កងកម្លាំង យោធា នៅតែត្រូវបាន ដាក់ពង្រាយតាមបណ្ដោយផ្លូវវ៉េងស្រេង
ដោយ ម៉ម មុនីរតន៍ / វិទ្យុអាស៊ីសេរី | ០៥ មករា ២០១៤
កងកម្លាំងប្រដាប់អាវុធរដ្ឋាភិបាល ដើរល្បាតតាមផ្លូវវ៉េងស្រេង ក្រោយបាញ់បង្ក្រាបបណ្ដាលឲ្យបាតុករស្លាប់ កាលពីថ្ងៃទី៣ មករា ឆ្នាំ២០១៤។
RFA/Sek Bandith
ចំណែកកម្មករដែលស្នាក់នៅក្នុងតំបន់ទាំងនេះ ត្រូវបានជម្លៀសចេញ និងរកទីតាំងសុវត្ថិភាពជាបន្តបន្ទាប់ ក្រោយការបង្ក្រាបដ៏ហិង្សាក្នុងពេលកន្លងទៅនេះ។ មានមនុស្សចំនួនតិចតួចប៉ុណ្ណោះ ដែលបន្តនៅក្រាញននៀលស្នាក់នៅ ព្រោះតែពុំមានជម្រើស។
ក្រុមប្រជាពលរដ្ឋដែលរស់នៅក្បែរកំណាត់ផ្លូវវ៉េងស្រេង ឲ្យដឹងនៅថ្ងៃទី៥ ខែមករា ថា នៅពេលនេះការរស់នៅរបស់ពួកគេកំពុងស្ថិតក្រោមសម្ពាធនៃភាពតក់ស្លុត ការភ័យខ្លាច ក្តីព្រួយបារម្ភ គឺមិនខុសក្នុងសម័យនៃការគ្រប់គ្រងរបស់របបកម្ពុជាប្រជាធិបតេយ្យ ប៉ុល ពត ឡើយ៖ «នៅពេលនោះ គឺចាប់បានកម្មករ ចាប់បានម្នាក់យកមកដល់... វាចាប់បានហើយវាបោក វាបោកហើយវាវ៉ៃទាល់តែងាប់នៅនឹងកន្លែង។ ហ្នឹងខ្ញុំឃើញភាពជាក់ស្ដែងរបស់ខ្ញុំតែម្ដង។ ខ្ញុំថាគួរឲ្យខ្លោចផ្សារណាស់! សកម្មភាពឥឡូវហ្នឹងក៏នៅតែស្ងាត់ដែរ អ្នករោងចក្រធ្វើដំណើរទៅផ្ទះកាន់តែបណ្ដើរៗទៅអស់ហើយ អស់រលីងហើយ។ អ៊ំកើតមកបួនជំនាន់ហើយ សង្គ្រាម តែមិនដូចហ្នឹងទេកូន។ កូនឥឡូវនេះ មកវ៉ៃទាំងរស់ៗ ស្រស់ៗអ៊ីចឹងកូន។ ខ្លាចណាស់ អ៊ំភ័យណាស់»។
ទិដ្ឋភាពទូទៅនៅអមសង្ខាងផ្លូវវ៉េងស្រេង នៅពេលនេះ បានវិលទៅរកភាពប្រក្រតីឡើងវិញ ក្រោយការបង្ក្រាបដោយបាញ់គ្រាប់ពិត និងគ្រាប់បែកផ្សែង ដោយក្រុមបង្ក្រាបរបស់អាជ្ញាធរមានសមត្ថកិច្ច ដែលបញ្ជាដោយលោក រ័ត្ន ស្រ៊ាង មេបញ្ជាការប៉េអឹម រាជធានីភ្នំពេញ ដោយផ្ទាល់កាលពីថ្ងៃទី៣ ខែមករា។
ផ្សារ ស្ថានីយសាំង និងតូបលក់ដូរតូចៗនៅអមសង្ខាងផ្លូវ ចាប់ផ្ដើមដំណើរការអាជីវកម្មជាបណ្ដើរៗឡើងវិញហើយ គិតមកដល់ថ្ងៃទី៥ មករា។
ក៏ប៉ុន្តែបើទោះជាស្ថានភាពបានវិលមករកភាពប្រសើរ និងស្ងប់ស្ងាត់បន្តិចក្ដី ក៏កម្លាំងយោធានៅតែត្រូវគេដាក់ពង្រាយយ៉ាងស្អេកស្កះ នៅអមសង្ខាងផ្លូវនៅឡើយ។ កងពល ង៧០ ដែលកំពុងល្បាតដោយមានអាវុធគ្រប់ដៃ នៅតែបន្តចល័តរថយន្តដឹកទាហានបើកបរចុះឡើងៗ ជាប្រចាំ ចាប់តាំងពីមានការបាញ់បង្ក្រាបដោយក្រុមកងរាជអាវុធហត្ថរាជធានីភ្នំពេញ ប្រឆាំងបាតុកម្មកន្លងទៅនេះ។
មន្ត្រីយោធាកងពល ង៧០ ដែលល្បាតនៅលើកំណាត់ផ្លូវវ៉េងស្រេង ជាច្រើននាក់ បានឲ្យវិទ្យុអាស៊ីសេរី ដឹងកាលពីថ្ងៃទី៤ មករា ថា ពុំមានបិទសិទ្ធិអ្នកដំណើរឆ្លងកាត់ទេ ប៉ុន្តែយន្តការនេះ ដើម្បីពង្រឹងសន្តិសុខក្រោយកើតហេតុប៉ុណ្ណោះ។
