បក្សទាំងពីរ នឹងពិភាក្សា លើសេចក្ដីព្រាង វិសោធនកម្ម រដ្ឋធម្មនុញ្ញ រួមគ្នា
RFA | ១ សីហា ២០១៤
ថ្នាក់ដឹកនាំ គណបក្ស ប្រជាជនកម្ពុជា ដឹកនាំ ដោយលោក ហ៊ុន សែន
(កណ្ដាល) ក្នុងកិច្ចប្រជុំ ចរចា រវាង គណបក្ស ប្រជាជនកម្ពុជា
និងគណបក្ស សង្គ្រោះជាតិ នារដ្ឋសភា កាលពីថ្ងៃ ទី១៦ ខែកញ្ញា
ឆ្នាំ២០១៣។ RFA/Mom Sophon
លោក ឧបនាយករដ្ឋមន្ត្រី ស ខេង និងជាមន្ត្រី ជាន់ខ្ពស់ គណបក្ស ប្រជាជនកម្ពុជា បានផ្ញើ សេចក្ដីព្រាង មកគណបក្ស សង្រ្គោះជាតិ វិញហើយ អំពី ការវិសោធនកម្ម រដ្ឋធម្មនុញ្ញ ដែលសំដៅ ដល់ការដាក់ ស្ថាប័នរៀបចំ ការបោះឆ្នោត ជាស្ថាប័ន ធម្មនុញ្ញ នោះ។
មន្ត្រីជាន់ខ្ពស់ គណបក្ស សង្រ្គោះជាតិ និងជាប្រធាន ក្រុមការងារ វិសោធនកម្ម រដ្ឋធម្មនុញ្ញ លោក អេង ឆៃអ៊ាង ឲ្យដឹងថា, នៅព្រឹកថ្ងៃ ទី៣១ កក្កដានេះ លោក ស ខេង បានផ្ញើ សេចក្ដីព្រាង មកគណបក្ស សង្រ្គោះជាតិវិញ។ លោក បញ្ជាក់ថា, ក្រុមការងារ គណបក្ស ទាំងពីរ នឹងជួបគ្នា នៅរសៀលថ្ងៃ ទី១ សីហា ដើម្បី ពិភាក្សាគ្នា អំពី សេចក្ដីព្រាង របស់ គណបក្សទាំងពីរ ក្នុងការធ្វើ វិសោធនកម្ម រដ្ឋធម្មនុញ្ញនេះ រួមគ្នា។
នៅក្នុងសេចក្ដីព្រាង របស់ គណបក្ស សង្រ្គោះជាតិ ផ្ញើទៅលោក ស ខេង កាលពីថ្ងៃ ទី៣០ កក្កដា នោះ គឺ គណបក្ស សង្រ្គោះជាតិ ចង់ធ្វើ វិសោធនកម្ម រដ្ឋធម្មនុញ្ញ មាត្រា ៧៦ និងបង្កើតជំពូក ទី១៥ថ្មី នៃរដ្ឋធម្មនុញ្ញ អំពី អង្គការ រៀបចំ ការបោះឆ្នោត, ក្នុងនោះ ទាមទារ ឲ្យសមាជិក កំពូល គ.ជ.ប. មាន អភ័យឯកសិទ្ធិ, មានថវិកា ស្វ័យភាព របស់ខ្លួន ជាដើម។
នៅក្នុងលិខិត របស់លោក ឧបនាយករដ្ឋមន្ត្រី ស ខេង ឆ្លើយតប ទៅលោក សម រង្ស៊ី ជាប្រធាន គណបក្ស សង្រ្គោះជាតិវិញនោះ គឺ លោក យោងទៅលើ សេចក្ដីព្រាង របស់ គណបក្ស ប្រជាជនកម្ពុជា កាលពីថ្ងៃ ទី២២កក្កដា ដែលគណបក្ស ទាំងពីរ ធ្លាប់បាន ពិភាក្សាគ្នា, ហើយ មិនត្រូវរ៉ូវគ្នានោះ។ នៅក្នុង សេចក្ដីព្រាង របស់ គណបក្ស ប្រជាជនកម្ពុជា អំពី ការធ្វើវិសោធនកម្ម រដ្ឋធម្មនុញ្ញ មាត្រា៧៦នេះ មិនបានបញ្ជាក់ អំពី សមាជិក គ.ជ.ប. ដាក់ឲ្យមាន អភ័យឯកសិទ្ធិ នោះឡើយ និងមាន ករណី ជាច្រើនទៀត ដែលខុសគ្នា។
ទោះបី ជាយ៉ាងនេះក្ដី លោក អេង ឆៃអ៊ាង អះអាងថា, លោក មានជំនឿថា គណបក្ស ទាំងពីរ នឹងមាន ចំណុចរួម ក្នុងការធ្វើ វិសោធនកម្ម រដ្ឋធម្មនុញ្ញនេះ នៅក្នុងកិច្ចពិភាក្សា នៅរសៀលថ្ងៃ ទី១ សីហានេះ។ លោក បន្ថែមថា លទ្ធផល យ៉ាងណានោះ នឹងរង់ចាំមើល ការជួបគ្នា ជាក់ស្ដែងទៀត៕
No comments:
Post a Comment