លក្ខខណ្ឌ ៦ចំណុច របស់ លោកស្រី ពុង ឈីវកេក ទៅកាន់ គណបក្ស នយោបាយ ទាំងពីរ
VOD | ៣០ កក្កដា ២០១៤
លោកស្រី ពុង ឈីវកេក ប្រធានអង្គការលីកាដូ (រូបថត៖ អេមី)
លោកស្រី ពុង ឈីវកេក ប្រធាន អង្គការ លីកាដូ ដែលត្រូវ បានជ្រើសរើស ជាសមាជិក ទី៩ នៃគណៈកម្មាធិការ ជាតិ រៀបចំ ការបោះឆ្នោត ថ្មី បង្ហាញលក្ខខណ្ឌ ទាមទារ ៦ចំណុច ដែលលោកស្រី បានដាក់ ទៅកាន់ គណបក្ស នយោបាយ ជាប់ឆ្នោត ទាំងពីរ។
សេចក្តីថ្លែងការណ៍ ចុះថ្ងៃ ទី៣០ ខែកក្កដានេះ ឲ្យដឹងថា, លោកស្រី វេជ្ជបណ្ឌិត ពុង ឈីវកេក បច្ចុប្បន្ន ជាប្រធាន អង្គការ ការពារ សិទ្ធិមនុស្ស លីកាដូ ត្រូវ បានគណបក្ស ប្រជាជនកម្ពុជា និងគណបក្ស សង្គ្រោះជាតិ ស្នើសុំ ធ្វើជាសមាជិក ថ្មី នៃស្ថាប័ន រៀបចំ ការបោះឆ្នោត កាលពីថ្ងៃ ទី២៦ និងទី២៧ ខែកក្កដា។ តបនឹងសំណើនោះ លោកស្រី បានដាក់ លក្ខខណ្ឌ មួយចំនួន ទៅកាន់ គណបក្ស ទាំងពីរ និងទទួលបាន ការឆ្លើយតប ជាវិជ្ជមាន នៅថ្ងៃ ទី២៨ ខែកក្កដា។
លក្ខខណ្ឌ ទាំងនោះ រួមមាន៖
១. ធានា ឲ្យមាន ឯករាជ្យភាព ច្បាស់លាស់ នៃស្ថាប័ន រៀបចំ ការបោះឆ្នោត ថ្មីនេះ;
២. អនុញ្ញាតឲ្យស្ថាប័នរៀបចំការបោះឆ្នោត មានសិទ្ធិពេញលេញក្នុងការអនុវត្តសមត្ថភាពខ្លួន ក្នុងការរៀបចំការបោះឆ្នោត ប្រកដោយឯករាជ្យភាព និងអព្យាក្រឹត្យភាព;
៣. ធានាឲ្យបាននូវសមាជិកនៃស្ថាប័នរៀបចំការបោះឆ្នោត ទទួលបានការពារអភ័យឯកសិទ្ធិ ការធានាស្វ័យភាពក្នុងការធ្វើសេចក្តីសម្រេចចិត្ត និងសកម្មភាពផ្សេងៗទៀត;
៤. ធានាឲ្យបានថា ស្ថាប័នរៀបចំការបោះឆ្នោត មានសិទ្ធិក្នុងការជ្រើសរើសបុគ្គលិក អ្នកជំនាញ និងមានសិទ្ធិចាត់ចែង លើសម្ភារៈ ហិរញ្ញវត្ថុ និងទទួលថវិកាស្វ័យយ័ត សម្រាប់ស្ថាប័ននេះ;
៥. ក្នុងករណីចាំបាច់ ស្ថាប័ននេះមានសិទ្ធិទទួលជំនួយ ដោយគ្មានលក្ខខណ្ឌពីម្ចាស់ជំនួយ; និង
៦. រាល់លក្ខខណ្ឌទាំងអស់ខាងលើនេះ គឺឆ្លើយតបទៅនឹងលក្ខខណ្ឌរបស់ស្ថាប័ន រៀបចំការបោះឆ្នោត ដែលជាប់ពាក់ព័ន្ធទៅនឹងវិសោធនកម្មរដ្ឋធម្មនុញ្ញ និងច្បាប់ជាច្រើនទៀត។
ក្នុងសេចក្តីថ្លែងការណ៍នេះ លោកស្រី ពុង ឈីវកេក បានអះអាងថា លក្ខខណ្ឌទាំងនេះ មិនជាប់ពាក់ព័ន្ធជាមួយនយោបាយ ឬការប្រកាន់បក្ខពួកនោះទេ គ្រាន់តែជាលក្ខខណ្ឌបច្ចេកទេស ដើម្បីធានាដល់ការបោះឆ្នោតនៅកម្ពុជា ប្រកបដោយសេរី យុត្តិធម៌ និអព្យាក្រឹត្យ ស្របតាមលទ្ធិប្រជាធិបតេយ្យ សេរីពហុបក្ស និងនីតិរដ្ឋ។ លោកស្រី ក៏អះអាងនឹងខំប្រឹងប្រែងធ្វើការងារតាមមនសិការ យោងតាមរដ្ឋធម្មនុញ្ញ និងច្បាប់ធរមានផ្សេងៗទៀត និងយុត្តិធម៌សម្រាប់ប្រជាពលរដ្ឋកម្ពុជា។
ក្រោយកិច្ចព្រមព្រៀងបញ្ចប់ជម្លោះនយោបាយ កាលពីថ្ងៃទី២២ ខែកក្កដា គណបក្សប្រជាជនកម្ពុជា និងគណបក្សសង្គ្រោះជាតិ បានឯកភាពក្នុងការដាក់ស្ថាប័នគជបក្នុងជំពូក១៥ នៃរដ្ឋធម្មនុញ្ញ ដោយជ្រើសរើសសមាសភាព គជប តាមរយៈការប្រើរូបមន្តម្ខាងៗ៤រូប និង១រូបទៀត ជ្រើសរើសដោយគណបក្សមានអាសនៈក្នុងសភា។
តាមរយៈកិច្ចព្រមព្រៀងនេះ គណបក្សទាំងពីរ បានសម្រេចជ្រើសរើសលោកស្រី ពុង ឈីវកេក ជាសមាជិកទី៩នៃគជបថ្មី តែទោះជាយ៉ាងនេះក៏ដោយ គណបក្សទាំងពីរ នៅមិនទាន់បានបង្ហាញពីសមាសភាពផ្លូវការនៃសមាជិក ៨រូបផ្សេងទៀត ដែលត្រូវបានជ្រើសរើសឡើងដោយភាគីគណបក្សម្ខាងៗនៅឡើយទេ៕
No comments:
Post a Comment