លោក ហ៊ុន សែន កោតសរសើរ កម្ពុជា អាចកសាង ស្ពានអាកាស បាន
VOD | ៣១ កក្កដា ២០១៤
លោកនាយករដ្ឋមន្រ្តី ហ៊ុន សែន ចូលរួមសម្ពោធស្ពានអាកាសស្ទឹងមានជ័យ (រូបថត៖ ណាត សុភាព)
លោក នាយករដ្ឋមន្ត្រី ហ៊ុន សែន នៅព្រឹក ថ្ងៃព្រហស្បតិ៍ នេះ ដាក់សម្ពោធ ស្ពានអាកាស ស្ទឹងមានជ័យ ឲ្យប្រើប្រាស់ ជាផ្លូវការហើយ ដោយលោក បានកោតសរសើរ ចំពោះ សមត្ថភាព របស់ ប្រជាជនខ្មែរ ក្នុងការកសាង ស្ពានអាកាស បែបនេះ។
លោក នាយករដ្ឋមន្ត្រី មានប្រសាសន៍ ថា, ស្ពានអាកាស មួយនេះ ជាស្នាដៃ របស់ ប្រជាជនខ្មែរ ដែលបង្ហាញ ថា, កម្ពុជា មានសមត្ថភាព កម្រិតខ្ពស់ គួរសមដែរ ក្នុងការកសាង ស្ពានអាកាស និងអគារ ខ្ពស់ៗ ផ្សេងៗទៀត, ដូចជា វិមាន សន្តិភាព ជាដើម។ លោក នាយករដ្ឋមន្ត្រី បន្តថា, ការកសាង ស្ពានអាកាសនេះ គឺ កម្ពុជា មានវិស្វករ និងអ្នកបច្ចេកទេស ខ្លួនឯង ដោយមិនយក អ្នកជំនាញ មកពីបរទេសទេ។
លោក ហ៊ុន សែន ឲ្យដឹងទៀត ថា, ការសាងសង់ ស្ពានអាកាស ចំនួន ៣រួចមកហើយ, រាជរដ្ឋាភិបាល បានប្រើទុន របស់ រាជធានី ក្រុមហ៊ុន ក្នុងស្រុក និងមាន អ្នកបច្ចេកទេស ក្នុងស្រុក គឺ មន្ទីរសាធារណៈការ និងដឹកជញ្ជូន។
ស្ពានអាកាស ស្ទឹងមានជ័យ ត្រូវ បានបើក ការដ្ឋាន សាងសង់ កាលពីថ្ងៃ ទី២៦ ខែវិច្ឆិកា ឆ្នាំ២០១២ ដែលទទួល ម៉ៅការសាងសង់ ដោយក្រុមហ៊ុន O.C.I.C. ជាក្រុមហ៊ុន ក្នុងស្រុក, ហើយ ចំណាយ ថវិកា សាងសង់ អស់ប្រមាណ ១៧លាន ដុល្លារ អាមេរិក។
ស្ពានអាកាសបីរួចមកហើយ ត្រូវបានកសាងរហូតមកដល់ពេលនេះ គឺស្ពានក្បាលថ្នល់ និងស្ពានអាកាស៧មករា។
ស្ពានអាកាសស្ទឹងមានជ័យ នឹងដោះស្រាយបញ្ហាកកស្ទះចរាចរណ៍ នៅព្រំប្រទល់ខណ្ឌទួលគោក ខណ្ឌចំការមន និងខណ្ឌមានជ័យ។
របាយការណ៍របស់មន្ទីរសាធារណការ និងដឹកជញ្ជូនរាជធានីភ្នំពេញ ឲ្យដឹងថា គម្រោងសាងសង់ស្ពានអាកាសស្ទឹងមានជ័យនេះ មានតួស្ពានចំនួន៤ និងផ្លូវរត់ក្រោមដីចំនួន១ ដែលស្ពានមេសង់តាមបណ្ដោយផ្លូវលេខ២៧១ ឆ្លងកាត់ខាងលើវិថីព្រះមុនីរ៉េត មានរាងបត់បែនដែលមួយកំណាត់ជាស្ពានជាប់គ្នា និងមួយកំណាត់ទៀតជាស្ពានបែកពីគ្នា។
ស្ពានមេទី១ មានប្រវែង៤២៩ម៉ែត្រ ទទឹង៩ម៉ែត្រ ស្ពានមេទី២ មាន ប្រវែង ៣៧៦ម៉ែត្រ ទទឹង៩ម៉ែត្រ ហើយនៅកំណាត់ជាប់គ្នាក្នុងភូមិសាស្ត្រខណ្ឌចំការមន មានទទឹងស្ពាន ១៥,២ម៉ែត្រ ។ ចំណែកស្ពានរងចំនួន២ទៀត គឺទី១ សង់ឆ្លងកាត់ប្រឡាយស្ទឹងមានជ័យផ្នែកទី១ មានប្រវែង១៨ម៉ែត្រ ទទឹង១១ម៉ែត្រ និងស្ពានទី២ ឆ្លងកាត់ប្រឡាយស្ទឹងមានជ័យផ្នែកទី២ មានប្រវែង២០ម៉ែត្រ ទទឹង១២,៧ម៉ែត្រ៕
No comments:
Post a Comment