លោក សម រង្ស៊ី ដាក់លិខិត ទៅប្រធាន រដ្ឋសភា លោក ហេង សំរិន រៀបចំ ចូលធ្វើ សច្ចាប្រណិធាន
VOD | ៤ សីហា ២០១៤
ប្រធាន គណបក្ស សង្គ្រោះជាតិ លោក សម រង្ស៊ី
ប្រធាន គណបក្ស សង្គ្រោះជាតិ លោក សម រង្ស៊ី នៅថ្ងៃចន្ទនេះ ដាក់លិខិត ទៅប្រធាន រដ្ឋសភា លោក ហេង សំរិន ដើម្បីស្នើ ឲ្យមាន ការរៀបចំ ចូលសច្ចាប្រណិធាន នៅមុខ ព្រះភក្ត្រ របស់ ព្រះមហាក្សត្រ។
លិខិត របស់លោក សម រង្ស៊ី ចុះហត្ថលេខា នៅថ្ងៃ ទី៤ ខែសីហានេះ បង្ហាញថា, គណបក្ស សង្គ្រោះជាតិ ស្នើសុំ ចាត់ចែង រៀបចំ ដើម្បី ឲ្យបេក្ខជន ជាប់ឆ្នោត តំណាងរាស្ត្រ គណបក្ស ទាំង៥៥រូប ចូលធ្វើ សច្ចាប្រណិធាន នៅមុខ ព្រះភក្ត្រព្រះមហាក្សត្រ។ លិខិតផ្ញើជូន ប្រធាន រដ្ឋសភា មិនបានបញ្ជាក់ ពីកាលបរិច្ឆេទ ពិតប្រាកដ នៃការចូល ធ្វើសច្ចាប្រណិធាន នោះទេ។
មន្ត្រី ជាន់ខ្ពស់ គណបក្ស សង្គ្រោះជាតិ លោក អេង ឆៃអ៊ាង មានប្រសាសន៍ ថា, លិខិត របស់លោក សម រង្ស៊ី ត្រូវ បានបញ្ជូនទៅ ព្រះបរមរាជវាំងហើយ រហូតមកដល់ ពេលនេះ។
លិខិត របស់ រដ្ឋសភា គោរពជូន សម្តេចចៅហ្វាវាំង គង់ សំអុល រដ្ឋមន្រ្តី ក្រសួង ព្រះបរមរាជវាំង ឲ្យដឹងថា, សម្តេចចៅហ្វាវាំង មេត្តាពិនិត្យ និងរៀបចំ ពិធីសច្ចាប្រណិធាន ជូនតំណាងរាស្រ្ត គណបក្ស សង្រ្គោះជាតិ ចំនួន ៥៥រូប នៅកាលបរិច្ឆេទ ដ៏គួរសម តាមការគួរ។
VOD មិនទាន់ អាចសុំ ការអត្ថាធិប្បាយ ភ្លាមៗ ពីមន្ត្រី ព្រះបរមរាជវាំង បាននៅឡើយទេ។
សេចក្តីរាយការណ៍ ចុងក្រោយ ឲ្យដឹងថា, បេក្ខជន ជាប់ឆ្នោត ជាតំណាងរាស្ត្រ គណបក្ស សង្គ្រោះជាតិ មានផែនការ ចូលស្បថ នៅព្រះមរមរាជវាំង នៅថ្ងៃអង្គារ ស្អែកនេះ នៅពេល រសៀល៕
No comments:
Post a Comment