សង្គមស៊ីវិល និងពលរដ្ឋ ខេត្ត ត្បូងឃ្មុំ បារម្ ភពីការជួលដី ក្បែរព្រំដែន ឲ្យពលរដ្ឋ វៀតណាម
RFA / វិទ្យុ អាស៊ី សេរី | ១៨ វិច្ឆិកា ២០១៥
ពលរដ្ឋខ្មែរនិងចាម ចុះពិនិត្យមើលតំបន់ជម្លោះព្រំដែនជាមួយវៀតណាម នៅខេត្តត្បូងឃ្មុំ កាលពីថ្ងៃទី៣១ ខែឧសភា ឆ្នាំ២០១៥។ RFA/Uon Chhin
ក្រុមហ៊ុន ដីសម្បទាន សេដ្ឋកិច្ច មួយចំនួន ក្នុងស្រុក មេមត់ ខេត្ត ត្បូងឃ្មុំ ក្បែរព្រំដែន កម្ពុជា-វៀតណាម នៅតែ បន្តជួលដី របស់ខ្លួន ទៅឲ្យ ប្រជាជន បរទេស ពិសេស ជនជាតិ វៀតណាម។ បញ្ហានេះ សង្គមស៊ីវិល និងប្រជាពលរដ្ឋ រស់នៅ ខេត្ត ត្បូងឃ្មុំ សម្ដែងក្តី បារម្ភ ខ្លាចតែ មានបញ្ហា កើតឡើង នៅពេល ខាងមុខ ខណៈ អាជ្ញាធរ មានភាព ធូររលុង ក្នុងការ គ្រប់គ្រង នោះ។
មន្ត្រីសិទ្ធិមនុស្ស និងពលរដ្ឋ បានឲ្យដឹងថា សកម្មភាពជួលដីឲ្យពលរដ្ឋវៀតណាម ពីសំណាក់ក្រុមហ៊ុនដីសម្បទានសេដ្ឋកិច្ចមួយចំនួននៅស្រុកមេមត់ រួមមានក្រុមហ៊ុន ម៉ែន សារុន ក្រុមហ៊ុន កុយ សុខងួន ជាដើម នៅតែបន្តកើតមាន។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មានប្រសាសន៍ថា ក្រុមហ៊ុនទាំងនេះវិនិយោគនូវចំណែកដីខ្លះដែលទទួលបានពីរាជ រដ្ឋាភិបាល ប៉ុន្តែចំណែកដីទំនេរខ្លះទៀត ពួកគេក៏បានជួលទៅឲ្យប្រជាជនវៀតណាម។ បើទោះបីជាលោកមិនដឹងពីចំនួនផ្ទៃដីជួលនោះច្បាស់ក៏ដោយ ប៉ុន្តែបញ្ហានេះជារឿងគួរឲ្យបារម្ភមួយ ស្របពេលជម្លោះដីធ្លីតាមព្រំដែនរវាងប្រទេសទាំងពីរកំពុងកើតមាន ឡើង។ លើសពីនេះ មានតំបន់ខ្លះជនជាតិវៀតណាម អាចសង់ផ្ទះបានទៀតផង ហើយតំបន់ទាំងនោះ ពលរដ្ឋខ្មែរពិបាកចូលទៅដល់ថែមទៀត។ បញ្ហានេះ លោកថាវាផ្ទុយទៅនឹងសារាចររបស់រាជរដ្ឋាភិបាល ដែលបានប្រកាសហាមឃាត់ពលរដ្ឋខ្មែរនៅតាមព្រំដែនមិនឲ្យលក់ ឬជួលដីខ្លួនទៅឲ្យប្រជាពលរដ្ឋប្រទេសជិតខាង៖ «ឥឡូវតំបន់ហ្នឹង ជាកន្លែងដែលយើងពិបាកចូលហើយ ព្រោះអីមានជើងកាងនៅតំបន់ហ្នឹង។ យើងមិនអាចធ្វើអ្វីកើត។ ខ្ញុំចេះតែភ័យដែរ ភ័យថាតើយើងការពារព្រំដែនយើងយ៉ាងម៉េច បើនៅតាមព្រំដែន ជួលឲ្យបរទេស។»
ទាក់ទងបញ្ហានេះ អ្នកគ្រប់គ្រងក្រុមហ៊ុន ម៉ែន សារុន លោក សៅ សុខម៉ៃ ច្រឡោតតែម្តងនៅពេលសាកសួរអំពីបញ្ហាជួលដីទៅឲ្យប្រជាជនវៀតណាម នេះ ដោយលោកស្នើឲ្យប្រាប់ពីប្រភព និងបង្ហាញពីភស្តុតាងថែមទៀតផង ពីព្រោះលោកអះអាងថា វាជារឿងមិនពិត៖ «ឮគេនិយាយមួយរយដង មិនស្មើយើងឃើញមួយដងទេ។ រៀនធ្វើអ្វីក៏ដោយ មានឯកសារត្រឹមត្រូវផង។»
ដោយឡែកជំទប់ទី១ ឃុំទន្លូង លោក ពឹង ប៊ុនថន ធ្លាប់បញ្ជាក់ថា កន្លងមកក្រុមហ៊ុន កុយ សុខងួន គឺបានជួលចំណែកដីខ្លះទៅឲ្យពលរដ្ឋវៀតណាម មែន ហើយខាងអាជ្ញាធរឃុំក៏បានរាយការណ៍ព័ត៌មាននេះទៅថ្នាក់លើហើយដែរ។
