 |
| អតីតប្រធានគណបក្សសង្គ្រោះជាតិ លោក សម រង្ស៊ី ផ្ដល់បទសម្ភាសន៍ដល់អាស៊ីសេរី នាការិយាល័យនៅរដ្ឋធានីវ៉ាស៊ីនតោន សហរដ្ឋអាមេរិក កាលពីថ្ងៃទី៧ ខែតុលា ឆ្នាំ២០១៦។ |
លោក សម រង្ស៊ី សង្ឃឹម ថា តុលាការ អាមេរិក នឹងបង្គាប់ ឲ្យហ្វេសប៊ុក បង្ហាញ ឯកសារ តាមបណ្ដឹង
RFA / វិទ្យុ អាស៊ី សេរី | ៣០ មេសា ២០១៨
លោក សម រង្ស៊ី ប្រធានចលនាសង្គ្រោះជាតិ បានប្រាប់អាស៊ីសេរីតាមទូរស័ព្ទ កាលពីថ្ងៃទី៣០ ខែ មេសាថា លោកមានក្តីសង្ឃឹមមុតមាំថា ចៅក្រមនៃតុលាការអាមេរិក នឹងចេញសេចក្ដីសម្រេចបង្គាប់ ឲ្យក្រុមហ៊ុនហ្វេសប៊ុក (Facebook) បញ្ចេញព័ត៌មានលំអិត ពាក់ព័ន្ធនឹងលោក ហ៊ុន សែន និងគូកន ដែលលោកបានចោទថា បានប្រើទំព័រហ្វេសប៊ុក ក្នុងការបោកបន្លំរាស្ត្រម្ចាស់ឆ្នោត ដោយការទិញ “Likes” និង ការរំលោភសិទ្ធិមនុស្សផ្សេងៗទៀត៖ «រឿងនេះរឿងពិតទាំងអស់ ដែលលោក ហ៊ុន សែន មិនអាចប្រកែកបាន ហើយក្រុមរបស់គាត់ មិនអាចបដិសេធបាន។ ដូច្នេះអ្វីដែលជាការពិត ខ្ញុំជឿថា គេឲ្យតម្លៃ គេទទួលយកពាក្យបណ្ដឹងរបស់ខ្ញុំទៅក្រុមហ៊ុនហ្វេសប៊ុកតាមរយៈតុលាការ។ ខ្ញុំបានប្រគល់កិច្ចការទាំងនោះឲ្យមេធាវីខ្ញុំហើយ មេធាវីជាអ្នកចាត់ចែងទាំងអស់ ទាំងនៅតុលាការផង ទាំងឆ្លើយតបសំណួរពីគ្រប់មជ្ឈដ្ឋាន។ ហើយមេធាវីនឹងធ្វើរបាយការណ៍ប្រាប់ខ្ញុំ។»
ចៅក្រមតុលាការក្រុងសាន់ហ្វ្រាន់ស៊ស្កូ (San Francisco) រដ្ឋកាលីហ្វ័រញ៉ា (California) នៅសហរដ្ឋអាមេរិក លោក សាលី គឹម (Sallie Kim) កាលពីថ្ងៃច័ន្ទទី៣០ ខែមេសា បានបើកសវនាការ ក្នុងសំណុំរឿងរបស់មេធាវីលោក សម រង្ស៊ី ដែលដាក់ពាក្យប្ដឹងទៅកាន់ក្រុមហ៊ុនហ្វេសប៊ុក ដើម្បីទាមទារឲ្យក្រុមហ៊ុនយក្ស ផ្នែកបណ្ដាញសង្គមមួយនេះ បង្ហាញភស្តុតាងផ្សេងៗ នៃការប្រើប្រាស់គណនីហ្វេសប៊ុករបស់លោក ហ៊ុន សែន និងគូកនរបស់លោក ដើម្បីជួយលោក សម រង្ស៊ី ក្នុងរឿងក្ដីខ្លះ ដែលលោក ហ៊ុន សែន ប្ដឹងលោក សម រង្ស៊ី នៅប្រទេសកម្ពុជា និងការបំពានគោលការណ៍ប្រើប្រាស់ហ្វេសប៊ុក និងចំនួនទឹកប្រាក់ដែលពួកគាត់ ចំណាយទៅលើហ្វេសប៊ុកនេះ។
រហូតមកដល់ការផ្សាយនេះ អាស៊ីសេរី នៅពុំទាន់ទទួលបានលទ្ធផល នៃសវនាការនេះនៅឡើយទេ។ ប៉ុន្តែលោក មេធាវី ណូអេ ហាហ្គី (Noah Hagey) ដែលជាមេធាវីមួយរូបក្នុងចំណោមមេធាវីបីរូប ដែលការពារក្តីឲ្យលោក សម រង្សី ត្រូវបានទីភ្នាក់ងារព័ត៌មាន Bloomberg news ដកស្រង់សំដីថា សេចក្ដីសម្រេចរបស់តុលាការ ដែលបង្គាប់ឲ្យក្រុមហ៊ុនហ្វេសប៊ុកបង្ហាញភស្តុតាង អំពីម្ចាស់គណនី ហ្វេសប៊ុកទាំងនេះ មានសារៈសំខាន់ណាស់ ដើម្បីជួយលោក សម រង្ស៊ី ឲ្យរួចផុតពីការចោទប្រកាន់ របស់តុលាការក្រុងភ្នំពេញ ដែលបានកាត់ទោសលោក ឲ្យជាប់ពន្ធនាគារ ពីបទបរិហារកេរ្តិ៍លោក ហ៊ុន សែន នោះ។
អ្នកនាំពាក្យក្រុមហ៊ុនហ្វេសប៊ុក ដែលមានមូលដ្ឋាននៅរដ្ឋកាលីហ្វ័រញ៉ា លោក អែនថូនី ហារីសុន (Anthony Harrison) បដិសេធមិនធ្វើអត្ថាធិប្បាយជុំវិញរឿងនេះ។ ប៉ុន្តែកាលពីថ្ងៃទី១ ខែមីនាកន្លងមកនេះ ក្រុមហ៊ុនហ្វេសប៊ុក បានបដិសេធម្តងរួចមកហើយថា ពាក្យបណ្ដឹងរបស់មេធាវីលោក សម រង្ស៊ី នេះ គឺជាការរំលោភលើច្បាប់រក្សាទុកព័ត៌មាន ការពារព័ត៌មានផ្ទាល់ខ្លួន និងច្បាប់ ស្តីអំពីទំនាក់ទំនងតាមប្រព័ន្ធគមនាគមន៍។
ប្រភពដដែលបន្តថា ទោះបីជាក្រុមហ៊ុនហ្វេសប៊ុក មិនចង់ពាក់ព័ន្ធក្នុងរឿងជម្លោះនយោបាយ រវាងគណបក្សកាន់អំណាច និងគណបក្សប្រឆាំងនៅកម្ពុជានោះទេ។ ប៉ុន្តែ ក្រុមហ៊ុននេះ គ្មានជម្រើសអ្វី ក្រៅពីត្រូវឆ្លើយតបទៅនឹងអ្វីដែលតុលាការអាមេរិកបង្គាប់៕
No comments:
Post a Comment