កាលពីថ្ងៃទី៤ មករា ក្រសួងមហាផ្ទៃ បានចេញសេចក្ដីថ្លែងការណ៍បដិសេធការចោទប្រកាន់ថា សមត្ថកិច្ចប្រើប្រាស់កម្លាំងប្រដាប់អាវុធប្រឆាំងក្រុមអ្នកតវ៉ា។ លិខិតឲ្យដឹងថា អ្វីដែលព្រឹត្តិការណ៍កើតឡើងនៅគ្រានោះ គឺជាប្រតិបត្តិការដើម្បីសម្រួលដល់ការប្រើហិង្សា ការបិទផ្លូវសាធារណៈ និងបំផ្លិចបំផ្លាញទ្រព្យសម្បត្តិប៉ុណ្ណោះ។
ក្នុងការបង្ក្រាបកាលពីថ្ងៃទី២ និង ថ្ងៃទី៣ ខែមករា មានមនុស្សចំនួន ២៣នាក់ ត្រូវចាប់ខ្លួន។របាយការណ៍របស់អង្គការលីកាដូ រកឃើញថា អ្នកស្លាប់ក្នុងព្រឹត្តិការណ៍បាញ់បង្ក្រាបកាលពីថ្ងៃទី៣ នោះ អ្នកស្លាប់ក្រោយបញ្ជូនដល់មន្ទីរពេទ្យមានចំនួន ៤នាក់ និងមានមនុស្សអាចច្រើនជាង ៤០នាក់ផ្សេងទៀត រងរបួសធ្ងន់និងស្រាល។ តួលេខនៃអ្នកស្លាប់នេះ នៅពុំមានការប្រែប្រួលនៅឡើយទេ។ យ៉ាងណាក៏ដោយ ចំពោះទីតាំងនៃការឃុំខ្លួន អ្នកដែលត្រូវចាប់ខ្លួនវិញ នៅតែស្ថិតក្នុងអាថ៌កំបាំងនៅឡើយ។
វិទ្យុអាស៊ីសេរី ពុំអាចស្វែងរកការស្នើសុំបំភ្លឺពីមន្ត្រីតុលាការបានទេ ជុំវិញបញ្ហានេះ ចំពោះទីតាំងនៃការឃុំខ្លួនមនុស្សទាំង ២៣នាក់នេះ។ ក៏ប៉ុន្តែប្រភពដែលជឿទុកចិត្តថ្លែងសុំមិនបញ្ចេញឈ្មោះបានទម្លាយឲ្យវិទ្យុអាស៊ីសេរី ដឹងថា មនុស្សដែលត្រូវចាប់ខ្លួនទាំងនេះ ត្រូវគេបញ្ជូនទៅឃុំនៅមន្ទីរឃុំឃាំង CC4 ក្នុងខេត្តពោធិ៍សាត់ ហើយ។
មន្ត្រីអង្គការលីកាដូ លោក អំ សំអាត ថ្លែងថា ពន្ធនាគារនេះមានចម្ងាយប្រហែល ៥០គីឡូម៉ែត្រ ពីរួមខេត្តពោធិ៍សាត់ ស្ថិតក្នុងស្រុកក្រវាញ។ មុនទៅដល់ទីនោះ អ្នកដំណើរត្រូវឆ្លងកាត់ផ្លូវចុះឡើងជម្រាលជើងភ្នំ និងព្រៃស្តុកផង។
លោក អំ សំអាត ហៅការបន្តពង្រាយយោធា និងក្រុមបង្ក្រាបបាតុករនៅពេលនេះ ដោយរដ្ឋាភិបាលលោកនាយករដ្ឋមន្ត្រី ហ៊ុន សែន ថា គឺជាដំណើរវិវត្តន៍ថយក្រោយនៃលទ្ធិប្រជាធិបតេយ្យនៅកម្ពុជា៖ «យើងយកកម្លាំងបាយ ឬក៏កម្លាំងប្រដាប់អាវុធ មកដើម្បីធ្វើការដោះស្រាយ ដើម្បីគ្រប់គ្រងស្ថានការណ៍ វាទៅជារបបមួយ។ វាហាក់ដូចជាបើនៅគេចែកជាពីរនោះ វាទៅជារបបយោធា គ្រប់គ្រងដោយយោធាទៅវិញ។ អ៊ីចឹងយើងជាប្រទេសប្រកាន់លទ្ធិប្រជាធិបតេយ្យ យើងមិនចង់ឃើញអ៊ីចឹងទេ គឺធ្វើឲ្យពលរដ្ឋហ្នឹងមានការភិតភ័យធ្ងន់ធ្ងរ»។
យ៉ាងណាក៏ដោយស្ថានការណ៍នៅពេលនេះ ហាក់ដូចសមរភូមិប្រយុទ្ធ។ នៅរាជធានីភ្នំពេញ ត្រូវគេដាក់កម្លាំងការពារសន្តិសុខយ៉ាងតឹងរ៉ឹង នៅគោលដៅសំខាន់ៗ ដូចជាទីលានប្រជាធិបតេយ្យ និងលើកំណាត់ផ្លូវវ៉េងស្រេង ជាដើម ជាពិសេស ទីតាំងទាំងនេះ ពុំអនុញ្ញាតឲ្យមានមនុស្សប្រមូលផ្ដុំគ្នាច្រើនឡើយ៕
No comments:
Post a Comment