លោកនាយករដ្ឋមន្ត្រី ហ៊ុន សែន ប្រកាសឲ្យអ្នកគាំទ្រខ្លួន ត្រៀមខ្លួនប្រឆាំងតបទង្វើខុសរដ្ឋធម្មនុញ្ញ
ដោយ៖ តាំង វីដា និងជន ស្រីណុច | ថ្ងៃសៅរ៍ ទី18 ខែមករា ឆ្នាំ2014,
លោកនាយករដ្ឋមន្រ្តី ផ្តល់បទសម្ភាសន៍នៅមន្ទីររដ្ឋសភា កាលពីថ្ងៃទីធ្នូ ឆ្នាំ២០១៣ (រូបថត ណាត សុភាព)
លោកនាយករដ្ឋមន្ត្រី ហ៊ុន សែន នៅថ្ងៃសៅរ៍នេះ ប្រកាសឲ្យអ្នកគាំទ្រគណបក្សប្រជាជនកម្ពុជា ត្រៀមខ្លួនប្រឆាំងតបនឹងទង្វើទាំងឡាយដែល ខុសពីរដ្ឋធម្មនុញ្ញ ដែលស្មើនឹង ការផ្តួលរំលំរដ្ឋាភិបាល។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ ភូមិកុមារ អេស អូ អេស ខេត្តក្រចេះ នៅព្រឹកថ្ងៃទី១៨ ខែមករានេះ ប្រមុខរដ្ឋាភិបាល លោក ហ៊ុន សែន មានប្រសាសន៍ថា ដើម្បីរក្សាប្រក្រតីភាពនៃជីវភាពរស់នៅរបស់ប្រជាពលរដ្ឋខ្មែរ ដោះស្រាយវិបត្តិសេដ្ឋកិច្ច និងសង្គម ក្នុងគោលដៅដំណើរការគ្រប់គ្រងរដ្ឋស្របតាមរដ្ឋធម្មនុញ្ញ រដ្ឋាភិបាល នឹងចាត់រាល់វិធានការ បង្ក្រាបលើរាល់សកម្មភាព ដែលមានលក្ខណៈប្រឆាំងនឹងរដ្ឋធម្មនុញ្ញ។
លោកនាយករដ្ឋមន្ត្រី បានលើកជាឧទាហរណ៍ ចំពោះទង្វើប្រឆាំងរដ្ឋធម្មនុញ្ញ ក្នុងនោះរួមមាន សំណើឲ្យព្រះមហាក្សត្រដាក់រាជ្យ ដើម្បីធ្វើជានាយករដ្ឋមន្ត្រី និងការផ្តល់យោបល់ឲ្យបង្កើតរដ្ឋាភិបាលចម្រុះបណ្តោះអាសន្នជាដើម។ ហើយលោក ជឿជាក់ថា ព្រះមហាក្សត្រ នឹងមិនជឿតាមការញុះញង់របស់ក្រុមណាមួយឡើយ។
កាលពីថ្ងៃទី១២ ខែមករា ឆ្នាំ២០១៤ លោក លឺ ឡាយស្រេង អតីតឧបនាយករដ្ឋមន្ត្រី និងជាមន្ត្រីជាន់ខ្ពស់គណបក្សហ្វ៊ុនស៊ិនប៉ិច បានសរសេរលិខិតទូលថ្វាយព្រះមហាក្សត្រ ព្រះករុណា ព្រះបាទព្រះបរមនាថ នរោត្តម សីហមុនី ដោយរៀបរាប់ថា ក្រោយការបោះឆ្នោតថ្ងៃទី២៨ ខែកក្កដា ឆ្នាំ២០១៣ ភាពជាប់គាំងផ្នែកនយោបាយ បានធ្វើឲ្យប្រទេសកម្ពុជា ជួបនូវប្រទះនូវបញ្ហាដ៏ធ្ងន់ធ្ងរ។
លិខិតរបស់លោក លឺ ឡាយស្រេង ទូលថ្វាយព្រះមហាក្សត្រ បានបន្តដោយផ្តល់នូវអនុសាសន៍ចំនួន ៤ចំណុច ដោយក្នុងនោះ ស្នើឲ្យព្រះអង្គកោះអញ្ជើញគណបក្សជាប់ឆ្នោតទាំងពីរ ដោយត្រាស់បង្គាប់ឲ្យគណបក្សទាំងពីរនេះ ឈ្នះឆ្នោតទាំងអស់គ្នា ដឹកនាំរាជរដ្ឋាភិបាលពាក់កណ្តាលម្នាក់ ដែលឯករាជ្យពីគ្នា ហើយគណបក្សទាំងពីរត្រូវមានឧបនាយករដ្ឋមន្ត្រីស្មើៗគ្នា ក្រោមការដឹកនាំរបស់នាយករដ្ឋមន្ត្រីឯករាជ្យម្នាក់។
លិខិតដដែលបន្តថា ចំពោះនាយករដ្ឋមន្ត្រីឯករាជ្យ គួរជ្រើសរើសព្រះមហាក្សត្រី នរោត្តម មុនីនាថ សីហនុ ជាអ្នកទទួលភារកិច្ចបណ្តោះអាសន្នក្នុងរយៈពេលពីរឆ្នាំ សម្រាប់ទទួលសំណើពីរដ្ឋមន្ត្រីនីមួយៗ ហើយកងកម្លាំងប្រដាប់អាវុធទាំងអស់ ត្រូវស្ថិតនៅក្រោមការគ្រប់គ្រងរបស់ព្រះមហាក្សត្រ និងជ្រើសរើសសមាជិក គជប ឯករាជ្យថ្មីមួយ ដែលមានភាពយុត្តិធម៌៕
No comments:
Post a Comment