 |
| ប្រធានគណបក្សសង្គ្រោះជាតិ និងជាបេក្ខជននាយករដ្ឋមន្ត្រី លោក សម រង្ស៊ី។ |
RFA / វិទ្យុ អាស៊ី សេរី | ២០ មិថុនា ២០១៨
ស្ដាប់ ឬទាញយកសំឡេង
លោក សម រង្ស៊ី ប្រធានចលនាសង្គ្រោះជាតិ នៅរក្សាជំហររបស់លោកថា ព្រះរាជសាររបស់ព្រះមហាក្សត្រ ដែលអំពាវនាវឲ្យប្រជាពលរដ្ឋចូលរួម ក្នុងការបោះឆ្នោតថ្ងៃទី២៩ កក្កដាថា ជាលិខិតក្លែងក្លាយ ឬក៏ជាលិខិតធ្វើឡើង ក្រោមការសម្លុត និងគាបសង្កត់។ ការលើកឡើងរបស់លោក សម រង្សី ដូចនេះ គឺស្របពេលដែលសាលាដំបូងក្រុងភ្នំពេញ សម្រេចចេញដីកាកោះហៅលោក សម រង្ស៊ី ឲ្យចូលខ្លួនទៅបំភ្លឺព្រឹកថ្ងៃទី១២ ខែកក្កដា ដើម្បីសាកសួរករណីថ្មីមួយទៀត ដែលរបបក្រុងភ្នំពេញចោទប្រកាន់ថា ប្រធានចលនាសង្គ្រោះជាតិរូបនេះប្រមាថព្រះមហាក្សត្រតាមរយៈហ្វេសប៊ុករបស់លោកជាបន្តបន្ទាប់នៅក្នុងអំឡុងខែមិថុនានេះ។
ដីការបស់ព្រះរាជអាជ្ញារងអមសាលាដំបូងក្រុងភ្នំពេញ លោក សៀង សុខ ចុះថ្ងៃទី១៩ មិថុនា ដែលទើបផ្សព្វផ្សាយ នៅថ្ងៃទី២០ មិថុនា បង្គាប់ឲ្យលោក សម រង្ស៊ី ត្រូវធ្វើដំណើរមកកាន់សាលាដំបូងក្រុងភ្នំពេញឲ្យទាន់ពេលវេលា និងយកលិខិតផ្សេងៗ ដែលទាក់ទងនឹងសំណុំរឿងនេះ មកជាមួយផងប្រសិនបើមាន។
ដីការបស់ព្រះរាជអាជ្ញានៅពេលនេះ គឺក្រោយរយៈពេល ១២ថ្ងៃបន្ទាប់ពីរដ្ឋមន្ត្រីក្រសួងយុត្តិធម៌កម្ពុជាលោក អង្ស វង្សវឌ្ឍនា បានចេញអធិបញ្ជាឲ្យអយ្យការអមសាលាដំបូងរាជធានីភ្នំពេញប្ដឹងលោក សម រង្ស៊ី ករណីប្រមាថព្រះមហាក្សត្រ។
លោក សម រង្ស៊ី បានសរសេរនៅលើហ្វេសប៊ុករបស់លោកថា លោកជឿជាក់ថា ព្រះមហាក្សត្រសព្វថ្ងៃ ជាចំណាប់ខ្មាំងក្នុងកណ្តាប់ដៃលោក ហ៊ុន សែន ដែលបង្ខំឲ្យព្រះអង្គគាំទ្ររបបក្បត់ជាតិសព្វថ្ងៃ។ ដូច្នេះ លោកយល់ថា ព្រះរាជសារព្រះមហាក្សត្រ ដែលអំពាវនាវឲ្យពលរដ្ឋទៅបោះឆ្នោត គឺជាលិខិតគ្មានតម្លៃអ្វី និងមិនអាចយកជាការបានទេ។
អ្នកវិភាគនយោបាយវ័យក្មេងលោក ហង្ស វិទូ យល់ថា ការកោះហៅលោក សម រង្ស៊ី ម្តងនេះ ក៏មិនខុសពីសំណុំរឿងផ្សេងទៀតដែរ គឺគ្មានប្រសិទ្ធភាពទេ ព្រោះលោក សម រង្ស៊ី មិនដែលចូលខ្លួនបំភ្លឺម្តងណាឡើយ។ លោកបន្តទៀតថា វិធានការរបស់តុលាការនៅពេលនេះ គ្រាន់តែជាការបង្ហាញថា តុលាការនៅកម្ពុជាធ្វើការមិនឯករាជ្យ ដែលធ្វើឲ្យមានមហាជនទូទៅមិនឲ្យផ្តល់តម្លៃដល់តុលាការ៖ «ការកោះហៅរបស់តុលាការនេះគ្រាន់តែជាការដាក់បន្ទុកលើលោក សម រង្ស៊ី ដើម្បីឲ្យលោកមានទោសកាន់តែច្រើនទៅៗ។»
