កម្មករ បិទកំណាត់ផ្លូវជាតិលេខ៤ ពីរកន្លែង ទាមទារ ដោះលែងមនុស្សជាង១០នាក់ ដែលអាជ្ញាធរ បានឃាត់ខ្លួន
ដោយ៖ ពេជ្រ សុធារី / វិទ្យុ វីអូឌី | ថ្ងៃព្រហស្បតិ៍ ទី2 ខែមករា ឆ្នាំ2014
កម្មករបិទកំណាត់ផ្លូវជាតិលេខ៤នៅមុខបញ្ជាការដ្ឋានកងពលតូចទ័ពពិសេសឆ័ត្រយោង៩១១ នៅរសៀលថ្ងៃទី០២មករា (រូបថត តាត ឧត្តម)
កម្មកររោងចក្រជាច្រើនរយនាក់ នៅតំបន់សេដ្ឋកិច្ចពិសេសភ្នំពេញ នៅរសៀលថ្ងៃទី០២មករានេះ បានបិទកំណាត់ផ្លូវជាតិលេខ៤ ក្នុងខណ្ឌពោធិសែនជ័យ ចំនួនពីរកន្លែង ទាមទារឲ្យដោះលែង លោកវន់ ពៅ និងអ្នកដែលត្រូវបានអាជ្ញាធារចាប់ខ្លួនប្រមាណ១០នាក់ទៀត និងទាមទារដំឡើងប្រាក់ឈ្នួល ១៦០ដុល្លារក្នុងមួយខែ។
អ្នកយកព័ត៌មានរបស់វីអូឌី លោក ញឹម សុខន បានរាយការណ៍មកថា នៅម៉ោងជិត៥រសៀលនេះ កម្មករមកពីច្រើនរោងចក្រក្នុងតំបន់សេដ្ឋកិច្ចពិសេសភ្នំពេញ បានបិទកំណាត់ផ្លូវជាតិលេខ៤ចំនួនពីរកន្លែង គឺមួយកន្លែងនៅមុខតំបន់សេដ្ឋកិច្ចពិសេសភ្នំពេញ និងមួយកន្លែងទៀត នៅមុខបញ្ជាការដ្ឋានកងពលតូចទ័ពពិសេសឆ័ត្រយោង ៩១១។ លោកថា ការតវ៉ាបិទកំណាត់ផ្លូវជាតិលេខ៤នេះ ធ្វើឡើងក្នុងគោលបំណងទាមទារឲ្យអាជ្ញាធរដោះលែង លោក វន់ ពៅ ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ និងមនុស្ស១៤នាក់ផ្សេងទៀត ដែលអាជ្ញាធរបានចាប់ខ្លួនកាលពីថ្ងៃត្រង់នេះ និងទាមទារឲ្យរដ្ឋាភិបាលដំឡើងប្រាក់ឈ្នួលដល់កម្មករចំនួន ១៦០ដុល្លារក្នុងមួយខែ។
ដោយឡែកទាក់ទងនឹងការចាប់ខ្លួន ព្រះសង្ឃ សកម្មជនសហីជពនិងដីធ្លី និងកម្មករប្រមាណ ១០នាក់នោះ រហូតមកដល់ម៉ោងជាង ៦ល្ងាចនេះ នៅមិនមានសេចក្តីរាយការណ៍ណាមួយថានឹងមានការដោះលែង ឬបញ្ជូនទៅស្នងការរាជធានីភ្នំពេញ ដើម្បីធ្វើការចោទប្រកាន់នៅឡើយទេ។
បើតាមមន្ត្រីសិទ្ធិមនុស្ស លោក វន់ ពៅ ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ បានរងរបួសក្បាល ដេរចំនួន៨ថ្នេរ ក្នុងព្រឹត្តិការណ៍ប៉ះទង្គិចគ្នានោះ។
នៅម៉ោងប្រមាណ ១២ថ្ងៃត្រង់នេះ មានហិង្សាមួយបានកើតឡើងរវាងកម្លាំងទ័ពឆ័ត្រយោង៩១១ ជាមួយនឹងកម្មកររោងចក្ររាប់ពាន់នាក់ ក្នុងតំបន់សេដ្ឋកិច្ចពិសេសភ្នំពេញ ក្នុងខណ្ឌពោធិសែនជ័យ រាជធានីភ្នំពេញ បណ្តាលឲ្យសកម្មជនសហជីព ព្រះសង្ឃ និងកម្មករ រងរបួសធ្ងន់ និងស្រាល ហើយមួយចំនួនទៀតត្រូវបានឃាត់ខ្លួន ក្រោមការចោទថាញុះញង់កម្មករតវ៉ាដោយហិង្សាទៅលើរោងចក្រយ៉ាកជីង៕
No comments:
Post a Comment