លោក ស ខេង មិនទាន់ ឆ្លើយតប នឹងលិខិត របស់លោក សម រង្ស៊ី
RFA | ៣១ កក្កដា ២០១៤
លោក ស ខេង ឧបនាយករដ្ឋមន្ត្រី និងជារដ្ឋមន្ត្រី ក្រសួង មហាផ្ទៃ
ថ្លែងទៅកាន់ អ្នកចូលរួម ក្នុងឱកាស ផ្ទេរតំណែង អភិបាល នៃគណៈអភិបាល
ខេត្តពោធិ៍សាត់ នាសាលប្រជុំ សាលាខេត្ត ពោធិ៍សាត់ នៅថ្ងៃទី៧ ខែឧសភា
ឆ្នាំ២០១៤។ RFA/Chin Chetha
លោក យឹម សុវណ្ណ អ្នកនាំពាក្យ គណបក្ស សង្គ្រោះជាតិ ថ្លែងឲ្យដឹង នៅថ្ងៃ ទី៣១ កក្កដា ថា, មកទល់ល្ងាច ថ្ងៃ ទី៣១ កក្កដា នេះ គណបក្ស សង្គ្រោះជាតិ មិនទាន់ បានទទួល ចម្លើយតប ពីលោក ស ខេង និងគណបក្ស ប្រជាជនកម្ពុជា ទាក់ទងលិខិត លោក សម រង្ស៊ី ផ្ញើជូន លោក ស ខេង កាលពីថ្ងៃ ទី៣០ កក្កដា នៅឡើយទេ។
កាលពីថ្ងៃ ទី៣០ កក្កដា លោក សម រង្ស៊ី ប្រធាន គណបក្ស សង្គ្រោះជាតិ បានផ្ញើ លិខិតមួយ ជូនលោក ស ខេង មានភ្ជាប់ ជាមួយ សេចក្តីព្រាងច្បាប់ រដ្ឋធម្មនុញ្ញ ស្ដីពី វិសោធនកម្ម មាត្រា៧៦ និងការបង្កើត ជំពូកថ្មី ទាក់ទង នឹងអង្គការ រៀបចំ ការបោះឆ្នោត ស្របតាម ស្មារតី នៃកិច្ចព្រមព្រៀង រវាង គណបក្ស ទាំងពីរ កាលពីថ្ងៃ ទី២២ ខែកក្កដា ឆ្នាំ២០១៤។
លិខិត លោក សម រង្ស៊ី ដែលបាន ផ្ញើនោះ បានបញ្ជាក់ ថា, សូម ឲ្យលោក ស ខេង ពិនិត្យលើ សេចក្តីព្រាងនោះ, ហើយ បើ គណបក្ស ប្រជាជនកម្ពុជា ទទួលយក ខ្លឹមសារ នៃសេចក្តីព្រាងនោះ គណបក្ស ទាំងពីរ អាចដំណើរការ បានឆាប់រហ័ស, ហើយ អាចកំណត់ថ្ងៃ ក្នុងសប្ដាហ៍នេះ ឬសប្ដាហ៍ក្រោយ ក្នុងការរៀបចំ ពិធីសច្ចាប្រណិធាន សម្រាប់ តំណាងរាស្ត្រ ជាប់ឆ្នោត ៥៥រូប មកពីគណបក្ស សង្គ្រោះជាតិ, ព្រមទាំង កំណត់ថ្ងៃប្រជុំ វិសាមញ្ញ រដ្ឋសភា ដើម្បី ចាប់ផ្ដើម របៀបវារៈ ដែលបាន ឯកភាពគ្នា ក្នុងកិច្ចប្រជុំ នៅព្រះបរមរាជវាំង កាលពីរសៀល ថ្ងៃទី២៤ កក្កដា។
លិខិត លោក សម រង្ស៊ី នោះ បានបង្ហាញ ឲ្យដឹង អំពីខ្លឹមសារ សេចក្តីព្រាងថ្មី របស់ រដ្ឋធម្មនុញ្ញ មានមាត្រា ៧៦ថ្មី ជំពូក ១៥ថ្មី នៃរដ្ឋធម្មនុញ្ញ ដែលមាន មាត្រា ១៥០ថ្មី, មាត្រា ១៥១ថ្មី, មាត្រា ១៥២ថ្មី, និងមាត្រា ១៥៣ថ្មី៕
No comments:
Post a Comment