ចំណែកអភិបាលស្រុកមេមត់ លោក ចេង ប៊ុណ្ណារ៉ា មានប្រសាសន៍នៅថ្ងៃទី១៨ វិច្ឆិកា ថា កន្លងមកធ្លាប់មានករណីប្រជាពលរដ្ឋខ្មែររស់នៅក្បែរព្រំដែន បានជួលដីទៅឲ្យជនជាតិវៀតណាម មែន ប៉ុន្តែករណីក្រុមហ៊ុនយកដីរបស់ខ្លួនទៅជួលឲ្យពលរដ្ឋវៀតណាម នោះ ខាងអាជ្ញាធរស្រុកនៅមិនទាន់ដឹងទេ។ ត្បិតតែខាងលោកនៅមិនទាន់ដឹងក៏ដោយចុះ ប៉ុន្តែលោកថានឹងចុះស្រាវជ្រាវជុំវិញរឿងនេះ៖ «អត់ទាន់ទទួលបានថាយ៉ាងម៉េចទេ ប៉ុន្តែនឹងចុះស្រាវជ្រាវបញ្ហាហ្នឹង។»
ទោះបីជាយ៉ាងណាក៏ដោយ ប្រជាពលរដ្ឋនៅឃុំជាំក្រវៀន សុំមិនឲ្យបញ្ចេញឈ្មោះម្នាក់អះអាងថា ពិតជាមានក្រុមហ៊ុនដីសម្បទានសេដ្ឋកិច្ចមួយចំនួននៅស្រុកមេមត់ បានយកដីរបស់ខ្លួនទៅជួលឲ្យប្រជាជនវៀតណាម ដាំដំឡូង និងដាំអំពៅប្រាកដមែន។ លោកថា តម្លៃជួលដីមួយហិកតារចន្លោះពី ៧០ម៉ឺនទៅ ១លានរៀលក្នុងមួយឆ្នាំអាស្រ័យទៅលើប្រភេទដី ហើយពួកគេខ្លះជួលរហូតដល់ ៥ឆ្នាំក៏មាន។ ប្រភពដដែលយល់ថា ជារឿងមិនត្រឹមត្រូវ នៅពេលក្រុមហ៊ុនទាំងនោះយកដីពីរដ្ឋទៅជួលបន្តបែបនេះ ហើយលោកបារម្ភខ្លាចតែបាត់បង់ដីតំបន់នោះ ប្រសិនបើសកម្មភាពជួលដីឲ្យបរទេសនៅតែបន្តកើតមាន។ លោកថា ប្រសិនបើក្រុមហ៊ុនទាំងនោះមិនអាចគ្រប់គ្រងដីសម្បទានរបស់ខ្លួនបាន រដ្ឋគប្បីដកហូតចែកជូនពលរដ្ឋខ្មែរ គឺជាការប្រសើរ។
ការលើកឡើងរបស់ប្រជាពលរដ្ឋនេះ កាលពីថ្ងៃទី១៧ វិច្ឆិកា រាជរដ្ឋាភិបាលបានចេញសារាចរហាមប្រជាពលរដ្ឋខ្មែរមិនឲ្យលក់ ឬជួលដីស្រែ ដីចម្ការ ឬដីលំនៅឋាននៅតាមព្រំដែន ទៅឲ្យប្រជាពលរដ្ឋប្រទេសជិតខាង រួមមានប្រទេសថៃ វៀតណាម ឡាវ បើទោះបីក្នុងរូបភាពណាក៏ដោយ។ រាជរដ្ឋាភិបាលបញ្ជាក់ថា ប្រសិនបើមានការជួលដីរួចហើយ តែពុំមានឯកសារគតិយុត្តិ ឬកិច្ចសន្យាត្រឹមត្រូវ អភិបាលខេត្តត្រូវណែនាំឲ្យប្រជាពលរដ្ឋខ្មែរឲ្យបញ្ឈប់ការជួលដីនោះ ដោយដាក់ឱសានវាទក្នុងរយៈពេលកំណត់មួយជាក់លាក់ស្របតាមស្ថានភាព ជាក់ស្តែង ប៉ុន្តែបើការជួលដីនោះមានឯកសារគតិយុត្តិ ឬកិច្ចសន្យាត្រឹមត្រូវ ពួកគេអាចបន្តរហូតដល់អស់សុពលភាព ទើបបញ្ចប់លែងឲ្យមានការជួលដីបន្ថែមទៀត។
អភិបាលខេត្ត ត្រូវចាត់ឲ្យមានការពិនិត្យឯកសារ ឬកិច្ចសន្យាដែលប្រជាពលរដ្ឋខ្មែរបានជួលដីនៅតាមតំបន់ព្រំដែនឲ្យ ទៅប្រជាពលរដ្ឋប្រទេសជិតខាងនាពេលកន្លងមក។ បន្ថែមពីលើនេះ ក្រសួងស្ថាប័ន និងរដ្ឋបាលថ្នាក់ក្រោមជាតិ ត្រូវដាក់ចេញនូវវិធានការ និងយុទ្ធសាស្ត្រសមស្រប ដើម្បីជួយជំរុញការបង្កបង្កើនផល និងការដាំដុះដំណាំផ្សេងៗរបស់ប្រជាពលរដ្ឋនៅតាមតំបន់ព្រំដែន ដែលអាចរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋ និងដើម្បីទប់ស្កាត់មិនឲ្យប្រជាពលរដ្ឋខ្មែរជួលដីឲ្យទៅប្រជាពលរដ្ឋ ប្រទេសជិតខាងតទៅទៀត៕
No comments:
Post a Comment