សហព័ន្ធនិស្សិតមួយ អំពាវនាវ ឲ្យកម្លាំងនិស្សិត លះបង់ ការសិក្សាមួយពេលខ្លី ចូលរួម ជាមួយ គណបក្សប្រឆាំង
ដោយ៖ តាំង វីដា / វិទ្យុ វ៉អូឌី | ថ្ងៃសុក្រ ទី27 ខែធ្នូ ឆ្នាំ2013
សហព័ន្ធនិស្សិតបញ្ញវន្តកម្ពុជា អំពាវនាវឲ្យសិស្សនិស្សិតទូទាំងប្រទេស ក្រោកឈរឡើងចូលរួមជាមួយគណបក្សសង្គ្រោះជាតិ ដើម្បីការផ្លាស់ប្តូរនៅកម្ពុជា។
សេចក្តីអំពាវនាវ ចេញផ្សាយកាលពីថ្ងៃទី២៦ខែធ្នូ ឲ្យដឹងថា៖«...ដល់ពេលវេលាដែលសិស្ស និស្សិត និងយុវជនខ្មែរយើងទាំងអស់គ្នាក្រោឈរ រួមកម្លាំងគ្នាដើម្បីសង្គ្រោះប្រទេសជាតិយើងហើយ»។ សហព័ន្ធ បានអំពាវនាវឲ្យសមាជិក សមាជិកា សិស្ស និស្សិតទាំងអស់ លះបង់ការសិក្សាមួយរយៈពេលខ្លី ដើម្បីឲ្យសង្គមមានការផ្លាស់ប្តូរ ក្រោមហេតុផលថា មិនអាចទ្រាំរស់នៅក្នុងសង្គមដែលពោរពេញដោយភាពអយុត្តិធម៌ មហាពុករលួយ និងបក្ខពួកនិយម។
នាយកប្រតិបត្តិសហព័ន្ធ លោក ទិប ទាវ ប្រាប់VODថា សហព័ន្ធនិស្សិតបញ្ញវន្តកម្ពុជា មិនធ្វើការពាក់ព័ន្ធនឹងគណបក្សនយោបាយ ហើយត្រូវបានបង្កើតឡើងកាលពីឆ្នាំ២០០៨ ដោយមានសកម្មភាពជាការបណ្តុះបណ្តាលវគ្គខ្លីដល់សិស្ស និស្សិត។ លោកបន្តថា នៅរាជធានីភ្នំពេញ សហព័ន្ធ មានសមាជិកប្រមាណជា១០០០នាក់ ខេត្តបន្ទាយមានជ័យ៥០០នាក់ និងខេត្តស្វាយរៀង៣០០នាក់។ លោកបញ្ជាក់ថា ការអំពាវនាវនេះ ដោយសារសហព័ន្ធមើលឃើញពីធនធាននិស្សិត កំពុងខ្វះការងារធ្វើ និងពុំមានការយកចិត្តទុកដាក់ទៅលើនិស្សិតក្រីក្រ។
VOD មិនទាន់អាចទាក់ទងមន្រ្តីរដ្ឋាភិបាល ដើម្បីអត្ថាធិប្បាយលើបញ្ហានេះបាននៅឡើយទេ។
គណបក្សសង្គ្រោះជាតិ កំពុងធ្វើមហាបាតុកម្មជារៀងរាល់ថ្ងៃ។ លោក សម រង្ស៊ី ប្រធានគណបក្ស បានអំពាវនាវឲ្យប្រជាពលរដ្ឋនៅរាជធានីភ្នំពេញ ចូលរួមឲ្យបាន១លាននាក់ នៅថ្ងៃអាទិត្យទី២៩ខែធ្នូ ដើម្បីជាការដាក់បន្ទុកទៅលើរដ្ឋាភិបាល ឲ្យបោះឆ្នោតឡើងវិញ និងទាមទារថ្នាក់ដឹកនាំរដ្ឋាភិបាល ចុះចេញពីតំណែង។
លោកនាយករដ្ឋមន្ត្រី ហ៊ុន សែន កាលពីសប្តាហ៍មុន ព្រមានចាត់វិធានការផ្លូវច្បាប់ទៅលើក្រុមបាតុករ និងប្រជាពលរដ្ឋ ដែលចូលរួមបាតុ កម្មរបស់គណបក្សសង្គ្រោះជាតិ ក្នុងការបិទផ្លូវមួយចំនួន៕
this is show a peaceful khmer.
ReplyDelete