក់ នៅវិមានសន្តិភាព។
នៅថ្ងៃទី២៣ ខែតុលា ខាងមុខនេះ គឺជាខួប ២៦ឆ្នាំហើយ នៃកិច្ចចរចាទីក្រុងប៉ារីស ដើម្បីបញ្ចប់សង្គ្រាមនៅកម្ពុជា។ ភាគីដែលចូលរួមចុះហត្ថលេខាលើកិច្ចព្រមព្រៀងនេះរួមមាន សម្ដេច ព្រះនរោត្ត សីហនុ ក្រុមរបស់លោកតា សឺន សាន ក្រុមខ្មែរក្រហមរបស់ ប៉ុល ពត និងភាគីរដ្ឋាភិបាលដែលមានបង្អែកវៀតណាមនៅពីក្រោយគឺភាគីលោក ហ៊ុន សែន លោក ហេង សំរិន និង លោក ជា ស៊ីម ។ កិច្ចព្រមព្រៀងធ្វើឡើងដែលមានប្រទេសចំនួន ១៨ ចូលរួមចុះហត្ថលេខាក្នុងនោះរួមមាន សហរដ្ឋអាមេរិក បារាំង អូស្ត្រាលី ឥណ្ឌូនេស៊ី និងបណ្ដាប្រទេសចំនួន ១៣ផ្សេងទៀត។
កិច្ចព្រមព្រៀង នេះហើយដែលនាំឲ្យកម្ពុជារៀបចំរដ្ឋធម្មនុញ្ញរបស់ខ្លួនឡើងវិញតាមរយៈការទទួលយកការគោរពសិទ្ធិមនុស្ស គោរពគោលការណ៍ប្រជាធិបតេយ្យ សេរីពហុបក្ស តាមរយៈការបោះឆ្នោតដោយសេរី ត្រឹមត្រូវ និងយុត្តិធម៌ក្នុងការជ្រើសតាំងតំណាងរាស្ត្រ។
ក្រុមអ្នកឃ្លាំមើលស្ថានការណ៍នយោបាយនៅកម្ពុជា អះអាងថា រដ្ឋាភិបាលរបស់លោក ហ៊ុន សែន តែងរំលោភកិច្ចព្រមព្រៀងនេះ ចាប់តាំងថ្ងៃចុះកិច្ចសន្យាមកម្ល៉េះ។ អង្គការឃ្លាំមើលអន្តរជាតិ យូមែន រ៉ៃ វច្ឆ (Human Rights Watch) ធ្លាប់រិះគន់ ថា ចាប់តាំងពីការបោះឆ្នោតឆ្នាំ១៩៩៣ រហូតមកទល់ពេលបច្ចុប្បន្ននេះរដ្ឋាភិបាលរបស់លោក ហ៊ុន សែន បានព្យាយាមគ្រប់គ្រងលើប្រព័ន្ធតុលាការ រដ្ឋសភា និងកងកម្លាំងប្រដាប់អាវុធរបស់ជាតិទាំងអស់ ហើយព្យាយាមបំបិទសំឡេងក្រុមអ្នករិះគន់ និងគណបក្សប្រឆាំង ក្នុងហេតុផលឈ្មោះទៅរកការដឹកនាំបែបគណបក្សតែមួយ៕
No comments:
Post a Comment