ជនជាតិវៀតណាម ឈ្មោះ ផាម ថេគឿង (PHAM THE CUONG) កំពុងឈរលើគំនរឈើនៅស្រុកវ៉ឺនសៃ ខេត្តរតនគិរី កាលពីដើមខែមិថុនា ឆ្នាំ២០១៨។ |
តុលាការ រតនគិរី រងការ រិះគន់ ថា ដោះលែង ឈ្មួញឈើ ល្បីឈ្មោះ ជាជនជាតិ វៀតណាម
RFA / វិទ្យុ អាស៊ី សេរី | ១៧ មិថុនា ២០១៨
មន្ត្រីឃ្លាំមើលសិទ្ធិមនុស្ស រិះគន់តុលាការខេត្តរតនគិរី ដែលបានដោះលែងជនជាតិវៀតណាមម្នាក់ ដែលល្បីខាងជួញដូរឈើខុសច្បាប់ ឆ្លងដែនទៅលក់នៅប្រទេសវៀតណាម។
ការដោះលែងនេះធ្វើឡើងកាលពីថ្ងៃទី១៧ មិថុនា ក្រោយពីសមត្ថកិច្ចបានឃាត់ខ្លួននៅស្រុកវ៉ឺនសៃ សង្ស័យប្រមូលអនុផលព្រៃឈើខុសច្បាប់ ដឹកជញ្ជូនទៅវៀតណាម។
មន្ត្រីឃ្លាំមើលបរិស្ថាននៃសមាគមអាដហុក (Adhoc) ឲ្យដឹងនៅថ្ងៃទី១៨ មិថុនា ថា មន្ត្រីនគរបាលយុត្តិធម៌ បានប្រឹងប្រែងបង្ក្រាបបទល្មើសព្រៃឈើ និងឃាត់ខ្លួនជនជាតិវៀតណាមបញ្ជូនទៅសាលាដំបូងខេត្តរតនគិរី អនុវត្តច្បាប់ភ្ជាប់ភស្តុតាងដាក់បន្ទុកមានគំនរឈើជាច្រើនម៉ែត្រគូប និងរូបភាពជនជាតិវៀតណាមរូបនោះ ឈរលើគំនរឈើ ក៏ប៉ុន្តែបែរជាចៅក្រមនៃសាលាដំបូងខេត្តនេះ សម្រេចដោះលែងជនជនសង្ស័យនោះទៅវិញ។
មន្ត្រីពង្រឹងសិទ្ធិអំណាចសហគមន៍នៃសមាគមអាដហុក លោក ប៉ែន ប៊ុណ្ណារ៍ អះអាងថា ពលរដ្ឋ និងសង្គមស៊ីវិលនៅមិនស្ងប់អារម្មណ៍នោះទេ នៅគ្រាដែលតុលាការខេត្តរតនគិរី ដោះលែងជនជាតិវៀតណាម ដែលល្បីខាងជួញដូរឈើខុសច្បាប់នៅក្នុងទឹកដីកម្ពុជា។ លោកសង្ស័យថា ករណីនេះទំនងអ្នកមានអំណាចនៅពីក្រោយខ្នងជនជាតិវៀតណាមរូបនោះ ឬអាចទទួលប្រយោជន៍អ្វីមួយ។ លោកសង្កត់ធ្ងន់ថា លោកនឹងដាក់ពាក្យបណ្ដឹងករណីនេះ ទៅឧត្តក្រុមប្រឹក្សាអង្គចៅក្រម និង ក្រសួងយុត្តិធម៌ ដើម្បីស្រាវជ្រាវ ពីហេតុផលនាំឲ្យមានការដោះលែងជនសង្ស័យរូបនោះ។ «»
កាលពីថ្ងៃទី ១៤ មិថុនា សមត្ថកិច្ចខេត្តរតនគិរី បានឃាត់ខ្លួនបុរសជនជាតិវៀតណាមម្នាក់ ឈ្មោះ ផាម ថេគឿង (PHAM THE CUONG) វ័យ ៤១ឆ្នាំ កំពុងឈរត្រួតពិនិត្យឈើ នៅក្នុងចម្ការស្វាយចន្ទីមាត់ទន្លេសេសាន ឋិតក្នុងភូមិប៉ុងលើ ឃុំប៉ុង ស្រុកវ៉ើនសៃ។
ជនសង្ស័យ រួបនោះ មានស្រុកកំណើតនៅខេត្តហាយផុង ប្រទេសវៀតណាម។
អ្នកនាំពាក្យសាលាដំបូងខេត្តរតនគិរី លោក កែវ ពិសុទ្ធ ប្រាប់អាស៊ីសេរីថា លោកមិនអាចបញ្ជាក់លម្អិតពីហេតុផលករណីនេះបានទេ ព្រោះចៅក្រមស៊ើបសួរមានឆន្ទានុសិទ្ធិឃុំខ្លួន ឬមិនឃុំខ្លួនបាន ដោយផ្អែកបញ្ហាមិនស៊ីចង្វាក់នឹងបទចោទ និងភស្តុតាងជាក់ស្ដែង។ ទោះយ៉ាងណា លោកបញ្ជាក់ថា តំណាងអយ្យការអមសាលាដំបូងខេត្ត សម្រេចប្តឹងជំទាស់ ការមិនឃុំខ្លួនជនសង្ស័យជនជាតិវៀតណាមនោះរួចហើយ។ «»
