គ្រូ នៅតាម សាលារដ្ឋ ចាប់ផ្តើមធ្វើ កូដកម្ម ទាមទារ ប្រាក់ខែមួយលានរៀល
ដោយ៖ បូ សាវី និងអ៊ឹង ប៊ុនថន / វិទ្យុ វីអូឌី | ថ្ងៃចន្ទ ទី6 ខែមករា ឆ្នាំ2014
កូដកម្មនេះកើតឡើងស្របពេល ដែលប្រធានសមាគមគ្រូបង្រៀន កម្ពុជាឯករាជ្យ លោក រ៉ុង ឈុន ជូនដំណឹងទៅរដ្ឋមន្ដ្រីក្រសួងមហាផ្ទៃ ដើម្បីរៀបចំបាតុកម្ម នៅថ្ងៃទី៦ខែមករានេះ ស្នើឲ្យរដ្ឋាភិបាលដំឡើងប្រាក់ខែ ជូនគ្រូបង្រៀនឲ្យបាន១លានរៀល។ក្រុមគ្រូបង្រៀននៅតាមសាលារដ្ឋមួយចំនួន នៅថ្ងៃចន្ទនេះ នាំគ្នាធ្វើកូដកម្ម ដើម្បីទាមទារឲ្យរដ្ឋាភិបាលដំឡើងប្រាក់បៀវត្សគោលប្រចាំខែ ជូនពួកគេឲ្យបានចំនួន១លានរៀល។
គ្រូបង្រៀននៅគរុកោសល្យ និងវិក្រិតការ ខេត្ដសៀមរាប លោក ហ៊ី សម្បត្ដិ ប្រាប់VODថា ពួកគាត់ប្រមាណ២០នាក់ នៅបង្រៀននៅសាលាគរុកោសល្យ និងនៅវិទ្យាល័យខ្លះទៀត មិនបង្រៀនសិស្ស ដោយនាំគ្នាដើរអង្គុយតាមបង់នៅក្នុងសាលារៀងៗខ្លួន ប្រាក់ខែបច្ចុប្បន្ននេះ មិនអាចសមាមាត្រនឹងតម្លៃទំនិញដែលឡើងថ្លៃនោះទេ <<ខ្ញុំទាមទារទៅលើបីចំនុចធំៗ ចំនុចទី១ គឺទាមទារទៅលើប្រាក់ខែ ប្រាក់បៀវត្ស ដើម្បីរស់នៅមានជីវភាព តុល្យភាពជាមួយនឹងទំនិញទីផ្សារ សព្វថ្ងៃនេះ បានប្រាក់ខែទាបបំផុតគឺ ១លានរៀល។ ចំនុចទី២ គឺដើម្បីជំរុញគុណភាពអប់រំ ឲ្យគ្រូបង្រៀនហូបគ្រប់គ្រាន់ទៅ គ្រូមានពេលទៅបង្រៀនគិតគូរដល់សិស្ស ដើម្បីយកចិត្តទុកដាក់ធ្វើកិច្ចការ ក្នុងការបំពេញកិច្ចការងារនេះឲ្យបានជោគជ័យ។ ចំនុចទី៣ គឺទាក់ទងនឹងគុណបំណាច់របស់គ្រូ>>។
គ្រូបង្រៀននៅអនុវិទ្យាល័យបន្ទាយស្រី ស្រុកបន្ទាយស្រី លោក ណម សារ៉ាត់ ឲ្យដឹងថាគ្រូចំនួន២១នាក់ក្នុងចំណោម២៣នាក់ ក៏មិនបានបង្រៀនសិស្សដែរនៅថ្ងៃនេះ ប៉ុន្ដែមិនបានឲ្យសិស្សវិលត្រឡប់ទៅផ្ទះវិញទេ។ លោកបន្ដថា ប្រាក់ខែគ្រូបង្រៀនសព្វថ្ងៃនេះ មិនស្មើនឹងចំណេះដឹងដែលពួកគេមានឡើយ <<បើយើងគិតទៅ ជារឿងមួយត្រឹមត្រូវ ព្រោះយើងឃើញថាប្រាក់ខែ គ្រូបង្រៀនរាល់ថ្ងៃ យើងឃើញថា វាដូចជាមិនសមរម្យនិងតំលៃទីផ្សារ សូម្បីតែកម្មករក៏ប្រាក់ខែ ១០០$ ជាងដែរ មានអ្នកខ្លះដល់បរិញ្ញា ប្រាក់ខែ១០០$ដែរ វាអត់សមតុល្យ>>។
នាយកវិទ្យាល័យបន្ទាយស្រី លោក គឺ គន់ មានប្រសាសន៍ថា ពិតជាមានគ្រូបង្រៀនធ្វើកូដកម្មមែន ដែលលោកយល់ថា ការធ្វើកូដកម្មនៅក្នុងម៉ោងបង្រៀនជាករណីខុសច្បាប់ និង ធ្វើឲ្យប៉ះពាល់ដល់ការសិក្សារបស់សិស្ស។
ដោយឡែកប្រធានមន្ទីរ អប់រំយុវជន និងកីឡាខេត្ដសៀមរាប លោក អ៊ុង សិរីឌី ថ្លែងថា កូដកម្មគ្រូបង្រៀននេះកើតឡើងតិចតួច គឺមានតែសាលារៀនពីរកន្លែងប៉ុណ្ណោះ ហើយពួកគាត់បានចូលបង្រៀនវិញហើយ <<អត់មានកន្លែងណាដែលធំដុំផង បញ្ហាទី១គឺ វាមាននៅសាលាគរុកោសល្យបន្តិច គាត់លើកបដានៅចិញ្ចើមថ្នល់ ប៉ុន្តែគាត់នៅបង្រៀនធម្មតា មិនមានអត់បង្រៀនទេ។ បញ្ហាទី២ នៅវិទ្យាល័យ បន្ទាយស្រី មានគ្រូ៥នាក់ ម៉ោងទី១គាត់បង្រៀន ម៉ោងទី២គាត់ជជែកគ្នា ប៉ុន្តែនៅក្រោយពេលដែលការិយាល័យ អប់រំស្រុក និងនាយកសាលាបានអប់រំណែនាំទៅ បានចប់ គាត់ក៏បានចប់ម៉ោង គាត់ក៏ចេញទៅផ្ទះទៅ>>។
ក្រៅពីខេត្តសៀមរាប គ្រូបង្រៀននៅតាមខេត្តមួយចំនួន បានសម្រេចធ្វើកូដកម្ម នៅថ្ងៃចន្ទនេះ ដូចជា នៅវិទ្យាល័យ ជ័យវរ្ម័ន នៅស្រុកកៀនស្វាយ ខេត្តកណ្តាល វិទ្យាល័យទួលទំពូង រាជធានីភ្នំពេញ ជាដើម។
នៅពេលគ្រូៗនាំគ្នាមិនបង្រៀននេះ តាមសាលារៀនជាច្រើន ត្រូវបានពង្រាយកម្លាំងសមត្ថកិច្ច និងទទួលរងការគំរាមពីនាយកសាលា ចំពោះការធ្វើកូដកម្មនេះ៕
No comments:
Post a Comment