គិតមកដល់ពេលនេះ លោក សម រង្ស៊ី កំពុងរងបណ្តឹង និងចាញ់ក្តីនៅតុលាការក្រុងភ្នំពេញជាង ១០បណ្តឹងទៅហើយ។ ចំណាត់ការរបស់តុលាការក្រុងភ្នំពេញមកលើរូបលោក សម រង្ស៊ី លើករណីថ្មីនេះ ស្របពេលរបបលោក ហ៊ុន សែន កំពុងរងសម្ពាធពីចលនាមហាជននៃពលរដ្ឋខ្មែរ នៅក្រៅស្រុក រួមមាន សហរដ្ឋអាមេរិក កាណាដា បារាំង ជប៉ុន កូរ៉េខាងត្បូង និងអូស្ត្រាលី ជាដើមនោះ បាននាំគ្នាធ្វើបាតុកម្ម ទាមទារមិនទទួលស្គាល់ការបោះឆ្នោតថ្ងៃទី២៩ កក្កដាខាងមុខ និងស្នើសុំទៅប្រទេសជប៉ុនឲ្យឈប់គាំទ្រការបោះឆ្នោត ដោយពួកគេចាទប្រកាន់ថា ជាការបោះឆ្នោតក្លែងក្លាយ។
លោក ហង្ស វិទូ យល់ថា នេះអាចជាការប្រតិកម្មតបរបស់របបក្រុងភ្នំពេញ ទៅនឹងក្រុមពលរដ្ឋក្រៅប្រទេស ដែលកំពុងដាក់សម្ពាធមកលើខ្លួន។ ប៉ុន្តែ អ្នកវិភាគរូបនេះយល់ថា ការឆ្លើយតបបែបនេះ មិនខុសពីរឿងកំប្លែងនោះទេ៖ «យើងឃើញកន្លងមកឲ្យតែបាតុកម្មនៅក្រៅស្រុកច្រើន តុលាការតែងចេញដីកាកោះហៅ។ វាជារឿងមួយ ដែលកំប្លែងមើលទៅវានៅលើគោគ។»
ដីកាកោះរបស់តុលាការនៅពេលនេះ ក្រោយពេលលោក សម រង្ស៊ី លោកបាននិយាយកាលពីដើមខែមិថុនាថា របប លោក ហ៊ុន សែន ជាអ្នកបង្ខំឲ្យព្រះមហាក្សត្រចេញព្រះរាជសារអំពាវ នាវឲ្យពលរដ្ឋទៅបោះឆ្នោត។ លោក សម រង្ស៊ី ក៏ធ្លាប់បានហៅព្រះរាជសាររបស់ព្រះមហាក្សត្រថា ជាលិខិតក្លែងក្លាយ ឬត្រូវលោក ហ៊ុន សែន បង្ខំអោយចេញសារអំពាវនាវនោះ។
កាលពីថ្ងៃទី១០ ខែមិថុនា ខណៈរដ្ឋមន្ត្រីក្រសួងយុត្តិធម៌កម្ពុជាលោក អង្ស វង្សវឌ្ឍនា បង្គាប់ឲ្យ អយ្យការអមសាលាដំបូងរាជធានីភ្នំពេញប្ដឹងលោក សម រង្ស៊ី ប្រធានចលនាសង្គ្រោះជាតិ និងជាអតីតប្រធានចលនាសង្គ្រោះជាតិរូបនេះ បានសរសេរសារមួយនៅលើបណ្ដាញសង្គមរបស់លោកថា ព្រះមហាក្សត្រជាចំណាប់ខ្មាំងរបស់លោក ហ៊ុន សែន។ លោកបន្តទៀតថា គ្មាននរណាមើលងាយព្រះមហាក្សត្រជាងជនផ្ដាច់ការ ហ៊ុន សែន ទេ ដែលជេរប្រមាថ និងគំរាមកំហែងព្រះមហាក្សត្រតាំងពីយូរឆ្នាំមកហើយ ព្រមទាំងយកព្រះមហាក្សត្រធ្វើជាខែល ដើម្បីបន្តអំណាចផ្ដាច់ការរបស់គាត់។
រាល់ពេលមានការចោទប្រកាន់មកលោក សម រង្ស៊ី ម្តងៗ ពីតុលាការ លោកតែងហៅតុលាការនោះថា ជាតុលាការតេឡេ ដែលស្ថិតក្រោមការបញ្ជារបស់លោក ហ៊ុន សែន៖ «តុលាការស្រុកខ្មែរគ្នាមិនសូវដឹងអីទេ គ្នាធ្វើតាមថ្នាក់លើ ហើយថ្នាក់លើហ្នឹងធ្វើអីតាមតែអំពើចិត្ត។ ខ្ញុំសប្បាយចិត្តទៅវិញទេ ព្រោះឱកាសមួយលាតត្រដាងឲ្យកាន់តែច្បាស់ថែមទៀត អ្វីដែលអ្នកដឹកនាំនិងគូរកនរបស់គេបានធ្វើ។»
លោក សម រង្ស៊ី គឺជាមនុស្សទី៤ ហើយ ដែលត្រូវរដ្ឋអំណាចក្រុងភ្នំពេញប្រើប្រាស់ច្បាប់ថ្មីដ៏ចម្រូងចម្រាស ដើម្បីចាត់ការ។ យោងតាមច្បាប់ថ្មីស្ដីពីការប្រមាថព្រះមហាក្សត្រ លោក សម រង្ស៊ី អាចប្រឈមជាប់ពន្ធនាគារពី ១ឆ្នាំទៅ ៥ឆ្នាំ និងពិន័យជាប្រាក់ពី ២លានរៀលទៅ ១០លានរៀល ឬស្មើនឹងប្រាក់ ៥០០ ទៅ ២.៥០០ដុល្លារអាមេរិក៕
No comments:
Post a Comment