ព្រះសង្ឃ ដូនជី និងនិស្សិត នៅវត្តលង្កា ជំទាស់ ទៅនឹងការដំទ្បើង ប៉ុស្តិ៍អគ្គិសនីចល័ត ជាប់ របងវត្ត
ដោយ៖ ឡាយ សាមាន / វិទ្យុអាស៊ីសេរី | ថ្ងៃព្រហស្បតិ៍ ទី2 ខែមករា ឆ្នាំ2014
ព្រះសង្ឃ ដូនជី និងនិស្សិត នៅវត្តលង្កា សង្កាត់បឹងកេងកងទី១ ខណ្ឌចំការមន រាជធានីភ្នំពេញ នៅថ្ងៃព្រហស្បតិ៍នេះ ជំទាស់ទៅនឹងក្រុមហ៊ុនអគ្គិសនីកម្ពុជា ដែលគ្រោងដំទ្បើងប៉ុស្តិ៍អគ្គិសនីចល័តលើចញ្ចើមផ្លូវ៥១ ជាប់របងវត្ត ដើម្បីពង្រីកសមត្ថភាពបណ្តាញចែកចាយអគ្គិសនីជូនប្រជាពលរដ្ឋ ។
ព្រះចៅអធិការវត្តលង្កា ព្រះនាម សៅរ៍ ច័ន្ទថុល មានសង្ឃដីកាថា ព្រះអង្គបានប្រជុំជាមួយមន្ត្រីក្រុមហ៊ុនអគ្គិសនី នៅក្នុងវត្ត ដោយព្រះអង្គលើកទ្បើងពីផលប៉ះពាល់សោភណ្ឌភាពវត្ត និងការមកគោរពបូជារបស់ពុទ្ធសាសនិក។ ព្រះអង្គបានស្នើឲ្យក្រុមហ៊ុនអគ្គីសនីកម្ពុជាប្តូរទីតាំងទៅកន្លែងផ្សេងទៀត ពីព្រោះ រាជធានីភ្នំពេញមានកន្លែងសមស្របជាងនេះ។
ប្រធានបណ្តាញអគ្គីសនីកម្ពុជា លោក ហង់ ទូច មានប្រសាសន៍ថា ការដំឡើងប៉ុស្តិ៍អគ្គិសនីចល័តនេះ គឺដើម្បីបម្រើឲ្យពលរដ្ឋដែលរស់នៅសង្កាត់បឹងកេងកង១ ដោយសារប្រអប់អគ្គិសនីចាស់ដែលមានស្រាប់ប្រើប្រាស់តូច និងចៀសវាងការផ្ទុះ។ លោក បន្តថា ទីតាំងនេះសមស្របទៅនឹងការដំឡើងប៉ុស្តិ៍។
កន្លងមក អភិបាលរាជធានីភ្នំពេញ លោក ប៉ា សុជាតិវង្ស បានអនុញ្ញតឲ្យតាមការស្នើសុំដំទ្បើងប៉ុស្តិ៍អគ្គិសនីចល័តទំហំ ២,៦ម៉ែត្រ គុណ ៧ម៉ែត្រ កម្ពស់ ៣ម៉ែត្រ នៅលើចញ្ចើមផ្លូវលេខ ៥១ ជាប់របងវត្តលង្កានេះ។ ប៉ុន្តែ នៅពេលដំណើរការដំឡើងប៉ុស្តិ៍អគ្គិសនីចល័ត និងការជីកកប់ខ្សែកាបតាមចញ្ចើមផ្លូវ ព្រះសង្ឃ ដូនជី និងនិស្សិត បានយល់ព្រមឲ្យដំណើរការបន្តនោះទេ៕
No comments:
Post a Comment