បក្សប្រឆាំង ថា មិនចុះញ៉ម ចំពោះ ការគំរាម របស់ បក្សកាន់អំណាច
RFA / វិទ្យុ អាស៊ី សេរី | ៣ សីហា ២០១៤
លោក កឹម សុខា អនុប្រធាន គណបក្ស សង្គ្រោះជាតិ នៅមុខ សាលាដំបូង រាជធានីភ្នំពេញ កាលពីថ្ងៃ ទី២៥ ខែកក្កដា ឆ្នាំ ២០១៤។ RFA/Tin Zakariya
អនុប្រធាន គណបក្ស សង្គ្រោះជាតិ លោក កឹម សុខា ដែលចាត់ទុក ការឃុំខ្លួន យុវជន ៣នាក់ និងកោះហៅ មន្រ្តី គណបក្ស ឲ្យបំភ្លឺឡើងវិញ ថា ជាការគំរាមកំហែង ផ្នែកនយោបាយនោះ អះអាង ថា, គណបក្សលោក នឹងមិនចុះញ៉ម ចំពោះ ការគំរាមកំហែង នៅពេលនេះឡើយ។
លោក បន្តថា រាល់ការ ទាមទារ របស់ គណបក្សនេះ នឹងមិនមាន ការបន្ធូរបន្ថយ ទៀតទេ ដ្បិត អ្វី ដែលគណបក្ស សង្គ្រោះជាតិ ទាមទារ ជាកំរិតអប្បរមា, ហើយ មិនមែន ជាការទាមទារ ដើម្បី ប្រយោជន៍បក្សឡើយ, គឺ ដើម្បី ប្រយោជន៍ជាតិ។
កន្លងទៅ គណបក្ស សង្គ្រោះជាតិ បានប្រកាន់ យកលក្ខខណ្ឌ ចម្បងមួយ គឺ ការកែទម្រង់ ស្ថាប័នរៀបចំ ការបោះឆ្នោត ឲ្យឯករាជ្យ ជាថ្នូរ នឹងការយល់ព្រម ចូលសភា របស់ អ្នកតំណាងរាស្ត្រ ជាប់ឆ្នោត នៃគណបក្សនេះ ទាំង៥៥រូប។
ការអះអាង របស់លោក កឹម សុខា គឺ បន្ទាប់ ពីយុវជន គណបក្ស សង្គ្រោះជាតិ ៣រូប ត្រូវ បញ្ជូន ទៅឃុំខ្លួន បណ្ដោះអាសន្ន នៅពន្ធនាគារ ព្រៃ ស នៅរសៀលថ្ងៃ ទី២ ខែកក្កដា ដើម្បី រង់ចាំ ស៊ើបអង្កេត។ ពួកគេ ត្រូវ ចោទប្រកាន់ ពីបទព្រហ្មទណ្ឌ ពាក់ព័ន្ធ នឹងអំពើហិង្សា នៅក្បែរ ទីលាន ប្រជាធិបតេយ្យ កាលពីថ្ងៃ ទី១៥ ខែកក្កដា។
ចំណែកមន្ត្រី គណបក្ស សង្គ្រោះជាតិ ចំនួន ៩នាក់, ក្នុងនោះ មានលោក កឹម សុខា ផង, ត្រូវ បានសាលាដំបូង រាជធានីភ្នំពេញ កោះហៅ ឲ្យចូលខ្លួន ទៅបំភ្លឺ ជាថ្មី ដើម្បី សាកសួរ អំពី ការដឹកនាំ ធ្វើបាតុកម្ម កាលពីថ្ងៃ ទី១៥ សីហា។
យុវជន គណបក្ស សង្គ្រោះជាតិ ទាំងបីរូប ត្រូវ ចោទប្រកាន់ ពីបទចូលរួម កុបកម្ម, បទហិង្សា ដោយចេតនា, និងប្រមាថមន្ត្រី រាជការ។
យុវជន ទាំងរូបនោះ រួមមានលោក ឃិន ជំរឿន ប្រធាន ចលនា គណបក្ស, លោក នាង សុឃុន ជាហិរញ្ញិក ចលនា យុវជន គណបក្ស សង្គ្រោះជាតិ ក្នុងខណ្ឌ ច្បារអំពៅ, និងលោក សាន គឹមហេង ជាប្រធាន ចលនា យុវជន គណបក្ស សង្គ្រោះជាតិ ខណ្ឌ ទួលគោក។ ពួកគេ ត្រូវ នគរបាល ចាប់ខ្លួន បន្តបន្ទាប់គ្នា នៅថ្ងៃ ទី២ ខែសីហា និងត្រូវ បញ្ជូនទៅ ស្នងការដ្ឋាន នគរបាល រាជធានីភ្នំពេញ, បន្ទាប់មក ទៅតុលាការ, និងចុងក្រោយ ត្រូវ បញ្ជូន ទៅឃុំខ្លួន បណ្ដោះអាសន្ន នៅពន្ធនាគារ ព្រៃ ស រង់ចាំ ការសាកសួរ។
គណបក្ស សង្គ្រោះជាតិ បានចេញ សេចក្ដីថ្លែងការណ៍ ភ្លាមៗ នៅថ្ងៃ ដដែលនេះ ដោយថ្កោលទោស ចំពោះ ការចាប់ខ្លួននេះ និងអំពាវនាវ ឲ្យដោះលែង អ្នកទាំងនោះ ដោយគ្មាន លក្ខខណ្ឌ។ លើសពីនេះ គណបក្សនេះ បានបញ្ជាក់ ទៅគណបក្ស ប្រជាជន ឲ្យបញ្ឈប់ ការគំរាមកំហែង។
អង្គការ សង្គមស៊ីវិល ដែលឃ្លាំមើល ចាត់ទុក ករណីនេះ ថា ជាសម្ពាធ នយោបាយ ទៅលើគណបក្ស ប្រឆាំង ពីសំណាក់ គណបក្ស កាន់អំណាច ដើម្បី ចាប់បង្ខំ គណបក្សនេះ ឲ្យទទួលយក កិច្ចព្រមព្រៀង ចូលសភា។ ពួកគេ អំពាវនាវ ឲ្យគណបក្ស ទាំង២ ពិភាក្សាគ្នា ដោយសន្តិវិធី ដើម្បី ចៀសវាង បញ្ហាចម្រូងចម្រាស ដែលអាច កើតឡើង ក្នុងសង្គម។
ទាក់ទង នឹងករណី អំពើហិង្សា នៅក្បែរ ទីលាន ប្រជាធិបតេយ្យ កាលពីថ្ងៃ ទី១៥ កក្កដា បេក្ខជន តំណាងរាស្រ្ត គណបក្ស ប្រឆាំង ៧នាក់ និងសកម្មជនម្នាក់ ដែលត្រូវ រដ្ឋាភិបាល ចាប់ឃុំខ្លួន ចំនួន ១សប្តាហ៍ ដោយចោទប្រកាន់ ពីបទដឹកនាំ កុបកម្ម, បទញុះញង់ ឲ្យប្រព្រឹត្ត បទឧក្រិដ្ឋ និងបទផ្ដើម គំនិត ក្នុងអំពើហិង្សា, ប៉ុន្តែ ត្រូវ ដោះលែង មកវិញ នៅថ្ងៃ ទី២២ កក្កដា នៅក្រោយ មានកិច្ចព្រមព្រាង បញ្ចប់ភាពជាប់គាំង នយោបាយ៕
No comments:
Post a Comment