ជនជាតិដើមភាគតិចទំពូន រស់នៅស្រុកលំផាត់ខេត្តរតនគិរី លោក ខាំ និន អះអាងថា ឈ្មួញជនជាតិវៀតណាម បានជូញដូរឈើខុសច្បាប់ឆ្លងដែនតាមអំពើចិត្តនៅខេត្តរតនគិរី កម្រឃើញអាជ្ញាធរបង្ក្រាប ដោយសារពួកគេសូកប៉ាន់សមត្ថកិច្ចពាក់ព័ន្ធ។ លោកថា ដែនជម្រកសត្វព្រៃលំផាត់ មានឈ្មួញជនជាតិវៀតណាមឃុបឃិតជាមួយអាជ្ញាធរ បើកសិប្បកម្មកែច្នៃគ្រឿងសង្ហារឹមនៅតំបន់នោះ និង ជួញដូរឈើឆ្លងដែន គ្មានការបង្ក្រាប។ លោកសម្ដែងការខកចិត្តនៅគ្រាដែលតុលាការដោះលែងជនជាតិវៀតណាម ដែលល្បីខាងជួញដូរឈើខុសច្បាប់យូរមកហើយនេះ។
លោកបន្តអអះអាងថា ថ្មីៗនេះថា អាជ្ញាធរមូលដ្ឋាន បានលក់ដីឲ្យជនជាតិវៀតណាម ១៥ហិកតារដើម្បីកាប់យកឈើមានតម្លៃ និងទន្ទ្រានធ្វើកសិកម្ម ឋិតក្នុងដែនជម្រកសត្វព្រៃលំផាត់។ «»
មន្ត្រីឃ្លាំមើលបរិស្ថាន នៃសមាគមអាដហុក ខេត្តរតនគិរី លោក ឌិន ខន្នី ដែលតាមដានករណីនេះ អង្កេតឃើញថា ចំណាត់ការរបស់តុលាការ គឺគ្មានប្រសិទ្ធភាពចំពោះបុគ្គលមានឥទ្ធិពល និងជនជាតិវៀតណាម ដែលនាំឲ្យពលរដ្ឋអស់ជំនឿចិត្ត។ លោកទទូចឲ្យមានការស៊ើបអង្កេតឲ្យស៊ីជម្រៅរឿងនេះបន្ថែមទៀត ដើម្បីចៀសវាងនាំឲ្យជនល្មើស នៅតែបន្តប្រព្រឹត្តបទល្មើសដដែលៗ ហើយវប្បធម៌និទណ្ឌភាពនៅតែចាក់ស្រែះជ្រៅក្នុងសង្គម។ «»
មន្ត្រីអង្គការមិនមែនរដ្ឋាភិបាល ព្រួយបារម្ភពីការអនុវត្តច្បាប់របស់ប្រព័ន្ធយុត្តិធម៌នៅកម្ពុជា លើសំណុំរឿងឈ្មួញដុះស្លែជនជាតិវៀតណាម ជាប់ពាក់ព័ន្ធការជួញដូរឈើប្រណិតដោយខុសច្បាប់ច្រើនឆ្នាំ។ ពួកគេអះអាងថា បើតុលាការមិនអនុវត្តច្បាប់ករណីនេះឲ្យបានត្រឹមត្រូវទេ មានន័យថា តុលាការបានចូលរួមចំណែកបំផ្លាញធនធានធម្មជាតិនៅកម្ពុជា។
កាលពីចុងឆ្នាំ ២០១៦ សមត្ថកិច្ចបានចាប់ខ្លួនជនជាតិវៀតណាមឈ្មោះ ហេង សំនៀង ហៅយាយព្រឿង ដែលល្បីខាងជួញដូរឈើទ្រង់ទ្រាយធំទៅវៀតណាមនៅខេត្តភាគឦសាន។ ឈ្មួញរូបនោះ ត្រូវបានគេស្គាល់ជាសាធារណៈថា ជាមេខ្លោងជួញដូរឈើប្រណិតជាង ១០ឆ្នាំមកហើយ ដែលសូកប៉ាន់អាជ្ញាធរពាក់ព័ន្ធស្ទើរគ្រប់ស្ថាប័ន។
ទីភ្នាក់ងារស៊ើបអង្កេតបរិស្ថានអន្តរជាតិដែលមានមូលដ្ឋាននៅទីក្រុងឡុង ប្រទេសអង់គ្លេស ហៅកាត់ថា អ៊ីអាយអេ (EIA) ថ្មីៗនេះ បានចេញរបាយការបន្តបន្ទាប់បញ្ជាក់ថា ជនល្មើសជនជាតិវៀតណាមដែលប្រព្រឹត្តិឧក្រិដ្ឋកម្មព្រៃឈើតម្លៃរាប់រយលានដុល្លារ នៅកម្ពុជាមុខដដែលៗ ។ ទោះជាយ៉ាងនេះក្តី រហូតមកដល់ពេលនេះរាជរដ្ឋាភិបាលកម្ពុជានៅតែបរាជ័យក្នុងស៊ើបអង្កេត និងនាំជនល្មើសមកផ្ដន្ទាទោស ដែលធ្វើអោយកម្ពុជាបាត់បង់ទាំងព្រៃឈើផង និងបាត់បង់ប្រាក់ចំណូលចូលរដ្ឋរាប់រយលានដុល្លារក្នុងមួយឆ្នាំ ពីព្រោះតែគ្មានតម្លាភាពក្នុងការគ្រប់គ្រងបញ្ហានេះ៕
No comments:
Post a Comment