ថ្ងៃទី 22 មករា 2014 | ដោយ: រតនា / CEN
ភ្នំពេញ: មន្ត្រីជាន់ខ្ពស់ម្នាក់ នៃសាលារាជធានីភ្នំពេញ បានបញ្ជាក់ នៅព្រឹកថ្ងៃទី២២ ខែមករា ឆ្នាំ២០១៤ នេះថា ប្រធានសហជីពសេរីកម្មករ បានកំពុងបំពានច្បាប់បាតុកម្ម និងរំលោភលើសេចក្តីសម្រេច របស់សាលារាជធានីភ្នំពេញ ដែលពុំអនុញ្ញាតឲ្យធ្វើការហែក្បួននោះឡើយ។
នៅថ្ងៃនេះ លោកឃួង ស្រេង អភិបាលរងសាលារាជធានីភ្នំពេញ បានបញ្ជាក់តាមទូរស័ព្ទថា លោកជា មុនី បានកំពុងបំពានច្បាប់បាតុកម្ម និងរំលោភលើសេចក្តីសម្រេចរបស់សាលារាជធានីភ្នំពេញ ដែលពុំអនុញ្ញាតឲ្យធ្វការហែក្បួននោះឡើយ ប៉ុន្តែចំពោះការសុំច្បាប់ធ្វើពិធីសាសនា យកម្រងផ្កា មកគោរពវិញ្ញាណក្ខន្ធលោក ជា វិជ្ជា នៅកន្លែងរូបសំណាកនោះ សាលារាជធានីភ្នំពេញ ពុំបានហាមឃាត់ទេ គឺអនុញ្ញាតឲ្យធ្វើពិធីសាសនា។ ចំពោះការបំពានច្បាប់បែបនេះ នៅពេលមានបញ្ហាអសន្តិសុខ គឺលោក ជា មុនី និងមន្ត្រីសហជីព ជាអ្នកទទួលខុសត្រូវខ្លួនឯង តាមផ្លូវច្បាប់។
ក្រុមមេដឹកនាំសហជីពសេរីកម្មករ នៃព្រះណាចក្រកម្ពុជា និងលោកសម រង្ស៊ី មេដឹកនាំគណបក្សសង្គ្រោះជាតិ ដែលជាគណបក្សប្រឆាំង ប្រមាណជាង ៣០០ នាក់ បានដើរហែកម្រងផ្កា ចេញពីទីស្នាក់ការសហជីព នៅព្រឹកថ្ងៃទី២២ ខែមករានេះ មកកាន់ទីតាំងរូបសំណាកលោក ជា វិជ្ជា នៅសួនច្បារច្រមុះជ្រូក ខាងលិចវិមានឯករាជ្យ ដែលជាខួបគម្រប់ ១០ ឆ្នាំ នៃការបាញ់សម្លាប់លោក ជា វិជ្ជា អតីតមេដឹកនាំសហជីពនេះ។
ការដង្ហែក្បួនយកកម្រងផ្កា មកគោរពវិញ្ញាណក្ខន្ធសពលោក ជា វិជ្ជា នៅទីនោះ គឺពុំត្រូវបានរំខាន ឬរារាំងពីសំណាក់កងកម្លាំងសមត្ថកិច្ចឡើយ ទោះបីជាសាលារាជធានីភ្នំពេញ គ្មានការអនុញ្ញាតក៏ដោយ។
ក្រុមមេដឹកនាំសហជីព និងមន្ត្រីគណបក្សប្រឆាំង នៅតែបំពានច្បាប់ ដឹកនាំការហែក្បួនតាមដងផ្លូវ ដើម្បីកេងចំណេញនយោបាយរបស់ខ្លួន។
នៅក្នុងសេចក្តីថ្លែងការណ៍របស់លោក ជា មុនី ប្រធានសហជីពសេរីកម្មករ នៃព្រះរាជាណាចក្រកម្ពុជា បានអំពាវនាវសុំឲ្យអាជ្ញាធរ បន្តធ្វើការស៊ើបអង្កេត ចាប់ឃាតកពិត បាញ់សម្លាប់លោក ជា វិជ្ជា មេដឹកនាំសហជីព កាលពីថ្ងៃទី២២ ខែមករា ឆ្នាំ២០០៤ និងមេខ្លោង ដែលជាអ្នកបញ្ជា មកកាត់ទោសតាមច្បាប់ និងអំពាវនាវឲ្យសមត្ថកិច្ច បញ្ឈប់ការប្រើអំពើហិង្សាលើកម្មករ និងមេដឹកនាំសហជីព។
ទាក់ទងនឹងការបាញ់សម្លាប់លោក ជា វិជ្ជា តាំងពីឆ្នាំ២០០៤ មកនោះ មន្ត្រីក្រសួងមហាផ្ទៃ ធ្លាប់ បានបញ្ជាក់ថា អាជ្ញាធរ នៅតែបន្តការស៊ើបអង្កេត ករណីឃាតកម្ម លើរូបលោកជា វិជ្ជា។ សំណុំរឿងឃាតកម្មមួយនេះ នៅពុំទាន់បានបញ្ចប់ ឬបិទការស៊ើបអង្កេតនៅឡើយទេ៕
No comments:
Post a Comment