ក្រសួងមហាផ្ទៃ អំពាវនាវ ឲ្យពលរដ្ឋ ទៅធ្វើ អត្តសញ្ញាណប័ណ្ណ
RFA / វិទ្យុ អាស៊ី សេរី | ១៩ កុម្ភៈ ២០១៥
អត្តសញ្ញាណប័ណ្ណសញ្ជាតិខ្មែរ។ Photo: RFA
ក្រសួងមហាផ្ទៃ អំពាវនាវ ឲ្យពលរដ្ឋ ទៅធ្វើ អត្តសញ្ញាណប័ណ្ណ ដើម្បី ងាយស្រួល ចូលរួម បោះឆ្នោត។ ការអំពាវនាវនេះ ធ្វើឡើង បន្ទាប់ ពីក្រុមការងារ ចរចា នៃគណបក្ស ទាំងពីរ ឯកភាពគ្នា ដោយចែង ច្បាប់បោះឆ្នោត ថ្មី ថា, នឹងយកអត្តសញ្ញាណប័ណ្ណ ជាឯកសារគោល សម្រាប់ បម្រើការចុះឈ្មោះ បោះឆ្នោត និងបោះឆ្នោត។
លិខិត អំពាវនាវ របស់ ក្រសួងមហាផ្ទៃ បរិយាយ ថា, អត្តសញ្ញាណប័ណ្ណ សញ្ជាតិខ្មែរ ជាឯកសារ គតិយុត្តិ ដ៏សំខាន់ ចាំបាច់ សម្រាប់ បញ្ជាក់ ពីអត្តសញ្ញាណ របស់ បុគ្គល ម្នាក់ៗ ដើម្បី ធានា ដល់ការ លើកកម្ពស់ សិទ្ធិ, សេរីភាព, ផលប្រយោជន៍, និងកាតព្វកិច្ច សង្គម, ជាពិសេស ការអនុវត្តសិទ្ធិ ខាងនយោបាយ។
លិខិតនេះ ស្នើ ឲ្យប្រជាពលរដ្ឋ អាយុ ចាប់ពី ១៥ឆ្នាំ ឡើងទៅ ដែលមិន ទាន់មាន អត្តសញ្ញាណប័ណ្ណ សូម មេត្តា ទៅបំពេញ សំណុំបែបបទ ធ្វើអត្តសញ្ញាណប័ណ្ណ តាមគោលដៅ ដែលកំណត់ ដោយអាជ្ញាធរ មានសមត្ថកិច្ច និងបញ្ជា ឲ្យអាជ្ញាធរ គ្រប់លំដាប់ថ្នាក់ ចុះអន្តរាគមន៍ ឲ្យប្រជាពលរដ្ឋ ទទួលបាន អត្តសញ្ញាណប័ណ្ណ គ្រប់ៗគ្នា។
ប្រធាន ក្រុមការងារ ចរចា របស់ គណបក្ស ប្រជាជនកម្ពុជា លោក
ចំណែក ឯប្រធាន ក្រុមការងារ ចរចា គណបក្ស សង្គ្រោះជាតិ លោក គួយ ប៊ុនរឿន មានប្រសាសន៍ នៅថ្ងៃ ទី១៩ ខែកុម្ភៈ ថា, លោក គាំទ្រ ចំណាត់ការ របស់ ក្រសួងមហាផ្ទៃ ក្នុងការអំពាវនាវ នេះ។ ប៉ុន្តែ លោក ស្នើឲ្យ អាជ្ញាធរ ពិនិត្យ ឲ្យបានច្បាស់ ថា, អ្នកណាខ្លះ ត្រូវ ទទួលបាន អត្តសញ្ញាណប័ណ្ណ សញ្ជាតិខ្មែរ, ព្រោះថា កន្លងទៅ ជនអន្តោប្រវេសន៍ ជាច្រើន អាចធ្វើ អត្តសញ្ញាណប័ណ្ណ សញ្ជាតិខ្មែរ បាន ដោយសារ សូកប៉ាន់។
វិទ្យុ អាស៊ី សេរី មិនអាច ទាក់ទង ប្រធាន នាយកដ្ឋាន អត្តសញ្ញាណកម្ម លោក ឧត្តមសេនីយ៍ សុខ ផល បានទេ នៅល្ងាចថ្ងៃ ទី១៩ ខែកុម្ភៈ ឆ្នាំ២០១៥។
ទោះ ជាបែបណាក្តី ប្រធាន បណ្ដាញ រួបរួម គណនេយ្យភាព សង្គមអាស៊ីបូព៌ា និងអាស៊ីប៉ាស៊ីហ្វិក ប្រចាំនៅកម្ពុជា លោក សន ជ័យ មានប្រសាសន៍ថា រាជរដ្ឋាភិបាលគួរណាស់ពង្រឹងប្រសិទ្ធភាពការងារជូនពលរដ្ឋជាមុនសិន ទើបមិនមានបាតុភាពនៅពេលធ្វើអត្តសញ្ញាណប័ណ្ណ។ លោកលើកឡើងថា មន្ត្រីដែលចុះធ្វើអត្តសញ្ញាណប័ណ្ណ នៅតែលម្អៀងទៅរកអ្នកមានលុយ ហើយជានិច្ចកាលតែងឆ្លៀតយកពេលចុះធ្វើការនោះ ទៅគោះយកលុយពីពលរដ្ឋទៀតផង។
យ៉ាងណាមិញ លិខិតរបស់ក្រសួងមហាផ្ទៃ មិនបានបញ្ជាក់ពីតម្លៃនៃការធ្វើអត្តសញ្ញាណប័ណ្ណឡើយ។ ប្រជាពលរដ្ឋប្រាប់ថា ពួកគាត់ត្រូវបង់ប្រាក់ ១ម៉ឺនរៀល ដើម្បីអាចបំពេញសំណុំបែបបទធ្វើអត្តសញ្ញាណប័ណ្ណបាន។ ក្រសួងមហាផ្ទៃ ក៏មិនបានប្រកាសពីលេខទូរស័ព្ទពិសេសណាមួយ ដើម្បីប្រជាពលរដ្ឋប្ដឹងផ្ដល់ពីភាពមិនប្រក្រតីនៃការធ្វើ អត្តសញ្ញាណប័ណ្ណនោះទេ៕
No comments:
Post a Comment