ជប៉ុន បារម្ភខ្លាំង ពីការប៉ះទង្គិច រវាង កម្មករ និងសមត្ថកិច្ចកម្ពុជា
ដោយ៖ អ៊ឹង ប៊ុនថន / វិទ្យុ វីអូឌី | ថ្ងៃព្រហស្បតិ៍ ទី9 ខែមករា ឆ្នាំ2014
ការប្រឈមដាក់គ្នារវាងសមត្ថកិច្ច និងកម្មករនៅមុខទីស្ដីការគណៈរដ្ឋមន្ដ្រី នៅថ្ងៃទី៣០ ខែធ្នូ ឆ្នាំ២០១៣(រូបភាពដោយ តាំង វីដា)
ជប៉ុនបានព្រួយបារម្ភយ៉ាងខ្លាំងពីការប៉ះទង្គិចគ្នា រវាងកម្មករ និងសមត្ថកិច្ចកម្ពុជា កន្លងមកនេះ ដែលបណ្តាលឲ្យមានអ្នកស្លាប់ និងរបួសជាច្រើននាក់។
សេចក្តីថ្លែងការណ៍របស់អ្នកនាំពាក្យក្រសួងការបរទេសជប៉ុន កាលពីថ្ងៃទី៨ ខែមករានេះ បានលើកឡើងបីចំណុចទាក់ទងនឹងស្ថាន ការណ៍នៅប្រទេសកម្ពុជា។
សេចក្តីថ្លែងការណ៍ បានបញ្ជាក់ថា ជប៉ុនព្រួយបារម្ភយ៉ាងខ្លាំងចំពោះស្ថានការណ៍នៅកម្ពុជា ដោយកម្លាំងសន្តិសុខ និងបាតុករ បានប៉ះ ទង្គិចគ្នា ក្នុងវិវាទការងារ កាលពីថ្ងៃទី៣ ខែមករា ដែលបណ្តាលឲ្យមានអ្នកស្លាប់ និងរបួសជាច្រើននាក់។
ជប៉ុនក៏បានលើកទឹកចិត្តទៅដល់គ្រប់ភាគី ឲ្យជៀសវាង ការប្រើហិង្សា ហើយបន្តដោះស្រាយដោយសន្តិវិធី។ ប្រទេសជប៉ុន ក៏សង្ឈឹមថា កិច្ចពិភាក្សារវាង គណបក្សកាន់អំណាច និងបក្សប្រឆាំងអំពីវិវាទលទ្ធផលបោះឆ្នោត កាលពីខែកក្កដាឆ្នាំ២០១៣ នឹងត្រូវធ្វើឡើងទាន់ពេល ដើម្បីធ្វើឲ្យស្ថានការណ៍មានប្រក្រតីឡើងវិញ។
ចុងក្រោយជប៉ុន អះអាងថា ខ្លួននឹងបន្តតាមដានយ៉ាងយកចិត្តទុកដាក់ទៅលើស្ថានការណ៍ប្រទេសកម្ពុជា ដោយរួមមានទស្សនៈវិស័យក្នុងការធានាសុវត្ថិភាពនៃក្រុមហ៊ុនជប៉ុន និងប្រជាជនជប៉ុន។
ក្រោយពីការបាញ់សម្លាប់បាតុករ យ៉ាងតិច៥នាក់ និងរបួសជិត៤០នាក់ កាលពីថ្ងៃទី៣ ខែមករានេះ សហគមន៍អន្តរជាតិ បានចេញសេចក្តីថ្លែងការណ៍ថ្កោលទោស ចំពោះទង្វើហិង្សានេះ ហើយជំរុញឲ្យប្រញាប់ដោះស្រាយជាបន្ទាន់៕
Japon worry and concern because their benefit with hun sen. Japon knew what Khmer people need but because of their investment which way they should go? Khmer wake up only Khmer can help Khmer.
ReplyDelete